Sunday, September 25, 2011

Chunto tanya enggau saut karang PMR

Sekula nuan baru tembu ngatur Program Minggu Jaku Iban. Mayuh aktiviti ti udah digaga maya nya.
Tulis surat kepada pangan ba sekula bukai nyeritaka Program Minggu Jaku Iban nya.


Chunto Saut



                                                                                                         SMK Medamit
                                                                                                         P.O Box 341
                                                                                                         98700 Limbang
                                                                                                         Sarawak

                                                                                                        20 September 2011


Tabi Albert Mesa,

            Nama berita nuan? Baka aku ditu gerai selama. Ngarapka nuan sereta kita sebilik mega seruran gerai. Lama udah ga aku enda ngirumka nuan berita. Tu legi bisi batang kenang ti deka dipadahka aku ngagai nuan.

Bakih,

          Kebuah aku nulis surat tu laban deka nyeritaka Program Minggu Jaku Iban ti diatur ba sekula. Minggu Jaku Iban tu diatur sepengelama seminggu. Iya diatur kena 12 haribulan September nyentukka 16 haribulan September. Program tu diatur Panitia Jaku Iban sekula tu. Mayuh aktiviti ti udah digaga sepemanjai minggu tu. Nyadi program tu diatur setaun sekali. Nya alai aku enggai tinggal ari ti nyereta aktiviti ti udah dipejalaika bala pengajar Iban.

         Siti ari pengawa ti udah diatur maya nya iya nya pekit nunda ukir asal Iban. Sebedau ti ngukir tu, Pengajar Anap bisi ngangau siku tuai ti landir ngukir ba menua tu. Nyadi nama orang nya aya Kudang anak Awing. Iya ti ngajar kami ngukir Iban. Udah nya, pengajar lalu ngasuh kami ngaga ukir kediri empu. Aku enda benasit maya nya. Aku semina bulih lumur tiga aja. Bakih aku empu ti bulih lumur satu iya nya Richard Saging.


         Kelimpah ari nya aktiviti bukai ti bisi diatur iya nya Kuiz Jaku Iban. Pengajar Alex Rimong ti nyadi ketuai pengatur kuiz Iban tu. Nyadi nembiak dipinta nyaut tanya pasal jalai jaku Iban. Pekit tu diatur ba Kelas 3B. Pekit tu diungkup ngagai semua pom ti nganjung siku pengari aja. Nembiak ari pom 4 Alfa ti menang ba pekit tu.


        Pekit ke bukai ti diatur maya Minggu Jaku Iban iya nya Pekit nulis cherpan. Nembiak dipinta nulis cherpan asil kediri empu lalu dianjung ngagai pengajar Maria Sunta. Asil cherpan sida ti lumur satu ngagai lumur tiga deka dipasukka dalam Majalah Sagan. Majalah Sagan tu iya nya majalah sekula.Untung endar ga orang bulih lumur dalam pekit tu. Bisi ga bekau jari iya tinggal enti lebuh udah badu besekula ila. Ulih ga nyadi pengingat dudi hari ila.


        Naka ditu aja cherita aku ngagai nuan. Ngarapka nuan mega tentu bisi cherita bukai ti deka dikunsika ngagai aku. Aku ngarapka tua ila sama mujur dalam PMR ti deka datai tu. Belajar bebendar tua ari diatu. Ke pengujung iya, ngirumka pesan lelengau aku tu ngagai aya Stephen enggau ibu Julia.


Nya aja, terima kasih.


                                                                                                         Aku ti bendar,
                                                                                                         Gawing
                                                                                                         .................................
                                                                                                         (GAWING ANAK SIMPANG)

Saturday, September 24, 2011

Tanya objektif

Tanya 1- 12

Isi endur puang di baruh tu ngena jaku ti engkeman


1. Sayur _________ buah beguna ba tubuh ngambika kitai bepengerai sereta cheregas.
A. enggau
B. sereta
C. lalu
D. ti






2. Dom Tukau rindu belajar subjek sains laban ________ nyadi lutur enti udah besai ila.
A. deka
B. suah
C. lebuh
D. maya


3. Bilun bansa Twin Otter semina ulih mai 18 iku _______________ aja.
A. penepan
B. pemai
C. penumpang
D. pemayuh



4. Diatu Pulau Anak Karakatoa di Indonesia nyau ami __________ sereta manah endur betanam betupi.
A. bangat
B. kelalu
C. raya
D. bendar



5. Rumah panjai sida Awin di Ulu Tatau semina 20 kilometer ____________ pasar Bintulu.
A. ari
B. dalam
C. tengah
D. semak

6. Adat Melah Pinang nya atur enggau pengerami ____________ orang melaki bini.

A. jadi
B. nyadi
C. bejadika
D. nyadika


7. Semua perau ba pengkalan tu enggi aki Richard tang sebuah ___________ enggi aki Tinsai.
A. nyin
B. dia
C. ditu
D. kin


8. “Nuan tu tak lubah bendar __________ tekura ke ngirit kerubung,”ku Ganing madahka Radin.
A. munyi
B. sema
C. baka
D. nitih



9. Sida Layang serumah udah nyediaka semua __________________ ti dikena ngaga rumah baru.
A. kayu ramu
B. reta tengkira
C. temuda rimba
D. sintung ladung



10. Gua niah ____________ bendar laban iya manah endur orang nemuai lebuh ujung minggu tauka maya peremisi.
A. beberita
B. temegah
C. ditemu
D. dikelala


11. “Aku deka nemu nama _________,”Ku Anita minta ngagai Jali enggau Jubey.
A. nuan
B. seduai
C. kita
D. kitai


12. Bala apai indai udah __________________ bediri nganti nganti penatai kepala pengajar nya.
A. bekedugau
B. bekedumu
C. bekedegir
D. betegayut



Tanya 13-18
Ayat di baruh tu nyangka betul tauka bisi salah. Enti ayat nya bisi penyalah, penyalah nya udah ditanda ngena A, B, tauka C. Pilih A, B, tauka C enti ayat nya bisi penyalah. Pilih D enti ayat nya nadai penyalah.



