Karang : Pemesai Guna/Penguntung Industri Betanam Betupi

Langkar Karang
Pemuka karang:
- pengawa betanam betupi tu batang pengawa ti dikereja ari dulu kelia
- betanam betupi diatu jauh udah berubah ari dulu kelia.(Chunto: perengka dikena, chara ngereja, etb)
- Sekeda pengawa betanam betupi digaga ba menua tu baka bumai, bekebun getah, nupi ikan, etb)
- perintah endang sigi meransang pengawa betanam betupi.
-Pengawa betanam betupi mai mayuh penguntung.

Isi Karang (5/6 isi)
Isi 1: Nambahka penatai pemisi menua
- ulih nyual asil betanam betupi ngagai menua luar.( chunto: nyual sawit, getah, ikan)
- penatai pemisi betambah ulih dikena ngaga mayuh macham pemansang (chunto: sekula baru, jalai raya baru, sepital baru, etb)
- menua majak maju ( ulih nyadi menua mansang enggau maju ba taun 2020)
- rayat diau enggau ati ti senang lantang.

Isi 2: Nyendiaka mayuh macham peluang gawa ba industri betanam betupi
- ngurangka penanggul rayat ti enda bekereja.
- mayuh macham batang pengawa ba industri betanam betupi. ( deriba lori sawit, menija sawit, etb)
- pengidup rayat enda merinsa agi laban bisi pengawa ba industri betanam betupi.
- ulih bebeli mayuh macham barang laban bisi duit gaji.

Isi 3: Pun penatai pemakai
- semua barang pemakai di dunya bepun ari pengawa betanam betupi.
- pemakai ti bisi dijual ba pasar asil ari pengawa betanam betupi.
- pemakai ti chukup beguna bendar ngambika kitai enda pungkang enggau suntuk.
- pengawa betanam padi chukup mayuh dikereja laban nyadika pemakai selama mensia.
- kurang padi deka ngasuh suntuk beras.
- chukup pemakai, kitai enda lepi

Isi 4: Ngemansangka menua pesisir.
- perintah ngaga jalai ngagai menua pesisir.
- jalai digaga dikena ngangkut asil betanam betupi dijual ke pasar.
- Pemansang bukai ( ai beresi, kuasa karan, etb)
- Chunto asil betanam betupi ti dijual ke pasar baka petai, rian, sibau enggau mayuh agi.
- rayat menua pesisir kena rampit pemansang ti digaga perintah.
- pemansang ba menua pesisir enggau pasar lebih kurang sama lalu enda jauh tinggal.

Isi 5: Mantu ngurangka pengangat dunya
- dunya majak angat laban mayuh karbon dioksida.
- utai tumbuh ulih ngurangka karbon dioksida tang nambahka oksigen
- industri betanam betupi tu pengawa nanam utai tumbuh.
- rayat idup enggau menyana.
- pengerusak rampa menua enda balat nyadi

Penutup
- industri betanam betupi mesti dikemansangka ari diatu
- nembiak rebak baru patut diiri penemu industri betanam betupi ngena chara moden
- perintah patut nulung ngangkatka indutri betanam betupi.
- Menua kitai ulih tampak rita ketegal ti nyulut ba pengawa betanam betupi dudi hari ila.
- Pengawa betanam betupi ukai semina ungkup diri sebilik aja tang bisi juluk ati deka ngasuh iya ngagai tikas ti tinggi agi.

Isi Karang Pelajar Jaku Iban Sekula Sekondari

Sekeda Rintai Karang Jaku Iban Sekula Sekondari

1.Chara sekula ulih ngemujurka nembiak
-Pengetua ti landik sereta nemu ngatur pengawa
-Perengka enggau kereban chukup dikena belajar ba sekula
-Pengajar ti chukup sereta landik
-Nembiak ti ransing sereta manah disiplin
-Sukung apai indai enggau orang luar

2.Chara nyaga pemeresi kandang sekula
-Ngatur gotong-royong
-Ngaga kimpin nyaga pemeresi sekula
-Ngatur pekit kelas pemadu beresi
-Nyediaka taga jam meresika kelas enggau kandang sekula
-Neritka atur sekula

3.Chara nyadi nembiak ti menyana sereta beguna
-Belajar bebendar
-Nitihka ajar jalai pengarap
-Begulai enggau kaban/orang ti manah ulah
-Bebasa ke orang tuai
-Ulih nerima jaku peransang enggau jaku ajar

4.Penguntung ngambi bagi aktiviti sukan ba sekula
-Ngisi maya lepa
-Tubuh semampai regas enggau bepengerai
-Ngeririka diri bedisiplin
-Ngerapitka kaul enggau orang bukai
-Ngulihka setipit/ngarika sekula ba lumba enggau main

