Karang (Penemu Rama) PMR

Karang 4-

Tanya: Aktiviti lumba enggau main amat beguna ngagai nembiak sekula. Pejuraika guna aktiviti lumba enggau main ngagai nembiak.

               Aktiviti lumba enggau main tu iya nya aktiviti ti digaga ba luar kelas. Mayuh aktiviti lumba enggau main ti dikerinduka nembiak sekula baka bemain bol, badminton, futsal, enggau mayuh agi. Kitai sama nemu pekara ti dipelajar nembiak di sekula enda chukup enti semina belajar nulis, macha enggau ngira aja. Tu mih ngujungka pelajar ti diulih nembiak deka setimbang enti bisi nyereta aktiviti lumba enggau main.

               Siti ari kebuah guna aktiviti lumba enggau main tu ngagai nembiak iya nya mantu ngurangka stress. Stress tu nyadi engka kelalu mayuh pikir lalu irauka pasal peresa ti enda manah. Tu ngujungka bala nembiak ulih ngurangka pengelelak untak ti mayuh pikir maya ba kelas. Udah bemain, dia untak nembiak ulih regas baru.

               Kelimpah ari nya, aktiviti lumba enggau main tu ulih mantu meri pengerai ngagai nembiak. Penyakit deka nyamai inggap ba siku-siku mensia enti kurang ngaga aktiviti lumba. Enti nembiak semampai aktif, dia sida deka semampai gerai. Ari tu tadi, nembiak mega deka nyamai agi bulih pemujur ba sekula.

               Nambahka nya, lebuh bemain begulai enggau nembiak bukai, dia nembiak mega ulih belajarka reti bekerejasama enggau orang bukai. Nembiak deka bulih pengelandik begulai enggau orang bukai. Enti nembiak semina belajar aja, penemu tauka pengelandik ke baka tu enda dipelajar. Pemansang nembiak enda setimbang.

               Guna bukai aktiviti lumba enggau main iya nya ngelatih nembiak nerima pemenang enggau pengalah enggau ati ti tebuka. Sida enda sumbung enti alah. Pia mega enti sida alah. Sida enda jampat tumpul ati.

               Ke pengujung iya, lumba enggau main tau mai mayuh penguntung ngagai nembiak sekula laban iya ulih ngasuh pemansang runding enggau tubuh nembiak chukup setimbang sereta menyana. Nya alai, nembiak endang patut nyereta lumba enggau main. Tu ulih ngujungka nembiak tu bulih pemujur ba sekula.

Sekeda ari Chunto Karang PMR 2012

Karang 2- Ripot

Tanya: Gerempung Jaku Iban sekula udah mujur ngatur aktiviti sepemanjai taun tu. Nuan dipadu nyadi seketari lalu dipinta nulis ripot aktiviti sepemanjai taun tu.

Ripot Aktiviti Sepemanjai taun 2012 Gerempung Jaku Iban SMK Medamit

               Gerempung Jaku Iban ba SMK Sematong tu udah ditumbuhka kenyau ari taun 2010. Tu taun kedua iya gerempung tu bejalaika pengawa. Dalam taun tu, gerempung tu bisi dua iku pengajar penyanding iya nya pengajar Braoh Ngumbang enggau pengajar Mary Entalai. Nyadi raban nembiak ti masuk ba gerempung tu iya nya 43 iku. Bisi nambah 12 iku ari taun 2011.

               Mayuh aktivti ti udah diatur dalam taun tu. Semua aktiviti endang diatur nitihka perambu ke udah digaga sebedau nya. Aktiviti keterubah iya diatur iya Pekit bekelikuh penemu. Iya mujur digaga kenan 29hb Mac tu tadi. Pekit tu dibuka ngagai semua nembiak ba sekula tu. Nembiak ti menang iya nya Nelson Jeti ari kelas 4B. Iya mega dipilih ngarika sekula ba pekit ke sama tang enda mujur.

               Kena bulan Lima, Gerempung Jaku Iban mujur ngatur Minggu Jaku Iban. Dalam minggu nya, mayuh aktiviti udah mujur dipejalaika. Aktiviti ke diatur dalam minggu nya baka Pekit Nulis Karang, Pekit Belagu Karaoke, Pekit Bepantun enggau Pekit Becherita. Mujur bendar taun tu Gerempung Jaku Iban bisi bulih bantu ari Serakup Iban Dayak (SADIA). Nya alai, perais ke taun tu manah agi ari taun ke udah.

               Ba bulan Lapan, Gerempung Jaku Iban bisi ngatur siti Program ngagai nembiak ti deka ngambi peresa ba PMR enggau SPM. Program ke diatur pengelama dua hari tu iya Program Nyaut Peresa PMR enggau SPM. Bisi 50 iku nembiak ke ngambi bagi. Tuju program tu diatur ngambika nembiak ti deka ngambi peresa SPM enggau PMR bisi peneleba nyaut tanya peresa Jaku Iban. Tu mega ngambika mayuh agi nembiak bulih pemujur ba peresa taun tu.

               Siti agi aktiviti ti digaga Gerempung Jaku Iban tu iya nya nemuai sambil belajar. Gerempung Jaku Iban udah mujur nemuai sambil belajar ngagai Opis RTM ba bagi Iban. Program tu semina ungkup raban gerempung aja. Program ke baka tu digaga dikena nambahka pengelandik enggau penemu diri. Semua raban ti bisi enggau gaga magang laban ti udah nemuai sambil belajar. Bisi sekeda minta nemuai ngagai tempat ke jauh agi.

               Ke taun tu, semua aktiviti bejalai lanchar. Gerempung Jaku Iban bisi nerima jaku puji ari pengetua laban ti udah mujur bejalaika semua aktiviti sepemanjai taun 2012. Tu ngujungka gerempung tu nyadi gerempung ti pemadu mujur taun 2012. Enggau tu, ngarapka taun ti deka datai, mayuh agi aktiviti ti deka digaga.

Ripot ditulis ulih:

Semaun

..................

(SEMAUN ANAK BIDAU)

Seketari

Gerempung Jaku Iban

SMK Sematong

Karang PMR 2012

KARANG 1

Tanya: Nuan dipinta bejaku ba mua mayuh pasal “Bakani Milih Pangan Serambau ti manah”. Tulis teks jaku nuan nya

               Iya ti dipebasaka Pengetua SMK Biau Tanju, Mr Edwin Nanta, semua pengajar ti bisi datai enggau raban nembiak semua. Selamat pagi, selamat begempuru enggau selamat Satu Malaysia. Aku dulu meri besai terima kasih laban diberi peluang bejaku baka ke pagi tu. Tuju aku bejaku ba mua mayuh baka ke dipeda kita semua laban deka bejuraika topik “Baka ni milih pangan serambau ti manah”.

