PERESA BAHASA IBAN POM TIGA (2.0)

PERESA JAKU IBAN POM TIGA

BAGI A

(Taga Jam: 40 minit)

(38 mark)

1.Tulis siti ayat ngena leka jaku di baruh tu. Nuan enda tau meri penambah, nukar penambah sereta        ngena leka jaku nya nyadi sempama tauka jaku nama tetap.

(i) nikung
_____________________________________________________________________________

(ii) betegar
_____________________________________________________________________________

(iii) semampai
_____________________________________________________________________________

(iv) betalat
_____________________________________________________________________________

(v) pambar
_____________________________________________________________________________

(10 mark)

2.Ayat di baru tu bisi ngundan dua iti penyalah jalai jaku. Kemetulka lalu tulis baru ayat di baruh tu tang anang ngubah tukuh enggau reti asal ayat nya.

(i) Mata pelajar Matematik endang dirinduka sida sekelas kenyau ari pom satu nyentukka kemaya           tu.
_____________________________________________________________________________


(ii) Iya teperakaka sunti ti diparukka orang ke baruh temetong mua pintu.
_____________________________________________________________________________

(iii) Endu Mina tabakka sayur ti deka digoreng ke dalam kali.
_____________________________________________________________________________

(iv) Kami sekelas bepecahka ngagai tiga raban nitih asuh pengajar Tindin.
_____________________________________________________________________________

(v) Sapit tuai rumah-tuai rumah ba pelilih menua Sungai Buluh sama bela dipinta ngulu baum ti              diatur kena hari Enam tu ila.
____________________________________________________________________________


3.A) Tukar ayat sebut ngagai ayat tusi di baruh tu.
(i) “Anang mudah ngalah tang terus belajar bebendar kita,” ku Dr Adam.
_____________________________________________________________________________
(ii) “Patut tauka enda aku tu meli bup tu?” tanya Libau ngagai Santa
_____________________________________________________________________________

(iii) “Sehari tu, kita ngechat bilik tu dulu sebedau nyambung nyemin ba rumah nyin” ku Umbat                   madah ngagai bala pekereja nya.
_____________________________________________________________________________

3.B) Tukar ayat tusui di baruh tu ngagai ayat sebut.
(iv) Ibu Menti tekenyit sereta nyerauh lalu ngasuh bala nembiak mit lari ari kena ketup ukui ti                   benung mansang semak nya.
_____________________________________________________________________________

(v) Tuai rumah Emparan enda ngasuh sida serumah mindah dua hari udah tu laban temuai bisi deka         datai kia.
_____________________________________________________________________________

(vi) Aki Undie madahka diri enda ingat agi nusui ensera Jelu Nubai ba genteran perau jelu karam               ngagai bala uchu iya.
_____________________________________________________________________________

(12 mark)


4.Tulis sempama ti engkeman dikena nipakka leka jaku ba baruh tu.
(i) Iya chukup nyesal udah ditangkap polis nyual dadah tang penyesal nya nadai mai reti laban tetap         dijil pengelama 10 taun.
_________________________________________________________________
(ii) Anding enggau Ibau nyau sampai deka bepantap belaya tang diatu udah begulai manah nyadi               diri menyadi baru.
_________________________________________________________________
(iii) Iya bedau nyanggup megai pengawa nya laban pengelandik enggau penemu ti bedau chukup               endar.
_________________________________________________________________
(6 mark)

Bagi B

[ Taga jam: 20 minit]

[12 mark]

5.Bacha teks leka main di baruh tu. Udah nya saut tanya ti nangkanka nya ngena ayat penuh.

“Nya alai tu aya,
Ai telesai tu datai ari sungai,
Pandi indai Raja Petara,
Ai sempuli tanah nyadi, diberi sempeti Api,
Dikumbai kitai Allah Taala,
Nya alai lalu dipie dara tinggi,
Dalam pendi periuk temaga,
Lalu disarap dara nelap
Enggau lipat kain kesumba.
Udah nya lalu dituang
Sida Endun Kumang
Dalam baling jebul segala,
Lalu perenchitka aku mimit dalam chubit chawan bebunga,
Nya alai, dipeda tak lejah-lejah,
Nengah kelasah anchau sana,
Ngensara ke tugung bala,
Nya alai tu aku,
Ai bunga mentapu ai keduka ayam raja,
Endang lumur satu pemadu bisa teleba ngerebahka gajah jelu singa,
Munyi ke ngekah leka buah bindang.
Nya alai tu ga endang teleba kena aku,
Ngansah terinting puting dabung seleka, enggi nuan aya unggal,
Ngambika nuan bejaku inggar didingga nusui rita
Awakka munyi geruda Injin Selalang.
(diambi sereta dibali ari BTP, JPN Sarawak)

(i) Ari ni penatai ai ti deka dipadahka iya ngagai aya?
_____________________________________________________________________________
(1m)
(ii) Nama penyadi ai ti udah disarap nya tadi?
_____________________________________________________________________________
(2 mark)

(iii) Nama kebuah ai nya pemadu bisa?
_____________________________________________________________________________
(2mark)

(iv) Nama tuju leka main tu dibantaika lebuh maya bisi pengerami?
(2 mark)
_____________________________________________________________________________
(v) Nama reti leka jaku lejah-lejah?
_____________________________________________________________________________
(2 mark)

vi Ba penemu nuan, nama kebuah kitai patut ngetanka main asal bansa diri?
_____________________________________________________________________________
(3 mark)



BAGI C
[ Taga Jam: 15 minit]
[10 mark]
6 Peratika enggau silik grafik di baruh tu. Belalauka penerang nya, tulis pasal ubah ti nyadi lebuh bedagang suba enggau diatu. Pemanjai karang nuan antara 50 ngagai 70 leka jaku.

