Thursday, December 10, 2015

Karang Kedut 6.0

Bacha enggau silik teks di baruh tu. Udah nya tulis karang kedut. Pemanjai karang kedut nya enda tau lebih ari 100 leka jaku.


        Kemaya hari tu, nyau serap anak mit dianjung ke sekula. Kebuah pia, apai indai ngarapka anak sida nyadi orang ti menyana sereta mujur dalam pengidup dudi hari ila. Ba menua kitai, mayuh endar jalai ti muntang ngulihka pemujur dalam pengidup tang nembiak enda nguna iya enggau manah. Nya alai, orang ti patut ngiring ngembing nembiak tu tau mujur dalam pelajar sekula enda lebih ari apai indai diri empu. Ari nya tadi, apai indai patut enggau naka ulih bejalaika tanggung pengawa diri dikena ngemujurka anak diri.
         Ke diatu, mayuh anak ti besekula enti nitihka pengawa ti lurus tang deka agi nitihka bala pangan bukai ngereja pengawa ti enda betul kelebih agi enda belajar ba kelas. Nembiak rindu agi enda datai ke sekula, enda nembuka kereja diberi pengajar, ngelaban pengajar enggau mayuh agi. Beduduk ari pekara nya, apai indai patut meri jaku ajar ngagai anak diri. Nya mih tanggung pengawa ti patut digaga apai indai ngambika anak sida enda tepejuh ngagai pengawa ti lari ari tuju asal besekula. Jaku ajar ti diberi ngagai anak ukai jaku ajar ti kasar sereta nganu tang lebih ngagai jaku siru sereta lembut. Kelimpah ari nya mega, apai indai patut ngatur jam belajar anak ba rumah. Anang ngelakka anak muai jam ngereja pengawa ti enda beguna. Enda salah anak bepedaka televisyen tang anang nyau nadai awak belajar. Anak mesti bisi belajar ba rumah kelimpah ba sekula. Nya alai, apai indai mesti ngaga taga jam ke anak sida. Enti pekara tu dipejalaika enggau manah, dia anak sida ke mujur dalam pelajar sekula. Kebuah pia, anak ulih tetitihka atur jam belajar ti digaga apai indai ba rumah.
             Anak ti endang reta ti pemadu berega ngagai apai indai. Apai indai patut nemu ngemesaika anak diri tu endang baka ti megai telu. Ari nya tadi, apai indai patut betunggang lupung enti deka anak sida mujur ba pelajar sekula. Apai indai patut beambis duit dikena nyengulaka anak diri. Pemerinsa ukai ketegal anak diketuka ari neruska pelajar sekula. Enti pia, anak sigi enda ulih mujur ba pelajar sekula laban ditagangka neruska pelajar sekula ngagai tikas ti pemadu tinggi. Ba pekara nya, apai indai patut bisi duit simpan ke ungkup anak sida kenyau anak nya agi mit. Enti bisi duit simpan, anak nadai penanggul neruska pelajar sekula ngagai universiti. Enggau nya, anak sida ulih mujur sereta nyadi orang ti menyana dudi hari ila. Sempama “labang apai, labang ga anak” endang mandangka ulah apai indai ti dititihka bala anak. Enti apai indai ngayanka ulah ti enda manah, dia anak mega ngayanka ulah ti enda manah. Nitihka penemu ti bekaul apai indai enggau anak, tanggung pengawa apai indai iya nya ngayanka ulah ti manah. Ulah ti dititihka anak tu enda mai penusah sida lebuh besekula. Enti apai ngayanka diri nginsap, dia anak deka nunda ulah nya lalu mai disiplin ti enda manah ba sekula. Pengujung iya ila, anak deka enda besekula laban ngelanggar atur sekula. Juluk ati deka ngasuh anak mujur deka puntan. Bepun sehari tu, ayan mih ulah ti manah ngambika anak nunda ulah nya.
           Nitihka penemu sains, untak ti cheregas nyadika kunchi penajam runding siku-siku mensia. Ari nya, indai. Ari tu, apai indai patut ngepunka anak sida makai pemakai ti manah ke untak enggau pengerai. Indai patut nyaga pengerai berengkah ari sida tu benung ribat. Indai mesti chukup pemakai ngambika anak ti anak ila bepengerai sereta tajam runding. Anak ti suah sakit lengit ngujungka sida enda ulih datai ke sekula sereta tinggal pelajar. Nya alai, apai indai patut meri pemakai ti manah ngagai anak diri enti deka meda anak sida tu pintar sereta ulih nerima pelajar ari pengajar. Enda salah apai indai meri vitamin ngagai anak laban nya ngasuh sida majak landik sereta tajam runding.
           Ke pengujung iya, apai indai endang bisi tanggung pengawa ti besai dikena ngasuh anak mujur ba pelajar sekula. Anang nejuka pengawa ngajar bepanggai ba pengajar aja. Anang mega nyalahka pengajar enti anak enda mujur ba pelajar sekula. Ibun mih anak enggau manah sereta iring mih sida ngambika ulih mujur nyadi mensia ti beguna dudi hari ila. Saup mih pengajar ti bebendar ngajar sida tu.

Karang : Pemesai Guna/Penguntung Industri Betanam Betupi

Langkar Karang
Pemuka karang:
- pengawa betanam betupi tu batang pengawa ti dikereja ari dulu kelia
- betanam betupi diatu jauh udah berubah ari dulu kelia.(Chunto: perengka dikena, chara ngereja, etb)
- Sekeda pengawa betanam betupi digaga ba menua tu baka bumai, bekebun getah, nupi ikan, etb)
- perintah endang sigi meransang pengawa betanam betupi.
-Pengawa betanam betupi mai mayuh penguntung.

Isi Karang (5/6 isi)
Isi 1: Nambahka penatai pemisi menua
- ulih nyual asil betanam betupi ngagai menua luar.( chunto: nyual sawit, getah, ikan)
- penatai pemisi betambah ulih dikena ngaga mayuh macham pemansang (chunto: sekula baru, jalai raya baru, sepital baru, etb)
- menua majak maju ( ulih nyadi menua mansang enggau maju ba taun 2020)
- rayat diau enggau ati ti senang lantang.

Isi 2: Nyendiaka mayuh macham peluang gawa ba industri betanam betupi
- ngurangka penanggul rayat ti enda bekereja.
- mayuh macham batang pengawa ba industri betanam betupi. ( deriba lori sawit, menija sawit, etb)
- pengidup rayat enda merinsa agi laban bisi pengawa ba industri betanam betupi.
- ulih bebeli mayuh macham barang laban bisi duit gaji.