Bala peninga semua,

               Kitai semua sama nemu kitai enda ulih idup kediri. Anang mih kitai nunda pendiau bubut. Kitai idup di dunya tu enda bepanggai ba orang. Baka nya mega kitai ti nyadi nembiak sekula. Pangan serambau tu ti nyadi orang ke semak enggau kitai kelimpah ari apai indai. Pangan serambau tu bisi guna iya enggau kitai. Bala nembiak ti bisi ditu tentu suah agi bekunsi penemu, cherita tauka penusah diri enggau orang ti sama rebak. Sida tu nyamai agi sereta deka agi madahka siti-siti pekara tauka penanggul ngagai pangan serambau enti dibandingka enggau diri sebilik.

               Siti chara kitai milih pangan serambau ti manah iya nya ari umur. Bala nembiak deka nyamai agi begulai enggau pangan lebih kurang sama umur. Ambi ke chunto, nembiak ba pom satu tentu ngiga pangan serambau ti sama ba pom satu. Kebuah pia, chara bepikir tauka pekara ti dikerindu endang nyau deka sama. Tambah mega, pangan serambau tu enda malu bekunsi penanggul enggau pangan diri. Nya mih kebuah umur ti dikena milih pangan serambau.

               Kelimpah ari nya, pengerindu ti sama mega nyadika siti chara ba milih pangan serambau. Nembiak ti bakedayau rindu agi begulai enggau nembiak ti sama perangai ke baka nya. Nya alai, bala nembiak semua patut bejimat lebuh milih pangan serambau. Pilih mih pangan serambau ti ngembuan pengerindu ti meri pemujur tauka bisi tuju ke manah. Chunto pangan ti manah iya nya rajin, bebasaka pengajar enggau apai indai, mereti enggau mayuh agi. Kebuah pia, pangan serambau ulih nukar perangai enggau ulah kitai nundaka sida iya.

               Chara ke bukai iya nya meda pengelebih pangan serambau nya. Bisi ari kitai ngiga pangan serambau ti pemisi. Kebuah iya, sida ti pemisi tu ulih nulung kitai maya bisi penyuntuk tauka penusah. Bisi mega kitai milih pangan serambau ti pandai. Sida ke pandai tu ulih bekunsi penemu lalu ngajar sida iya. Nya alai, pengelebih ba siku-siku nembiak tu nyadika siti kebuah sida dipilih nyadi pangan serambau.

               Ke pengujung tu, aku ngarap bendar bala nembiak semua bejimat lebuh milih pangan serambau. Anang ngerusak diri begulai pangan serambau ti jai ulah. Orang ti baka tu enda mai kitai ngagai pemujur tauka pemanah. Beduduk ari sehari tu, pilih mih pangan serambau nitihka udah dipadah ke tadi. Enggau nya, naka tu aja jaku aku pasal “bakani milih pangan serambau ti manah”. Nya aja, terima kasih.

Pra PMR Kertas 2 Bahasa Iban

Bagi A : Meretika Teks Prosa
[ Taga Jam : 15 minit]
[ 10 mark ]
Tanya 1 – 5
Bacha enggau silik teks karang di baruh tu. Udah nya saut semua tanya ti nangkan nya ngena ayat penuh.

              Hari Gawai Dayak tu siti ari pengerami ti diintu di Malaysia, tiap-tiap taun lebuh 1 haribulan Enam. Di Sarawak, hari tu diintu semua pupu raban bansa Dayak. Iya hari diau ke semua rayat di Sarawak laban sida bela ngerami hari nya. Sida ke bansa Dayak ti diau di nengeri tauka di menua pesisir kiruh nyambut penatai pengabang ke datai besun-sun.
Hari Gawai Dayak udah nyadi hari besai kenyau ari taun 1964 udah bekau Council Negeri ti ngemasukka iya ba Gazette nengeri Sarawak lebuh 25.09.1964. Iya terubah diintu dalam taun 1965.
Pemutus runding perintah ti ngemendarka Hari Gawai Dayak nyadi hari diau, besai bendar reti ke mayuh raban bansa Dayak. Iya ukai semina nyadi ke tanda bansa bukai ngelala sereta bebasaka bansa Dayak, tang iya nyadi ke tali penanchang mayuh raban bansa Dayak ti ngujungka sida ulih beserakup sereta begulai sejalai dalam semua pengawa. Raban bansa Dayak patut bendar temegah ati sereta beterima kasih ngagai tuai bansa Dayak baka Datuk Tra Zehnder ke udah bendar amat minta hari nya dikemendarka perintah. Peminta nya udah didinga Kepala Menteri Menua Sarawak ke terubah iya, Datuk Stephen Kalong Ningkan enggau bala menteri lebuh maya nya.
Ke maya hari tu, Hari Gawai udah tebilang di menua tu. Iya diintu ngena mayuh macham pengerami ti mandangka pengaya adat asal bansa Dayak di menua tu. Bansa ti ukai peturun Dayak ti enda sama pengarap enggau adat nadai sanggu datai ngabang lebuh Hari Gawai Dayak. Enti sida enda ulih datai batang tubuh, sida ngirumka kad Selamat Hari Gawai Dayak. Hari Gawai Dayak tetap nyadi ke lambang penyerakup pupu raban bansa di Malaysia. Ketegal tu, iya udah narit ati bala temuai ari menua bukai.

1. Ke maya terubah bansa Dayak ngintu Hari Gawai? [1 mark]
2. Nama kebuah Hari Gawai besai bendar reti ke bansa Dayak? [2 mark]
3. Baka ni Hari Gawai Gayak tu nyau udah tebilang ke maya hari tu? [2 mark]
4. Beri reti rambai jaku nadai sanggu nitihka genteran karang di atas [2 mark]
5. Ba penemu nuan, beri kebuah kitai Dayak mesti nyambut Hari Gawai? [3 mark]




Bagi B: Karang Belalau
[ Taga jam : 15 minit ]
[ 20 mark ]
Peratika gambar di baruh tu enggau silik. Beri penerang nuan senentang pengerusak ketegal eksiden di jalai alun. Pemanjai kerembai karang nuan nya patut lebih ari 80 leka jaku.

Bagi C : Karang
[ Taga jam : 45 minit ]
[ 30 mark]

Tulis siti karang pasal siti ari pekara di baruh tu. Pemanjai karang nuan nya patut lebih ari 200 leka jaku.

1. Kimpin Nagang Orang Nginsap majak dipejalaika ba semua tempat. Tulis siti karang pasal “kebuah kitai enda patut nginsap”

2.  Sekula nuan baru tembu ngatur Hari Pengajar. Nuan dipadu ngaga ripot pasal pengerami Hari Pengajar nya.Tulis ripot nuan nya

3.  Industri Dagang Temuai majak beguna dikena nyungkakka penatai pemisi menua. Bakani chara ti tau digaga dikena narit temuai ari menua bukai.