Bagi D: Karang

[ Taga jam: 45 minit]

[40 mark]

7.Tulis karang pasal siti ari pekara di baruh tu. Pemanjai karang nya enda kurang ari 150 leka jaku.


(i) Ai ke pengidup


(ii) Nuan deka nulis surat minta pemendar lalu madahka kebuah nemuai ngagai    rumah panjai ti               enda jauh ari sekula.

     Tulis surat nuan nya.

(iii) Tulis siti cherita belalauka sempama di baruh tu:
      “Bekikis bulu betis, bebuai bulu gundai”

Tampung Ensera Ngabas Langit

Ensera Puchuk Sibau.

            Lebuh Kenyalang seduai Tekura nadai agi dipeda, dia bala jelu mulaika diri ngagai rumah diri empu.Hari maya kemarau lalu angat bendar. Nya alai, upih pinang sayap Tekura mupuk ngeriut. Iya lalu manjah enggau ai nyiur. Nyau kelama, ai nyiur mupuk abis. Panas mansang bisa. Sayap iya majak ngeriut.
“Nama mih penyadi aku tu? Sayap aku mansang ngeriut. Enda aku ulih terebai nitihka nuan,” pia ku Kenyalang.
“Nadai nya tusah, pajak mih. Nyin langit enda jauh agi,” ku Kenyalang.
“Enda tu alah pajak,” pia ku Tekura. “Sayap aku enggai kebab-kebab,” ku iya. Iya mupuk labuh ke baruh. Kenyalang, laban agi keran deka ngabas peninggi langit, nyau mupuk terebai berari. Tekura, laban sayap iya enda ulih kebab-kebab agi lalu labuh. Seninjik bendar Tekura labuh lalu tepanggai enselit ba selepak dan sibau.
          Kenyalang enda nyamai terebai lapu-lapu kediri-diri. Iya lalu nikal. Enda mih seduai nemu peninggi langit. Dia mih tudah Tekura kawih-kawih tepanggai ba selepak dan sibau. Iya enda ulih nurun, enda ulih niki.
“Nama mih penyadi aku tu,”pia ku Tekura.
Maya nya benung buah sibau mansau. Tekura nyau berasai lapar tang enda ga iya ulih ngambi buah sibau ke dempa diri.
            Lama agi mayuh agi ga bala jelu mansa pun sibau alai Tekura tepanggai. Sekeda sida enda meda iya teselit ba dan sibau. Barang sida meda lalu nanya.
“Nama gaga nuan dia sambi?”
“Eh! Meda pemayuh buah sibau mansau. Aku tu diasuh Raja ngibun iya,” pia ku saut Tekura. Bala jelu enda ngetu lama dia. Sida majak pejalai diri berari. Nyau ka lama, dia dih mansa tudah Beruang.                Iya nengkadah lalu tepedaka Tekura ba selepak dan sibau.“Nama gaga nuan dia, sambi?” pia ku Beruang.“Eh! Peda nuan pemayuh buah sibau mansau. Aku tu diasuh Raja ngibun iya,” pia ku saut Tekura.“Au, amat munyi ku nuan sambi. Uji aku niki buah sibau nya ke tua,”pinta Beruang.
“Oh! Enda tau dih sambi. Enggaika Raja nganu aku,” pia ku Tekura.
“Anang bangat ngerangka enggau pangan,” ku Tekura.
“Enti nuan deka ngasuh aku niki, aku tumbit lagi,”ku putap Beruang.
“Oh! Anang mungkal pangan ngaga laya. Nya mih dikeenggai aku. Tambah ga Raja tentu nganu nuan,” ku Tekura.
               Enda ibuhka diri dianu Raja laban nyawa tetengukka buah sibau, dia Beruang lalu niki ke puchuk. Enda lama udah nya iya lalu manggai ba pun dan alai Tekura enselit. Dia tudah Tekura, enda nemu daya agi, tak nat nganti Beruang numbit iya.
               Datai Beruang dia lalu enda chechamang tak lalu numbit Tekura. Tudah Tekura lalu labuh ke tanah. Seninjik iya ke labuh lalu tama kebung.

Latih A
Saut tanya di baruh tu ngena ayat penuh:

1.Nama kebuah sayap Tekura ngeriut?

2.Nama kebuah sayap Tekura nyau enggai agi kebap-kebap?

3.Nama penyadi Tekura lebuh sayap iya enggai kebap-kebap agi?

4.Nama kebuah Kenyalang nikal?

5.Ba penemu nuan, nama ajar manah ari ensera nya tadi?

Latih B
Beri reti leka jaku di baruh tu.