13. Iya mujur nyengulaka semua anak taja pan semina bumai enggau bekebun aja. Nadai penyalah
                           A                                 B                   C                                               D

14. Kami menyanak agi nganti apai pulai ngambika ulih makai begulai tengahari tu. Nadai penyalah
                                         A                      B                                            C                 D

15. Mua nembiak mit nya nyau bepera-pera laban baru udah makai aiskrim. Nadai penyalah
                                  A               B                                C                                   D



16. Indai Gasah jual mayuh macham kui enggau lauk dikena nambahka penatai pemisi. Nadai penyalah
                           A                                                    B                           C                         D                

17. Rumah ti semak simpang nyin suah telanggar kerita ti mansang kelang kelut. Nadai penyalah
                                              A                 B                                      C                    D


18. Indu ti bebaju kuning nya menyadi Lenya ti bekereja nyadi indu misi di Sepital Limbang. Nadai penyalah
                    A                          B                          C                                                                     D


Tanya 19-22
Pilih ayat ti sama reti tauka nyau deka sebaka reti enggau ayat ti dichelak tebal di baruh tu.


19. Pengelandik ngukir nunda ukir asal Iban tu siti ari pengelandik ti nemu punas enti iya enda dipelajarka nembiak rebak baru.
A. Nembiak rebak baru deka nemu punas ngukir enti sida nadai pengelandik belajarka ngukir nunda ukir asal Iban.
B. Ukir asal Iban deka nemu punas enti enda pengelandik tu ditunda enggau dipelajarka nembiak rebak baru.
C. Pengelandik ti nunda ukir Iban enti iya enda dipelajar dia pengelandik ngukir nembiak rebak baru nemu punas.
D. Siti ari pengelandik ti nemu punas enti enda dipelajar nembiak rebak baru iya nya pengelandik ngukir nunda ukir asal Iban.


20. “Aku bisi betemu enggau madi nuan, Muluk enggau bini iya, Menja di kedai Ah Chong,”ku Empira madahka Likung.
A. Empira madahka iya bisi betemu enggau madi iya, muluk enggau bini iya, menja di kedai Ah Chong ngagai Likung.
B. Likung dipadahka Empira iya nya betemu enggau madi iya, Muluk enggau bini iya Menja di kedai Ah Chong.
C. Empira nusuika Likung iya nya iya bisi betemu enggai madi Likung iya nya Muluk enggau bini, Menja di kedai Ah Chong.
D. Likung ditusuika Empira iya nya iya bisi betemu enggau madi Muluk enggau bini iya, Menja di kedai Ah Chong.



21. Engkamat minta tulung Sandra ngiga gambar terabai dikena iya ngaga kereja kus Adat Asal Iban.
A. “aku minta nuan ngiga ke aku gambar terabai dikena ngaga kereja kus Adat Asat Iban,”ku Engkamat madahka Sandra.
B. “Sandra,ulih nuan ngiga gambar terabai. Deka dikena ngereja kus Adat Asal Iban,”ku Engkamat madahka Sandra.
C. “Ulih nuan ngiga gambar terabai kus Adat Iban ke aku laban dikena ngaga kereja,”ku Engkamat minta ngagai Sandra.
D. “Nuan nulung aku ngiga gambar terabai ngambika dikena aku ngambi Kus Adat Asal Iban,” ku Engkamat minta tulung ngagai Sandra.


22. Tiris ba perau udah kelalu balat, nya kebuah kami karam.
A. Kebuah kami karam kelalu balat laban tiris ba perau.
B. Perau kelalu udah tiris balat lalu kami pan karam.
C. Kami karam kebuah tiris ba perau ti udah kelalu balat.
D. Perau kami tiris udah kelalu bangat terus perau karam.



Tanya 23-26
Pilih ayat ti betul di baruh tu lalu tentuka saut nuan nya engkeman.


23. I. Gamal iya baka ke beli tang naka pemintar-mintar orang.
      II. Benda lama sida Randin udah dichuri orang demalam.
      III. Maya apin bisi lampu pichit menya, orang begunaka sempun di kena bejalai malam
      IV. Mayuh udu amat mensia renga rambau musin kemarau tu.
      A. I enggau II
      B. II enggau III
      C. III enggau IV
      D. I enggau IV


24. I. Siti ari basa bansa Iban iya nya mali nelah nama mentua.
      II. Abit enggau Junat pulai ke rumah laban bisi rabat.
      III. Kami selalu besuaka utai ke empelua ngagai sida bilik sepiak.
      IV. Manuk sabung ti diperakitka aki di tengah laman udah lepas.
      A. I enggau II
      B. II enggau III
      C. III enggau IV
      D. I enggau IV

25. I. Ibu Laka selalu enggau orang jual kuchai di pasar minggu.
      II. Litan telih aki Ibau ke dipantap munsuh mengkang dilak-dilak.
      III. Indu tampuk pinang rindu bendar nabakka diri ngagai api panduk lebuh malam
      IV. Aku rindu udu agi makai asi guring ari asi amat.
      A. I enggau III
      B. II enggau IV
      C. I, II, enggau III
      D. II, III enggau IV


26. I. Gawai ke diintu raban bansa Dayak di Sarawak dikumbai Gawai Dayak.
      II. Indai Ubin nya bagas empegal nyebut utai sebarang lebuh ngerandau.
      III. Amat seduai enda selubang penemu ba politik tang seduai tetap bepangan.
      IV. Endu Maria enda disagi ngugi orang laban sida sebilik nadai anak indu agi.
      A. I enggau III
      B. II enggau IV
      C. I, II enggau III
      D. II, III enggau IV







Tanya 27-30
Pilih saut ti engkeman belalauka penerang tauka sempama ti diberi di baruh tu.

27. Aki tuai nya __________________, nya kebuah iya enda nyaut lebuh dikangauka.
A. basah jari
B. berani kesa
C. bengkak jari
D. bengal beruang


28. Orang ke ngereja penyalah sigi, baka ___________ , nguji ngelalaika penyalah diri
A. pelanduk enda ingatka panjuk
B. manang ke nangkap semengat
C. uduk ke labuh anak
D. mayau ke ngelalaika tai

Thursday, September 22, 2011

Surat Pekirum Perintah

Nuan deka ngeripot pasal sekeda orang ti suah muai uras sengapa lalu betunuka sengapa utai semak alai nuan diau.Pekara tu meri penanggul lalu ngerusakka menua ti beresi sebedau tu.
Tulis surat nuan nya nuju orang ti patut.


Pemuka karang
- Address Pengirum- Address Penerima- Hari bulan
- Pekara: Ngeripot Pasal Ulah Orang ti Suah Muai Uras


Isi 1- madahka diri empu
-nerangka tuju nulis surat
-madahka penanggul ti nyadi nya-(berengkah kemaya??)