4. Tulis siti cherita belalauka sempama di baruh tu.
   “Baka tekura enggai enda tepantup ba bandir”


KERTAS SOALAN TAMAT

Pra PMR 2012 Kertas 1 Bahasa Iban

TANYA 1-12
Tembuka ayat di baruh tu ngena saut ti engkeman
1. Engkudu enggau tepus endang tau diempa ___________ ulih ke ubat.
A. sereta
B. tauka
C. laban
D. enti

2. Entelah ti ____________ pengajar Junit bulih lumur satu ba pekit begaga entelah.
A. ditebangka
B. ditangkanka
C. dikengkangka
D. diengkebangka
3. ______________ nganti belabuh bumai baru, aki Irik betanamka sayur ensabi.
A. semadi
B. sereta
C. seraya
D. sampaika
4. _____________, besai amai ular sawa nyin!
A. Akai dai
B. Apo
C. Eh
D. Nyah

5. “Baju nuan tu ______________ alai meli iya?ku Mugat nanya palan endur meli baju nya.
A. kati
B. lapa
C. dini
D. sapa

6. Baur ginti enggi Judan nyin nyau ______________ laban benung dientun ikan.
A. gilik-gilik
B. benyut-benyut
C. gusak-gusak
D. rat-rat

7. Aki Daup enggau uchu iya mai dua _____________ jala ke sungai lemai tadi.
A. rawan
B. rumbang
C. perugan
D. panchang

8. Lebuh ninga berita ari radio pagi tadi, empat ___________ pelilih menua ditinggang penusah kemarau panjai.
A. bidang
B. bengkah
C. dendan
D. enteran

9. Orang ti disebut ___________________ nya orang ti udah mati.
A. resa papa
B. miau mapau
C. lungau mamau
D. layu punggu

10. “Tu _____________ bup aku tang iya ke tebal nya baru bup aku,”ku Bidau madahka Ungging.
A. nadai
B. enggai
C. enda
D. ukai

11. Jibam bisi peneleba bejalai ba pasar Sibu laban ____________ diau dia pengelama tujuh taun.
A. kala
B. deka
C. patut
D. ukai

12. Jidin enda milih engkayu enti lebuh makai ________ nyawa baya.
A. munyi
B. sema
C. baka
D. nitih

TANYA 13-18
Ayat di baruh tu nyangka betul tauka bisi salah. Enti ayat nya bisi salah, penyalah nya udah ditanda ngena A, B tauka C enti ayat nya bisi salah. Pilih D enti ayat nya nadai salah.

13. Bansa Dayak tu dipechahka ngagai mayuh raban bansa baka Iban, Bidayuh enggau ke bukai.
       A       B     C
Nadai penyalah.
           D
14. Ujan demalam ti bangat lalu ngujungka arus Sungai Ulu Limbang jampat sereta enda likun ke
                                 A     B            C
perau ti mit. Nadai penyalah
   D
15. Kami duai Anggit sama bela makai kolo mee enggau pau kachang sambil macha bup cherita.
           A           B      C
Nadai penyalah
            D
16. Bantin gaga amat ati laban beli apai iya tanchut enggau baju baru ke upah iya ti bulih 8A
             A       B          C
dalam peresa PMR. Nadai penyalah
    D
17. Sebengkah ari pemakai kitai bansa Iban ti udah chukup tebilang di serata menua iya nya
A
manuk lulun tauka pansuh manuk. Nadai penyalah
B C D

18. Tuai rumah Emparan meri pemutus runding pasal penyarut sida serumah munyi idung antara
A    B
mata, baka dilah antara nyawa. Nadai penyalah
C         D


Tanya 19 – 22
Pilih ayat ti sama reti tauka nyau deka sebaka reti enggau ayat ti dichelak tebal di baruh tu.


19. Komiti Penusah Angus Pasar Sebuyau deka ngatur aum senentang ngaga palan baru pasar Sebuyau ke retung diempa api kena 26 Jun ke udah.
A. Kena 26 Jun ke udah, Komiti Penusah Angus Pasar Sebuyau deka ngatur aum senentang ngaga palan baru pasar Sebuyau ke retung diempa api.
B. Aum senentang ngaga palan baru pasar Sebuyau ke retung diempa api kena 26 Jun ke udah deka diatur Komiti Penusah Angus Pasar Sebuyau.
C. Pasar Sebuyau ti angus kena 26 Jun tu udah dikeaumka Komiti Penusah Angus pasal ngaga palan pasar baru.
D. Deka ngatur aum senentang ngaga palan baru pasar Sebuyau kena 26 Jun ke udah Komiti Penusah Angus Pasar Sebuyau.

20. Opis Pengerai naburka berita pasal penyakit denggi ti bisi berampit ba pelilih menua Tanah Galau.
A. Penyakit denggi ti bisi berampit udah ditaburka Opis Pengerai ba pelilih menua Tanah Galau.
B. Menua Tanah Galau udah ditaburka berita pasal penyakit denggi ti bisi berampit ulih Opis pengerai.
C. Berita pasal penyakit denggi ti bisi berampit ba pelilih menua Tanah Galau ditaburka Opis Pengerai.
D. Pelilh menua Tanah Galau udah ditaburka Opis Pengerai pasal berita penyakit denggi ti bisi berampit.

21. Mayau enggi sida Chabu bechura burak tang mayau enggi sida Kumbau bechura chelum.
A. Bechura chelum burak mayau enggi sida Chabu enggau enggi sida Kumbau.
B. Sida Chabu bisi mayau ti bechura burak tang nadai mayau sida Kumbau bechura chelum.
C. Enggi sida Kumbau nya mayau chelum tang enggi sida Chabu mayau burak.
D. Nya mayau burak enggi sida Chabu lalu nyin mayau chelum enggi sida Kumbau.


22. Nina madahka Julia deka pulai ke rumah panjai kena ujung minggu tu enggau Mikie.
A. “Aku deka pulai ke rumah panjai Mikie kena ujung minggu tu,”ku Nina madahka Julia
B. “Aku enggau Mikie pulai ke rumah panjai,” ku Nina madahka Julia kena ujung minggu tu.
C. “Aku enggau Mikie pulai ke rumah panjai kena ujung minggu tu,”ku Nina madahka Julia
D. “Kena ujung minggu tu aku enggau seduai Mikie pulai ke rumah panjai,”ku Nina madahka Julia

Tanya 23 – 26
Pilih ayat ti betul di baruh tu lalu tentuka saut nuan nya engkeman.