Isi 3: Pun penatai pemakai
- semua barang pemakai di dunya bepun ari pengawa betanam betupi.
- pemakai ti bisi dijual ba pasar asil ari pengawa betanam betupi.
- pemakai ti chukup beguna bendar ngambika kitai enda pungkang enggau suntuk.
- pengawa betanam padi chukup mayuh dikereja laban nyadika pemakai selama mensia.
- kurang padi deka ngasuh suntuk beras.
- chukup pemakai, kitai enda lepi

Isi 4: Ngemansangka menua pesisir.
- perintah ngaga jalai ngagai menua pesisir.
- jalai digaga dikena ngangkut asil betanam betupi dijual ke pasar.
- Pemansang bukai ( ai beresi, kuasa karan, etb)
- Chunto asil betanam betupi ti dijual ke pasar baka petai, rian, sibau enggau mayuh agi.
- rayat menua pesisir kena rampit pemansang ti digaga perintah.
- pemansang ba menua pesisir enggau pasar lebih kurang sama lalu enda jauh tinggal.

Isi 5: Mantu ngurangka pengangat dunya
- dunya majak angat laban mayuh karbon dioksida.
- utai tumbuh ulih ngurangka karbon dioksida tang nambahka oksigen
- industri betanam betupi tu pengawa nanam utai tumbuh.
- rayat idup enggau menyana.
- pengerusak rampa menua enda balat nyadi

Penutup
- industri betanam betupi mesti dikemansangka ari diatu
- nembiak rebak baru patut diiri penemu industri betanam betupi ngena chara moden
- perintah patut nulung ngangkatka indutri betanam betupi.
- Menua kitai ulih tampak rita ketegal ti nyulut ba pengawa betanam betupi dudi hari ila.
- Pengawa betanam betupi ukai semina ungkup diri sebilik aja tang bisi juluk ati deka ngasuh iya ngagai tikas ti tinggi agi.

Chunto Surat Minta Biasiswa Sekula

Tanya Karang:
Nuan bisi ati deka ngisi pom biasiswa ungkup nembiak sekula. Tulis siti surat nuju Pengetua dikena nyempulang pom nuan nya. Beri kebuah nuan enggau orang bukai minta biasiswa tu.



Chunto Saut:

Kelas 5 Nyulut
SMK Bukit Segenggam,
98000 Miri.
Sarawak

_______________________________________________________________________________

Pengetua,
SMK Bukit Segenggam,
98000 Miri.
SARAWAK 4 JANUARI 2015

Tuan,

Kebuah Deka Minta Biasiswa

Belalauka pekara di atas, enggau basa ti besai ngarapka tuan ulih nerima peminta aku tu. Aku benama Raynold Ulin anak Ulis, ari Rh Menti anak Junang, Ulu Tamang. Diatu, aku belajar ba kelas 5 Nyulut. Aku ngarap amat peminta tu ulih dikemendarka tuan. Aku nyempulangka mega pom ti udah diisi sereta surat sukung ari tuai rumah.


2.     Tuju aku minta biasiswa tu laban ngambika ngelempungka belanja sekula. Kami menyadi bisi enam iku. Aku anak ti lumur dua tuai. Iya ke tuai benung nyambung pelajar ba Universiti Malaya, Kuala Lumpur. Bala madi aku ke biak ti bukai agi besekula magang. Apai aku semina bekereja nangkal getah. Indai aku nadai bekereja. Enggau biasiswa ti diterima tu ila, aku ulih ngelempungka belanja sekula kami menyadi.


3. Kelimpah ari nya, aku mega ngarapka bulih bisiswa tu laban ti suah ngarika sekula ba mayuh macham aktiviti. Enti bulih bisiswa tu ila, bisi ga duit dikena aku nyikap diri baka bebelika kasut, baju enggau perengka ti bukai. Ari nya tadi, biasiswa tu ulih mai pemujur. Enggau nya tadi, nama sekula pan deka majak tebilang sereta dikelala orang mayuh.

4.     Aku mega ngarapka tuan nerima peminta tu laban ti suah mujur dalam peresa sekula. Ba kelas 5 Nyulut, aku aja ti nadai bisi nerima bantu biasiswa ari perintah. Sida ke bukai bisi ampit nerima biasiswa baka Yayasan Sarawak, Petronas, Telekom enggau mayuh agi. Enti bulih biasiswa tu ila, aku deka meli mayuh macham kereban sanding. Pemujur ba peresa pan ulih manah semanah.

5.     Nambahka nya, aku ngarapka peminta bisiswa tu bulih laban ti enda kala ngelanggar atur sekula. Aku tu ukai raban nembiak ti suah enda nitihka atur sekula. Ukai semina nya aja, aku mega suah meri jaku ajar ngagai bala nembiak bukai ti ngembuan disiplin enda manah. Nya alai, aku arap bendar biasiswa tu ulih ngentapka agi displin ba sekula. Ari nya mega, iya ulih nyadika peransang diri nulung nembiak bukai ti enda ngembuan disiplin ti manah.

6.      Kelimpah ari nya, aku ngarapka bulih biasiswa tu laban apai aku ti suah mantu pengajar. Iya siku ari raban gerempung apai indai. Semua pengawa ti dikereja iya nadai bebayar. Mayuh pun bungai udah ditanam raban apai indai. Apai aku mega udah nulung ngechat semua kelas ba sekula tu enggau enda bebayar. Enti aku bulih biasiswa tu ila, iya bedanji seruran nulung bala pengajar ba sekula tu.


7.       Ke pengujung iya, aku ngarapka semua pekara tu tadi ulih dipeda tuna enggau silik. Aku arap tuan ulih peminta biasiswa tu bulih pemujur. Aku mega bedanji deka belajar enggau bendar agi ngambika bulih pemutus peresa ti manah sereta nyaga ulah diri lalu seruran mantu sekula. Enggau tu, sebarang pemutus runding ari tuan, meri besai terima kasih.


Nya aja, terima kasih.

Aku ti bendar,

Raynold  
...........................
(Raynold Ulin anak Ulis)
Nembiak Kelas 5 Nyulut




Asil karang: Alexander Tan (5B)

Isi Karang Pelajar Jaku Iban Sekula Sekondari

Sekeda Rintai Karang Jaku Iban Sekula Sekondari

1.Chara sekula ulih ngemujurka nembiak
-Pengetua ti landik sereta nemu ngatur pengawa
-Perengka enggau kereban chukup dikena belajar ba sekula
-Pengajar ti chukup sereta landik
-Nembiak ti ransing sereta manah disiplin
-Sukung apai indai enggau orang luar

2.Chara nyaga pemeresi kandang sekula
-Ngatur gotong-royong
-Ngaga kimpin nyaga pemeresi sekula
-Ngatur pekit kelas pemadu beresi
-Nyediaka taga jam meresika kelas enggau kandang sekula
-Neritka atur sekula

3.Chara nyadi nembiak ti menyana sereta beguna
-Belajar bebendar
-Nitihka ajar jalai pengarap
-Begulai enggau kaban/orang ti manah ulah
-Bebasa ke orang tuai
-Ulih nerima jaku peransang enggau jaku ajar

4.Penguntung ngambi bagi aktiviti sukan ba sekula
-Ngisi maya lepa
-Tubuh semampai regas enggau bepengerai
-Ngeririka diri bedisiplin
-Ngerapitka kaul enggau orang bukai
-Ngulihka setipit/ngarika sekula ba lumba enggau main