Isi 2-Uras ti dibuai-pansut bau ti enda manah(bau but, etb)
-lebuh dipuput rebut/angin, bau nya tama ke bilik/rumah
-berasai amat enda nyamai,(asai deka mutah,etb)


Isi 3-asap ti ditunu ngasuh kitai enda bepengerai
-enti anak bisi penyakit asma, ngasuh sakit nya raya agi
-bau asap lekat ba gari ti dijembi(gari nyau enda bau manah agi)
-penyakit bukai ari asap, batuk, kanser, etb


Isi 4-Kala ngajar orang tin gaga ulah tu
-sida enda mending jaku ajar
-sida terus muai uras sengapa endur.



Isi 5-Minta tuan ngadu/mutarka pekara tu
-meresa ngagai palan tu
-nangkap sida ti muai uras/ngukum sida
-tu ulih nyedarka sida




Isi 6-Minta ngemanjaika pekara tu ngagai Opis Pengerai
-Ngasuh sida ngatur siti kimpin ba genturung pendiau(ulih ngatur siti Licha, etb)
-tu meri sida penerang pasal nyaga pemeresi


Penutup
-Ngarapka penanggul tu ulih diputarka enggau jampat
-semua tu digaga ngambika semua ti diau ba genturung pendiau ngasaika pengelantang
-Nya aja, terima kasih.

Tuesday, September 13, 2011

Guna Ai- Karang Pom Tiga

Karang: Kitai mensia begunaka ai. Ai pun pengidup semua utai. Tulis siti karang pasal guna ai ba pengidup mensia.


              Ai tu checair ti nyadi ari dua bagi hidrogen enggau siti bagi oksigen. Kitai semua nemu ai endang pemadu beguna ba semua utai idup enggau utai tumbuh. Enti nadai ai, dia mayuh penanggul deka nyadi. Semua utai idup bepanggai bendar ba ai. Ai tu mih ke pun pengidup semua utai.

             Pengidup kitai mensia bepanggai bendar ba ai. Guna ai tu mayuh bendar ba pengidup mensia. Siti ari guna ai ba pengidup kitai iya nya nyadika ai irup. Kitai mensia begunaka ai dikena ngelanchar sistem tubuh bejalai enggau manah. Ai ulih muai teda sel enggau utai kamah ari tubuh kitai. Nya mih pemesai guna ai dalam tubuh kitai. Enti kurang ai ba tubuh, dia tubuh kitai deka kurang pengerai.

            Guna ai mega dikena ngasilka kuasa letrik. Ari peneras ai sungai ti anyut dikena mensia ngeluarka kuasa karan. Nya alai kitai berasai nyamai endar laban bisi kuasa karan. Pendiau pengidup mensia pan nyau berubah. Pengidup kitai majak menyana laban ti nyau bisi kipas, peti ais enggau kereban letrik ti bukai. Nyadi tu ngasuh pendiau kitai dipeda lantang agi.

           Kelimpah ari nya, ai beguna mega ba industri betanam betupi. Utai tanam endang begunaka ai. Utai tanam deka galak agi enti ai chukup. Ambi ke chunto, sayur baka rampu, sawi endang beguna ai ti chukup. Enti tekena musim kemarau, sayur mudah amat enda nyadi. Pia mega, jelu tupi mega begunaka ai. Nya alai, ai tu enda patut dibasau. Iya amat beguna ba pengidup mensia.

          Guna ai ke bukai iya nya ba kilang ngaga pemakai. Kilang beguna ai ti chukup deka ngeluarka pemakai ti manah. Kilang bekenaka ai dikena nuchi dulu barang pemakai sebedau diproses nyadi pemakai dalam tin. Dia dih kitai sama nemu gunai ai tu. Ba kilang ai irup, dia ai dikena lalu dichampur dulu sebedau digaga nyadika ai irup baka ai dalam butul, ai kotak enggau mayuh agi.

         Ke pengujung iya, nyaga mih pemeresi ai ari diatu. Mayuh penusah deka nuntung enti ai di dunya tu enda dijaga enggau manah. Ai ti kamah nya ulih ngundang mayuh penyakit. Semua kitai bisi tanggung pengawa kediri empu nyaga pemeresi ai. Ai ti bisi anang dibasau pia aja. Belajar mih kitai bekenaka ai enggau menyana.

Karang PMR- Industri Dagang Temuai

Industri Dagang Temuai endang mayuh meri penguntung ngagai menua kitai. Beri penemu nuan senentang pemesai guna industi Dagang Temuai ngagai menua kitai.


           Menua Malaysia udah tebilang ngagai menua luar. Ke diatu, temuai luar ti datai ke menua tu majak betambah ari taun ke taun. Kitai patut ngemajuka industri dagang temuai enggau manah agi. Kitai semua ulih ngasaika pemanah ari ngemajuka industri dagang temuai tu. Industri dagang temuai tu mayuh mai penguntung ngagai menua tu taja pan bisi sekeda madahka bisi pengerugi iya. Endang enda ulih disangkal agi, industri dagang temuai tu mai penguntung ngagai menua kitai.


                Siti ari penguntung ti ulih diasaika kitai iya nya ari sukut ekonomi. Bisi industri dagang temuai tu ditumbuhka, dia bisi mega peluang gawa enggau bisnis. Enti maju industri dagang temuai tu, peluang gawa pan majak mayuh. Tu ngurangka bala nembiak ti enda bulih kereja. Ari industri dagang temuai, sida ulih gawa ba hotel, homstay enggau palan ti bukai. Tu endang pekara ti dikeinginka perintah. Nembiak lepas sekula enda ngemasauka diri enggau pekara ti enda patut.

                Pia mega industri dagang temuai tu mega nambahka penatai pemisi. Temuai luar ti deka nemuai ke Malaysia dulu nukar mata duit sida dulu. Enti pekara tu nyadi, duit masuk ngagai Malaysia tau ngujungka pemisi kitai majak nambah. Mata duit menua kitai ulih entap agi ketegal pemujur industri dagang temuai tu. Kebuah pia, aktiviti nyual enggau meli bisi nyadi dalam menua tu.


                Penguntung bukai industri dagang temuai iya nya ulih ngemansangka menua. Pengawa ti ngemajuka palan nemuai tu ngerampit mega pemansang ti bukai. Perintah mega ngaduka pemansang ba palan ti dilawa temuai nya. Tempat ti semak nya mega kena tempias ari pemansang nya. Tu ulih nyeliahka tempat siti-siti ke tinggal pemansang.