23. I. Nembiak ditagang muai uras ba sebarang endur
II. Linda mai Nita raun ke Pulau Labuan
III. Buah sawit ba kebun aki Sawing nyau garing labuh atas tanah
IV. Usup benung ngemasang lampu ba ruai.
A. I enggau II
B. II enggau III
C. III enggau IV
D. I enggau IV

24. I. Nembiak nyin benung ngenataika pesan ngagai pengajar Chuat.
II. Kitai enda tau ngemulaka orang bukai kelebih agi ngagai orang tuai.
III. Lemambang nya ngemiau kami ngena manuk sabung ba tengah ruai.
IV. Kapal nya benung ngemutarka lebuh bala nembiak mit agi bemain ba ai.
A. I enggau II
B. II enggau III
C. III enggau IV
D. I enggau IV

25. I. Taja pia iya semina bekereja deriba lori lalu enda kala ngutang duit.
II. Aku agi mit suba deka amat makai buah pisang enggau buah rian.
III. Baju baru Ambar udah ditesah tang baju lama iya baru udah dilipat.
IV. Aki Mandau dulu nanam getah ari nanam sawit enggau lada.
A. I enggau IV
B. II enggau III
C. I, II enggau III
D. II, III enggau IV

26. I. Udah makai magang sida uduk enggi Gerunsin ti diberi iya nama Jugam.
II. Santi enggau madi iya berundang ninting hari ke sekula laban ti enda jauh.
III. Igat Usup gendai-gendai pulai ke menua nadai mai buah jari.
IV. Pungga enda telabanka pemintar Bunsie ba pelajar Matematik.
A. I enggau IV
B. I enggau III
C. I, II enggau III
D. II, III enggau IV

Tanya 27 – 30
Pilih saut ti engkeman belalauka penerang tauka sempama ti diberi di baruh tu.




27. Beri sempama ti nipakka enggau reti ba atas nya?
A. Baka ngelakuka tajau belah
B. Baka burung patah sayap
C. Baka Kumang nupi sawa
D. Baka pitak dibuai mata


28. Nama reti sempama berani kesa ?
A. Berani ngereja lalu berani ga tanggung
B. Enda berani enggau nadai akal ngereja utai
C. Enda berani bendar tak semina berani sekejap aja
D. Berani pengambis ati sereta kempang ngereja utai nya

Kasih amat meda bala orang sakit nya. Siku ari sida nya ke balat bendar sakit lalu nganti hari aja.

29. Sempama ti patut nipakka ayat di atas iya nya
A. Nyawa ikan
B. Ngulit keli
C. Meragai baka mulung
D. Munyi ke diruruk


30. Siti ari sempama di baruh tu enda engkeman nitihka reti iya.
A. Dinding bulu         - bisi ngembuah pengaruh
B. Ruruh asam           - betakah hari orang mati
C. Chelap ati           - enda mudah ringat
D. Nemu rian tingkar - bulih penguntung taja nadai pansut peluh


Tanya 31 – 35
Bacha enggau silik genteran cherita di baruh tu. Udah nya saut semua tanya ti nangkan nya.


“Kitai anang bebakih enggau Abol. Iya tu ‘pegian dadah’. Enti kita enda bejimat, kita kena rampit iya ngereja pengawa jai ila!”
Jaku ke munyi nya endang selalu ke pangan pending aku. Orang keji ke aku ukai semina orang bukai tang nyengkaum Apai Mungat, endang menyadi niang apai aku. Ulah kami serumah ti benchika aku enda semacham. Orang ti bisi anak dara berat-rat nagang anak sida bejaku enggau aku. Sekeda enda leju-leju nyindir aku ngena jaku ke tajam-tajam. Mesai kukut chelum pan nadai mensia ke menyana.

Lebuh ninga jaku jai orang, aku nyabung pengeliat ati diri nitihka ajar pengarap aku. Aku enda nimbal jaku orang tauka nganu orang. Aku ingatka penyai diri. Indai aku balu. Kami sebilik miskin amat. Batang jalai pengidup kami sebilik nya nangkal getah. Aku bisi menyadi dua iku ke agi besekula. Janting besekula ba pom lima enggau Luat agi ba primari 5.Tu balat amat agi nating indai ba belanja.

Nya alai sekumbang ke udah datai di rumah panjai, aku nguji bekereja bebendar. Lebuh tumu pagi, aku nulung indai nangkal getah. Muak ke lemai aku ngintu kebun sayur ti ditumbuhka aku ba tanah muakka ujung bilik kami. Utai ditanam aku nyadi bendar. Asil kebun dijual ke pasar. Aku enda nyual iya ba kami serumah laban orang agi keji. Datai asil kereja aku pan orang enggai beguna.

Asil ari kebun aku chukup ke belanja kami sebilik. Pendiau kami sebilik nyau mansang menyana-semenyana. Meda kami sebilik nyau mansang nyamai, dia pemenchi kami serumah nyau betukar kepapas.

Hari siti lebuh deka nangkal getah, dia ati aku nyau asai ke runtuh meda batang getah kami nyau bakedilak ditibak orang. Aku belabaka nya sigi pengawa kami serumah empu. Enti nundaka pemedis ati, sigi aku serang kami serumah kelebih orang ke nibakka pun getah nya. Indai aku tusah amat ati meda siti ari jalai pengidup kami sebilik udah dikachau orang.


31. Nama orang ke bempu cherita nya tadi?
A. Abol
B. Mungat
C. Janting
D. Luat

32. Nama kebuah penulis tu dibenchi?
A. Iya ditangkap laban nyual dadah
B. Iya kala dijil ketegal gian dadah
C. Iya ngerampit sida serumah gian dadah
D. Iya endang nembiak ti jai ulah sereta enda manah pendiau

33. Baka ni chara penulis napi semua jaku jai ari sida serumah?
A. Bekereja bebendar
B. Ngena pengeliat ati nitihka ajar pengarap iya
C. Nyerang sida serumah ti bejai sereta enggai meda sida sebilik
D. Bejual asil sayur ke pasar

34. Nama reti jalai pengidup nitihka genteran cherita nya tadi?
A. Ulah digaga ngurangka penusah diri
B. Pengawa ti digaga maya nya
C. Chara ngiga pemakai
D. Batang pengarap


35. Nama kebuah sida serumah kepapas meda penulis?
A. Pengidup penulis sebilik ti majak manah
B. Penulis bisi bejaku enggau indu dara
C. Penulis enda nemu ngelaban sida serumah
D. Penulis enggaika nyual sayur ngagai sida serumah


Tanya 36 – 40
Bacha enggau silik leka main di baruh tu. Saut semua tanya ti nangkan nya.

              Aku deka belagu,
Ninga kita aka adi,
Ngenang pengawa dagang, kereja betanam betupi.
Kereja bekebun lada, pengawa betupi chapi.

Paya tau dikena, parit enggau kubi.
Tanah renjan sungkur lipan, jalai mai lori.
Munggu tanamka labu, selat sayur ensabi.
Lebak tanamka retak, emperan tanam empari.

Asil jual ke pasar, eksport ke luar nengeri.
Bulih duit mayuh, anang main judi.
Simpan dalam bank, guna dudi hari.
Belanja anak sekula, masuk universiti.
Pemakai nadai pungkang, empa peneka ati.
Gari nadai ngenchadi, duit bisi enggau meli.