5.Chara nyadi nembiak ti mujur ba pelajar sekula
-Ngembuan disiplin ti manah
-Ulih belajar kediri
-Ngembuan pengerindu macha
-Rajin ngulang pelajar
-Aktif ba kokurikulum

6.Chara Ngurangka Kes Nembiak enda datai ke sekula
-Neritka atur sekula
-Tanggung pengawa apai indai
-Pengajar ngajar ngena chara ti ngerinduka/ulih narit nembiak belajar
-Ngatur program ti ulih narit ati nembiak ke sekula
-Polis bejalaika pengawa nangkap nembiak ti sengaja enda datai ke sekula

7.Kebuah nembiak majak kurang bedisiplin
-Kurang penyayau ari apai indai/enda dikeibuhka apai indai
-Kena rampit pangan serambau/salah pilih pangan serambau
-Undang-undang enggau atur sekula ti enda terit
-Mayuh nerima tempias ti enda manah ari luar- televisyen, internet
-Nadai pengibuh ari mensia mayuh


8.Penguntung nyereta/ngulu program motivasyen
-Ngambika lebih ransing agi belajar
-Bekelala enggau nembiak bukai
-Ngulihka mayuh macham penerang ti beguna
-Ngisi maya lepa
-Ngemanahka ulah/nyeliahka pengawa ti enda menuku

9.Pemesai guna belajarka jaku Iban ba sekula
-Jaku enda mudah punas
-Bisi peluang gawa ba profesion ti bisi kait enggau jaku Iban
-Jaku ulih nyadika identiti/kelai siti-siti bansa
-Ngerapitka kaul enggau bansa iban di menua bukai
-Ngambika jaku iban ulih nyadi jaku rasmi dudi hari ila


10.Pemesai guna main asal
-Identiti/kelai/penyelai siti-siti bansa
-Dikena merindang diri
-Narit temuai luar
-Ngerapitka kaul
-Ngisi maya lepa

Karang Rama 1.0

CHARA NGEMANSANGKA MAIN ASAL BANSA IBAN
Asil: Nelson Lenggi (5B)

Kemaya hari tu, main asal bansa Iban nyau majak punas. Ari pekara tu, nembiak rebak dudi ila enda nemu agi pasal main asal ti majak punas. Beduduk ari nya, patut bisi chara ti ulih dipejalaika ngambika pekara tu enda nyadi senyadi. Ari nya tadi, main asal ulih ditanka ari diatu nyentukka jemah ila laban udah bisi chara ti betul sereta semitan. Nya alai, chara-chara ti nangkanka tu dikarapka ulih ngemansangka main asal bansa Iban.
Keterubah iya, apai indai patut ngajar anak pasal main asal lebuh belabuh ari mit. Kebuah pia, anak riri sereta teleba pasal main asal bansa diri. Nengah chara tu, anak mit deka bisi pengerindu ngagai main asal diri diri. Apai indai patut mai anak sida bemain main asal baka main pangka, main selingkut enggau mayuh main asal ti bukai. Enti apai indai ngemeranka tanggung pengawa tu, main asal tu ulih ditanka ari terus punas dudi hari ila.

Nangkanka nya, siti chara ke bukai dikena ngemansangka main asal bansa Iban iya nya ngatur pekit main asal. Main asal baka nyumpit enggau bebatak lampung ulih diangkat nyadi main ti ulih datai ngagai tikas antara bansa. Enti bisi pekit diatur, ukai semina bansa Iban aja deka ngambi bagi tang mega ngerampit bansa bukai. Enggau nya, main asal tu ulih mansang semansang. Kebuah pia, main asal tu majak ditemu sereta dikelala mayuh raban bansa. Iya mega ukai dikerindu bansa Iban aja tang mega bansa bukai.

Kelimpah ari nya, chara bukai ti patut digaga dikena ngemansangka main asal iya nya numbuhka aktiviti main asal ba sekula. Kelab main asal patut ditumbuhka enda ngira ba sekula primari tauka sekondari. Nembiak ulih belajarka main asal nengah aktiviti kokurikulum ti dipejalaika ba sekula. Dikena ngepun pengawa tu, kelab ti ulih narit nembiak baka main asal nyumpit endang patut ditumbuhka dulu sebedau main ke bukai baka kelab tabuh enggau mayuh agi. Ari nya tadi, nembiak sekula nemu sereta rinduka main asal nya tadi.

Nambahka nya mega, perintah patut ngatur kimpin rinduka main asal. Kimpin ke baka tu dikena narit mensia mayuh rinduka main asal bansa diri. Chara ke baka tu endang siti chara ti chukup manah. Kimpin ti dipejalai nengah surat berita, televisyen enggau radio endang ulih ditemu serap mensia. Ari nya tadi, mensia mayuh deka rindu agi ke main asal laban udah bisi kimpin ti dipejalaika perintah sepemanjai taun. Sida mega ulih ngeleda laban main asal tu mega bisi mai penguntung.

Chara ke bukai ke tau dipejalaika dikena ngemansangka main asal iya nya ngatur promosi. Enggau chara tu, main asal deka laku lalu dikerinduka mensia mayuh. Temuai luar datai ke menua kitai endang deka meda penyelai ti bisi ba menua tu. Kitai patut ngambi peluang ngayanka main asal bansa diri ti empai dipeda temuai luar. Tu ulih nyadi siti promosi ngagai orang bukai lalu ukai semina ngagai temuai aja. Enti promosi tu dipejalaika enggau manah, dia tiap raban bansa enggau naka ulih mantaika main asal diri empu. Kebuah pia, ngambika main asal sida ulih dipeda temuai luar. Enggau tu, main asal enda mudah punas pia aja.

Ke pengujung iya, semua pupu raban bansa enda tau nejuka main asal bansa diri punas lalu terus lenyau. Kitai enda patut disemaka baka kachang ti enda ingatka umbang laban ninggalka identiti bansa diri. Kitai sama ngarapka perintah terus nyukung program ngetanka main asal. Nya alai, enti main asal tu ulih ditanka dia semua kitai bulih penguntung iya. Arapka main asal tu terus dikerembaika ari sida ke tuai lalu disambung sida ke biak dudi hari baka rutan tampung danan, wi tampung tali, pechah periuk tanah, ganti periuk tani, parai sida tuai nganti nembiak dudi.

Monday, August 31, 2015

Meretika Teks (2.0)

Bacha enggau silik genteran teks tu. Udah nya saut semua tanya ti nangkanka nya.

Apai tuai Jana rindang beransah. Iya ngansah lungga penutus. Diansah iya tajam-tajam. Nya baru ngilir lungga nya ba batu linchin. Dikilir tajam-tajam. Diuji-uji ba bulu lengan iya empu. Bekeberai putus. Nyau nyilu asai tungkul ati beratika penajam lungga penutus. Jampat ketap kedap. Rentak-rentak dada, belematika lungga nya lagi dikena tukang tutus bedengahka kami lima.
            Apai tuai Jana endang tukang tutus tebilang. Nyau ka semua bujang enggau nembiak rebak baru kami serumah udah nyepi penajam lungga penutus enggi iya. Jari iya mega chelap nutus orang.