                Ke pengujung iya, ngarapka kimpin nemuai ngagai menua majak digaga enggau lebat agi. Pia mega enggau chara ti bukai ti sama ngemansangka industri dagang temuai. Kebuah pia, mayuh penguntung ti ulih kitai ari industri dagang temuai tu. Tu mih peluang kitai ngangkat menua tu tebilang di serata dunya.

Sunday, September 11, 2011

Latih- Meretika Genteran

Bacha lalu meretika genteran karang di baruh tu. Udah nya saut semua tanya ngena ayat penuh.

           Pengawa nginsap tu endang dikembuan ari aki ini kitai suba. Tang ulah tu siti ari ulah ti enda manah. Ke maya hari tu, orang ti gian nginsap majak mayuh. Taja pan bisi kimpin dikena ngurangka ulah nginsap tang enda mai pemujur. Perangai nginsap ukai semina ba sida ti tuai besai aja tang nyau ngerampit ngagai nembiak sekula. Ke diatu udah bisi dipeda tauka didinga pasal nembiak sekula ti nginsap.

           Enti suba semina nembiak ke laki aja. Tang diatu, bisi mega nembiak indu ke nginsap. Ulah ke bansa tu ukai semina ngerua belanja aja tang ulih meri penanggul ba pengerai. Nitihka padah Menteri Pengerai, Dato’ Dr. Chua Soi Lek, dalam taun 2006, ulah nginsap tu majak betambah ba nembiak sekula. Pekara tu amat ngirauka kitai semua. Nama mih penyadi enti taun-taun ti deka datai semua orang nyau nginsap magang.

          Kimpin nagang nginsap ti dipejalaika perintah endang siti kimpin ti chukup manah. Perintah besai patut dipuji laban ngatur kimpin tu. Bisi dipandangka ba kimpin tu iya nya gambar orang ti kena penyakit ketegal ti nginsap. Bisi mega diayanka gambar lempuang ti chelum sereta rusak. Kimpin ngarapka nembiak takut deka nginsap agi lebuh meda gambar-gambar ti baka nya.


            Kimpin nagang nginsap tu dipejalai ngena mayuh bengkah chara. Kitai nemu kimpin tu ari televisyen, surat kabar enggau mega radio. Kimpin ti digaga ngena chara baka tu laban nembiak mayuh agi bepedaka televisyen enggau ninga radio. Perintah ngarapka semua kitai tepedaka kimpin tu enda ngira mit tauka besai. Meda kimpin tu ba televisyen tau nyedarka kitai pasal pengerusak enti nginsap.

             Kitai ngarapka kimpin tu ulih ngurangka orang ti nginsap. Ari ti meli insap, manah agi duit tu dikena meli barang bukai ti lebih beguna. Ukai semina ari kimpin tu aja, mayuh agi chara bukai mega patut diaduka dikena nagang orang gian nginsap. Nya alai, ari diatu, sapa ti nginsap tau badu. Iya ke baru deka nguji tau terus ngetu ke ulah ti nginsap tu.


1. Sapa ti madahka orang nginsap majak betambah mayuh? (1 mark)

2. Nama kimpin ti dipejalaika perintah besai lalu nama tuju iya? (2 mark)

3. Beri kebuah kimpin tu dipejalai nengah radio enggau televisyen? (2 mark)

4. Beri reti leka ngerampit. (2 mark)

5. Ba penemu nuan, nama chara ti patut digaga dikena nagang nembiak sekula ti nginsap? (3 mark)

Saturday, September 10, 2011



Televisyen (TV) iya nya siti ari kereban eletronik ti dikembuan kitai mayuh. Bisi tauka enda kitai berunding pasal pemanah enggau pengelemi enti kitai meda tv. Beri penemu nuan.


Pemanah meda TV:-

1. Kitai nemu berita enggau jampat. Berita ari luar enggau dalam menua ulih ditemu magang.Chunto, berita jam 8 malam enggau jam 10 malam

2. Kitai ulih nerima penemu baru. Program-program ti dikeluar ari RTM baka pasal betanam betupi enggau bisnis endang amat beguna ngagai kitai.Ambi ke chunto, penemu kitai pasal betanam betupi pan betambah enti meda program pasal betanam betupi.

3. Kitai teperindang enti bisi TV. Sambil kitai belelak, kitai ulih meda tv. Kadang-kadang bisi TV ngeluarka cerita ti ulih ngasuh kitai ketawa. Enda berasai kitai pun enda lelak agi.



4. Kitai nemu pasal barang baru. Ari ti meda iklan ba TV, kitai nemu pasal barang baru nya tadi. Tu nguntungka kompeni ti mansutka iklan ba TV.


Pengelemi meda TV(ngagai nembiak)

1. Bisi program ti enda manah ngagai bala nembiak. Nembiak jampat deka nunda utai ti dipeda iya. Enti program nya bisi bebukut, dia dih nembiak nya deka bebukut.



2. Ngemasau jam. Nembiak sekula ti rindang meda tv lalu enda belajar. Bala nembiak enggai belajar laban deka meda cherita dalam tv ti dikerinduka sida. Jam ti dikena belajar nyau dibasau kena meda tv

Friday, September 9, 2011

Topik Karang PMR

Sekeda ari Topik Karang ti dipelajar ari Pom 1 ngagaii Pom 3

1. Pengawa bedagang

-Barang beselat

2. Nulung orang ke nadai daya

3. Pengidup siga

4. Aktiviti Jaku Iban-Minggu, Bulan (Ripot)

5. Pengelikun di kandang sekula(Pom 1)

- Jalai nentuka pengelikun

- chara

-Pekara ti diputarka bekaul enggau pengelikun di kandang sekula

6. Surat apil minta tambang bas/van disamarata

7. Jalai kereban eletronik tau ngenyenangka pengidup mensi

8. Internet

9. Guna buluh

10. Palan nemuai ti manah

11. Nyeritaka baru pasal karya ti udah dibacha

12. Karang biografi

13. Mensia enggau pengawa ngidupka diri

14. Jelu siga

15. Pekayan Seraris

16. Pengelikun di menua diri (Pom 2)

- Kes ngerusak reta tengkira

17. Guna Sabun

18. Tempat beberita

19. Pangan serambau

20. Juluk ati

21. Chara kitai siruka nyawa diri

-Pemakai/Pengerai

-undang2 jalai raya

-chara mutarka ari layap nyaga pengelikun diri

22. Industri dagang temuai

23. Pengelikun antara menua (POM 3)

-orang kampar datai enda beradat

24. Media chelak

25. Palan ngelantangka ati

26. Lumba enggau main

Monday, September 5, 2011

Karang

Tanya: Nembiak sekula ti nemu bejaku lebih ari siti bansa jaku endang mayuh penguntung iya. Beri penemu nuan senentang pemesai guna nembiak landik ngena lebih ari siti bansa jaku




