Monday, April 30, 2012

Karang Kreatif

Karang Kreatif
Penerang:
1. Karang kreatif  tu  mega siti ari tanya ba PMR
2. Jalai nulis baka karang ti bukai, iya nya bisi pemuka, isi karang enggau penutup.
3. Tanya ditanya pasal nyerita siti-siti pekara ti nyadi baka cherita pengidup diri
4. Suah agi dipinta nembuka karang ti diberi paragraph pemuka, tauka diberi paragraph penutup.
5. Karang nulis cherita nadai format ti nyengala.
6. Karang ti baka tu deka manah agi dibacha enti ngena leka jaku ti bebungai, bisi sempama, bisi ngena jaku sebut enggau mayuh agi dikena ngelaguka karang nya tadi.
7. Nulis karang kreatif nguna kitai bepikir enggau kreatif. Kebuah pia, kurang macha, dia gaya karang deka kurang idea ti menyana.
Chunto Tanya
Kelab Jaku Iban sekula nuan deka ngatur pekit nulis cherita ti betopikka pasal pemesai pelajar sekula. Tulis karang nuan nya.

            Indai Majang diau ba rumah panjai sida di Emperan Aping Tuai. Iya bisi enam iku anak. Pengidup sida menyanak endang baka pengidup orang bukai. Semua anak Indai Majang ampit besekula magang. Nasit Indai Majang manah. Semua anak iya mujur magang. Enti dipeda bala anak iya tu nyulut ari anak sida serumah.

Ninting taun, anak Indai Majang tu baka ke diatur ngambi peresa. Udah siku, siku ga ngambi peresa. Taun nyin kemari, dua iku anak iya sereta ngambi peresa. Siku ba SPM lalu siku agi ba PMR. Nasit seduai manah. Kedua-dua seduai bulih pemutus peresa ti manah. Nya mih ngasuh Indai Majang tu seruran beterima kasih ngagai Petara atas semua ti nyadi ba pengidup sida menyanak.

            Ba pun bulan Tujuh tu ila, dua iku anak Indai Majang deka nyambung pelajar ba Universiti Malaysia Sarawak (UNIMAS). Indai Majang puas ati endar enggau pelajar sekula anak iya. Ba ati iya din, “biar sampai bekikis bulu betis mih nyengulaka sida tu”. Tang enggai mih ngasuh anak iya enda nampung pelajar sekula. Bala anak iya endang ninga jaku ajar indai. “anak, belajar bebendar ba sekula. Anang mantul ngapa. Baka tekura, apin tepantup pa bandir”. Semua tu dikeingat bala anak iya. Enti apai sida tu agi bisi, chukup gaga ati iya. Engka udah umur iya. Engka udah diberi Petara. Enda panjai begulai.




Bala sida serumah endang muji magang bala anak Indai Majang. “Untung amat nuan Indai Majang, anak mujur magang. Anak aku dua iku nyin enda mujur baka anak nuan”ku Indai Kiyai ngagai Indai Majang. “Asai semua utai ti dipinta anak, ditundukka magang. Tang enda ga sida tu mujur sekula”agi bejaku Indai Kiyai.
“Aku tu endang nadai kala besekula. Semua pekara pasal anak ti besekula tu endang nitihka penau sida aja. Tang sigi merinsa ga nyengula sida tu siku-siku kitai aja”ku Indai Majang. Bepun ari nya sida serumah bisi tebuka mata. Baru sida nemu pasal pemujur anak Indai Majang. Bisi ke salah sangka ngelama tu berasai ngesal. Kala mega Indai Majang tu dikumbai gila enggau laki sida. Suba nadai orang kiruh pasal tusah senang sida menyanak.

                 Semua anak Indai Majang endang patut dipuji lalu dititihka bala anak bukai sida serumah. Anak Indai Majang ti udah bekereja endang tiap bulan ngirum belanja ke indai sida. Enti bisi peremisi, sida tu suah pulai ke menua. Taja pan udah bekereja manah tang enda sumbung.


Ke diatu, baru Indai Majang bisi ngasaika pengelempung. Bisi  anak ti udah bekereja lalu ulih mantu iya nyengeluka sida ke agi bedau. Ku ati iya din, anang enda besabar enti deka bulih utai ti manah. Pelajar sekula mih siti chara ti ulih ngasuh siti siti bansa ngelengkaka pemerinsa enggau penyeranta. Indai Majang udah ngerebut peluang tu lalu dikena enggau manah. Peluang belajar enda suah diberi. Nembiak sekula patut ngena enggau manah peluang ti diberi tu.

Monday, April 23, 2012

Tanya Jaku Sempama

1. Kami serumah ngaga jematan tu endang ngena chara "angkut semut". Nama reti jaku "angkut semut"?
A. Betulung ngereja pengawa
B. Bebendar sereta kiruh lebuh ngereja pengawa
C. besaup ngereja pengawa ti kelalu berat.
D. Bepeda sereta ngereja pengawa diri empu.