         “Bah, niki kitu! Sapa bagi dulu?” Tanya tukang. Agat?Enggai. Igat? Enggai. Arong? Enggai. Anchap?Pan Enggai. Sida semua takut sereta kakang ati.
“Aku dulu apai tuai. Lagi pan betutus mih,” aku mansutka diri ari ai. Chelap pemadu chelap. Tekap pending, empa penyelap. Digak-digak. Seruran begangga dagu. Aku lalu duduk empekang ba atas kah mereba, nunga tukang tutus. Nyerahka diri ngagai iya nunda pemeli buyah ti nabakka diri ngagai api. Tak pejam menchelak.
“Pejamka mata!” perintah tukang. Tekemil asai punggung asai ti digigit kesa. Gemerik.
“Udah! Alai berendam baru!”
Dibuka aku mata. Peda tak mirah chechirak belumur darah. Aku nabanka diri terejun ke ai. Hesssshhh! Nadai utai ngemedis nya. Meliar ai mata laban abi tutus nya bepedi laban ai. Sekejap bekau nya, baru naban diri baru niki ke tebing. Apai, ke nyadi pemantu tukang, lalu ngubat telih ngena ai entemut. Dilapik ngena daun sirih. Baru iya malut ngena kain ini.
            Anchap nangkanka aku. Iya nadai penakal. Maya tukang ngurik, nyawa iya rauh-rauh madahka diri pedis. Madahka diri mati. Lalu nyabak duie-duie. Ulah iya, ngemba sida tiga ke apin. Lalu sida tiga nya tadi lalu ganjang-ganjang niki jalai pendai. Ke ngejungka sida tiga apin betutus rebak nya.
          Dalam kandang seminggu nangkanka nya, enda disagi apai indai betanchut, enggaika abi tutus bedarah kena rindas tanchut. Enda disagi mandi enggaika abi muruk laban ai. Utai bebau baka belachan, budu, bubuk enggau utai bebau dipenti makai. Baka nya mega utai gatal baka bukau, utai miang baka tubu, enda tau diempa enggai abi laun suman.
            Dalam tiga minggu, abi tutus udah suman. Ati berasai bisi pemuas. Sebengkah agi pengawa ti diungkup ke lelaki udah mujur dikereja. Besunat. Kelimpah ari penguntung bukai, besunat ngenuaika bulu. Besunat nanda pemerani.
(Diambi sereta dibali ari Dunya Aku, Janang Ensiring, 1995)


Tanya 1 ngagai 5
Ba siti-siti tanya empat iti pilih saut A, B, C enggau D. Pilih siti saut ti betul nitihka lebas tanya nya.

1 Nama pengawa sida lima iku ti deka ditutus maya apai tua Jana beransah?
A Berunding ngerarika diri ari kena tutus
B Beratika penajam lungga ari tebing ai
C Beasuh-asuh dulu laban enggai ditutus
D Berendam dalam ai

2 Baka ni asai penulis lebuh maya ditutus apai tuai Jana?
A Meliar ai mata
B Seruran bedangga dagu
C Tekemil asai punggung
D Rauh-rauh madahka diri pedis


3 Sapa ti enda nyadi betutus?
A Igat, Anchap enggau Arong
B Agat, Igat enggau Arong.
C Agat, penulis enggau Anchap
D Igat, penulis enggau Anchap

4 Pemakai ti dibaruh tu “utai gatal”?
A belachan
B tubu
C bukau
D bubu

5 Siti ari pekara di baruh tu ukai kebuah pengawa besunat tu beguna ba sida ke lelaki?

A Ngambi jampat bebini
B Ngasuh ngenuaika bulu
C Nanda pemerani diri
D Nyadi ke tanda pengawa orang lelaki ti udah mujur dikereja

Tanya 6 ngagai 10
Saut tanya di baruh tu ngena ayat penuh.
6 Nama kebuah apai tuai Jana ngansah lungga enggau naka iya penajam?


7 Nama kebuah apai tuai Jana ngasuh penulis mejamka mata?

8      Nama reti leka jaku ngurik ?

9 Rintai tiga penti udah besunat?

10   Ba penemu nuan, nama kebuah orang diatu jarang betutus ngena chara lama?



KARANG KEDUT (5.0)

Pengidup enggau Pengawa

Bacha enggau silik teks di baruh tu. Udah nya tulis siti karang kedut. Pemanjai karang kedut nya enda lebih ari 100 leka jaku.

           Pengereja pengawa menua luar majak mayuh ba menua kitai. Nitihka padah ari Menteri Pengatur Pengereja Pengawa, Datuk Seri Richard Riot, 6.7 juta pengereja pengawa menua luar diambi bekereja dalam taun tu kemari. Mayuh sida tu asal iya ari Indonesia, Bangladesh, Myanmar enggau Nepal. Pengereja pengawa ari menua luar tu suah dipeda kitai gawa ba kilang, kompeni sawit enggau nyadi ama. Taja pan penatai pengereja pengawa tu ngelanchar pemansang ba menua kitai tang bisi mega mai empas ti enda manah.
        Tuju pengereja pengawa bekereja di menua kitai laban ngulihka pengaya enggau jampat. Ari nya tadi, sida sanggup ngereja sebarang pengawa enda ngira pengawa betul tauka salah. Nya alai, majak kurang pengelikun baka kes ngerumpak, kes bebunuh enggau kes ngenchuri suah nyadi ba tempat ti mayuh alai pengereja penggawa menua luar. Tu mih empas negatif ti nyadi ketegal mayuh pengereja pengawa ari menua luar. Kelimpah ari nya, mayuh mega pansik madahka rayat di menua tu majak enda rindu meda pengereja pengawa menua luar ti udah kelalu mayuh. Peluang gawa rayat menua tu nyau majak nadai. Kompeni deka agi ngaji pengereja pengawa ari luar laban gaji mit. Nya alai, rayat menua tu dikurangka sereta ditambah enggau pengereja pengawa menua luar. Rayat di menua tu baka sempama “kunchit di tisi langit di tuju, rusa di pala tangga enda ditunu” laban enda dikeibuhka sereta enda diambi gawa.
        Kelimpah ari nya, kitai mega mayuh pengirau lebuh pengereja pengawa menua luar diambi gawa ba menua kitai. Sida tu bisi nya mai igi penyakit ke menua tu. Nitihka penerang ari Serakup Pengawa Berubat Malaysia (MMU), penyakit berampit baka malaria, batuk rangkai enggau H1N1 tu nyadi bisi kait enggau penatai pengereja pengawa menua luar. Ukai semina nya aja, pengereja pengawa menua luar tu dipeda suah ngayahka indu di menua tu. Gamal sigat baka Shah Rukh Khan enggau Salman Khan tu mih dikena ngumpan indu di menua tu. Indu dara nyau abis pengerindu ngagai pengereja pengawa menua luar tu. Bisi nya indai orang nyau minta sarak ari laki sida ketegal ti udah ‘labuh pengerindu’. Tu mih ‘penyakit pengerindu’ ngagai pengereja menua luar majak nyadi sereta ngirauka ati.
       Enti diperatika enggau silik, pengereja pengawa ti bekereja ba menua kitai kurang ngena belanja ti diterima sida. Duit tu deka dikirum ngagai menua asal lalu dikena ba menua sida din. Tu mih pengerugi ti majak nyadi enti mayuh pengereja pengawa ari menua luar. Nitihka pansik, penyampau RM6 bilion duit ke luar. Pengerugi iya laban pengereja penggawa tu nadai melanjaka duit sida ba menua kitai. Enti tu majak nyadi, menua kitai majak nadai mudal agi laban duit majak ke pansut ngagai menua luar.
      Nya alai, pengereja pengawa ari menua luar patut dikurangka sereta diganti enggau rayat di menua tu empu. Kebuah pia, mayuh amat pengerugi ketegal ti bekenaka pengereja pengawa ari menua luar.