5.Chara nyadi nembiak ti mujur ba pelajar sekula
-Ngembuan disiplin ti manah
-Ulih belajar kediri
-Ngembuan pengerindu macha
-Rajin ngulang pelajar
-Aktif ba kokurikulum

6.Chara Ngurangka Kes Nembiak enda datai ke sekula
-Neritka atur sekula
-Tanggung pengawa apai indai
-Pengajar ngajar ngena chara ti ngerinduka/ulih narit nembiak belajar
-Ngatur program ti ulih narit ati nembiak ke sekula
-Polis bejalaika pengawa nangkap nembiak ti sengaja enda datai ke sekula

7.Kebuah nembiak majak kurang bedisiplin
-Kurang penyayau ari apai indai/enda dikeibuhka apai indai
-Kena rampit pangan serambau/salah pilih pangan serambau
-Undang-undang enggau atur sekula ti enda terit
-Mayuh nerima tempias ti enda manah ari luar- televisyen, internet
-Nadai pengibuh ari mensia mayuh


8.Penguntung nyereta/ngulu program motivasyen
-Ngambika lebih ransing agi belajar
-Bekelala enggau nembiak bukai
-Ngulihka mayuh macham penerang ti beguna
-Ngisi maya lepa
-Ngemanahka ulah/nyeliahka pengawa ti enda menuku

9.Pemesai guna belajarka jaku Iban ba sekula
-Jaku enda mudah punas
-Bisi peluang gawa ba profesion ti bisi kait enggau jaku Iban
-Jaku ulih nyadika identiti/kelai siti-siti bansa
-Ngerapitka kaul enggau bansa iban di menua bukai
-Ngambika jaku iban ulih nyadi jaku rasmi dudi hari ila


10.Pemesai guna main asal
-Identiti/kelai/penyelai siti-siti bansa
-Dikena merindang diri
-Narit temuai luar
-Ngerapitka kaul
-Ngisi maya lepa

Karang Rama 1.0

CHARA NGEMANSANGKA MAIN ASAL BANSA IBAN

Asil: Nelson Lenggi (5B)

Kemaya hari tu, main asal bansa Iban nyau majak punas. Ari pekara tu, nembiak rebak dudi ila enda nemu agi pasal main asal ti majak punas. Beduduk ari nya, patut bisi chara ti ulih dipejalaika ngambika pekara tu enda nyadi senyadi. Ari nya tadi, main asal ulih ditanka ari diatu nyentukka jemah ila laban udah bisi chara ti betul sereta semitan. Nya alai, chara-chara ti nangkanka tu dikarapka ulih ngemansangka main asal bansa Iban.

Keterubah iya, apai indai patut ngajar anak pasal main asal lebuh belabuh ari mit. Kebuah pia, anak riri sereta teleba pasal main asal bansa diri. Nengah chara tu, anak mit deka bisi pengerindu ngagai main asal diri diri. Apai indai patut mai anak sida bemain main asal baka main pangka, main selingkut enggau mayuh main asal ti bukai. Enti apai indai ngemeranka tanggung pengawa tu, main asal tu ulih ditanka ari terus punas dudi hari ila.

Nangkanka nya, siti chara ke bukai dikena ngemansangka main asal bansa Iban iya nya ngatur pekit main asal. Main asal baka nyumpit enggau bebatak lampung ulih diangkat nyadi main ti ulih datai ngagai tikas antara bansa. Enti bisi pekit diatur, ukai semina bansa Iban aja deka ngambi bagi tang mega ngerampit bansa bukai. Enggau nya, main asal tu ulih mansang semansang. Kebuah pia, main asal tu majak ditemu sereta dikelala mayuh raban bansa. Iya mega ukai dikerindu bansa Iban aja tang mega bansa bukai.

Kelimpah ari nya, chara bukai ti patut digaga dikena ngemansangka main asal iya nya numbuhka aktiviti main asal ba sekula. Kelab main asal patut ditumbuhka enda ngira ba sekula primari tauka sekondari. Nembiak ulih belajarka main asal nengah aktiviti kokurikulum ti dipejalaika ba sekula. Dikena ngepun pengawa tu, kelab ti ulih narit nembiak baka main asal nyumpit endang patut ditumbuhka dulu sebedau main ke bukai baka kelab tabuh enggau mayuh agi. Ari nya tadi, nembiak sekula nemu sereta rinduka main asal nya tadi.