1.Kemarau

2.Nengkadah

3.Mungkal

4.Laya

5.Rangka

ENSERA NGABAS LANGIT

                                   NGABAS LANGIT

                   Nyadi hari siti, dia Badak ke selalu nyadi tuai bala jelu ngasuh Kera seduai Nyumbuh nesau bala jelu baum. Kebuah Badak milih seduai nya ngenyadika Kera enggau Nyumbuh tau niki kayu.
                 Kera seduai Nyumboh lalu nanchangka temuku tali seduai nimpuh hari maya baum. Seduai lalu niki kayu sereta engkechit bejambanka semua puchuk kayu. Lebuh seduai betemu enggau bala jelu, dia seduai lalu meri temuku tali madahka maya baum. Dalam kandang dua hari, dia semua jelu abis ditesau seduai magang. Seduai lalu mulaika diri ngagai Badak. Dia seduai nganti maya baum. Sintal temuku tali pan abis, bala jelu lalu datai. Endur sida ke baum nya ba tuchung Bukit Rabong.
               Lebuh bala jelu udah sampal datai, dia Badak lalu bejaku. “Suba bala kitai udah nubai. Lebuh nya mayuh ga salai ulih kitai. Nya alai, sekalitu kitai sebuat nguji ngabas peninggi langit. Enti kitai enda nguji, kitai lalu enda nemu peninggi iya,” pia ku Badak.
“Au, manah mih runding nuan nya, tuai,”pia ku Rusa nyaut ngarika bala jelu bukai.
“Tang sapa ari bala kitai berani nguji ngabas peninggi langit?”pia ku tanya Nyumbuh.
“Nya barang ku pilih mayuh. Aku empu enda ulih, laban kelalu berat,”pia ku Badak.
“Aku tu nadai bantah enti sema kita mayuh ngasuh. Tang aku enda nyamai terebai kediri, enti nadai pangan,”ku Kenyalang mansutka jaku iya.
“Oh! Kenyalang, nya amat patut laban iya tau terebai,” pia ku Rusa.
“Kami bukai tu enda ulih laban nadai sayap,” pia ku iya.
“Eh! Pasal sayap nya enda mar. Iya ga tau dilekat ka dudi hari ila,” pia ku Badak.
“Oh! Enti munyi nya, aku tu deka nyadi kaling Kenyalang terebai ngabas peninggi langit,” pia ku Kera.“ Enti nuan deka ke pangan aku, nyawa nuan enda tau enda diuji dulu kena nimbal nyawa aku,” ku Kenyalang.
         Udah nya, “Enggang!” pia ku Kenyalang. “Kachih-kerah!”ku Kera nimbal nyawa Kenyalang
“Oh! Enggai nyadi nyawa munyi nya nimbal enggi Kenyalang,” pia ku bala jelu. “Uji aku,” pia ku Pelanduk ngansakka diri semak Kenyalang. “Enggang! Enggang!”ku Kenyalang. “Put!Suut-suut-suut!” timbal pelanduk. “Oh! Lapa nyawa ngenyai nya munyi,” pia ku bala jelu.
“Aku ga nguji,”pia ku Babi.
“Embus! Embus! Embup! Embup!” ku Babi nimbal Kenyalang.
“Oh! Nya jauh agi deka nimbal enggi Kenyalang,” pia ku bala jelu.
“Uji aku. Nama enggi kita lalu enda betul,”pia ku Ukui.
“Enggang! Enggang!” pia ku Kenyalang.
“Au-o-o-ong! Au-o-o-ong!” ku Ukui
“Oh! Enggi Ukui pama mimit, laban inggar tang apin betul,” pia ku bala jelu.
            Bala jelu bukai lalu ngujika diri, tang siku pan sida nadai ga tau nimbal nyawa Kenyalang.
“Uji nuan ga nguji, unggal Beruang,”pia ku jaku jelu bukai.
“Au, kita ga ngasuh, deka ga aku nguji,” Beruang nyaut.
“Enggang! Enggang!” pia ku Kenyalang. Beruang dianti nimbal, lalu enda ga nimbal. “Lapa nuan enda nimbal nyawa Kenyalang?” ku bala jelu nanya Beruang. Beruang enda kebut-kebut. Udah nya, Kera lalu merak Beruang. “Lapa nuan lalu enda nimbal Kenyalang?” ku Kera.
“Iya nama utai ku kita?” ku Beruang.
“Es! Mandap nuan tu! Kenyalang udah ngenggang, nuan lalu enda nimbal iya,” ku bala jelu.
“Kati ku aku nimbal, aku ga enda ninga,”pia ku Beruang. “Oh! Enti baka tu, enda nuan tau enggau Kenyalang ngabas langit. Nuan ga bengal. Enggaika nuan enda ninga Kenyalang lalu tesat,” ku bala jelu nganu Beruang. “Eh! Ukai nya baka ke enda tau aku enggau ngabas langit. Ukai nya bisi madu renyuan din,” pia ku putap Beruang, laban iya endang irau deka maka madu renyuan.
“Es! Pachal utai, aya Makop nya. Enti nadai utai nguntungka iya enggai enggau kitai,” ku bala jelu.
             Bala jelu lalu ngasuh Tekura nyadika pangan Kenyalang. Tekura ngeringak duduk reringkap di atas batang mendingka bala jelu ngujika nyawa diri. “Uji nuan unggal Tekura terebai enggau kenyalang ngabas peninggi langit,” pia ku Badak. “Uji munyika nyawa nuan,” pia ku sida nganu Tekura. “Enggang! Enggang!” ku Kenyalang. “Changkuk liuk! Changkuk liuk!” pia ku Tekura nimbal munyi Kenyalang. “Ah! Nya baru manah! Nya baru tau nimbal Kenyalang,” ku jaku bala jelu mayuh. “Enti baka tu, nyadi mih ngabas peninggi langit,” ku Kenyalang.
            Ninga munyi nya, bala jelu lalu richah diri gagaka Tekura seduai Kenyalang deka ngabas peninggi langit. Bala jelu lalu begigaka upih pinang. Lebuh udah bulih, dia sida lalu ngebat nya ke sayap Tekura. Sida lalu nanchang buah nyiur sigi ba belakang iya. Lebuh semua udah kemas, dia Kenyalang seduai Tekura lalu mupuk terebai. Mayuh bendar bala jelu ngemataka seduai angkat.                    Lama agi tinggi agi ga seduai terebai. “Enggang! Enggang!” ku Kenyalang. “Changkuk liuk! Changkuk liuk!” pia ku Tekura nyaut. Bala jelu gaga ati meda seduai terebai. Sida nimang seduai ari tanah munyi tu:
“Terebai deras mih seduai,
Baka upas kesulai tandang,
Terebai bapit-apit mih seduai,
Baka sit tandan pisang,
Tau nginda mih seduai baka bekia,
Tau ngindang mih seduai baka lang.”


            Bala jelu ngeringak ngemataka seduai terebai. Lama agi jauh agi ga seduai ngejangka sida. Kenyalang seduai Tekura pan nyau rapas mata dipeda sida. Seduai nyau enda ayan laban lindung remang. Bala jelu meruan nganti seduai pulai baru. Sida keran deka nemu peninggi langit.