Saturday, August 29, 2015

ENSERA TEKURA

"Pisang Tekura"

      Bala jelu mupuk bepangan baru. Sida badu agi ringat ngagai Pelanduk seduai Tekura. Hari siti Beruang mai Tekura berumah. Seduai betampung dua pintu aja. Seduai lalu mupuk beramu. Ramu pan chukup, rumah pan lalu dientakka seduai. Lebuh rumah udah tembu, seduai lalu ngiga utai bukai ke dempa. Terubah Tekura nurun lalu dititihka Beruang.

       “Enda pia, manah tua mupuk bekebun pisang. Enda manah tua beridupka buah kampung,” pia ku Beruang. “Amat kena runding nuan, Sambi,” pia ku saut Tekura. Beruang seduai bulih seduai lalu nanam tambak pisang semak rumah seduai. Nyadi pisang Beruang enda tau besai laban mayuh diempa iya upa. Enggi Tekura galak bendar. Diatu, pisang Tekura mupuk bebuah. Lama agi, majak mayuh ga pisang Tekura mupuk bebuah. Lama agi, mayuh agi ga pisang Tekura nungkul tang pisang Beruang lalu nadai bebuah. Lebuh Beruang meda buah pisang Tekura nyau midar, reti nya baru kuning, iya lalu minta diri niki pisang nya. “Oh! Sambi. Uji aku niki buah pisang nuan nya ke diempa tua,” pia ku Beruang.

“Oh! Oh! Enda tau Sambi. Tua ga sama bisi pisang ke diri empu,” pia ku saut Tekura. Nyadi Beruang, nemu pisang diri enda tau bebuah laban selalu diupa iya. Iya majak madahka diri deka niki buah pisang Tekura. Pia mega Tekura sayau ke pisang iya ditiki Beruang.

            Nyau kepuas seduai bekelikuhka nya, dia Beruang enda liat ati lalu niki pisang Tekura. Nama dih jaku tudah Tekura tak besap-besap mata ngilaka Beruang niki buah pisang iya. Lebuh datai ba puchuk, dia Beruang lalu bepakaika buah pisang. Kupak seleka, tikau ga umbang. Anti Tekura meri enda ga meri. Dia Tekura lalu nyabak teki-teki:
“Hi-hi! Umbang embuang
Isi enda embui
Hi-hi Umbang embuang
Isi enda embui!”

             “Eh! Nama agi dianti aku ditu. Buah pisang udah ga abis diempa Beruang,” pia ku putap Tekura. Kenyau ari hari nya iya ngiga akal dikena iya malas penyai Beruang. Antara dua-tiga hari udah nya, dia seduai sama-sama nurun ngiga buah ke kampung. Diatu Tekura udah bulih akal. Lebuh iya tepedaka unak semambu, dia iya ngaitka kapir iya ba unak. Iya lalu betayun-tayun ba unak nya nimang diri munyi tu:
“Ayun! Uang ayun!
Upa uyas ungkol isang!
Ayun! Uang ayun!
Upa akai uah isang!
Oh! Nyin apai betugal kurung
Bebaju burung
Oh! Nyin indai betanggui seraung
Beseluk lintung
Naka pengelenggau ati
Ke apai seduai indai
Naka udah meda baka tu
Pan pama mih !”

         “Eh! Sapa dipeda nuan dia, Sambi?” pia ku Beruang. Tekura enda nyaut, tang majak nampung nimang diri. “Oh! Sambi! Sapa dipeda nuan dia?” pia ku Beruang. “Eh! Apai seduai indai enggau sida bukai sama benung nugal di sebayan din,” pia ku saut Tekura sikuk-sikuk ngaga diri nyabak, sinu ati.

         Dia mih Beruang bengap-bengap ngemataka Tekura berua tunsang ba unak semambu, enda badu-badu nimang diri. Beruang nyau enda liat ati agi. Iya mega keran deka meda sebayan nugal baka ke dipeda Tekura.

         “Uji aku ga berua dia Sambi?” pia ku Beruang. “Oh! Enda nuan tau!” pia ku saut Tekura. “Tubuh nuan berat. Tambah mega, enggai ke sebayan tak lari meda pemesai gamal nuan,” ku iya. “ Enti nuan enda ngasuh. Aku tarit nuan ari nya lagi,” ku Beruang. “Anang nuan nguji berua baka aku, enggaika nuan tak bebadi ngapa,” ku Tekura. “Enti sema aku tak mati labuh ari nya lagi, nadai ku enggau iya. Jampat agi ga betemu enggau sida apai sida indai di sebayan din,” ku Beruang.

       “Barang iya! Enti nuan tak keras, enda ga aku nagang nuan berua,” pia ku Tekura. Udah nya, Beruang lalu niki ngagai randau semambu. Unak iya pan panjai. “Nuan bepegai rat ba randau semambu tu. Aku ngachukka unak ba burit nuan,” ku Tekura. “Au, jampatka agi, awakka lengkas meda sida apai din,” pia ku Beruang.

        Tekura lalu ngachukka unak ba burit Beruang. “Bisi nuan meda sida apai enggau indai nuan di sebayan din?” pia ku tanya Tekura. “Tak lalu nadai ayan sida tu,” pia ku Beruang. “Anang guai,” pia ku Tekura. “Apin chukup dalam unak tu.” Beruang rauh-rauh madahka diri pedis, Tekura enda ibuh. Udah nya, tak lalu ditayunka Tekura. Peda tak merubus perut Beruang pansut ditarit unak.

             Enda lama udah nya, Beruang pan lalu bekalih tunsang. Dinga nyawa iya tak merap sekali agi. Udah nya lalu enda engkeretik agi. “Lapa nya dih Sambi?” Tekura nanya tang Beruang enda nyaut agi. Iya udah mati.