Nambahka nya mega, perintah patut ngatur kimpin rinduka main asal. Kimpin ke baka tu dikena narit mensia mayuh rinduka main asal bansa diri. Chara ke baka tu endang siti chara ti chukup manah. Kimpin ti dipejalai nengah surat berita, televisyen enggau radio endang ulih ditemu serap mensia. Ari nya tadi, mensia mayuh deka rindu agi ke main asal laban udah bisi kimpin ti dipejalaika perintah sepemanjai taun. Sida mega ulih ngeleda laban main asal tu mega bisi mai penguntung.

Chara ke bukai ke tau dipejalaika dikena ngemansangka main asal iya nya ngatur promosi. Enggau chara tu, main asal deka laku lalu dikerinduka mensia mayuh. Temuai luar datai ke menua kitai endang deka meda penyelai ti bisi ba menua tu. Kitai patut ngambi peluang ngayanka main asal bansa diri ti empai dipeda temuai luar. Tu ulih nyadi siti promosi ngagai orang bukai lalu ukai semina ngagai temuai aja. Enti promosi tu dipejalaika enggau manah, dia tiap raban bansa enggau naka ulih mantaika main asal diri empu. Kebuah pia, ngambika main asal sida ulih dipeda temuai luar. Enggau tu, main asal enda mudah punas pia aja.

Ke pengujung iya, semua pupu raban bansa enda tau nejuka main asal bansa diri punas lalu terus lenyau. Kitai enda patut disemaka baka kachang ti enda ingatka umbang laban ninggalka identiti bansa diri. Kitai sama ngarapka perintah terus nyukung program ngetanka main asal. Nya alai, enti main asal tu ulih ditanka dia semua kitai bulih penguntung iya. Arapka main asal tu terus dikerembaika ari sida ke tuai lalu disambung sida ke biak dudi hari baka rutan tampung danan, wi tampung tali, pechah periuk tanah, ganti periuk tani, parai sida tuai nganti nembiak dudi.

Latih Karang Pindah Penerang

Tanya: Perati grafik di baruh tu. Tulis penerang nuan enda lebih ari 80 leka jaku

Pengerindu Macha
Tanya: Nembiak sekula endang diansak seruran ngembuan pengerindu macha. Tentu bisi tuju sida diansak macha. Pejuraika penemu nuan senentang pekara tu?


Langkar karang
1.Pemuka karang
- nama kebuah orang macha?
- ni maya kitai diajar macha? Ari tadika, diajar apai indai ( umur 3-4 taun)
- sapa ti patut ngembuan ulah rindu macha?mit besai, tuai biak
- nama pekara ti suah dibacha?pasal penanyi, politik, berita kemaya hari
- dini orang suah macha?
- Pengawa macha pengawa seumur idup

Isi Karang (5/6 Paragraf)
Isi 1: Ngisi maya lepa enggau beguna
- kemaya bisi maya lepa?
- Nama penyadi enti maya lepa enda diisi enggau manah?
- Beri chunto pengawa ti enda menuku ketegal nadai ngembuan ulah rindu macha?
Selit jaku sempama: baka uduk nyalak bukit

Isi 2: Ngulihka penemu/penerang baru
- dini kitai ngulihka penemu baru/penerang baru?
- padahka kereban bacha ti nyadi palan ngiga penemu?chunto: artikel, rencana, esei
- nama guna penemu baru nya?
- nama penyadi enti kitai enda belumba-lumba enggau orang bukai ngulihka penemu baru?



Isi 3: Ngulang pelajar ti udah/kala diajar pengajar.
- Tuju macha: ngulang pelajar
-Nama kebuah ngulang pelajar? Mulaika pengingat, ngambika seruran ingat
- Kebuah bukai ngulang pelajar? Ulih nyaut peresa enggau manah.
Selit jaku sempama: Belakang duku enti diansah tau mih tajam

Isi 4: Merindang ati/Nyeliahka stress
- Nama kebuah kitai mesti merindang ati?
- Nama kereban bacha ti patut dikena merindang ati?Beri chunto? Komik, Cherpan, Ensera Jelu
- Nama penyadi enti kitai udah merindang ati?
Selit jaku sempama: Lapang asai dada

Isi 5: Ngena perengka ti disediaka perintah(Librari tu keresa rama)
- Tuju perintah nyediaka librari?beri kebuah? Ngambika rayat ulih nginjau bup, macha bup dia.
- Perintah udah bebelanja besai nyediaka librari- Beri chunto librari ti disediaka perintah? Librari Limbang, Librari Sarawak, Librari Mit Nanga Medamit.
- Nama penyadi enti nadai orang deka macha ba librari ti disediaka perintah?
Selit jaku sempama: baka rumput di tisi jalai

Penutup Karang
-Mayuh penguntung enti ngembuan pengerindu macha.
-Menua ulih maju enti rayat bisi pengerindu macha
-Nembiak patut nelebaka diri macha bup cherita.
-Anang madah bisi pengerindu macha tak lalu enda ngereja
Selit jaku sempama: Mulut nyebut patung enda nyaut

Atur Ngena Pemisi ti diberi Perintah

Gaya Ngena Duit Belanja Ti Diberi Perintah

Tanya Karang: Tiap rayat di menua tu patut bisi tanggung pengawa diri lebuh bekena  pemisi ti diberi perintah. Pejuraika penemu nuan senentang pekara nya?