LATIH A
Saut tanya di baruh tu ngena ayat penuh.

1.Nama kebuah Badak mai bala jelu baum baru?

2.Sapa ti diasuh Badak nesau bala jelu?

3.Nama kebuah Badak milih Kera seduai Nyumbuh diasuh nesau bala jelu?

4.Nama guna temuku tali?

5.Dini alai bala jelu baum?

6.Sapa ti nyadi pangan Kenyalang ngabas peninggi langit?

7.Kati ku munyi Kenyalang seduai Tekura besaut-saut enggau pangan diri lebuh terebai?


Latih B.
Terangka dulu reti leka jaku di baruh tu. Udah nya gaga ayat.

1.  Beduan

2.  Tesat

3.  Nimbal

4.  Rapas

5.   Ngeriut

6.   Nuduh

7.   Lekat

8.   Manjah

Nulis Karang - INTERNET (PENGURANG/PENGELEMI)

Karang

Unit: KOMUNIKASYEN GLOBAL(POM LIMA)

INTERNET KEMAYA HARI
Tanya: Kemaya hari tu, mensia mayuh beguna amat internet. Taja pia, internet tu bisi mai empas ti enda manah. Pejuraika pengurang/pengelemi internet tu.


        Diatu, enti kitai besebutka internet ngagai orang bukai, semua orang nemu pekara nya. Indah orang besemaka baka tu, “indah nembiak baru ada nemu utai ti dikumbai internet”. Internet tu ukai pekara ti baru. Guna internet ngagai pengidup mensia mayuh endang enda ulih disangkal agi. Bisi sekeda madahka diri enda ulih gawa ketegal ti nadai internet. Pekara tu endang bisi pengamat. Dunya kemaya hari tu, bepanggai ba internet. Taja pia, anang ga kitai madahka internet tu nadai pengurang. Internet tu bisi pengurang iya empu.

        Siti ari pengurang internet tu iya nya mensia mayuh nyamai ngulihka penerang ari internet. Lebuh tepeda gambar ti enda menuku baka pronografi tu, iya ulih ngeruga runding enggau pikir ngagai utai ti enda betul. Enti ngagai orang tuai besai, pekara tu enda tentu meri pengerusak laban ulih nimbang sereta nemu bepikir enggau manah. Enti ba nembiak sekula, utai ti enda menuku tu deka ngerusak runding enggau pikir sida iya. Lama laun, sida ngumbai utai tu enda salah. Ke pengujung iya, ulah enggau runding ketegal internet tu nyau limpang ngagai utai ti enda manah. Disiplin nembiak sekula pan majak enda manah bepun ari ulah meda utai ti enda menuku ba internet.

        Pengurang ke bukai internet tu iya nya mai empas ti enda manah ngagai penyerakup raban bansa.Blog tauka web ti sengaja meri penerang selebubu ngapa tau bendar ngasuh belaya. Penerang ti selebubu ngapa enggau enda amat tu laban enda ulih ditapis perintah tau ngujungka iya nyadi penerang ti betul. Penulis ti sengaja nulis utai ngapa tu disemaka baka sempama pandak mulut engkerasak panjai mulut kitai. Pengujung iya, perang mulut nyadi ba internet baka komen ti ngasuh belaya ba Facebook, Twitter enggau ba blog.Kemaya hari tu, mensia mayuh pechaya agi penerang ti ditulis ba internet enti dibanding penerang ari perintah. Nya mih biuh ti enda manah ari internet. Ngambika kitai nemu siti-siti pekara nya betul tauka enda, anang enda macha penerang ari internet tu. Udah nya, bandingka enggau penerang ti diberi perintah. Ari nya, kitai ulih mikir sereta ngaga pemutus kediri empu pekara ti endar.

        Kelimpah ari nya, orang ti bekenaka internet tu dikumbai enda nemu begulai enggau orang bukai. Tu enda bisi pengamat iya. Ambi ke banding, pulai ari sekula, lalu meda an Kaban mai bemain bol pan sida ti gian beinternet tu sigi enggai. Pengujung iya ila, kitai mensia enda nemu begulai enggau orang bukai. Kitai deka dikumbai orang bukai baka pendiau bunsu bubut. Kaul kitai enggai orang sepiak rumah nyadi jauh. Tu pekara ti patut dikenangi ka kitai semua. Mayuh penusah enti kitai enda nemu begulai enggau orang bukai. Kitai deka bisi penanggul lebuh kitai dituntung penusah. Ukai ga ngajika rangkang ngachuk mata tang kitai enda nemu utai ti deka nyadi dudi hari ila.

       Nangkanka tu, internet bisi pengurang iya ba dunya dagang. Pekara ti manah nyau nyadi enda manah. Kebuah pia, mayuh udah kes ngelakar lebuh pengawa dagang dipejalaika nengah internet. Orang ti bedagang amat nyau enda bulih bedagang nengah internet. Ambika banding, duit udah diberi tang barang lalu enda ga bisi tauka barang enda ngipakka gambar ti diayan ba internet. Ulah ti ngarap utai ngapa baka sempama ngarapka kijang dalam babas.Tu mih pekara ti ngasuh orang nyau jera bebeli barang nengah internet. Ke batang, pengawa dagang tu mih pemadu iya muntang. Enda ibuh ngelawa kedai, enda ibuh bebaris ba kaunter enggau enda kiruh minching barang pulai ke rumah. Nengah dagang ba internet barang datai ba pala tangga.