2. Apai Nina enda dibai sida serumah begiga laban iya agi bengkak jari. Reti bengkak jari nya meri reti ngagai..
A. bepentika pangan ngandung
B. bepentika bini ngandung
C. bepentika madi ngandung
D. bepentika anak ngandung

3. Nembiak patut ningaka ajar orang tuai laban sida endang _________________.
A. makai bulu
B. dulu makai garam
C. tau mulut
D. pachal orang

4. Pengudah makai ba kedai makai di ujung jalai, dia dih buah lemba Achai tak enda nyamai. Nama reti buah lemba.
A. perut
B. pala
C. kaki
D. jari

5. Di Plaza Limbang, mayuh barang murah dijual tang kami sekaban semina ____________ aja laban ti nadai duit kena meli.
A. main ular
B. nyual mata
C. bekedar lengan
D. mata engkudu

Saturday, April 21, 2012

Tanya Jaku Bekaling

1. Indai Duyan enda nyadi enggau orang ngiga lelita pagi tu laban kena penyakit _______________.
    A. chelap lindap
    B. chelap ngerinan
    C. chelap angat
    D. chelap-chelap

2. Bala kami sekaban ti pulai bemain bol ari sekula tadi abis ________________ digagai indu gamang.
    A. demam resam
    B. teterap tetingkap
    C. resa papa
    D. kuang kuit

3. Bala apai inda endang dipinta seruran meri jaku ______________ ngagai anak diri ngambika sida enda
    ngereja pengawa ti enda menuku di sekula.
   A. seleka seleka
   B. dua tiga
   C. tiga empat
   D. empat lima

4. Apai Makus dipeda ari tadi bejalai _______________ laban ti kiruh ngereja pengawa ti bedau tetembu.
   A. kin kitu
   B. telentang tingkup
   C. tenggelam pansut
   D. rait kait


5. "Enti kita menyanak nadai beras, anang malu _____________ ngagai kami duai," ku Indai Linggang madahka ngagai menantu iya.
   A. nupi nengkani
   B. minta nyanda
   C. lebih lilih
   D. ngulat ngeremat

6. Aya Engkamat tak lalu enda nemu utai __________ senentang penemuai orang ari opis pengerai ngagi rumah sida di Nanga Ijok.
   A. ulu ili
   B. tesau kangau
   C. jangka pelaba
   D. temuai sakai

7. "_____________ pan gamal kitai tang ulah mesti dijaga enggau manah," ku Aya Gudam ngagai bala anak iya.
    A. singkung bilung
    B. jai manah
    C. mati idup
    D. jai manah

8. Kitai enda patut ngereja pengawa ti enda manah laban __________ pan ditemu orang mih penyalah kitai nya.
     A. jamah udah
     B. tampak beberak
     C. jangka pelaba
     D. lama laun


9. Aki Seliung nyau ______________ mabuk ketegal makai kulat dilah kendawang.
    A. empa lua
    B. chau belau
    C.meliur bubur
    D. dauh auh

10. ____________ enggi Igat bedau dibasu tang enggi Anggit benung diredai ba ujung tanju.
  A. Gari kelambi
  B. Gari beambi
  C. Gari ambi
  D. Gari seambi

Thursday, April 19, 2012

Set Kertas 1- Bahasa Iban PMR

TANYA 1 – 12
Tembuka ayat di baruh tu ngena saut ti engkeman.
1. Tiap pagi Uging makai asi enggau ikan pusu _______ ngirup segelas kupi.
A. laban
B. sereta
C. lalu
D. enggau

2. “ Kati nuan bisi meli ikan di pasar tadi?” ku Enon ______ Bella.
A. madahka
B. nanya
C. nyaut
D. nusuika

3. Lebuh sida Bunda datai, aku benung nebas _______ kebun.
A. ari
B. dalam
C. ba
D. ke

4. Tandang ngelala ______ nyawa orang ke bejaku enggau iya dalam telefon.
A. tiun
B. munyi
C. sada
D. ayas

5. Sida apai Laja enggau Tauke Seliung benung _________ pasal orang ti deka ngundi di ruai.
A. randau
B. berandau
C. ngerandau
D. terandau

6. Kur nyaga pendiau diri sereta enggau pemeresi tempat alai diau nya ke ________ pengerai kitai mensia mayuh.
A. ujung
B. dalam
C. pun
D. tengah



7. Bala indu kami sekelas __________ amat ngajat enggau belagu.
A. bajik
B. bidik
C. landik
D. deras

8. Bunyi letup meriam ari kem soldadu nya nyaris _________.
A. amat
B. raya
C. bangat
D. pemadu

9. Jantang landik amat ngajat _________ iya enda berapa landik bepantun.
A. sambil
B. laban
C. enggau
D. tang

10. Dua _____________ ikan semah di dalam mangkuk nya tadi udah diempa mayau.
A. igi
B. iti
C. kepin
D. kerat

11. Periuk enggi sida Wat di langkau umai nyau _______________ laban enda kala dituchi.
A. Lapar lar
B. chelum ngelintum
C. kirat  ringkat
D. langkang pungkang


12. Mayuh udah jaku ajar diberi ngagai iya __________ ulah lalu enda pulai ke manah.
A. semina
B. lalu
C. sereta
D. tang






Tanya 13 – 18
Ayat di baruh tu nyangka betul tauka bisi salah. Enti ayat nya bisi salah, penyalah nya udah ditanda ngena A, B, enggau C. Pilih  A, B, tauka C enti ayat nya bisi salah lalu pilih D enti ayat nya nadai salah.