Tu naka jaku, aku main betusi
Pagi ila kitai gawa, anang masau hari.


36. Sapa orang ti ditujuka leka main nya ?
A. Orang ti bisi bekereja
B. Bala apai indai
C. Nembiak ti agi besekula
D. Orang ti rindu ninga lagu



37. Nama kebuah asil betanam betupi nya nyau kena eksport ke luar nengeri?
A. Asil ti mayuh lalu ulih dijual ke nengeri luar
B. Nengeri luar rinduka asil ari menua kitai
C. Orang ti menua tu udah leju ke makai asil diri empu
D. Laban untung agi asil tu kena eksport ke luar nengeri


38. Siti ari guna duit ti enda manah nitihka genteran di atas?
A. Meli pemakai sepeneka ati
B. Belanja anak sekula
C. Simpan dalam bank
D. Bemain judi

39. Nama reti masau nitihka leka main di atas?
A. ngemanjaika
B. ngiga
C. muai
D. meri

40. Nama kebuah orang tu mantaika leka main tu?
A. Ngasuh semua kitai betusi pasal kereja
B. Madahka chara nanam sayur
C. Bekenangka enggau pangan diri
D. Ngajar orang ti bekereja

Latih Kertas 1

Set Latih Iban
1. Aki Nita meli sekilo gula enggau lima ____________ telu manuk ba kedai Ah Chan.
A. leka
B. buah
C. igi
D. limpir

2. ___________ nembiak mit nya empeleman lebuh ti bemain pasir di tengah laman rumah.
A. mata
B. kaki
C. jari
D. pending

3. Jabah enggau Babah endang pemain bol ti suah _____________ sekula.
A. ngarika
B. negapka
C. negika
D. ngentapka

4. Ai tuak enggai indai Minda enda berapa manah taunt u laban deka bebuya masam ________.
A. udu
B. mimit
C. raya
D. bendar

5. Changgir baru ditikika pangkat nyadi sapit manijer _______ Kompeni Terubuk Masin, Limbang.
A. ba
B. ari
C. ke
D. tu

6. Maya ujung minggu tu tadi, mayuh amai orang bebelika barang _________ hari Gawai ti deka datai.
A. semaya
B. nyerumba
C. berimbai
D. tekala

7. Semua nembiak sekula patut belajar bebendar ngambika bulih pemutus peresa _____manah.
A. ti
B. tu
C. mih
D. nya

8. Kemaya hari tu, main asal kitai Iban nyau majak ___________.
A. ayas
B. ambis
C. punas
D. naya

9. Aki Engkasan dibai uchu iya nemuai tiga hari dua _________ ngagai Kuala Lumpur.
A. hari
B. malam
C. siang
D. jam

10. Tiap lemai hari Lima, kami sekelas begutung-ruyung meresi ___________ ngias kelas.
A. enggau
B. nyereta
C. seraya
D. sekalika

11. Dua __________ nembiak ti belaban bemain badminton nya sama ikak.
A. pelilih
B. iti
C. iku
D. gempung

12. Ai kupi ti digaga indai Kasi kelalu pait ___________ upa lalih.
A. munyi
B. baka
C. asai
D. sema

13. Nembiak ti deka bemain ba tanah nya __________ laban benung ujan nyala.
A. nagang
B. betagang
C. ditagangka
D. tagangv

14. Semua  tuai _____________ patut minta bantu tauka projek ari perintah dikena ngemansangka rumah panjai diri.
A. rumah
B. kampung
C. menua
D. bilik

15. Penemuai __________ belajar raban Kelab Jaku Iban SMK Medamit ngagai Muzium Sarawak deka digaga peremisi ujung taun tu.
A. enggau
B. sereta
C. sambil
D. sekalika

16. Igat Letu diau nyau ____________ begagaka ulu duku laban ti suah belajar ari aki iya.
A. jauh-sejauh
B. nemu-senemu
C. agi-seagi
D. lantang-selantang

17. Paderi nya meri jaku ___________ ngagai orang ti bisi datai dia ngambika sama betulung enggau pangan diri maya bisi kena penusah.
A. puji
B. ajar
C. tagang
D. gerah

18. Nembiak ti diau bemalam ba SMK Ulu Rian ________ pulai ke rumah diri enti sida diambi apai indai.
A. ulih
B. kala
C. deka
D. lalu

19. “Anang ngerami ikan __________ garam enggaika masin,”ku Indai mesan Abun.
A. mimit
B. nadai
C. mayuh
D. bendar

20. _____________ iku kita sekelas ti nemu ngaga gudi ?
A. Lapa
B. Kati
C. Berapa
D. Sapa

21. Kamarau enggau Dunyau ______________ landik bepantun tang mega nemu ngajat.
A. taja pan
B. agi mega
C. ukai semina
D. entudika nya

22. Iga ___________ semua kita serumah enda ninga berita ti bisi ditabur ba radio pagi tu.
A. mih
B. ga
C. jara
D. dih

23. Nembiak sekula ulih mujur tauka enda bepanggai bendar _________ sukung apai indai.
A. di
B. ba
C. ngena
D. dalam

24. Wat Telasa nya ___________ ngangkat perau nya kediri iya aja taja pan iya kering sereta besai gamal.
A. aruh ulih
B. mesti deka
C. agi tengan
D. bedau kala

25. Kitai idup di dunya tu enda ngira ___________ lalu patut diau manah enggau pangan diri.
A. mua mata
B. mati idup
C. miskin kaya
D. mua mata

26. Jamit enggau Anchis enda enggau orang nurun begiga laban __________ agi deka nangkal getah.
A. iya
B. kami
C. seduai
D. nuan

27. Gempuru besai ba padang sekula enda nyadi ___________ hari ujan maya nya.
A. enti
B. taja
C. tang
D. lalu

28. Samai ke dapur __________ deka nulung indai iya berapi.
A. nyadi
B. laban
C. awakka
D. pengudah

29. Munai ___________ nembuka latih ngaga karang Iban malam tadi.
A. benung
B. agi
C. udah
D. deka

30. Kami sekaban belindung ari panchar mata panas di ____________ ayung pun rian ti rinda.
A. atas
B. ngimbai
C. mua
D. baruh

31. Chenggir endang deka enggau orang ngabang. ____________ iya ngibun indai iya sakit di sepital.
A. Ulih mega
B. Pengudah iya
C. Tang mega
D. Taja pia

32. Geluma pedis perut ketegal makai ___________ ti bisi buya bari.
A. asi nyampur
B. champur asi
C. nyampur asi
D. asi champur

33. Pengerami Hari Koperasi SMK Tinting Balau ___________ari jam lapan pagi nyentukka jam satu lemai.
A. ngepun
B. berengkah
C. dulu
D. ngelabuh

34. Lisa enggau Luna rindu agi macha bup cherita ____________ ti bemain catur.
A. ari
B. antara
C. enggau
D. sereta

35. Aya Lidom deka pulai ______ Sabah kena ujung minggu tu ila dianjung sida sebilik.
A. ke
B. di
C. ari
D. ba

Karang Cherita

Tanya: Gaga siti cherita ti diberi pengujung iya baka tu:
 
           "............................Iya mega bedanji deka nitihka jaku indai iya" 




Chunto Saut Nembiak:

              Rangga rindu bendar pengawa nginti. Iya endang siku nembiak ari sida serumah ti jarang tinggal enti ba pengawa nginti tu. Enti bisi maya lepa, iya endang ngereja pengawa nginti. Nyau deka ninting hari Rangga tu nginti. Taja pia, Rangga suah agi enda bebala enti lebuh nginti.