       Nambahka nya, pengurang bukai ba internet tu iya nya nambahka belanja siti-siti ruang bilik. Diatu nyau macham pekara begunaka internet. Enti suba kita semina muka Facebook. Tang diatu, mayuh agi baka Wechat, Whatassp enggau Telegram. Semua tu begunaka duit. Enti duit ngelamatu dikena bebayarka bil ai, letrik enggau Astro. Diatu ditambah enggau bil internet baka bil broadband. Tentu pekara tu mai penanggul ngagai sida ti kurang penatai pemisi. Ditambah enggau cas GST, bil nyau majak mar. Enggai enda pan laban udah ubah pemansang. Enti ulih, arapka perintah ulih meri internet enda bebayar ngagai orang ti kurang penatai pemisi. Enti sida ulih meri duit BRIM ngagai mensia mayuh, beri mih subsidi kena mayar bil internet.

       Nya alai, internet tu endang bisi pengurang iya. Ngarapka enggau pengurang tu, kitai sama bela bejimat bekenaka internet. Anang mega lalu ngelengka internet meda iya bisi pengurang enggau pengelemi. Kauk ke manah tang iyarka iya enda manah. Iya beguna bendar, kitai nemu manding pekara ti manah enggau iya ti enda manah. Guna mih internet ti mai pemanah.

Entelah Iban 1.0

Entelah(1)

Bujang Lidi sigi berani,
Angat pan iya endang enda lari.
Mati lesi nyau ngasuh orang nempikka jari
Rindu ati ukai sunyi bisi ke ngirup wiski

Ibu Latah endang panjai bungkang,
Ngenjun tanah luchak sigi enda tumbang,
Orang ti benanyi iya ti laya midang.
Enda dikenang semua orang.

Menua:
Bisi ba rumah panjai
Begulai enggau kitai
Dikerindu bala mensia
Ari semua pupu raban bansa
Ulih nyadi sebarang maya

Ulu Lunga : Kain Sari India
Saut iya : Lilin Hari Pengada


Entelah(2)
kulit buka bulu peda,
Bulu buai Igi tebantai,
Igi dikerari,batang pegari .
Ulu lungga: Tudung
Saut iya     : Jagung

Entelah (3)
Raja Lesit begulai Aya Uban ngembuan kaki enam,
Dikena  semina kaki empat bejalai jampat
Ulih ngelampat.
Ulu lungga; Tambang Kerita Saga
Saut iya     : Orang Nepan Kerita

Tampung Ensera Nginsap Danau

Pemintar Tekura

          Menarat agi ringatka diri udah kena akal Tekura, lalu iya enggai ninga jaku pujuk siku nya. Iya meruan ingatka diri udah kena asuh bala jelu bukai munuh tekura.
“Enti tua belaya, tua sama tau pedis. Nuan tau pedis. Aku tau pedis. Bala jelu bukai ketawaka tua,” ku Tekura nganu Menarat.
“Badu nuan agi mujuk aku. Aku enda tau enda munuh nuan nitihka jaku bala jelu bukai,”pia ku Menarat.
“Unggal! Ukai aku takutka ilang nuan nya. Dinga nuan munyi baju dikena kau,” ku Tekura natuk kerubung iya udu agi.
           Menarat, ninga munyi kerubung Tekura amat kering, arapka iya kebal. Menarat lalu nyelitka ilang iya pulai ngagai sarang.
“Unggal, uji dingaka aku nusut penatai tua,” pia ku Tekura.
“Au. Manah mih nya,”pia ku Menarat.
“Nyadi kami Tekura datai ari puri Ra. Pelanduk datai ari purih Ruk. Kijang datai ari purih Rang.                 Badak datai ari purih Rak. Tupai datai ari purih Rai. Mayau datai ari purih Rau. Ukui datai ari purih Rui. Babi datai ari purih Ri. Kita Menarat datai ari purih Rat,” ku Tekura.
“Nya! Peda nuan ripih kitai. Kita ari purih Rat, kami ari purih Ra,” pia ku Tekura. “Menua kitai pan enda bangat jauh ari pangan. Kitai sama tau idup dalam ai, sama mega tau idup di tebing . Kulit nuan tebal lalu kerubung kami kering. Nya alai kitai sama kebal,” pia ku Tekura.
“Nya amat munyi ku tusut nuan,”ku Menarat. “Tang sida bukai ngasuh aku enda tau enda munuh nuan.”
“Es! Sida bukai nya enda saum menua enggau kitai,” pia ku Tekura. “Sida semina idup ba darat.”
“Unggal, nama jalai aku madahka diri udah munuh nuan ngagai Badak?” pia ku tanya Menarat.
“Es! Nadai nya mar dih,”pia ku Tekura. “Legi tua ngunsut ilang nuan enggau darah pinang. Lebuh nuan pulai, pandangka ilang nuan ngagai bala jelu bukai. Padah ngagai sida darah ba ilang nya darah aku, udah dibunuh nuan,” pia ku Tekura mekat Menarat.
             Menarat enggau Tekura lalu pansut ari danau. Seduai lalu ngunsut ilang Menarat enggau darah pinang.Ilang pan tembu unsut, Menarat lalu pulai ngagai bala jelu bukai dalam kampung. Lebuh Menarat datai ba tengah-tengah jelu, dia iya lalu manjung rais-rais. Iya lalu nyintak ilang ari sarang. Bala jelu ngenung meda ilang Menarat nyau mirah chirak-chirak dibalut darah.
“Peda kita ilang aku balut darah! Tekura udah mati dibunuh aku. Taja Tekura beberita kebal, tang mimit pan enda mih iya ngelaban aku,” pia ku Menarat muji diri.
          “Akai rai! Nya baru amat berani. Unggal Menarat tu baru amat patut dipuji,”pia ku Badak. Bala jelu lalu manjung. Sida gaga laban Tekura udah mati.
           Enda lama udah nya, alai bala jelu mulaika diri ngagai palan sida empu. Serantu-rantu jalai sida nanyaka jalai Menarat munuh Tekura. Sekeda sida muji iya, gaga iya udah munuh Tekura. Enda bangat jauh udah sida bejalai, dia Pelanduk lalu ninggalka diri. Iya lalu begigaka buah buan di tisi jalai. Lebuh udah kenyang iya lalu tinduk ba pun kayu. Iya map mua diri enggau daun buan.
            Menarat pan diadang udah jauh ninggalka danau, Tekura lalu niki baru ke tebing. Iya lalu niti jalai ke ditengah bala jelu bukai.
            Hari pan nyau mupuk lemai, dia dih Tekura meda Pelanduk tinduk ba pun kayu. Iya lalu ngerak Pelanduk, Pelanduk ngadang nya jelu bukai, tekenyit lalu dani deka rari. Lebuh iya meda nya Tekura, nya baru ati iya lantang.
“Ni nuan ke udah mati dibunuh Menarat,”ku Pelanduk.
“Enti nitihka gaya pemedis ati bala jelu, udah mati mih aku dibunuh Menarat. Kita ga pintar, bisi akal begulai enggau orang bukai. Kitai ga enda tambap,” ku iya.
“Nama jalai nuan mujuk Menarat ngasuh iya enda nyadi munuh nuan?” pia ku Pelanduk.
“Jaku enda tau enda lembut. Tang taja pia, anang kitai ngayanka penakut diri,” pia ku Tekura.
Enda lama udah nya, alai Tekura seduai Pelanduk lalu mulaika diri ngagai palan seduai empu. Seduai meruan bepangan.
          Di rantau jalai, dia Pelanduk nusi pasal sida ke nginsap ai ba danau. Iya nusui diri numbit burit Badak, awakka danau enda langkang. Tekura gaga bendar meda Pelanduk udah nulung ngidupka iya.