Pilih saut ti engkeman

13. Jomil asai-asai deka enggau orang nyereta pekit becherita tang ngasaika diri enda chukup
                  A                                             B          C  
pengelandik. Nadai penyalah
                                   D


14. “ Mati idup pan enggai mih aku nyadi enggau Umbing nya, laban iya kelalu pemabuk sereta
                           A  B          C
ngelusu ngereja pengawa,” ku Anie madahka ngagai apai enggau indai iya. Nadai penyalah
                                      D

15. Musim kemarau tu tadi bala Langgan serumah endang tiap-tiap pagi besaukka ai di sungai
                                     A     B     C
Teraban. Nadai penyalah.
                            D


16. Kami serumah baru udah badu ngetau taja pan  diatu kami benung ngintu padi.
                   A          B      C
Nadai penyalah.
             D

17. Nyau richah rami burung bepakaika buah kara di tisi kebun aki Jagol. Nadai penyalah 
                     A                    B            C                D


18. Kemari kami serumah udah baum deka nyeruri perabung rumah ini Igat ti suah amat tuduh.
                A                      B  C
Nadai penyalah  .
           D





TANYA 19 – 22
Pilih ayat ti sama reti tauka nyau deka sebaka reti enggau ayat ti dichelak tebal di baruh tu.

19. Anak kedua apai Rubia diatu gawa nyadi pemacha berita di Bagi Iban, Radio Sarawak.
A. Nyadi pemacha berita Radio Sarawak anak kedua apai Rubia di Bagi Iban.
B. Pengawa anak kedua apai Rubia nyadi pemacha berita Bagi Iban di Radio Sarawak.
C. Gawa nyadi pemacha berita di Bagi Iban, Radio Sarawak anak kedua apai Rubia.
D. Diatu Bagi Iban, anak kedua apai Rubia diatu nyadi pemacha berita di Radio Sarawak.


20. Alfred Mina ngirum duit ke anak iya ti benung belajar di Universiti Teknologi Malaysia, Johor.
A. Alfred Mina minta duit ke anak iya ti benung belajar di Universiti Teknologi Malaysia, Johor.
B. Alfred Mina nginjau duit ke anak iya ti benung belajar di Universiti Teknologi Malaysia, Johor.
C. Alfred Mina meri duit ke anak iya ti benung belajar di Universiti Teknologi Malaysia, Johor.
D. Alfred Mina nyanda duit ke anak iya ti benung belajar di Universiti Teknologi Malaysia, Johor.

21. “Nama utai ti didinga nuan nya dih, unggal?” ku Tarang nanya Empati.
A. Tarang nanya Empati pasal utai ti didinga unggal.
B. Empati madahka bisi ninga utai bemunyi ngagai unggal.
C. Empati ditanya Tarang pasal utai ti didinga iya
D. Tarang nanya unggal pasal utai ti didinga Empati.

22. Perangai ke manah sereta pendiau ti beradat endang nyadi lalau enggau tenggau kitai nyadi nembiak sekula.
A. Nembiak sekula patut ngembuan perangai ke manah sereta pendiau beradat ti nyadi lalau enggau tenggau sida iya.
B. Sida iya nembiak sekula endang nyadi lalau enggau tenggau nyadi perangai ke manah sereta pendiau ti beradat.
C. Endang nyadi lalau enggau tenggau sida ti perangai ke manah sereta pendiau ti beradat nyadi nembiak sekula
D. Perangai ke manah sereta pendiau ti beradat nembiak sekula endang nyadi lalau enggau tenggau.








Tanya 23 – 26
Pilih ayat ti betul di baruh tu lalu tentuka saut nuan nya engkeman


23. I.   Taja pan  rega insap majak niki lalu agi ga mensia mayuh deka meli iya.
II. Bala nembiak sekula benung ninga licha pasal chara belajar jaku Inglis.
III. Mayuh penguntung enti kitai rajin macha bup.
IV Eksiden ti nyadi ba jalai alun nya asuh deriba ti mabuk.
A. I enggau II
B. II enggau III
C. III enggau IV
D. I enggau IV

24. I. Pantai Damai suah alai temuai luar ngelantangka ati
II. Aki Inchun deka nupi enggau nerenakka ikan semilang enggau ikan keli
III. Endu Maria benung masu baju sereta tanchut adi iya.
IV. Indai Juan enggau orang pekit pansuh enggau pekit ajat.
A. I enggau II
B. II enggau III
C. III enggau IV
D. I enggau IV

25. I. Bala nembiak nyin ngetu bemain bol laban hari benung ujan lebat
II. Semua sida-sida serumah diatu nadai tempat diau agi laban rumah panjai udah angus.
III. Linda, Ibung enggau Marie udah besekula ba SMK Julau tu ila.
IV. Pemakai ti disediaka ba pengerami nya nyamai-nyamai magang.
A. I enggau II aja
B. I enggau III aja
C. I, II enggau III aja
D. II, III, enggau IV aja

26. I. Bala apai indai diperansang nganjung anak sida besekula nyentukka tikas pelajar tinggi.
II. Sapit Menteri Perengka Pengangkut, Jelaing Mersat nyadika pengerami makai lemai  ke
              diatur Kelab Lumba enggau Main Nanga Julau.
III. Perintah menua Sarawak endang bebendar deka nyungkak tikas pengidup rayat.
IV. Gerempung Apai Indai enggau Pengajar (PIBG) patut mantu sereta meri sukung enti bisi
              sebarang kurang enggau penanggul ke bisi ba sekula.
A. I enggau II aja
B. I enggau III aja
C. I, II enggau III aja
D. II, III enggau IV aja

Tanya 27 – 30
Pilih saut ti engkeman belalauka penerang tauka sempama ti diberi di baruh tu.