        “Ukai semina ulih meda sida sebayan nugal sambi tu, tang lalu enggau sida din,” pia ku Tekura gaga meda Beruang udah mati. Tekura lalu mulaika diri ngagai rumah iya empu. Lebuh meda rumah Beruang nadai nguan agi, dia Tekura serebana lalu bejaku enggau diri empu. “Enti nunda, patut bagi bela mih buah pisang. Nya baru ati sama lantang. Tang ga enda sebaka ati, laban bisi amu ari pangan,” ku iya. “Enti asai ati aku diatu, enda aku malas penyai Beruang enggau aku. Tang Beruang ga enda meretika ati orang bukai,”ku iya. Iya lalu bepantun:
“Getil isi orang, getil isi diri”






LATIH A:
Sambung ayat di baruh tu nitihka ensera nya tadi

1.Nyadi pisang Beruang enda tau.............
2.Lama agi, majak mayuh ga...........
3.Lebuh datai di puchuk, dia Beruang...........
4.Dia mih Beruang bengap-bengap.......
5.Tekura lalu mulaika....................


Latih B:
Terangka reti leka jaku di baruh tu:
1.Betampung
2.Beramu
3.Bekelikuh
4.Mupuk
5.Sebayan
6.Ditayunka

Latih C:
Saut tanya di baruh tu ngena ayat penuh.
1.Sapa ti enggau Tekura betampung rumah?
2.Nama kebuah pisang Beruang enda tau besai?
3.Sapa niki pisang Tekura?
4.Lapa Tekura nyabak teki-teki?
5.Nama akal ti deka dikena Tekura?
6.Nama penyadi Beruang ti ditayunka Tekura?
7.Nama reti rambai jaku “getil isi orang, getil isi diri”?
8.Nama ajar manah ari ensera nya tadi

Latih Pindah Penerang (2.0)


Adar: Peratika notis taga jam di baruh tu enggau silik. Ngena penerang di baruh nya, tulis karang pasal program motivasyen ba SMK Tajau Lama. Karang nuan nya patut entara 50 ngagai 70 leka jaku.


Friday, August 28, 2015

Merdeka: Pengerindu, Penyerakup enggau Patriotisme

Kenang Merdeka: Ngelabuhka Pengerindu


          Ninting taun kena 31 Ogos endang nyadi hari besai kenyau ari taun 1957. Berindik ari tu, kitai patut enggau naka ulih ngelabuhka pengerindu ngagai menua diri. Ukai nya senang menua tu ngikaska diri ari kuasa luar maya nya suba. Bansa Indonesia suba merinsa pengelama 350 taun ketegal dipegai orang menua luar. Menua kitai dipegai British dalam kandang 150 taun lalu mai tempias ngagai pengerapit kaul. Bisi nya nyau lesi bebadi ketegal ngetanka menua diri ari pegai kuasa luar. Kitai beterima kasih ngagai bala tuai dulu suba ti mai menua tu merdeka baka ke diatu. Enti nadai sida, kada menua kitai ulih merdeka baka ke diatu. Nya alai, begempung mih kitai nyaga buah merdeka tu. Sulu jaku, kediri kitai lemi, betubuh kitai kukuh sigi tau ngeringka semengat merdeka kemaya hari tu. Ngayanka diri rindu ngagai menua ukai semina ngantung menira maya Hari Merdeka. Ia mega ukai semina dipeda bebaris manah di padang. Pengerindu tu dipeda ari ulah kitai ti ngemeratka sereta kiruhka menua diri.

Ditu Pengerindu belabuh
         Pengerindu tu mai reti bisi pengeransing ati. Iya mega tau dikumbai pengandal ati. Kitai patut bisi pengerindu ngagai menua diri. Kitai gaga ati laban udah diau ba menua tu. Enggau nya, ketegal ti ngembuan pengerindu, pengagit, sereta pengandal ati ke menua diri, kitai enggau naka ulih nyaga menua tu ari kena kachau ari orang menua luar. Ari nya, rayat patut ngelabuhka pengerindu ti enda bebelah bagi ngagai menua diri. Enti bisi pengerindu ti chukup dalam ba siku-siku rayat di menua tu, kuasa luar sigi enda ulih ngeruga sereta ngachau menua kitai. Iya nyadi kuta ti chukup tegap dikena napi serang ari luar.

         Pengerindu, Pengandal sereta penyayau ngagai menua diri ukai semina ba mulut aja. Semua tu mesti dikereja lalu dibantai sereta diayanka ngagai orang bukai. Baka ni mantaika sereta ngayanka pengerindu tu? Arus pemansang kemaya hari tu nganyutka pengerindu ngagai menua diri? Semua tu bepanggai ba diri kitai empu magang. Kitai patut bisi penangi. Nangika menua kitai dipegai menua luar baru. Pekara tu deka nyadi enti rayat nyau belabuh nadai pengerindu ngagai menua diri. Kitai sama enda nemu pekara ti deka nyadi dudi hari. Ari nya sama-sama mih besedia baka sempama “sediaka payung sebedau ujan.”


        Genap iku rayat tu patut ngembuan pengangkun ti chukup tinggi ngagai menua diri. Nitihka penemu Abd. Rahim Abd Rashid (2004) dalam Patriotisme:Agenda Pembinaan Bansa, madahka menua ti maju sereta mansang ulih napi ubah jeman ke-21 bepanggai ba pengering nasionalisme, demokrasi enggau pengawa ti dipejalaika ngambika ulih belematika reti merdeka. Nya alai, semengat patriotisme sereta angkunka menua diri chukup beguna dikena dikena ngenegapka menua tu. Ba taun 2014, Tema Hari Merdeka ke-57 iya nya ‘Malaysia: Ditu Pengerindu belabuh’ endang minta rayat sayauka menua diri sereta ngetanka iya ari menua luar. Orang ngembuan patriotisme iya nya orang ti ngembuan penyayau ti enda bebagi ngagai menua. Penyayau enggau pengerindu nentuka siti-siti menua nya terus maju sereta mansang bediri sama tinggi enggau menua bukai.

Jalai Ngelabuhka Pengerindu

         Pengerindu ngagai menua kitai bepun ari ati. Ari ati din, baru iya ulih ditunda udi enggau ulah. Kitai ukai semina ulih nyebut “Aku Sayau ke Malaysia” nengah leka jaku aja, belagu enggau mandangka ulah ti rindu ke menua diri. Rayat patut taluk ke raja sereta pemesai ti megai menua. Tu mih sekeda jalai kitai mantaika pengangkun ngagai menua diri. Rayat ti temegah ke menua diri mega bebasa lambang menua baka menira enggau lagu besai menua nya. Semengat tu ukai semina bebasa ke pemesai enggau lambang menua aja. Rayat ti angkun sigi enggau naka ulih ngetanka menua diri ari serang munsuh tauka kuasa luar. Kuasa luar tu meri tempias ti enda manah ba pengerapit kaul enggau dunya politik ba menua tu. Tun Dr Mahathir Mohamad kala minta rayat ukai bumiputera sama bela ba raban pengelikun baka soldadu, polis enggau mayuh agi. Nya alai, rayat Malaysia bepegai ba ramba jaku “Menua Kitai Tanggung pengawa Kitai”.