Latih meretika genteran
1. Baka ni gaya Menarat agi ringat Tekura?

2. Nama kebuah Tekura madahka Menarat mega sama kebal?

3. Nama chara Menarat madahka iya udah munuh Tekura?

4. Nama pekara ti ditusi Pelanduk ngagai Tekura?

5. Nama ajar manah ti ulih nuan ari cherita nya tadi?


Latih: Ngaga ayat
1. purih

2. saum

3. ngadang

4. palan

5. langkang

Tampung Ensera Jelu Nubai

ENSERA NGINSAP DANAU
             Nyadi diatu bala jelu tusah ati. Sida nyau nemu diri udah kena akal Pelanduk seduai Tekura. Sida ringat ngagai seduai, laban lebu nadai mai salai ikan pulai ngagai palan diri empu. Salai ikan abis dibai Pelanduk seduai Tekura.
“Pelanduk seduai Tekura tu patut kena bunuh. Seduai udah ngakal semua kitai,” pia ku Badak.
Semua bala jelu lalu ngamatka jaku Badak. Diatu sida ngiga akal dikena munuh Pelanduk seduai Tekura. Nyadi lebuh Tekura ninga jaku bala jelu bukai, iya lalu rari terejun ke dalam danau. Pelanduk lalu belalai ba perigu pun buluh. Dia iya engketut takutka bala jelu deka munuh iya.
               Bala jelu lalu belabuh begigaka Pelanduk seduai Tekura. Lebuh sida datai semak perigu pun buluh ke alai iya belalai, dia Pelanduk lalu numbit pun buluh nya. Nyadi daun buluh, laban layu, lalu labuh sebelah tanah. Tanah ngelingi pun buluh nya luchak. Nya kebuah daun buluh ke labuh lalu bediri baka tukak.
“Anang kitai beguai ngampir. Peda tukak ditan Pelanduk,” pia ku Rusa.
Enda lama udah nya, Pelanduk lalu ngangau: “Mansang mih! Enti kita amat berani munuh aku,”ku iya.
“Enda kami munuh nuan. Enti nuan deka madahka alai Tekura belalai,” pia ku Rusa.
“Au mih,” pia ku Pelanduk. “Aram! Titihka aku.”
         Bala jelu lalu nunda udi Pelanduk. Nyau kelama, nya baru bala sida datai ba danau, alai Tekura belalai.
“Diatu semua kitai bediri berintai-rintai ngelilingi tebing danau. Lebuh aku ngasuh, semua kita lalu belabuh nginsap ai danau tu. Lebuh ai udah langkang, nya baru Tekura ayan, lalu ulih bunuh kitai,” pia ku Badak.
          Bala jelu lalu nginsap ai nya. Lama agi mimit agi ga ai tinggal dalam danau. Pelanduk ngeluluka diri enggau nginsap ai. Iya bediri semak Badak. Nyadi Badak, laban besai agi, mayuh agi ga ai diinsap iya. Burit Badak ditensang enggau libut enggaika ai pansut baru.
           Danau pan nyau deka langkang, belakang Tekura pan ayan. Tudah Tekura belabuh tusah ati, meda bala jelu deka munuh iya.
Enda mukai-mukai, Pelanduk lalu engkechit. Iya tetumbitka libut dikena nensang burit Badak. Ai lalu pansut ngisi danau nya baru.
“Lapa nuan baka nya!” pia ku Badak.
“Eh, aku ga engkechit deka mantap Tekura. Tang enda mukai-mukai kaki aku kena kait randau lalu tetumbitka burit nuan,”pia ku Pelanduk.
“Anang ibuh ke nya. Insap baru ai tu ulih kitai. Gaga Tekura nya idup udah ngakal kitai,”pia ku bala jelu.
          Bala jelu lalu berengkah baru nginsap ai danau nya. Pelanduk ngeluluka diri nginsap ai. Iya bediri semak Badak.
Enda lama udah nya, ai danau nyau langkang baru. Peda belakang Tekura lalu ayan baru.
“Bah! Tangkap Tekura nya ulih kitai,” pia ku Rusa.
Pelanduk lalu engkechit, kaki iya dikait randau baru kenu ku iya. Iya lalu tetumbitka libut tensang burit Badak. Nyah! Ai lalu tebubuh ari burit Badak. Danau lalu penuh baru. Tudah Tekura lalu enda ulih tangkap sida.
“Salah tu!Enti baka tu enda ai danau tu ulih insap kitai. Manah Menarat nya asuh nyelam Tekura. Iya betah agi nyelam ari kitai bukai,”pia ku Badak. Semu jelu bukai nurutka penemu Badak.
Menarat lalu terejun ke dalam danau. Iya nangkin ilang sebilah. Iya deka munuh Tekura.
           Lebuh Menarat datai semak Tekura, dia dilah iya lalu kelur-kelur. Tekura nemu Menarat deka munuh iya. Iya lalu ngeluluka diri mati. Iya enda kebut-kebut. Menarat udah nyintak ilang iya. Enda ga iya berani lalu mantap Tekura. Iya nemu Tekura kebal. Iya semina ngamang aia. Amang Menarat sekali, enda ga iya berani mantap.
“Lalu Unggal, duduk,”ku Tekura.
          Menarat laban endang agi ringat, enda bejaku manah nyaut Tekura. “Au, enda diasuh nuan lalu, pan lalu ga aku. Enda diasuh nuan duduk, duduk ga aku. Aku endang datai deka munuh nuan,” pia ku Menarat.
“Anang bangat beguai mih unggal,”pia ku Tekura nyaut. “Dulu makai pinang, nya baru tua bebunuh,” pia ku Tekura.
          Menarat enda nyaut Tekura. Mata iya merening Tekura. Dilah iya kelur-kelur. Iya enggai makai pinang diberi Tekura. Tekura lalu ngerayap semak agi ngagai Menarat. “Nama kebuah tua bebunuh ngelaban diri sebilik, diri sekaban. Nama laya tua? Enti aku bisi penyalah, kita tau ngaduka iya. Ukai aku takutka nuan, tang enggaika tua bisi bebadi ngapa. Seput enda ulih ganti ngena tajau dua, tajau tiga. Enti nuan mati, sapa ngidupka bini anak nuan? Aku tu kebal, unggal,” pia ku Tekura, natuk kerubung diri, lalu ngujungka jaku iya enggau Menarat.