27. Nama sempama ti madahka pendiau orang ti enda mudah ringat?
A. Enda nyamai ati
B. Ngachuk ati
C. Chelap ati
D. Tajam ati

28. Nama reti sempama ‘untung sekarung rugi seguni’?
A. Penguntung nadai ngipakka pengerugi ti udah mayuh amat
B. Manah nasit, udu betuah, bulih penyenang nadai enggau kereja bebendar.
C. Semina masau jam aja, utai endang enda ulih tang deka nguji
D. Orang ke nadai daya agi udah kena tinggang penusah.






29. Sempama ti patut nipak ayat di atas iya nya
A. Udah ga ngantuk disurung ga panggal
B. Udah labuh dipanggung lesung
C. Pipit di tisi langit diasu, rusa dip ala tangga enda ditunu
D. Bekikis bulu betis, bebuai bulu gundai.


30. Siti ari sempama di baruh tu enda betul nitihka reti iya. Pilih sempama ti enda betul reti iya.
A. Bekerendut dada – Meda aja tang nadai ati deka nulung
B. Chebur mulut - Mayuh utai disebut tauka dirara
C. Dinding bulu - Bisi ngembuan pengaruh
D. Makai telu bangah - Bekereja bebendar ngiga ungkup diri enggau orang bukai.










Tanya 31 – 35

Bacha enggau silik genteran cherita di baruh tu. Udah nya saut semua tanya ti nangkan nya.

“Nadai kereja bukai sida tu. Main. Bemain-main.” Nya mih jaku dalam ati aya Ibau. Ba iya, jaku nya dalam amat reti iya.

Semua rindu bemain. Nembiak rindu bemain. Bujang dara rindu bemain. Orang tuai besai pan rindu bemain. Nadai orang enda rindu bemain. Bemain tu siti pemerindang ngagai semua. Laban bemain mih kitai ulih ngelantangka ati. Ati ti tusah ulih nyadi senang. Ati ti pedis nemu nyadi nyamai. Orang ti tusut runding ulih gerai ketegal bemain.

Nembiak nadai ngira maya bemain. Pagi bemain. Lemai bemain. Malam pan agi bemain. Amat nakal endar ga sida tu bemain. Endang nadai ngira maya enggau tempat. Enti nembiak ti nyau rindang bemain, dia dih deka bulih pemedis. Tu engka enda ingatka pekara ulih  mai penusah. Ukai semina nembiak mit aja. Tuai besai ti kelalu bemain mega deka bulih pemedis.

Mua sekeda nembiak ti bemain nya agi dikeingatka aya Ibau. Sekeda sida ti udah besai tuai diatu endang dipeda ada. Pengelama aya Ibau meda nembiak ti bemain, iya teingatka Juing. Juing udah ditangkap polis ketegal nyual dadah. Nasit Juing manah. Iya enda lama dijil.Dadah ti dijual iya mimit aja. Tang agi mih nya salah. Enti dipeda, Juing tu manah ulah. Udah ti begulai enggau orang ti enda menuku nya baru iya jai. Ku Juing, iya semina deka bemain-main aja enggau dadah nya. Ujung-ujung iya nya letu ngujungka bejual dadah udah nya.

Aya Ibau mega teingatka Angkun. Angkun tu orang pejudi. Pun iya semina bemain rindu ati enggau bala pangan ba rumah sewa. Tang pengujung iya nya pandai bekena duit. Diatu, Angkun nyau udah gian amat bejudi. Ambis reta di rumah digadai ngambika bisi dikena bejudi. Endang nadai penyadi mih sida tu ku ati aya Ibau kediri.

Mata aya Ibau agi lekat ba nembiak ti bemain ba laman rumah panjai sida. Nama kini penyadi sida ke bemain tu? Baka ni sida tu ila? Semua tu dalam runding aya Ibau magang. Endang besai mega kuasa ‘bemain’ tu ngagai mensia.


31. Kemaya orang  bemain-main ?
A. Sebarang maya
B. Maya pagi hari
C. Enti bisi maya ke manah aja
D. Maya pagi enggau lemai



32. Nama reti orang ti enda menuku?
A. Orang ti enda temu penatai
B. Orang ti miskin sereta nadai reta
C. Orang ti nadai tuju pengidup
D. Orang ti bekereja enda tetap

33. Beri siti ukai kebuah orang rindu bemain?
A. Ngasuh ati lantang
B. Ulih ngemanjaika umur diri
C. Muai runding ti tusut
D. Ulih merindang ati ti tusah

34. Nama kebuah ulah Juing enggau Angkun nyau enda manah?
A. Ketegal ti begulai enggau bemain enggau orang ti enda menyana
B. Ketegal ti suah bemain-main
C. Ari ti semina bemain-main aja lalu nyadi gian
D. Dikemainka bala pangan ti bukai


35. Nama lalau pendiau ti ulih agi genteran cherita di atas?
A. Bebasa
B. Pengelikun diri
C. Temegah ati
D. Penyinu


Tanya 36 – 40
Bacha enggau silik genteran leka main di baruh tu. Udah nya saut semua tanya ti nangkan nya.