          Rayat Malaysia patut ngembuan semengat rindu begulai enggau sama diri. Reti nya, kitai ulih bekerejasama, sama ulih mantu pangan diri sereta ulih betulung enda ngira bansa, pengarap enggau penatai. 1Malaysia udah ditumbuh dikena nyerakupka semua bansa di menua tu. Kitai semua rayat 1Malaysia enda ngira Melayu, Cina, Iban tauka bansa bukai. Enti udah ngaku diri nyadi rayat 1Malaysia, nya baru ulih ngentapka pengangkun ngagai menua diri. Ulih begulai enggau mayuh pupu raban raban siti ari kebuah menua kitai tetap tegap sereta kebal ari kena kachau menua luar. Pengentap siti-siti menua sigi bepanggai ba pemansang enggau penyerakup raban bansa ti nguan menua nya.

         Apai indai patut ngepun pengerindu ke menua diri. Apai indai patut nyeritaka pasal tuai-tuai ti dulu kelia ti ngelaban orang luar sereta mai buah merdeka baka kemaya hari tu. Lebuh becherita, apai indai madahka pemar orang tuai bulih merdeka ari kuasa luar. Apai indai mega patut nusui pasal penusah orang maya pegai orang luar. Ari nya tadi, anak ulih mandingka penyamai ke baka sehari tu enggau penusah maya jeman pegai orang luar menya. Tunku Abdul Rahman suba enda ngerendut dada aja meda menua kitai dipegai menua luar. Iya bemati-mati ngulihka merdeka baka ke diasaika kediatu. Semua pengawa ti digawa tuai-tuai menya endang ungkup kitai ke diatu. Beduduk ari iya, sumbuk pengerindu ngagai menua deka nyamai agi tumbuh ba anak mit. Betul mih jaku sempama, meleti buluh sigi ari tubu iya. Nya baru, pengerindu ke menua majak galak-segalak.

          Patriotisme ari belabuh ati beguna agi ari patriotisme luar. Patriotisme luar baka nuatka menira, belagu patriotisme enggau begelumu maya merdeka tu semina mantai pengawa lalu sekeda nya enda datai ba lubuk ati din. Pengerindu ke menua sigi senyata ti chukup tajam dikena ngetanka menua ti merdeka. Pekara ti semampai nyau deka sama enggau merdeka iya nya begulai sereta nyerakup semua bansa. Sekeda tema hari merdeka iya nya besatu maju, nasionalisme teras penyerakup, seati sepenemu enggau mayuh agi. Enti nadai penyerakup, tentu menua enda likun baka ke diatu. Penyadi maya 13Mei suba mesti dikingatka kitai. Lebuh nya, rayat enda ulih begulai enggau bansa bukai. Mayuh pengerusak deka nyadi enti kitai nadai pengerindu ke menua diri. Berita perang di menua luar ulih nyadika teladan ti manah ngagai kitai.

         Kitai ulih nunjukka pengerindu ti chukup dalam lebuh sama besaup nyaga pengelikun menua. Polis enggau Soldadu endang sigi orang ti dipadu nyaga pengelikun menua. Enda salah enti kitai mega sama ulih mantu pengawa tu. Tanggung pengawa nyaga pengelikun menua tu ukai semina bepanggai ba polis enggau soldadu aja. Ari nya, kitai patut ulih nyereta raban pengelikun ti mantu polis enggau soldadu. RELA enggau Soldadu Wataniah antara dua raban ti nyadi terabai pengelikun menua tu. Perintah mega enggau naka ulih nambahka raban RELA enggau Soldadu Wataniah. Nengah chara tu mega, kitai ulih ngetanka menua diri ari serang menua luar. Berita pasal Lahad Datu tau nyadi ajar ti manah. Baka ni enti menua kitai majak diserang? Sama mih berunding. Menua sigi begunaka rayat ti ngembuan pengandal sereta pengerindu ti enda bebelah bagi.


         Pengerindu tau nyumbuk manah enti rayat nemu sejarah menua. Ari penerang tu, rayat nemu sereta meretika mayuh macham pekara ti nyadi lebuh numbuhka Malaysia. Penerang enggau penemu pasal sejarah tu ulih mantu rayat bisi penyayau, temegah ati ngagai menua diri. Kitai patut temegah ati nyadi rayat Malaysia. Enggau nya kitai ulih ngelabuhka pengerindu ngagai Malaysia. Nitihka Raja Ruslan Raja Samah (2005), “Patriotisme Belia Malaysia,” madahka elemen temegah ati ngagai menua diri siti ari elemen patriotisme. Ari nya, rayat ulih ngasaika pemerinsa sereta pengeran ati tuai kelia deka ngasuh menua tu merdeka. Enti rayat ke diatu ulih beterima kasih ngagai tuai keia ti ngulihka merdeka tu, dia sida enggau naka ulih ngetanka menua diri. Rayat ngembuan pemerani lebuh ngelaban munsuh lalu enda mudah nyerah.

         Pengerindu ke menua ulih nyadi besai bendar reti enti rayat iya bedisiplin. Rayat ti bedisiplin iya nya rayat ti taluk ke menua, nitihka atur dipelajaika perintah sereta enda ngelanggar undang-undang. Rayat ti nerima sereta nitihka undang-undang amat beguna ngagai perintah. Enti rayat seruran nitihka undang-undang, nyamai bejalaika mayuh macham pemansang. Juluk Wawasan 2020 ulih nyadi nyata.

         Kitai mesti bisi pengerindu enggau penyayau. Penyayau ke menua tu siti elemen ti bekaul rapat enggau pengerindu. Rayat lebih ngembuan penyayau enggau pengerindu ke menua ari ke sida sebilik. Tu mih siti ari pekara ti patut dikembuan rayat. Penyayau enggau pengerindu siti pekara dikena ngatur pemansang dudi hari. Ari penyayau mih kitai ulih begulai enggau orang bukai. Ari penyayau mih kitai ulih nerima pemesai ti megai menua tu. Pengerindu enggau penyayau ulih nyeliahka rayat ari ngereja pengawa ti enda menuku kelebih agi ngagai nembiak rebak baru. Pengawa baka ngerusak keresa rama, ngerumpak enggau mayuh pekara bukai ulih diseliahka laban rayat bisi penyayau enggau pengerindu.

        Pemadu manah pengerindu ke menua tu patut dikerembai bepun ari sekula. Nembiak kemaya hari tu dipeda majak kurang pengangkun ngagai menua diri. Ba sekula mih alai ngiri pengerindu ngagai menua diri. Mayuh macham program maya bulan Merdeka diatur ba sekula. Sekeda nya baka Pekit Lagu Patriotisme, Ngias kelas, Nuatka menira ba kandang sekula enggau mayuh agi. Ari pengawa ke baka tu, pengerindu ke menua ulih diiri ngagai nembiak sekula. Pengajar endang seruran ngiring ngembing nembiak sekula taluk ke menua. Mata pelajar baka Pendidikan Sivik dan Kewarganegaraan endang mayuh skop pasal pengandal, pengerindu sereta pengangkun ngagai menua. Pia mega, pekara ti bisi bekaul enggau pengerindu ke menua bisi diajar nengah mata pelajar Pendidikan Moral. Nembiak sekula kemaya hari tu chukup beruntung laban belajarka semua pekara tu. Perintah ngasaika mayuh penanggul deka nyadi enti nembiak nyau kurang pengangkun, pengandal enggau pengerindu ngagai menua diri. Nembiak tu orang ti nganti orang tuai besai dudi hari ila. Sida tu mih reta ti pemadu beguna dudi hari ila.