          Kemaya hari tu, nembiak sekula belajarka jaku Melayu. Kelimpah ari nya, jaku kedua ti dipelajar ba sekula iya nya jaku Inglis. Ari nya tadi, kitai sama nemu bepun ari sekula endang belajarka lebih ari siti bansa jaku. Bedau ditambah agi jaku bansa diri baka jaku Iban, jaku Cina, jaku Tamil enggau Kadazandusun. Nya alai, nembiak sekula udah disikap enggau lebih siti bansa jaku dipelajar ba sekula. Kebuah pia, mayuh guna iya ba pengidup nembiak ke dudi hari ila. Enda rugi enti kitai nemu lebih ari siti bansa jaku.




         Siti ari pemesai guna kitai belajarka lebih ari siti bansa jaku iya nya dikena ngiga penemu enggau jampat. Menua kitai majak maju. Nya alai rayat iya mega patut sebaka. Dia mih kitai beguna lebih siti bansa jaku. Kitai mudah agi belajar sereta nambahka penemu diri dikena napi pemansang ti deka datai. Ambi ke banding, enti kitai nemu jaku Jipun, dia penemu nya mudah diambi. Kebuah pia, kitai udah nguasa jaku sida. Enda mih jaku nya disalin dulu ngagai jaku Melayu. Enti semina nemu siti bansa jaku, dia lubah agi kitai bulih penemu nya.



          Kelimpah ari nya, jaku besai bendar reti dikena bekomunikasi. Komunikasi deka semitan agi enti kitai landik ke jaku iya. Ba menua kitai empu, mayuh pupu bansa. Dia dih mayuh mega jaku iya. Chunto iya, enti nembiak Iban landik dalam jaku Cina, dia iya deka mayuh pangan bansa Cina. Pia mega enti iya landik ba jaku bukai. Bekaban enggau bansa bukai endang dikena kitai ngerapatka kaul diri. Tu ulih nyeliahka pekara ti enda manah nyadi. Idup pan lantang senang.


            Landik lebih siti jaku endang beguna bendar ngagai orang ti deka minta kereja. Nitihka pansik, mayuh nembiak ti lepas ari university enda teulihka pengawa laban kurang nguasa jaku Inglis. Pekara tu ulih nanggul sida ngiga kereja. Tang enti bisi pengelandik ba jaku Inglis ditambah ulih ba jaku bukai baka jaku Cina endang diguna bekereja ba kompeni-kompeni.Tu mih kriteria ti patut ditemu nembiak sekula. Endang besai guna iya enti ulihn nguasa lebih siti bansa jaku. Baka lebuh kena intebiu, orang ti landik jaku Melayu, Inglis, Cina enggau Arab tentu nyulut agi orang ti semina nemu jaku Melayu aja. Tu ukai reti kitai ngelaungka jaku Melayu tang dikena ngemansangka diri sereta menua.



            Nya alai, nadai pengerugi enti nembiak sekula landik lebih siti bansa jaku. Endang udah ditemu, enti nemu lebih ari siti bansa jaku mayuh meri penguntung. Ukai semina penguntung tu ngagai kitai aja tang ngagai menua mega. Tu ngujungka menua ulih terus mansang nuju juluk pemansang dalam wawasan 2020. Bepun ari sehari tu, anang enda belajarka jaku bukai kelimpah ari jaku Melayu enggau jaku Inglis. Enti ulih tambah agi siti agi jaku bukai baka jaku Cina, Jerman tauka jaku bukai.


Dikarang: Grup A(POM 3B)

Friday, September 2, 2011

Latih Karang Bagi C (PMR Kertas 2)



Tanya: Nuan dipinta nulis siti karang pasal Gaya Idup Pengerai.







               Gaya idup bepengerai tu mayuh meri penguntung. Enti pekara tu digaga, kitai deka seruran bepengerai sereta cheregas. Enti kitai bisi ngaga aktiviti ti mansutka peluh, nya nandaka kitai bisi ngaga aktiviti bepengerai. Semua ulah tauka pengawa ti ngasuh cheregas tu endang pengawa ti manah. Gaya idup bepengerai tu endang pengawa ti ulih nyeliahka diri ari kena tuntung penyakit. Pengawa ke tu baka nyediaka payung sebedau ujan. Nya alai mayuh chara dikena kitai ngambika seruran bepengerai


            Siti ari chara ti patut digaga kitai iya nya ngambi pemakai ti setimbang. Pemakai ti setimbang iya nya pemakai ti chukup ba tubuh kitai. Ambika banding, pemakai ti ngundan mayuh lemak enda tau diempa mayuh.Enti enda, dia kitai mudah amai kena penyakit baka darah tinggi enggau diabetis. Pemakai baka sayur enggau buah tu antara pemakai ti manah lalu ngasuh kitai bepengerai. Ari diatu, kitai ti bedau ngatur pemakai diri patut ngeririka diri makai pemakai ti setimbang. 

         Gaya bukai ti patut dikembuan enti deka idup bepengerai iya nya besukan. Sukan tu endang manah ke tubuh kitai. Ia ulih ngelancharka darah lalu ngasuh tubuh bepeluh. Ari pekara tu nyadi, kitai deka seruran cheregas lalu bepengerai. Enti ulih pansutka peluh tiga kali seminggu. Antara aktiviti sukan baka bemain bol, bejogging, enggau bemain badminton endang aktiviti digaga ngambika tubuh bepengerai. Tubuh ti cheregas mega ngasuh untak kitai regas.