Nya alai naka pemalu mih tudah aku di lempedu tangkai kamai,
Bediri degi-degi di mua kita ke kemumuk duduk berimbai,
Duduk rerentak atas ketawak imbai bebendai,
Tang semadi aku udah meda kaki manuk pungka laki
Udah diungki enggau ragi benang jerai,
Meda pala udah ditata enggau lala minyak pugai,
Meda iku tak merundu panjai merundai,
Meda punggung tak sematung tuntung engkerawai,
Meda tuah mua pemanah nyangkum di dilah dabung landai,
Ni nya baka nya,
Tu ga manuk inang Sempeta seduai Simpandai ke suah dikena orang begulaika peratai rampang bunga.


36. Nama kebuah orang ti mantaika leka main nya ‘malu’?
A. Meda mayuh orang ti bisi datai
B. Laban iya bediri degi-degi
C. Iya endang orang ti pemalu
D. Pengawa ti digaga maya nya besai reti

37. Sapa orang ke bempu manuk ti dikena maya nya?
A. Sempeta
B. Simpandai
C. Pungka laki
D. Sempeta, Simpandai enggau pungka laki

38. Rambai jaku minyak pugai tau diganti
A. Minyak makai
B. Minyak bungai
C. Minyak pengaruh
D. Minyak ubat


39. Nama bansa leka main di atas nya tadi?
A. Timang jalung
B. Ai ansah
C. Biau
D. Ramban


40. Pilih lalau pendiau dalam leka main nya?
A. Bebasa
B. Ransing
C. Beterima kasih
D. Penyinu




KERTAS SOALAN TAMAT

Sunday, April 15, 2012

Leka Main Iban

Jaku Ngelar Ai Tuak

Tu ai sempuli padi mudah,
Ditanam Endu Dara Kelinah,
       Di tanah datar tarah,
Nyerumba penumbuh Bintang Tangkung Peredah,
Maya taun udah nampun nuntung di penyungah;
Iya dulu diketau Dara Bagau udu penyampau
      Menuhka langkau ngisi rumah,
Maya ingga kitai deka gawa ngintu rumah
     Tu kemari iya lalu dipi Dara Tinggi
Ngena pendi periuk tanah,
Diperesing Manang Iling,
Enggau pamping piring diperah,
Disimpan iya dalam pelawan tajau kelawah;
Tujuh hari udah nya,
Ensium bau tak bealu-alu udu pemanah-manah,
Dinga kurak tak perebensak,
Munyi umbak mangkaka silak awak Nanga Mukah.
"Enti baka tu udah mansau ai berau tua Lengau lebu majah,"
Pia ku Endu Teruna Dara Kelinah,
Bejaku enggau bini Bunsu Tuah,
Udah nya lalu dikauk seduai enggau cherebuk,
Disimpan dalam jebul balang mirah;
Nyadi ai nya bisi ditu lemai tu,
Ditunga kitai ke berintai duduk bekejengah;
Enti agi menya,
Ai tu teleba dikena Ngumbang seduai Balang
     Ngansah isau sanjau betatah timah,
Nya ke suah dikena seduai bedengah mudah rawai dua.
Tang ke lemai tu,
Ai tu semina dikena kitai
     Bebuti sambil bungah,
Awakka kitai tau sama
     Bela bulih mudah gerah
Nguan menua......

Thursday, April 12, 2012

Kertas 2- Bahasa Iban (PMR)

Bagi A: Meretika Teks Prosa
Bacha enggau silik teks karang di baruh tu. Udah nya saut semua tanya ti nangkan nya ngena ayat penuh.

Kuntau: Main Asal Iban
 Kati nemu enda leka jaku ‘kuntau’? Nama ke dikumbai orang kuntau?Kuntau tu siti ari main asal kitai Iban. Kuntau tu siti ari pengelandik nyaga pengelikun tubuh diri ari serang orang ke jai. Ia mega siti chara ke manah nyaga pengerai tubuh enggau pemintar runding.

            Ke maya hari tu jarang kitai meda orang bekuntau. Enti bisi, iya dibantai maya bisi pengerami. Ba pengerami Gawai, orang suah diperindang enggau kuntau kelimpah ari main asal bukai baka ngajat. Endang timpang kuntau tu enti iya enda diserimbai enggau tabuh ti ngena perengka baka tawak, bebendai, engkerumung enggau gendang. Kebuah pia, tiun tabuh nya nyadika peransang orang ke bekuntau. Tu ngujungka orang ti bekuntau tau gagit agi ati ngerenekka bungai kuntau iya enggau naka pemanah-manah.

            Baka ni chara bekuntau tu? Sebedau belajar bekuntau, dia dulu nyediaka kelang tauka palan ti numbas iya pemesai. Kelang tu amat iya enda jauh ari rumah tang jarang digaga tekelalu ayan dipeda orang. Kebuah pia, maya belajar orang bukai ke ukai nembiak enda ulih meda.