               Hari siti, Rangga berumban-rumban pulai ari sekula laban deka nginti ba sungai. Indai iya nagang iya laban hari baka deka ujan. Tambah pia, hari nyau jauh lemai. Jaku tagang indai enda dikeibuhka Rangga. Jaku ti dipansutka indai iya baka ke tama ari pending kanan lalu pansut ari pending kiba. Rangga  nyapai baur ginti lalu bejalai nuju ke sungai.

               Hari nyau majak petang tang ikan lalu enda ga makai umpan ginti Rangga. Enda lama udah nya, ginti Rangga asai bisi ngentun. Baru Rangga deka nyintak ginti iya, enda memukai kaki iya tegelinchir. Rangga labuh ke ai. Nasit Rangga manah. Iya enda dianyutka ai ti deras. Iya sempat bepaut ba akar kayu ba nebing sungai nya. 

             

               Pengudah niki ke pantai, Rangga lalu beguai pulai ke rumah. Nadai siku orang meda utai ti udah nyadi ba Rangga. Semua barang enggau perengka ginti agi tinggal ba tebing ai. Iya enda ibuh ke semua barang ti tinggal nya. Iya chukup kesal. Rangga benasit manah laban enda ditabanka ai ti benung deras nya tadi.

               
                 Ketegal nya, Rangga berasai besalah. Iya patut mending lalu nitihka jaku indai iya dulu nya tadi. Bepun ari sehari nya, Rangga ngubah ulah iya ti tekelalu deka amat ginti enda ngira sebarang maya. Iya mega bedanji deka nitihka jaku indai iya. 

Leka Main- Biau/Sampi

Sa, dua, tiga, empat, lima, enam, tuuu...juh.
Aku ke ngumbai kita Petara, baka nya,
Ukai aku ngumbai Petara ngapa,
Ukai aku ngumbai Petara saja,

Aku ngumbai Petara aki,
Aku ngumbai Petara ini,
Aku ngumbai Petara kejakang,
Aku ngumbai Petara puyang,
Aku ngumbai Petara,
Pengemata anak mensia
Enti nasau,
Iya nganchau keresan,
Enti nebang,
Iya ngaduka tundan,
Enti nebas,
Iya ngidarka reban.

Kita Petara, baka nya,
Anang kita ngabang kediri,
Anang kita angkat ngengali.
Bepadah diri serumah,
Bebai diri menyadi,
Bekumbai diri beserekai,
Bekangau diri selangkau.

Kita ngabang baka nya,
Anang nurun tubuh murus,
Anang nurun tubuh untus,
Mai ubat teruba ingat,
Mai pengaruh gambar tubuh,
Mai keminan gembar badan,
Mai penchelap mai pengelindap,
Mai batu ai mali langkang,
Mai tanduk rusa labang,
Mai batu tapa tampung perempung,
Keruntuk tanduk rusa kampung,
Mai taring uting babi kepung,
Mai batu tanah ulih nyamah,
Di tingkah tebiang,
Mai batu getah ulih nyamah,
Di tengah lampung pundang,
Nyadi kami nugal sehari tu,
Nanam padi nanam puli.

Sekeda ari Chunto Karang Belalau PMR

Karang Belalau Gambar Tunggal

Chunto 1
Tanya: Peratika gambar di baruh enggau silik. Beri penerang nuan senentang Pemanah kitai bemain enggau besenam

Chunto 2
Tanya: Peratika gambar di baruh tu enggau silik.Tulis karang senentang enggau pengerusak betebangka  kayu enggau berumpangka kampung

Karang : Chara Nulis Paragraf Pemuka

 Chara Nulis Paragraf Pemuka


1. Paragraf pemuka tu nyadika ‘pala’ tauka ‘pun’  lalau karang ti ditulis. Pemacha ulih meragamka pekara ti     
    ditulis ari paragraf pemuka nya tadi.


2. Pemuka patut ditulis enggau manah lalu ulih narit pemacha laban pemuka tu nentuka karang kitai tu nyaut 
    tanya, tauka enda nitihka tanya, tauka rari ari topik.


3.  Paragraf pemuka patut ditulis enda kelalu panjai. Kebuah pia, enggaika nyadi paragraph isi karang.


4. Pemuka ditulis ba siti paragraf aja.

Chunto Tanya:  Industri dagang temuai majak beguna ba pemansang menua kitai. Beri chara dikena ngemajuka dagang temuai.

Chunto (1) Paragraf pemuka:

            Industri dagang temuai endang beguna ba ngemansangka menua kitai tu. Kebuah pia, industri dagang temuai tu siti ari jalai ngulihka penatai pemisi ngagai menua kitai. Ari penatai pemisi ti mayuh tu, mayuh projek-projek ngemansangka menua lalu meri pengelantang ngagai rayat. Nya alai, industri dagang temuai tu patut dikemajuka ari diatu.

Chunto (2) Paragraf pemuka:

            Nemu enda kita pasal industri dagang temuai tu amat beguna dalam ngemansangka menua? Siti ari tuju industri dagang temuai tu iya nya mantu nikika penatai pemisi menua kitai. Asil ari penatai pemisi tu mih ti dikena ngaga pemansang enggau meri pengelantang ngagai rayat. Nya mih, industri dagang temuai tu patut dikemajuka ari diatu.

Tanya ke lain :

Duit amat beguna ba pengidup kitai mensia. Nya alai kitai patut ngeririka diri besimpanka duit. Beri penemu nuan senentang pemanah besimpanka duit.

Chunto Paragraf: Ulih ngambi ayat ba tanya.

                  Duit amat beguna ba pengidup kitai mensia. Enda ngira besai tuai, duit endang beguna amat. Kitai patut ngeririka diri besimpanka duit. Ari peneleba tu mih kitai ulih besimpanka tu lalu dikena dudi hari. Kebuah pia, mayuh pemanah kitai besimpanka duit ari diatu.