            Chara bukai ngasuh kitai bepengerai iya nya beperesa pengerai. Kitai semua enda ulih melaba diri bepengerai enti enda ari lutur. Nya alai, orang ti udah manggai umur 40 taun patut beperesa ngagai klinik tauka sepital. Pia mega ngagai orang ti enda nyamai isi. Sida pan patut betemu enggau lutur. Anang ngenatka diri aja. Bala lutur ulih meresa rengka dalam tubuh baka lempuang, atau, tungkul sengayuh enggau ti bukai bejalai enggau manah. Enggau chara baka tu, enti bisi penyakit iya ulih ditemu tumu. Ari nya ulih terus berubat. Tu ulih ngasuh ti kitai seruran bepengerai lalu panjai umur. Anang nganti nyau raya sakit baru deka berubat. Tang nya ukai jalai ti betul.


            Nya mih antara gaya idup bepengerai. Idup bepengerai tu patut diririka kitai. Tu ngambika kitai udah nya teleba dalam gaya idup bepengerai. Menua ti maju sereta mansang endang bepanggai ba pengerai rayat iya. Ari diatu, ketuka mih gaya idup ti enda bepengerai. Rega nyawa enda ulih ditukar ganti tauka dijual beli.

Thursday, September 1, 2011

Latih-Tanya Pasal Jalai Jaku

1. Perut Unsa berasai pedis _________________ udah makai buah empelam mata kelalu mayuh.
 A. sereta
 B. laban
 C. lalu
 D. enti

2. Indai Endut _____________ tikai senggang ba tanju dikena iya nyembi padi pulut.
A. kerembai
B. dikerembai
C. ngerembaika
D. bekerembai

3. Nyalu nanya sekalika Rawie bisi betemu enggau menyadi _________ di rantau jalai.
A. nuan
B. kami
C. iya
D. kitai

4. Maya hari Enam, nembiak ti diau bemalam ba SMK Medamit deka belajar ari pukul lapan pagi ________ pukul sepuluh pagi.
A. ke
B. nuju
C. enggau
D. ngagai

5. Sida sekelas udah diukum pengajar Dunstan ketegal ti ___________ inggar maya belajar.
A. amat
B. kelalu
C. raya
D. pemadu

6. Nitihka berita ari radio pagi tu, hari bisi ujan ba empat _________ pelilih menua tu.
A. bagi
B. batang
C. gempuru
D. raban

7. Aya Ubie nyau _______________ udah bekau berubat ba Sepital Besai di Kuching.
A. regas-seregas
B. regas-regas
C. seregas-regas
D. seregas-seregas

8. Jangguk gaga bendar ati laban udah nerima surat ___________ pelajar iya ngagai Universiti Sains Malaysia (USM) di Pulau Pinang.
A. nankan
B. napi
C. nyambung
D. ngemanjai

9. Cheremin ti dilap Sawai nya tebelengka ari pegai iya lalu labuh sereta ____________.
A. redak
B. kimpi
C. naya
D. merekah

10. Aki Inung diatu nyau udah rabang __________ enda tekanitka jagung agi.
A. enggau
B. lalu
C. taja
D. kelimpah

11. Bala apai indai endang dipinta seruran ___________ anak belajar bebendar.
A. mejal
B. ngansak
C. mekuh
D. neju

12. Aki Unyat __________ perau dulu sebedau iya dibai sida serumah mukat di sungai Semah.
A. nganyam
B. ngeban
C. nyanggit
D. nyimpai

Friday, August 26, 2011

Karang- Bejaku ba mua mayuh

KARANG BEJAKU BA MUA MAYUH
TANYA: Nuan deka nyereta pekit bejaku ba mua mayuh serimbai enggau Minggu Jaku Iban ba sekula. Topik nuan iya nya “Penguntung macha”.
Sediaka teks jaku nuan nya.

                 Selamat pagi ngagai Kepala Pengajar SMK Meluan, En Ghani Ramba, pengajar-pengajar, bala hakim, enggau bala ti bukai. Nyadi ke pagi tu, aku deka meri licha pasal penguntung macha. Aku nemu semua kitai endang nemu macha magang. Kebuah pia, kitai diajar macha ari ba sekula tadika. Bisi orang rindu macha surat kabar, bup cherita, majalah enggau ti bukai.

            Macha tu siti ari pengawa ti manah. Nadai orang nagang kitai macha. Ba pengidup kitai sehari-hari, endang kitai suah macha. Semina utai ti dibacha kitai enda sama. Ba penemu aku, macha tu ulih nambahka penemu kitai. Bala bukai pan setuju enggau penemu tu. Ambi ke banding, enti kitai macha pasal sains, dia kitai deka nemu agi pasal sains. Tu endang meri penguntung ngagai orang ti rindu macha. Nya alai bisi orang madah macha jematan penemu. Ari macha kitai bulih penemu.

             Siti agi penguntung kitai macha iya nya ngisi maya lepa enggau beguna. Nembiak sekula endang dianti-anti maya peremisi sekula. Enti peremisi sekula enda dikena enggau menyana, dia nadai mih guna. Siti jalai kitai ngena maya lepa enggau menyana iya nya macha. Nembiak ti macha tu ulih nyeliahka diri ari enggau orang ti ngaga pengawa enda menuku. Endang untung enti kitai rindu macha.

             Kelimpah ari nya, penguntung bukai enti macha iya dikena nembiak sekula ngulang pelajar ti diberi pengajar. Nembiak ti mujur dalam pelajar sekula endang seruran macha. Sida tu macha baru pekara ti udah diajar pengajar. Enti pekara ti diajar pengajar tu ditandu, dia nembiak deka ingat agi pasal isi pelajar ti diajar. Tu ngemudahka agi nembiak mujur dalam sekula.


             Nya mih tadi penguntung kitai macha. Bepun ari sehari tu, aram mih kitai sama ngeransing diri macha. Nadai pulai ke pengerugi enti bebelika bup ari bebelika barang bukai ti enda tentu beguna. Kemeratka mih pengerindu macha ari diatu. Naka tu aja licha aku pasal penguntung macha. Nya aja, terima kasih.

Friday, August 12, 2011

Asil karang nembiak SMK Medamit

Tanya: Empai lama ti udah, ba menua nuan kena kemarau ti panjai. Cheritaka pendiau kita serumah maya nya.

Tiap-tiap taun menua kami enda kala enda kena kemarau. Bulan tujuh tu tadi, menua kami di Rantau Kurra kena kemarau panjai. Enti dibanding enggau taun-taun ti udah, kemarau ke taun iya nya kemarau ti pemadu panjai. Ukai semina menua kami aja, tang bisi menua bukai mega kena pangka penanggul tu. Endang mayuh ari kami serumah sebana ke tinggang penanggul ketegal kemarau tu.