            Kuntau Iban tu diajar siku pengajar ti digela Guru. Iya tu orang ti landik sereta ngembuan mayuh macham bungai kuntau. Apin berengkah belajar, dia bala nembiak guru nya tadi dulu berunsut ngena ubat ke dikumbai pelampas. Nyadi pelampas tu digaga ari buah nyiur puda ti diengkah dalam mangkuk lalu disampi. Kelimpah ari nya, tiap-tiap sida ke belajar kuntau mai buah limau sigi siku. Tu dikena nitik mata sida ngambika lansik lebuh belajar. Nyadi pengawa ke betitikka mata ngena ai limau tu dikereja tiap-tiap kali sida datai sebedau belajar dalam kandang tiga minggu.

            Nyadi pelajar keterubah diajar guru ngagai nembiak iya nya belajar nusun langkah enggau nanam kuda ti lebuh maya belaban tauka bebukut. Udah nya, baru sida diajar bunga kuntau ti bendar nitihka guru dalam kandang dua tauka tiga minggu. Sida mega diajar muai tumbuk, diajar nyilat enggau numbuk. Udah tembu penau nya diajar guru, sida lalu diajar lapis. Lapis tu iya nya jalai ngalahka silat tauka buai munsuh. Udah sida pandai ngelapis, dia guru lalu ngajar sida megai senyata baka keris enggau kayu.

            Enti sema guru udah puas ati meda pengelandik peranak iya bekuntau, dia iya ngatur pengawa ti dikumbai tamat. Dalam pengawa tu dia tiap-tiap iku sida mai manuk. Manuk tu tadi lalu disayat ba tengah kelang. Enti sema manuk ti disayat nya mati jauh ngejangka lubang ti digaga ba tengah kelang, reti nya orang ke bempu manuk nya enda mutus ati. Orang ti bempu manuk ti mati semak lubang nya, nya nunjukka iya mutus ati sereta berani.
            Nya sekeda ari pasal kuntau. Nembiak  diatu jarang bendar rindu bekuntau. Nemu nya nadai orang ngajar tauka nadai ati deka belajar bekuntau, ni ke betul? Taja pia, kitai bansa Iban patut ransing ati ngetanka main asal tu enggaika punas. Mayuh penguntung ari bekuntau tu. Kelimpah dikena merindang maya rami, tau bendar nyadi siti ari pekit lumba enggau main ba menua tu. Sama-sama mih kitai negapka main asal diri.


1.Sapa orang ti ngempu main asal ti dikumbai kuntau?

2. Nama kebuah orang ti bekuntau tu tau gagit ati lebuh ngerenekka bunga kuntau?

3. Nama ajar ti diberi guru keterubah iya lebuh belajar bekuntau?

4. Beri reti leka jaku nanam kuda.

5. Ba penemu nuan, nama kebuah main kuntau tu nyau majak punas?







BAGI B: KARANG BELALAU
Peratika Grafik di baruh tu enggau silik. Beri penerang nuan senentang enggau chara ngabiska peremisi sekula. Pemanjai karang nuan patut lebih ari 80 leka jaku

                       

BAGI C: KARANG
Tulis siti karang ari pekara di baruh tu. Pemanjai karang nuan nya patut lebih ari 200 leka jaku.

1.Nuan baru nerima surat ari pangan nuan ba sekula bukai. Iya minta nuan madahka chara-chara belajar ti manah.
Balas surat pangan nuan nya.

2.  Rayat di menua tu majak nemu pengerai amat beguna. Tulis karang pasal chara-chara idup bepengerai.

3.  Empai lama ti udah, menua nuan kena ampuh bah. Ceritaka penusah ti nyadi maya nya.

4. Tulis siti cherita belalauka sempama di baruh tu:
    “ Genggam bara api sampai nyadi arang”


Monday, April 9, 2012

Karang Kreatif


"Bebudi"
Hari maya nya tengah hari nampun. Matahari manchar terit. Ribut nadai bepuput. Daun kayu nadai engkebut. Jelu enggau burung ba temuda nya nadai engkeretik. Naka iya pengangat sehari nya. Siku ular sawa ke begenarau likau benung nyengkilung natka diri ba teluk bandir kayu upi. Sehari nya iya nadai berunding deka ngiga pemakai laban iya tak berasai ngelusu.

“Nyamai agi tinduk lebuh utai ngangat tu,” ku ati iya. Maya nya mega tudah tupai siku berasai angat bendar. Iya ngiga ayung puchuk kayu endur iya belalai. Seraya ti bejalai-jalai ngiga utai diempa. Iya bejalai bejimat-jimat sereta begadai-gadai laban takutka diri dipeda lalu disambar menaul. Iya tetemuka jumbuh utai. Ko ati iya lalu deka belindung dia. Iya lalu bejalai kejuk-kejuk sebelah nya. Tiki iya ari baruh sampai ke atas. Udah nya nurun baru ngiga endur belindung. Lebuh nya sawa ke tinduk nya ngasaika utai bisi ngerayap ba tubuh iya. Iya berasai geledi.

                “Nama utai ngachau aku tinduk?” ku iya bejaku kediri berandau nenggali. Mata iya agi pejam. Iya balat ngantuk.
                Jam nya tupai tekenyit bendar. Iya nguji merejuk tang tindikka pala sawa. Sawa pan tekenyit lalu nyambar kaki tupai.