Latih A
1. Nama kebuah bala jelu tusah ati?

2. Nama penyadi sida ti nginsap ai danau nya?

3. Lapa Menarat enda berani mantap Tekura?

4.Nama ajar manah ari ensera nya tadi?


Latih B;
Beri reti leka jaku di baruh tu:
1.Langkang

2. tebubuh

3. nyintak

4. ngerayap

5. natuk

SISTEM JAKU IBAN ( Atur D-N)

SISTEM JAKU IBAN

ATUR D-N

D tu penerang ke diterangka

N tu rambai jaku ti nerangka pekara nya.

Chunto:

D-penerang ke diterangka	N-rambai jaku ti nerangka pekara nya
Ikan patih	pansuh
Mee	kolo
buk	burak

Pekara ti Salah enti atur D-N nyau tekalih.

Peratika chunto di baruh tu.

1. Ayat ti salah: Iya bedau bulih deriba lesen motosikal taja 6 bulan udah belajar deriba.

  Ayat ti betul: Iya bedau bulih lesen deriba motosikal taja 6 bulan udah belajar deriba.

2. Ayat ti salah: Sida sekaban kenyang makai tadi laban dinahka ibu Jentang 

                          enggau pansuh manuk tuai begulai kusuk daun empasa.

   Ayat ti betul: Sida sekaban kenyang makai tadi laban dinahka ibu Jentang 

                         enggau manuk tuai pansuh begulai daun empasa kusuk.

Latih:

Peratika ayat di baruh tu.Pilih saut ti betul

1	I	Ibu Moni nyuaka kredit kad lebuh bebayarka barang ba kaunter nya.
	II	Aki Wat bedau makai ubat darah tinggi enggau kemi manis pagi tu.
	III	Dom semina makai Maggie mi aja enggau sigi telu rebus.
	IV	Kami sebilik makai mi kampua ba pasar Sibu kemari.
	A	I enggau II
	B	I enggau III
	C	III enggau IV
	D	II enggau IV
		Saut: D

2	I	Ikan terubuk masin bisi dijual ba kedai baru nya.
	II	Apai Mugat mai leka penabur lebuh iya begiga malam kemari.
	III	Salai ikan lelumai jauh nyamai ari panggang sayap manuk.
	IV	Kedai nya bisi nyual mayuh perengka dapur baka batu lesung, mangkuk  sup enggau periuk karan.
	A	I enggau II
	B	II enggau III
	C	III enggau IV
	D	I enggau IV
		Saut: A

3	I	Indai iya meli kari manuk ke lauk sida sebilik tengah hari tu
	II	Endu Linda nulung indai iya nyual tuchur pisang
	III	Kitai enda tau enda nemu dunya luar ti deka ngemansangka diri empu.
	IV	Tuai rumah mesan sida serumah sama bela nupi manuk penelu.
	A	I enggau II
	B	II enggau III
	C	III enggau IV
	D	I enggau IV
		Saut: C

Karang Belalau(Pom Tiga)

Karang mindahka Penerang

Peratika iklan di baruh tu. Udah nya tulis karang ti ngundan leka jaku 50-70 leka jaku

Peresa Jaku Iban Pom Tiga

Mata pelajar: Bahasa Iban

Pengelama  : 2 jam

Penerang: Saut semua tanya

BAGI A

(Taga Jam: 40 minit)

(38 mark)

1. Tulis siti ayat ngena leka jaku di baruh tu. Nuan enda tau meri penambah, nukar penambah sereta ngena

 leka jaku nya nyadi sempama tauka jaku nama tetap.