Kami sebilik endang udah besindang dulu sebedau penanggul tu nyadi. Pia mega enggau bala rumah panjai. Dalam seminggu dua, bedau ga suntuk agi. Tang nyau udah sebulan dia kami serumah bisi ngasaika diri suntuk ai. Kena ngelempungka pengawa, kami serumah begutung ruyung numbak pegung. Bisi empat ti pegung dikeruang maya nya. Tu ngambika penyuntuk ai tu ulih diputarka.


Kami sebilik bisi ga nulung bala serumah. Bisi ga sekeda sida tu minta ai beresi ari kami. Kelimpah pia, ba belakang rumah kami bisi siti mata ai. Dia mih endur kami bulih ai beresi. Ai tu endang enda putus taja pan kemarau panjai. Kami endang enda nagang sida tu ngambi ai di belakang rumah nya. Mayuh kami serumah beangkut ai ari mata ai nya.



Nyadi apai maya nya nyadi tuai rumah. Iya seruran ngelalau kami serumah enda bebasauka ai maya musim kemarau tu. Iya mega bisi kala minta tulung ari Opis Ai. Opis tu udah kala nganjung ai ke rumah tu bisi lima kali. Berasai rindu ga meda bala kami beangkutka ai ari lori ai nya. Nyau sampal ari mit ke tuai maya bisi lori ai tu datai. Bisi sekeda nyau deka teterap ketegal ti enda bejimat lebuh ngangkut ai. Nyau rami diri ga kami serumah maya nya.

Sekumbang maya kemarau tu mega mayuh utai tanam enda nyadi. Jagung enggi sida aya Jenggi udah mati ketegal tanah ti kelalu rangkai. Pia mega sayur ensabi ibu Jenia pan sama mega. Tu mih ngenusahka ka kami serumah. Penatai pemisi kami serumah bisi mega kurang ari selama bekau ari utai tanam ti enda nyadi.


Musim kemarau tu mayuh meri penusah ngagai kami serumah. Nyau deka sebulan lebih kami deka penyuntuk ai. Udah tembu musim kemarau, dia baru kami serumah bisi ngasaika diri lantang. Kami serumah sama bela beterima kasih ngagai Petara ti enda ngelakka penusah kemarau.

Thursday, August 11, 2011

KARANG RIPOT

Nuan nyadi Ketuai Nembiak. Nuan dipinta nulis ripot pasal pengerami Hari Pengajar ti diatur ba sekula. Tulis ripot nuan nya.

Ripot Pasal Pengerami Hari Pengajar SMK Batu Kapur Taun 2011

                Hari Pengajar diatur ninting taun. Semua sekula enda tinggal ngintu Hari Pengajar. Pia mega ba SMK Batu Kapur . Dalam taun tu, pengerami Hari Pengajar tu diatur kena 16 Mei 2011. Pengerami tu di atur ba SMK Batu Kapur. Mayuh macham atur enggau main udah digaga maya pengerami Hari Pengajar tu.


                Hari pengajar ba renggat sekula tu udah dilanggur dulu sebedau iya dipenyadika. Pengerami udah diatur ari tumu pagi nyentukka tengah hari. Dia mayuh macham main sereta atur udah digaga maya tu. Nyadi Hari Pengajar tu diintu ngambika kitai meri basa ngagai bala pengajar ti udah ngajar selama tu. Hari tu diintu kena nembiak semampai ingatka budi, pengiruh sereta pengelelak pengajar ti ngajar nyentukka nembiak sekula pandai sereta nyadi mensia ti beguna.


                Atur digaga ari pagi. Bala nembiak enggau pengajar sama-sama begempuru ba padang sekula. Pengudah belagu Lagu ‘Negaraku’ enggau lagu sekula, dia kami mendingka jaku ari Kepala Pengajar ti benama Edward Jupa ak Braoh. Kepala pengajar lalu menyadika Pengerami Hari Pengajar nya. Pengudah nya, kami ningga teks jaku ari Menteri Pelajar ti dibacha Penulung Kanan, Pengajar Micheal Lansi ak Buda. Pagi nya mega, kami ninga bala pengajar belagu ‘Kami Guru Malaysia’. Udah nya baru kami badu begempuru pagi nya.



               Pengerami Hari Pengajar diteruska belabuh baru jam lapan pagi. Semua pengajar bisi enggau bemain ba padang. Bala pengajar laki bemain bol. Bala pengajar indu bemain badminton. Semua pekit tu diatur antara nembiak enggau pengajar. Nembiak ti enda enggau bemain dipinta nyadi penyukung. Bala kami ti enda enggau rindu bendar meda bala pengajar bemain.


             Udah tembu bemain nya, enda berasai udah jam 10 pagi. Kami belelak dulu. Program disambung baru 11 pagi, kami sama begempuru baru ba balai makai sekula. Program ari nembiak diatur maya nya. Bala nembiak bisi mantaika pengelandik diri baka belagu, ngajat sereta belakun. Semua pengajar gaga bendar sereta rindang maya nya.


              Program ke pengujung maya nya, meri perais ngagai semua pengajar. Semua perais tu diberi bala pengawas ngagai bala pengajar. Serimbai enggau nya bala nembiak bela sama meri selamat Hari Pengajar ngagai bala pengajar. Sebedau pengerami tu tembu, dia bala pengajar enggau bala nembiak merarau. Pengerami tu tembu pengudah makai tengah hari.
Selamat Hari Pengajar Taun 2011


JamesUnting
………………………………………
(JAMES UNTING ANAK RIPIN)
Ketuai Nembiak
SMK Batu Kapur

Monday, August 8, 2011

Karang Pom Tiga

Gula mayuh guna ba pengidup kitai mensia. Taja pia, bekenaka gula ti lebih ari ti patut meri mayuh penanggul.
Beri penemu nuan senentang pekara di atas nya.

***********Tubuh kitai mensia begunaka gula. Semina bekenaka guna ti kelalu mayuh ulih meri penanggul ba kelebih agi ba timpuh dudi hari ila. Orang ti enda ulih nagang diri ari ti bekenaka gula ti mayuh deka bulih penyakit sereta tu nanggul pengidup sida besehari- sehari. Tu mih pekara ti patut dikenangika kitai semua.