                “Oh, oh…minta kasih ngagai nuan. Aku ukai deka ngachau nuan punggal, sawa. Aku bejalai ngiga pemakai, lalu tesingkangka nuan. Minta ampun, tulung lepaska aku, “ku tupai.
                “Nadai jalai. Nuan udah ngachau aku tinduk. Aku telan idup-idup mih nuan!” ku sawa lalu ke lalu nerekan deram-deram.

                “Minta kasih mih! Lepas ka aku! Ni nemu, dudi hari pegila lusa aku ulih nulung nuan, maya nuan dalam penusah,” ku tudah tupai nguji ngiga sebarang akal ngidupka diri.

                “Eee!...Nadai kala aku ninga utai ke mesai bulu mata baka nuan tau nulung aku. Ni jalai nuan ulih nulung aku, heh?” ku sawa. Iya lalu masung tubuh tudah tupai rat-rat. Tudah tupai nyau deka alit seput, deka  luput. Iya ga takut. Iya nyabak. Ai mata iya lalu labuh nelusur kuyu iya.

                Meda nya sawa bisi berasai sinu bebali ati. Iya lalu ngelekaka tudah tupai. “Enda ibuh mih, ukai tak ngasuh aku kenyang utai ke ngemit nuan tu. Semina ngiruh aku aja nuan nya. Nadai guna, rari nuan ari tu,” ku sawa.Tudah tupai nyau digenggam semenggat. Iya lalu jampat-jampat rari ninggalka endur nya.

                Nyau kedua minggu udah bekau penusah nya, tudah tupai pan lalu begiga baru neresa babas repa. Iya tekenyit ninga utai seguda. Iya lalu mansang semak ngagai munyi utai nya. Dia iya tekenyit tepedaka sawa ti besai suba tak udah mati daya, mati kira disintak tali panjuk anak mensia. Balat agi iya ngerijat makin rat agi ga panjuk nya nyintak iya. Dia mih iya nyau lembut tulang kepuas ke ngerijat deka ngelepaska diri. Iya nyau meliur. Dilah nyau kelur-kelur.
“Oh, nama pengawa nuan baka tu dih punggal sawa?Lama nuan udah kena sintak panjuk baka tu?” ku tupai.
“Lama. Kenyau ari tebererak tawas tadi. Tang lalu enda ulih ngelepaska diri. Diatu aku nyau lembut tulang. Uji lepaska aku tu apin anak mensia datai lagi,” ku iya minta tulung tupai.
“Eh, ni jalai aku tau nulung nuan dih? Nuan empu udah madahka aku ke ngemit tu nadai jalai nulung orang ke besai baka nuan nya,” ku tupai mulaika jaku sawa.
“Anang baka nya nuan punggal. Anang nuan enda ingatka pemanah ati aku ke udah ngelepaska nuan. Enti aki jai, udah aku telan nuan. Diatu tulung aku,” ku sawa.

Ninga munyi nya tupai nadai beleman lalu nulung. Dikerit iya tali panjuk datai ke putus. “Ah…idup mih nyawa tu. Oh , enti baka tu amat mih jaku nuan punggal. Ulih  mih nuan nulung aku. Minta ampun aku,” ku sawa.
“Nya mih, kitai anang kelalu tinggi jaku ensepi diri ke besai gamal. Anang ngumbai orang k emit nadai guna, “ ku tupai.
“Pia mih punggal. Kelanjur jaku aku. Minta ampun, lalu minta kasih. Anang lama ditu, rari tua!”

Saturday, April 7, 2012

Penyakit Denggi

CHARA NYELIAHKA DIRI ARI KENA RAMPIT PENYAKIT DENGGI
CHUNTO KARANG
               Penyakit denggi tu siti ari penyakit ti dibai nyamuk Aedes. Kitai ulih kena penyakit tu ari pantang nyamuk tu. Ke diatu, bedau bisi ubat ti chukup semitan dikena orang ngelaban penyakit tu. Nya alai kitai patut nemu chara nyeliahka diri ari kena rampit penyakit denggi.
               Siti ari chara chara nyeliahka diri ari penyakit denggi iya nya mesti tinduk bekibung. Kebuah pia, nyamuk enda ulih nginsap darah kitai laban udah kena lindung kibung. Tambah mega, kitai ulih tinduk jenak ketegal nadai nyamuk.
               Chara ti bukai iya nya nyaga pemeresi rumah. Kandang rumah mesti beresi. Parit rumah mesti disapu ngambika ai enda betekat. Pia mega babas mesti ditebas. Tin-tin enggau tayar kerita ti enda dikena patut ditanam. Semua pekara tu mesti diaduka kitai ngambi rumah enda endur nyamuk besarang.
               Kelimpah ari nya, kitai mega ulih nyeliah diri ari penyakit Denggi ngena chara ‘fogging’. Ngena chara tu, tempat diau kitai deka disembur asap. Tu ulih ngurangka lalu mega munuh nyamuk. Nyamuk mega enda ulih betelu agi ba tempat ti udah defogging nya tadi. Nya alai fogging tu beguna bendar kena nyeliahka ari penyakit denggi.
               Pia mega, kitai patut nudung endur nyimpan ai. Kebuah pia, nyamuk Aedes endang betelu ba ai betekat baka ba ai tung. Enti endur nyimpan ait u dijaga manah lalu ditudung, nadai alai nyamuk tu betelu. Tu ngujungka nyamuk nadai ba kandang rumah. Ari tu tadi, kitai enda irau agi pasal penyakit Denggi.
               Ke pengujung iya, anang ngambi mudah pasal penyakit Denggi tu. Penyakit tu ending ulih nabanka nyawa enggau ngenyit. Belabuh diatu, sama-sama mih kitai nyaga diri ari penyakit Denggi tu. Semua pekara ti ngasuh penusah tu nyadi patut diperatika semua kitai. 

