Sunday, September 16, 2012

Karang (Penemu Rama) PMR


Karang 4-
Tanya: Aktiviti lumba enggau main amat beguna ngagai nembiak sekula. Pejuraika guna aktiviti lumba enggau main ngagai nembiak.

               Aktiviti lumba enggau main tu iya nya aktiviti ti digaga ba luar kelas. Mayuh aktiviti lumba enggau main ti dikerinduka nembiak sekula baka bemain bol, badminton, futsal, enggau mayuh agi. Kitai sama nemu pekara ti dipelajar nembiak di sekula enda chukup enti semina belajar nulis, macha enggau ngira aja. Tu mih ngujungka pelajar ti diulih nembiak deka setimbang enti bisi nyereta aktiviti lumba enggau main.
               Siti ari kebuah guna aktiviti lumba enggau main tu ngagai nembiak iya nya mantu ngurangka stress. Stress tu nyadi engka kelalu mayuh pikir lalu irauka pasal peresa ti enda manah. Tu ngujungka bala nembiak ulih ngurangka pengelelak untak ti mayuh pikir maya ba kelas. Udah bemain, dia untak nembiak ulih regas baru.
               Kelimpah ari nya, aktiviti lumba enggau main tu ulih mantu meri pengerai ngagai nembiak. Penyakit deka nyamai inggap ba siku-siku mensia enti kurang ngaga aktiviti lumba. Enti nembiak semampai aktif, dia sida deka semampai gerai. Ari tu tadi, nembiak mega deka nyamai agi bulih pemujur ba sekula.
               Nambahka nya, lebuh bemain begulai enggau nembiak bukai, dia nembiak mega ulih belajarka reti bekerejasama enggau orang bukai. Nembiak deka bulih pengelandik begulai enggau orang bukai. Enti nembiak semina belajar aja, penemu tauka pengelandik ke baka tu enda dipelajar. Pemansang nembiak enda setimbang.
               Guna bukai aktiviti lumba enggau main iya nya ngelatih nembiak nerima pemenang enggau pengalah enggau ati ti tebuka. Sida enda sumbung enti alah. Pia mega enti sida alah. Sida enda jampat tumpul ati.
               Ke pengujung iya, lumba enggau main tau mai mayuh penguntung ngagai nembiak sekula laban iya ulih ngasuh pemansang runding enggau tubuh nembiak chukup setimbang sereta menyana. Nya alai, nembiak endang patut nyereta lumba enggau main. Tu ulih ngujungka nembiak tu bulih pemujur ba sekula.

Sekeda ari Chunto Karang PMR 2012


Karang 2- Ripot
Tanya: Gerempung Jaku Iban sekula udah mujur ngatur aktiviti sepemanjai taun tu. Nuan dipadu nyadi seketari lalu dipinta nulis ripot aktiviti sepemanjai taun tu.
Ripot Aktiviti Sepemanjai taun 2012 Gerempung Jaku Iban SMK Medamit
               Gerempung Jaku Iban ba SMK Sematong tu udah ditumbuhka kenyau ari taun 2010. Tu taun kedua iya gerempung tu bejalaika pengawa. Dalam taun tu, gerempung tu bisi dua iku pengajar penyanding iya nya pengajar Braoh Ngumbang enggau pengajar Mary Entalai. Nyadi raban nembiak ti masuk ba gerempung tu iya nya 43 iku. Bisi nambah 12 iku ari taun 2011.
               Mayuh aktivti ti udah diatur dalam taun tu. Semua aktiviti endang diatur nitihka perambu ke udah digaga sebedau nya. Aktiviti keterubah iya diatur iya Pekit bekelikuh penemu. Iya mujur digaga kenan 29hb Mac tu tadi. Pekit tu dibuka ngagai semua nembiak ba sekula tu. Nembiak ti menang iya nya Nelson Jeti ari kelas 4B. Iya mega dipilih ngarika sekula ba pekit ke sama tang enda mujur.
               Kena bulan Lima, Gerempung Jaku Iban mujur ngatur Minggu Jaku Iban. Dalam minggu nya, mayuh aktiviti udah mujur dipejalaika. Aktiviti ke diatur dalam minggu nya baka Pekit Nulis Karang, Pekit Belagu Karaoke, Pekit Bepantun enggau Pekit Becherita. Mujur bendar taun tu Gerempung Jaku Iban bisi bulih bantu ari Serakup Iban Dayak (SADIA). Nya alai, perais ke taun tu manah agi ari taun ke udah.
               Ba bulan Lapan, Gerempung Jaku Iban bisi ngatur siti Program ngagai nembiak ti deka ngambi peresa ba PMR enggau SPM. Program ke diatur pengelama dua hari tu iya Program Nyaut Peresa PMR enggau SPM. Bisi 50 iku nembiak ke ngambi bagi. Tuju program tu diatur ngambika nembiak ti deka ngambi peresa SPM enggau PMR bisi peneleba nyaut tanya peresa Jaku Iban. Tu mega ngambika mayuh agi nembiak bulih pemujur ba peresa taun tu.
               Siti agi aktiviti ti digaga Gerempung Jaku Iban tu iya nya nemuai sambil belajar. Gerempung Jaku Iban udah mujur nemuai sambil belajar ngagai Opis RTM ba bagi Iban. Program tu semina ungkup raban gerempung aja. Program ke baka tu digaga dikena nambahka pengelandik enggau penemu diri. Semua raban ti bisi enggau gaga magang laban ti udah nemuai sambil belajar. Bisi sekeda minta nemuai ngagai tempat ke jauh agi.
               Ke taun tu, semua aktiviti bejalai lanchar. Gerempung Jaku Iban bisi nerima jaku puji ari pengetua laban ti udah mujur bejalaika semua aktiviti sepemanjai taun 2012. Tu ngujungka gerempung tu nyadi gerempung ti pemadu mujur taun 2012. Enggau tu, ngarapka taun ti deka datai, mayuh agi aktiviti ti deka digaga.