**********Ke bendar iya, gula endang mai pemanah ba industri pemakai. Pemakai ti ngundan gula deka lebih tan lama agi enti lebuh disimpan. Kelimpah ari nya, asai pemakai nya mega lebih nyamai sereta manis diempa.Ambi ke banding, pemakai ti pait enda dikerindu kitai bebanding iya ti manis. Pemakai ti begula endang pemakai ti ngasuh kitai masuk makai pemakai nya.

**********Ari nya mega, gula endang dikena ngaga ubat-ubat ti nyamai ditelan bala anak mit. Kitai sama nemu, anak mit endang rindu pemakai ti manis. Anak mit mega nyamai diberi ubat lalu tu ngasuh sida jampat gerai. Enti nadai ubat ti manis, tu pulai ke pemedis apai indai meri anak sida makai ubat.Pia mega, gula dikumbai glukosa suah digaga nyadi meri tenaga ngagai orang ti sakit.

**********Gula ti dikena kelalu mayuh tauka diguna sepeneka ati tau meri penusah. Siti ari pengerusak ari gula iya nya gigi kitai jampat rusak.Pemakai ti mayuh gula ulih ngerusakka ngeli kitai. Enti pekara tu enda dijaga, kitai deka jampat agi nadai ngeli laban jampat rusak. Nya alai kurangka pemakai ti manis ngambika ngeli tan lama dikena nyentukka tuai.

*********Siti agi penusah deka nuntung enti kelalu mayuh nguna gula iya nya deka jampat kena penyakit kronik. Penyakit ti bepun ari gula iya nya penyakit diabetes enggau penyakit jantung. Penyakit kemi manis nyadi ketegal mayuh nguna gula. Kebuah pia, gula ti dikena ngelui ari ke patut. Nya mih nyadi gula ti lebih tadi disimpan dalam tubuh nyadi lemak lalu nekul darah lanchar bejalai. Tu ngujungka orang ti kena penyakit jantung tu ulih kena strok tauka nabanka nyawa.

********Ke pengujung iya, gula tu ukai siti ari utai ti amat dikena tubuh kitai. Penyampau gula ti patut dikena tubuh kitai ukai nya mayuh endar. Kitai semua patut betagang diri empu ari makai pemakai ti manis sereta ngundan gula ti mayuh. Sebarang sapa ti ngena gula ti mayuh endang deka bulih penyakit dudi hari ila. Ari diatu, sama-sama mih kitai riri pemakai ti kurang manis sereta seruran nyaga pengerai tubuh diri..

Karang Pelaba PMR

Karang- 2011
Rampa menua ti beresi amat beguna ba pengidup kitai.
Beri penemu nuan senentang chara-chara ti patut digaga dikena nyaga pemeresi rampa menua.


                Ke diatu, mayuh pemansang nyadi ba menua kitai. Taja pia pemansang tu bisi mai penanggul ba kitai empu kelebih agi ba pemansang industri. Ketegal ti deka ke pemansang, dia kitai enda tepedaka rampa menua ti kena pangka ketegal pemansang. Kitai semua bisi tanggung pengawa kediri empu dikena nyekat pemansang tu ngerusakka rampa menua. Rampa menua ti beresi lebih agi beguna ari pemansang ti digaga sepeneka ati. Nya alai sama-sama kitai ngatur chara ti patut dikena nyaga rampa menua.

                Siti chara ti patut digaga dikena ngetanka rampa menua ti beresi iya nya ngurangka barang kimia. Kebuah pia, utai ti ngundan kimia tu ngenataika pengamah. Utai ti ngundan kimia meri pengerusak ngagai rampa menua. Ambi ke banding, orang bumai ti bekenaka rachun rumput. Pia mega sida ti bekenaka rachun indu utai. Semua nya tadi balat bendar meri pengerusak ngagai rampa menua. Siti ari kebuah iya nya lapis ozon majak nipis. Tu ngujungka kitai deka majak berasai angat. Nya alai, betagangka ngena bahan kimia tu ulih ngetankan pemanah rampa menua kitai.

              Kelimpah ari nya, undang-undang di menua tu patut diteritka agi. Tu mega siti chara nagang pengerusak rampa menua majak nyadi. Chara ke baka tu amat patut dikena ngambi rampa menua meruan menyana. Kilang-kilang ti enda nitihka atur pemeresi enggau pengelikun nyaga rampa menua patut diketuka. Kebuah pia, asap ti dipansutka kilang nya ngeruga pemeresi rampa menua. Ai kamah ari kilang tau ngujungka sungai kamah. Pengujung iya, ikan deka majak punas. Nya mih kebuah undang-undang patut diteritka. Tu ulih ngurangka kilang-kilang ngeluarka mayuh asap sereta enda muai sengapa ai kamah betoksik.

             Chara bukai ti patut digaga iya nya program ngena baru barang tebuai. Tu siti ari kimpin perintah menua dikena nyedarka orang mayuh nyaga rampa menua. Barang-barang tebuai ti ulih dikena baru tu meri mayuh penguntung ngagai semua orang. Barang-barang tebuai ti diproses baru ulih dikena baka barang ti baru dikena. Ambi ke chunto, surat kabar anang ditunu. Enti iya diproses, iya deka nyadi tisu. Pengawa ti tu ulih disemaka kitai “sambil nyelam ngirup ai”.Kelimpah ari ti nyaga rampa menua, iya tau ngurangka ungkus ngeluarka barang-barang.

               Siti agi chara ti patut digaga kita ngambika rampa menua meruan menyana iya nya bepun ari sekulua. Bala nembiak diajar chara nyaga rampa menua. Di rumah ajar tu ditampung apai indai. Apai indai seruran ngelalu bala anak nyaga rampa menua. Enti pekara tu digaga, kitai bisi penyedar nyaga pengelikun ari mit agi. Tu ulih ngemudahka kitai nyaga rampa menua. Ari mit nyentukka tuai besai bisi penyedar nyaga rampa menua. Nya alai, kitai endang patut sedar pasal rampa menua mesti dijaga.

               Ke pengujung iya, pengawa nyaga pemanah rampa menua tu ukai kereja siku aja. Kitai semua mesti bekereja sama ngetanka pemanah rampa menua. Ukai semina perintah tauka Opis Pemeresi Rampa Menua tang semua kita patut berat-rat nyaga pemeresi rampa menua. Rampa menua ti kamah mayuh meri penusah. Rampa menua ti manah sereta beresi mayuh meri pemanah ngagai kitai semua. Sama-sama mih kitai nyaga rampa menua.