                     
             

Karang : Nembuka Cherita

Penerang:

1. Karang tu siti ari bansa karang cherita.
2. Tanya ba karang ti bansa tu iya nya dipinda nembuka cherita. Pun ayat diberi lalu dipinta nyambung cherita nya.
3. Isi cherita patut manah.
4. Jalai cherita ti bisi klimaks
5. Bisi ngundan:  Watak, latar (tempat, maya), jalai cherita nyadi, pengudah cherita enggau ajar manah.
6. Gaya nulis ti kreatif
7. Anang nulis pekara ti enda lojik.

Chunto tanya:

Gaga cherita nuan bepun ayat ti baruh tu,

"Aku enda nemu dini endur aku diau. Aku nyerauh minta tulung.........." .

        Aku enda nemu dini endur aku diau. Aku nyerauh minta tulung ngambika bisi orang ninga. Tang lalu enda didinga orang. Kaki enggau jari endang udah kena tanchang. "Bakani mih aku ngelepaska diri?Mati mih enda majak bakatu" Aku bejaku dalam ati.

        Aku tu ke bendar udah ditangkap orang jai. Sida tu ngurung aku dalam bilik ti petang sereta kamah. Siku pan enda mih sida tu dikelala. Siku ari sida iya nya indu. Taja pan ditangkap, aku enda diperinsa tang semina ditanchang kaki jari.

        Peda aku hari nyau jau lemai. Siku ari sida nya ngasuh aku betalipaun enggau apai. Nemu nya sida minta duit RM100 000 dikena begantika aku ti udah ditangkap sida tu. Aku maya nya nyau enda tepansutka jaku lalu ngasuh apai nyediaka duit ti dpinta orang jai nya. Apai dipinta nyediaka duit dalam tiga hari. Enti enda, aku deka dibunuh sida.

        Nitihka semaya, apai lalu mai duit nyampau ke dipinta. Tang apai pintar. Iya bisi mai polis maya nya. Polis enda ngayanka diri maya nya. Bala polis udah nyubuk tempat tu. Benung siku orang jai nya ngambi duit, seraya maya nya nerais ketuai polis minta orang jai nya nyerah diri. Tang orang jai nya lalu ngelaban. Bala polis betimbak ngelaban orang jai nya. 

       

         Dua iku orang jai kena timbak lalu mati tekalanya. Siku agi ngelarika diri tang mujur ditangkap udah nya. Polis lalu ngiga aku dalam bilik. Aku baru nemu diri lepas ari nyawa baya. Aku lalu dibuka tanchang sereta dibai ke sepital. Udah diberi ubat lalu gerai, aku pulai ke rumah.

        Nya mih ngujungka aku jera bejalai kediri ba tempat ti puang. Kebuah ti enda mending jaku pesan apai indai mih pekara tu nyadi. Ngelamatu mih apai enggau indai mesan  ngasuh mindah mesti bisi orang enggau. Udah tu badu aku bejalai kediri. Enti mindah, aku seruran bisi kaling enggau bejalai.

Karang : Pejuraika Penemu Diri

Pengajar  endang megai tanggung pengawa ti besai dikena ngemansangka  nembiak sekula. Pejuraika penemu nuan senentang pekara di atas.

               Pengajar disemaka apai indai di sekula. Pengajar nganti tempat apai indai di sekula. Pengajar di sekula endang beamat-amat ngajar nembiak nyentukka sida pandai. Enti dikira, mayuh agi nembiak begulai enggau bala pengajar enti dibanding begulai enggau apai indai. Pengajar tu ukai semina ngajar nembiak ba kelas tang ba luar kelas mega bisi tanggung pengawa sida ngagai bala nembiak.

               Bisi orang madah, ulah enggau pendiau nembiak bepanggai ba ajar enggau lalau ti diberi pengajar. Tu endang amat. Bala pengajar  seruran neritka atur  ba sekula. Tiap iku nembiak sekula ti belajar sigi enda tau enda nitihka atur sekula ti udah ditetapka enda milih bulu. Nembiak sekula diririka pasal nyaga disiplin diri. Ari disiplin ti manah tu mih nembiak sekula ulih mujur ba peresa lalu ulih nyapai juluk ati diri.

               Nembiak sekula patut beterima kasih ngagai pengajar. Pengajar di sekula enda ngetu-ngetu ngiri penemu ngagai nembiak bisi. Penemu ti diajar pengajar tu mih ti ulih ngasuh nembiak pas peresa enggau manah. Kebuah pia, nembiak tu mih ti nganti orang ke maya hari tu. Sida tu ila engka nyadi pengajar, lutur, polis, indu misi enggau mayuh agi ke bukai. Pemujur orang ke diatu pan bepun ari pengajar. 

             Ba pengawa luar mega, pengajar ngembuan tanggung pengawa ti besai reti ngagai nembiak. Ambika chunto ba pengawa bemain ping pong, nembiak ari ti enda nemu bemain ulih nyadi pemain ping pong ti nyulut ba dunya. Pia mega, nembiak ba sekula diajar nyadi ketuai.  Nyadi sekeda pengawa tu enda diajar apai indai. Kitai beruntung laban pengajar. Sida ukai semina nulung apai dalam ngajar bala anak tang lebih agi ari nya.

         Nya mih pengajar besai bendar tanggung pengawa ngagai nembiak. Tang apai indai enda ulih nyerahka semua pengawa ngajar anak ngagai bala pengajar. Ti pekara tu nyadi, nembiak enda ulih mujur enti semina bepanggaika pengajar aja.

Bagi B: Karang Belalau

Peratika enggau silik gambar di baruh . Tulis karang senentang guna aktiviti lumba enggau main ba sekula

Jaku Kelaung

Jaku Kelaung

Penerang:

Jaku kelaung tu siti ari leman jaku ti dibungkur jaku sempama. Jaku tu endang dikena kitai Iban besehari-sehari. Tu ngayanka kita chukup siru, bisi pemanah basa enggau ngena jaku kelaung tu ngambika ngelaung utai ti tau nganu nyawa.

Chunto Leka jaku Kelaung

1.    Ribat

Reti: orang indu ti ngandung

Chunto ayat:

Bini Anggat ti ngandung anak keterubah tetenguk deka makai salai rusa.

2.    Utai ke terebai

Reti:  burung pipit ti ngachau padi/ pulung.

Chunto ayat:

“Padi kami taun tu balat  amat dikachau utai ke terebai” ku Nabau madahka tuai rumah.

3.    Telih

Reti: padi ke balat diempa chit.

Chunto ayat:

“Nadai penyadi kitai menyanak taun tu. Udu amat padi telih di umai din.” Ku Indai Kui madahka anak iya.

4.    Baju

Reti: sakang tauka puchau dikena nyaga tubuh diri ari pengaruh ti tau munuh

Chunto ayat:

Enti baju enda tebal, anang enggau orang mindah jauh enggaika bulih penusah

5.    Beranchau

Reti: bechara

Chunto ayat:

Bala kitai di ulu tebilang bendar ba pengawa beranchau. Nadai tau begulai manah enggau pangan diri.