(i)	nuang
	______________________________________________________________________
(ii)	bekuli
	______________________________________________________________________
(iii)	kampung
	______________________________________________________________________
(iv)	dikembuan
	_______________________________________________________________________
(v)	nyimpai
	______________________________________________________________________
	(10 mark)

2. Ayat di baru tu bisi ngundan dua iti penyalah jalai jaku. Kemetulka lalu tulis baru ayat di baruh tu tang anang ngubah 

tukuh enggau reti asal ayat nya. 

(i)	Surat khabar lama ti digumpul sida sekelas deka dijualka ngagai kedai ngimbai gerija nya.
	__________________________________________________________________________________________
(ii)	Endu Ajik dipinta melah kek hari pengada iya ba mua bala memayuh ti bisi datai maya nya.
	_________________________________________________________________________________________
(iii)	Tiap pepagi iya enda dulu agi nyiram pun bungai ba ujung bilik sebedau nurun gawa
	________________________________________________________________________________________
(iv)	Abi telih iya menanah laban enda cukup penti sereta enda makai ubat ti diberi lutor.
	_________________________________________________________________________________________
(v)	Sida sebuat bengabang berengkah ngah ruai tuai rumah sebedau napatka ruai indu dara ke pala tangga

3. A) Tukar ayat sebut ngagai ayat tusi di baruh tu.

(i)	“Janting ngasuh nuan mai bup tulis iya,” padah Mia ngagai Engkilat.
	_________________________________________________________________________________
(ii)	“Lapa sida Unchat sekelas enda belajar ba kelas?”tanya Linda
	________________________________________________________________________________
(iii)	“Ukai aku ngempu kasut tu tang nembiak ti baru pansut nya tadi,” saut Abam ngagai pengajar Landan.
	_________________________________________________________________________________

3. B) Tukar ayat tusui di baruh tu ngagai ayat sebut.

(iv)	Akai Ujang nyerauh seretai engkakai ngetatka pemedis sengat indu gamang.
	____________________________________________________________________________________
(v)	Pengajar Simon meri jaku gerah ngagai semua apai indai nengah radio pasal aum besai PIBG SMK Lubuk Masin deka  diatur kena ujung minggu tu ila.
	_______________________________________________________________________________________________
(vi)	Igat Liam betanyaka endur enggau pengelama Linda belajar komputer ngagai Dora.
	_____________________________________________________________________________
	(12 mark)

4. Tulis sempama ti engkeman dikena nipakka leka jaku ba baruh tu.

(i)	Ngandung
	_________________________________________________________________
(ii)	Mati
	_________________________________________________________________
(iii)	Nadai anak
	_________________________________________________________________
	(6 mark)

Bagi B

[ Taga jam: 20 minit]

[12 mark]

5. Bacha teks leka main di baruh tu. Udah nya saut tanya ti nangkanka nya ngena ayat penuh.

Nya baru geresak anak buntak,

Datai ari tegalan lama lang,

Sebulan tu udah nandan tumbuh nampak,

Ti udah gurak-gurak lidah ai tuak,

Kelimbak ari benung menaga bujang.

Nya baru nyaduh kitai betubuh,

Ngaga ensumbar ai tuak,

Kati ko iya enda bemunyi gurak-gurak,

Iya ga udah dichampur kerupak berupu ngerang.

Tu ai tuak anak padi nubai,

Ke digenggam aku enggau pensingan tangan tunjuk megai,

Iya ti dibai aku bejalai,

Ngerejang peretang rumah panjai,

Aku tu dientudika Endu Dara Rambai Geruda Seduai Indai Bilai.

Nya alai ai tuak tu digela seduai,

Anak selulut ribut ke bepuput biau balai,

Ngambu diri mangka menyaung Bukit Suai,

Sepiak renjan sepiak landai,

Enda kala telesai ujan labuh jarang.

Tang iya ukai semina naka nya,

Agi ga tu digelar Endu Dara Rambai Geruda,

Ngagai anak gelanggang gumbang begagai,

Mangkaka ujung tanjung Nanga Berunai,

Beseberai enggau pantai Nanga Limbang.

Tu ai tuak anak padi nibung,

Disimpan aku di dalam jalung jebung,

Digenggam aku enggau pensingan tangan tunjuk ujung,

Ke dibai aku bejalai ngerejang peretang rumah landung.

(diambi ari bup teks pom 3,KBSM,1992)

(i)	Ari ni penatai geresak anak buntak?
	____________________________________________________________________
	(1m)
(ii)	Beri kebuah ai tuak nya bemunyi gurak-gurak?
	___________________________________________________________________
	(2 mark)
(iii)	Nama ti dikena orang nyampur ai tuak tu?
	_______________________________________________________________
	(2mark)
(iv)	Nama dikena orang mai ai tuak anak padi nibung bejalai ngerejang rumah landung?
	(2 mark)
	__________________________________________________________________
(v)	Nama reti leka jaku renjan enggau landai?
	__________________________________________________________________
	(2 mark)
	Nitihka runding nuan, nama kebuah ai tuak tu disebut anak padi nibung?
	_________________________________________________________________
	(3 mark)

BAGI C

[ Taga Jam: 15 minit]

[10 mark]

6	Peratika enggau silik grafik di baruh tu. Belalauka penerang nya, tulis pasal guna lapis ozon lalu chara nyaga iya ari ti majak mipis.  Pemanjai karang nuan antara 50 ngagai 70 leka jaku

Bagi D: Karang

[ Taga jam: 45 minit]

[40 mark]

7. Tulis karang pasal siti ari pekara di baruh tu. Pemanjai karang nya enda kurang ari 150 leka jaku.

(i) Rumah ti dikinginka aku

(ii) Nuan dipinta meri licha pasal “Nyaga nyeliahka ari kena penusah pengangus 

   rumah”.

   Tulis teks licha nuan nya.

(iii) Kuasa internet besai amai kemaya hari tu. Pejuraika penemu nuan senentang 

   guna internet. 

                                                 -Nya aja-