           Selamat Hari Merdeka. Ngarapka merdeka tu mai besai reti ngagai kitai semua. Seati sama penemu mih kitai ngetanka menua tu merdeka belama. Ukai siku, ukai seraban tang serap rayat Malaysia mesti begempung sereta beserakup ngetanka menua ti merdeka tu. Nengah jalai ke baka tu, baru menua kitai ulih merdeka datai ke ila-ila.

Wednesday, August 19, 2015

LATIH SENENTANG SISTEM JAKU IBAN (2.0)

Latih Senentang Sistem Jaku Iban

Pilih ayat ti betul lalu tentu saut nuan nya engkeman

1
I
Pisang tuchur ti dijual ba kantin sekula nya nyamai amat.

II
Pansuh ikan tu pemakai ti dikerinduka aki iya.

III
Tuai rumah patut patut bisi ngembuan pelajar tinggi.

IV
Lampu pichit ti dibai iya nya enda ulih dikena agi.

A
I enggau II
C
III enggau IV

B
II enggau III
D
I enggau IV

2
I
Apai-indai patut ngemataka ulah anak sida iya.

II
Jalai alun ngagai menua kami sigi belingkuk-liuk ari suba.

III
Baju ti kating-kating nya enggi Duat enggau Angga.

IV
Aki iya nya gerai-segerai pengudah bisi ubat.

A
I enggau II
C
III enggau IV

B
II enggau III
D
I enggau IV

3
I
Indai Lum tedani lebuh ninga uduk ba ruai ti nyau bekekaung.

II
Anak mit nyin nyabak dedui laban deka nitihka indai iya ke umai.

III
Pengabang nya teguir laban nyau ngirup ai bisa sepemanjai malam.

IV
Abi sengat indu manyi ba lengan iya agi berasai tetengut taja udah 
disapu ubat.

A
I enggau II
C
III enggau IV

B
II enggau III
D
I enggau IV

4
I
Bala pengabang nya berengkah ngah ruai tuai rumah sebedau datai ba
 ruai kami.

II
Duan enggau Ajau deka nemuai agai menua Jipun ujun taun tu.

III
Endu Mira nyimpan semua baju ti udah dilipat iya alam jemari.

IV
Seduai iya bejalai ensara tugung bala mayuh ti benung meda 
orang belagu.

A
I enggau II
C
III enggau IV

B
II enggau III
D
I enggau IV

5
I
Igat Yan sigi orang ti dikenggaika sida serumah nyadi tukang wang.

II
Dom Riyan dipeanuka sida sebilik laban ti udah ngereja pengawa ti 
chukup mai pemalu.

III
Lian dianjung ngagai sepital ketegal teempaka tedai rachun chit.

IV
Gayun meletupka merechun nya ba tengah laman rumah sida.

A
I enggau II
C
III enggau IV

B
II enggau III
D
I enggau IV

6
I
Kereja sama ti ari sida serumah ngemujurka pengawa nya kemari.

II
SK Nanga Kebait udah numbuhka kelas pra sekula udah taun ti udah.

III
Mayuh poliklinik udah bisi ba menua sida.

IV
Iya kala masuk pekit tikas entarabansa dalam taun 2012 suba.

A
I enggau II
C
III enggau IV

B
II enggau III
D
I enggau IV

7
I
Ba kampung galau di Ulu Kerachih agi mayuh jelu bejelangkit.

II
Sida sebuat nyau takut ninga nyawa remaung ti enda badu dedegung 
dalam gua enda jauh ari tempat nginti nya.

III
Sida serumah begotong-royong nukar geladak gerija ti lama nya.

IV
Orang ti ngambi bagi ba bepekit badminton taun tu sepemayuh enggau 
pekit tu taun dulu.

A
I enggau II
C
III enggau IV

B
II enggau III
D
I enggau IV

  
8
I
Anak mit nya ngeliat dulu lebuh dani pagi.

II
Aki ngasuh iya nyegulka mua ruas nya enggau daun empasa.

III
Dom tekung kening nembiak nya laban nyebut utai kamah.

IV
Orang ti tinduk telentang enggau balat bekuruh di ruai nya apai iya.

A
I, II enggau III
C
I, III enggau IV

B
I, II enggau IV
D
II, III enggau IV





Pilih saut ti engkeman dikena ngisi endur lapang dalam teks di baruh tu.


Kitai mesti nemu milih pengawa kediri empu. Enti orang bukai ngigaka kitai pengawa, ____(1)___ nya ukai pekara ti betul. Kebuah iya, pengawa nya ukai ti ___(2)___ ati. Milih pengawa ____(3)___ kereja ukai nya pekara ti mudah. Sigi mayuh kereja ti ulih dipilih tang amat tusah deka nentuka pengawa nya engkeman enggau pengelandik, penau sereta penemu ti ____(4)____ siku-siku mensia. Di Malaysia, mayuh pengawa ___(5)____ ba bidang komputer enggau teknologi(ICT). Kebuah pia, Malaysia deka nuju Wawasan 2020 sereta nyadi ____(6)___ ti maju maya nya ila. Nya alai, nembiak patut ngerebut peluang ti bisi tu. Nembiak patut belajar bebendar sereta ____(7)___ bidang ti bisi kait enggau ICT. Enti ulih, anang ngambi bidang ti nadai peluang ____(8)___ bulih pengawa lebuh udah tembu belajar ba universiti ila. Kelimpah ari nya, mayuh kompeni diatu begunaka ______(9)___ pengawa landik jaku English. Ari nya tadi, orang ti bisi pengelandik jaku English bisi _____(10)____ ngujungka sida mudah bulih kereja. Perintah mega ngemeratka pekara tu. Dalam taun 2016 tu ila, mata pelajar English mesti pas ____(11)___ mata pelajar Bahasa Melayu enggau Sejarah enti deka bulih Sijil SPM. Enti nadai sijil SPM, pedis deka bulih pengawa perintah ____(12)___nyambung pelajar ngagai tikas ti tinggi agi.


1
A
endang
4
A
bisi
7
A
pilih
10
A
pemanah

B
engka

B
pemisi

B
milih

B
penulu

C
enda

C
kemisi

C
bepilih

C
pengelebih

D
enti

D
dikemisi

D
tepilih

D
penyulut












2
A
ka
5
A
puang
8
A
besai
11
A
nyengkaum

B
deka

B
lebih

B
tinggi

B
sebaka

C
sepeneka

C
lapang

C
mayuh

C
semina

D
dikedekaka

D
lepa

D
berat

D
bekaling












3
A
enggau
6
A
genturung
9
A
pekerja
12
A
lalu

B
tang

B
palan

B
pekereja

B
ti

C
lalu

C
endur

C
pengereja

C
enggau

D
tauka

D
menua

D
pengerja

D
mega