Friday, April 6, 2012

Jaku Sempama

Jaku Sempama

Bacha genteran ke dibaruh tu lalu peratika jaku sempama ke dichelak ngena urup chundung.


            Anggat baru ingat lalat lebuh indai iya nadai. Iya apin tentu nemu ulu ili jam nya. Semina utai ti dikingatka iya nya orang ke mayuh begelumu ba bilik sida enggau ba rumah sida. Ku orang, indai Anggat sakit laban kena pansa bulu babas. Mayuh dukun enggau manang nguji ngubat iya tang semua nya nadai mujur. Sida sebilik ending nadai nasit. Mayuh orang bukai enti bisi pedera renga, enti udah diperubatka sida lalu diau diri. Sekeda sida serumah benasit bendar laban ulih gerai, penyakit sida nya lesap baka ke muai empeleman.

            Pendiau sida Anggat sebilik udah tinggal indai iya timpang bendar. Tu ti ngujungka apai Anggat tekuing runding deka beganti baru. Anggat gagit bendar ati laban iya deka bisi indai tiri nganti indai bendar iya. Taja pia, iya mega irau laban suah bendar indai tiri semina deka nganta pengkalan aja, udah nya lalu berubah enda manah, kelebih agi enti iya udah bisi anak diri empu.

            Jangka Anggat endang amat. Lebuh indai tiri iya udah bisi anak ke diadaka iya empu, iya berubah. Iya semina manah enti apai Anggat bisi enggau sida. Enti apai Anggat nadai, indai tiri iya nyiping iya. Iya endang baka mayau landik ngelalaika tai diri. Mulut iya pulut tang ati iya keladi.

            Anggat enda bedulika nya. Ku ati iya “Petara bisi ngemata, antu bisi nemu”. Iya ngetupka ngeli lalu ngereja semua pengawa enggau bebendar. Pengawa enda tau dilengkaka enti apin tembu. Baka tekura, enggai enda tepantup di bandir.


Latih

Beri reti sempama nya tadi.

1. ingat lalat

2. nadai

3. pansa bulu babas

4. baka muai empeleman

5. beganti baru

6. indai tiri

7. nganta pengkalan aja

8. baka mayau landik ngelalaika tai

9. Mulut iya pulut ati iya keladi

10. ngetupka ngeli

11. tepantup di bandir

Thursday, April 5, 2012

Kuasa Penambah -ka

Penambah -ka


Penambah -ka  di baruh tu nunjukka jaku asuh ti mudah.

Penambah -ka sama enggau imbuhan "-kan" ba tatabahasa Melayu.

Penambaha -ka mega dikena ba jaku penerang ti mudah.


Teladan:

1. Gima tetengukka buah maram.

2. Kenataika pesan aku ngagai iya.

3. Nembiak sekula patut selalu ngingatka jaku ajar pengajar.

4. Kami sekaban belangkauka daun pisang.

5. Anang ngerembaika berita enda menuku ngagai orang mayuh.



*** Penambah -ka nerangka utai ti kena kereja enti iya ditambah ngagai leka jaku ti bepun ari penambah be-,  
       te-, tauka -dipe

6. Anang bechabutka padi lebuh bejalai di umai.




*** Penambah -ka mega dikena ti meri reti 'ngena tauka beguna'
     


 7. Sida tinduk bepanggalka  lengan diri empu.

Wednesday, April 4, 2012

Pengaya Jaku

Baka jaku bansa bukai, kala mega leka jaku Iban bisi dikena enda betul.
Di baruh tu jalai ngena sekeda pasang ti suah salah kena lebuh bejaku tauka ngereja pengawa betulis

1. nginjau enggau nyali

    Akih nginjau kerita ari Langi.

   Langi enda kakang nyali kerita ngagai Akih.

  *** Enti kitai nginjau, kitai ngena utai orang.
         Enti kitai nyali, orang bukai ke ngena utai kitai.



2. rebah enggau labuh

   Sepun kayu rian rebah dipangka kabut.

   Sebedau pun rian nya rebah, buah iya nyau baketepak labuh.


*** Enti kayu rebah, iya enda bediri agi, tang pun iya mengkang dia.
       leka jaku labuh nya melengka ari atas ke baruh.


3. Ulih enggau bulih

    Padi ulih sida Linda taun tu bisi empat igi tibang.

    Sida bulih amat padi, nya alai  sida tau enda bumai dalam kandang dua tiga taun ti deka datai.



Sekeda ari pasang leka jaku ti bukai iya nya:

a) kembai enggau kerembai


b) kira enggau kira-kira 


c) tiap enggau tiap-tiap

d) puang enggau muang