Sekeda ari Jaku Kelaung ti bukai

1.    Chelap

Reti: lama udah enda begulai enggau laki

2.    Ngaru

Reti: gatal

3.    Nawang

Reti: umai ke enggai tumbuh padi laban taun udah lanjur

4.    Kenyap

Reti: Mimpi

5.    Beganti

Reti: bebini tauka belaki baru

6.    Rumbau

Reti: Nadai anak/enda belaku tauka bebini

Entelah

Begiga Entelah

1. Rengayung nebah terentung,
   Anang abup, abub!
   Ila buah tamang checinang mansau begenarau.


   Menua iya: Menua kitai menua iya,
                     Menua antu menua Petara.

   Ulu lungga: Gelung kerungan
   Lalai iya : Terung pitan.



2. Tekuyung nanjak wung,
    Tumbung mansau chechinang.
    Sirut kesuh, sirut kesuh,
    Peda ngelegua baka asap api pengerang.

   Menua iya: Di tabung buluh betung,
                    Endur tedung nyengkilung ngangkut sarang.
                    Di peti sarang besi api,
                    Sukat nyai mau rerendang.

                    Ulu Lungga: Tulang kesindap
                    Lalai iya : Orang nginsap



3. Aki Engkik seduai Ini Engkik,
    Diau ba pelabuh beruai bilik,
   Makai Aki Engkik, ku Ini Engkik.
   Au, Ini Engkik, ku Apai Engkik.
   Tama Aki Engkik ke bilik.
   Kini ke nuan kitu, ku Ini Engkik,
   Nyin asi agi tinggal di ruai.


   Menua iya: Dalam ai, begulai enggau reni Raja Baya,
                    Di lubuk dalam begulai enggau kereman Raja Gumba.

      Ulu Lungga: Iban Ngaga Entaya
      Lalai iya : Ikan Tama Enselua


4. Ni dek apai uchu laki Endu?
   Tu sawa enggi aku ular sudu,
   Nadai pala nadai iku.
   Bisi nya ulih nuan,
   Ambi ka Jelapi Manang Megu,
   Datai din ila lalu galika di linti,
  Tikai bembai sapar rampu,
  Gagaka pedara lima piring telu,
  Tenchang di pala palu di pegu.
  Udah nya peda gamal iya tak rintu-rintu,
  Baka gamal Antu Buyu,
  Penunang bini orang.

  Idup aku apai,
  Gaga aku uchu.
  Dinga ada landu serebana munsuh di Ulu Kantu,
  Pagi mati lemai layu,
  Parai beduju rebah telentang.

   Menua: Di emperan madang ridan,
               Endur Kayan belaban beasur batak,
               Di tanjung pungga lesung,
               Dinga betekaung inggar baketerak.

Ulu lungga: Batang buluh pengerindu
Lalai iya : Orang Ngambuh Duku

Karang Belalau 2012

Karang belalau siti ari tanya ba PMR. Tanya tu ngundan 20 Mark. Iya ditanya ba Keretas 2.

Chunto Tanya Karang Belalau.

Peratika enggau silik gambar di baruh tu. Udah nya, tulis karang senentang enggau Profesion ti besai guna ba menua kitai. (20 Mark)

Karang - Dimensi Diri

Nuan dipinta nulis karang ti nyeritaka penemuai ngagai siti tempat di Malaysia.

Tulis karang nuan.

Pekara ti ditulis/dicheritaka

ü          *    Kemaya nemuai

ü          *    Sebut nama tempat ti dilawa

ü          *    Sapa ti enggau nemuai

ü          *    Ni pengelama nemuai

ü          *    Nama tuju penemuai nya

ü          *   Nama pengangkut ti dikena

ü          *   Nama aktiviti ti dikereja lebuh nemuai

ü          *   Nama pekara ti balat ngerinduka ati

ü          *  Ni asai nuan lebuh udah nemuai kia

Chunta Karang

               Peremisi sekula ujung taunt u tadi, aku bisi nemua ngagai siti tempat ti tebilang. Nyadi tempat tu iya nya menua Miri. Menua Miri tu digelar mega Menua Minyak. Kebuah pia, iya nyadi tempat ngeluar minyak ba Sarawak.

               Aku enda kediri nemuai ke Miri. Orang ti sama enggau iya nya madi tuai aku, Martin enggau aya aku empu ti benama Jubang. Apai enggau indai enda enggau nemuai maya nya laban agi kiruh betanamka sawit.

               Kami ti nemuai ke Miri semina tiga hari aja. Kebuah pia, aya Jubang enda ulih lama ngambi pemisi. Iya gawa nyadi lutur ba Sepital Limbang. Kurang lutur di Limbang nya iya enda diberi orang pemisi lama. Tuju kami nemuai endang udah semaya aya Jubang ngagai aku. Iya endang deka mai kami meda pemanah menua Miri. Aku pan gagit ati laban ti empai kala ke Miri. Tu keterubah iya dalam 15 taun udah idup. Tambah mega, aya Jubang madahka diri deka ngelantang ati ari mayuh pengawa ba sepital din.

               Hari keterubah kami raun ba Miri iya nya ngagai E-mart. Siti kebuah palan tu mayuh orang laban rega barang ti murah. Ukai kitai orang Malaysia aja ti bebeli barang ditu tang orang brunei mega sama bebelika barang tu. Amat maju tempat tu. Kami tiga bisi meli gari kediri empu. Aku meli baju Liverpool enggau beg sekula.

               Udah nya, nyau muak ke lemai, kami tiga bejalai ba Tanjung Lobang. Tu siti tempat memarin. Mayuh orang udah bisi dia maya kami datai. Rami menua tu ditu. Macham pupu bansa bisi.Kami tiga bisi ga enggau orang mandi enda lama. Udah nya kami lalu belelak ke hotel. Hotel endur kami diau iya nya Hotel Mega.

               Pagi siti, kami tiga ngagai tempat nupi baya di Baram. Datai ba tempat nya orang dia benung meri baya makai. Aku sempat ngambi gambar baya benung negam siku manuk. Nyau gelesi meda ulah baya tu. Tambah mega mayuh baya ti bebesai ditu. Pengelama kami tiga ditu nyau nya datai ke tengah hari. Udah nya, kami merarau ba kedai makai ba sebelah pasar Miri. Aku enda ingat agi tempat nya.Muak ke lemai, kami tiga ngeraun pasar Miri. Aku sempat begambar ba Canada Hill. Rindu sereta gaga amai ati laban bisi pengingat ba menua Miri.

               Hari ketiga kami lalu mulaika diri ke Limbang. Datai di rumah aku nyerita semua pasal penemuai ngagai Miri. Aku berasai lelak tang gaga laban semua tempat ti dilawa endang ngasuh ati rindu. Aku besemaya ngagai apai enggau indai deka belajar bebendar. Udah nya bulih gaji besai lalu mai seduai nemuai ngagai tempat ti tebilang ba dunya.