Ripot ditulis ulih:
Semaun
..................
(SEMAUN ANAK BIDAU)
Seketari
Gerempung Jaku Iban
SMK Sematong

Karang PMR 2012


KARANG 1
Tanya: Nuan dipinta bejaku ba mua mayuh pasal “Bakani Milih Pangan Serambau ti manah”. Tulis teks jaku nuan nya

               Iya ti dipebasaka Pengetua SMK Biau Tanju, Mr Edwin Nanta, semua pengajar ti bisi datai enggau raban nembiak semua. Selamat pagi, selamat begempuru enggau selamat Satu Malaysia. Aku dulu meri besai terima kasih laban diberi peluang bejaku baka ke pagi tu. Tuju aku bejaku ba mua mayuh baka ke dipeda kita semua laban deka bejuraika topik “Baka ni milih pangan serambau ti manah”.
Bala peninga semua,
               Kitai semua sama nemu kitai enda ulih idup kediri. Anang mih kitai nunda pendiau bubut. Kitai idup di dunya tu enda bepanggai ba orang. Baka nya mega kitai ti nyadi nembiak sekula. Pangan serambau tu ti nyadi orang ke semak enggau kitai kelimpah ari apai indai. Pangan serambau tu bisi guna iya enggau kitai. Bala nembiak ti bisi ditu tentu suah agi bekunsi penemu, cherita tauka penusah diri enggau orang ti sama rebak. Sida tu nyamai agi sereta deka agi madahka siti-siti pekara tauka penanggul ngagai pangan serambau enti dibandingka enggau diri sebilik.
               Siti chara kitai milih pangan serambau ti manah iya nya ari umur. Bala nembiak deka nyamai agi begulai enggau pangan lebih kurang sama umur. Ambi ke chunto, nembiak ba pom satu tentu ngiga pangan serambau ti sama ba pom satu. Kebuah pia, chara bepikir tauka pekara ti dikerindu endang nyau deka sama. Tambah mega, pangan serambau tu enda malu bekunsi penanggul enggau pangan diri. Nya mih kebuah umur ti dikena milih pangan serambau.
               Kelimpah ari nya, pengerindu ti sama mega nyadika siti chara ba milih pangan serambau. Nembiak ti bakedayau rindu agi begulai enggau nembiak ti sama perangai ke baka nya. Nya alai, bala nembiak semua patut bejimat lebuh milih pangan serambau. Pilih mih pangan serambau ti ngembuan pengerindu ti meri pemujur tauka bisi tuju ke manah. Chunto pangan ti manah iya nya rajin, bebasaka pengajar enggau apai indai, mereti enggau mayuh agi. Kebuah pia, pangan serambau ulih nukar perangai enggau ulah kitai nundaka sida iya.
               Chara ke bukai iya nya meda pengelebih pangan serambau nya. Bisi ari kitai ngiga pangan serambau ti pemisi. Kebuah iya, sida ti pemisi tu ulih nulung kitai maya bisi penyuntuk tauka penusah. Bisi mega kitai milih pangan serambau ti pandai. Sida ke pandai tu ulih bekunsi penemu lalu ngajar sida iya. Nya alai, pengelebih ba siku-siku nembiak tu nyadika siti kebuah sida dipilih nyadi pangan serambau.
               Ke pengujung tu, aku ngarap bendar bala nembiak semua bejimat lebuh milih pangan serambau. Anang ngerusak diri begulai pangan serambau ti jai ulah. Orang ti baka tu enda mai kitai ngagai pemujur tauka pemanah. Beduduk ari sehari tu, pilih mih pangan serambau nitihka udah dipadah ke tadi. Enggau nya, naka tu aja jaku aku pasal “bakani milih pangan serambau ti manah”. Nya aja, terima kasih.