           Menua kitai benung dituntung penusah penatai pemisi kemaya hari tu. Mata duit menua kitai majak enda berega enti dibanding enggau mata duit menua bukai baka Brunei enggau Singapura. Taja pia, perintah seruran meri ungkup pemisi ngagai genap rayat iya.  Mayuh empas ti enda manah deka nyadi enti kitai enda nemu ngena pemisi ti diberi nya. Gaya ngena pemisi ti diberi tu ulih mantu ekonomi ba menua tu pulaika manah baka selama.

           Pemisi menua kitai endang chukup mayuh. Asil batang dunya tu endang tebal agi ari menua kitai. Bedau agi asil ari minyak enggau pengeraja asal ke bukai. Kitai patut temegah ati laban menua tu mayuh penatai pemisi. Enti ulih penatai pemisi menua tu patut dibagi enggau manah. Tiap ti nengeri patut diberi nitihka pengulih diri. Enti nengeri nya ngasilka minyak pemadu mayuh, beri mih ungkup ti ngelui agi ari nengeri bukai. Pia mega, bala pemesai enda patut masau tauka ngena pemisi tu ngagai pekara ti enda beguna. Enti ulih, mayuh agi belanja tu ungkup ngagai pelajar sekula. Kebuah pia, pemansang pelajar sekula pemadu beguna jemah ila. Gaya pemesai ngena belanja ke diatu patut diubah ngagai pengawa ke menyana agi. Masau duit dikena ngatur konsert enggau pengerami ti besai-besai sigi patut dipejalai tang enda merubuhka mayuh belanja ba pengawa nya.

            Kebukai iya nya gaya bekenaka belanja ari opis-opis perintah. Tiap taun, endang bisi duit belanja ungkup opis-opis perintah. Ketuai ba opis perintah tu patut nemu ngena belanja nya. Bisi sekeda ketuai ba opis perintah lalu melanja duit nya dikena pekara ti enda tentu beguna. Ambika banding, nukar pekekas opis taja agi manah. Chunto iya, airkon lama diganti enggau airkon baru. Enti ulih, kena mih belanja tu ngagai pengawa ti beguna agi. Pengawa ti tau nambahka kualiti enggau produktiviti sigi patut nyadika iching perinching ketuai opis perintah.

           Ba genturung bukai mega bisi pengelemi lebuh bekena belanja tu. Enti ba rumah panjai, tuai rumah patut bekenaka belanja enggau betul. Duit rumah panjai enti enda dipelanja enggau betul nadai mai penguntung. Bisi sekeda rumah panjai lebuh nerima duit tu lalu dibagi sekayu rumah laban ngasaika diri untung nemu beliung enda ngambuh, nemu peredah enda ningkuh. Tu ukai jalai ti betul ngena belanja. Duit tu patut dibagi ngagai genap komiti ti bisi ba rumah panjai nya. Enti bedau bisi komiti, nadai salah numbuhka komiti baka komiti main asal, komiti pelajar sekula, komiti indu enggau komiti lumba enggau main.

             Ukai nya aja, tiap ruang bilik mega patut nemu ngena pemisi ti diberi perintah. Diatu, mayuh amat pemeri perintah ke ungkup rayat. Chunto iya, duit BRIM, duit bantu sekula, duit rayat seranta enggau mayuh agi. Taja pia, mayuh rayat enda nemu ngena pemisi ti diberi perintah tu. Enti ulih, kena mih duit nya enggau betul. Bisi sekeda udah bulih duit BRIM lalu mayuh kaban ngelangkau sereta enda ngira anak bini. Pengujung iya, duit ambis dikena ngena jalai ti enda betul. Duit ambis nadai temu tuju. Udah nya baru nesal laban udah masau pemisi ti diberi perintah tang nadai nguna baka sempama asi udah nyadi bubur.

             Nembiak ti agi belajar mega patut nemu bekenaka pemisi ti diberi perintah. Duit biasiswa taja kurang diberi ngagai bansa Iban tang anang mih ngayahka iya enggau pekara ti enda betul. Udah ngulihka duit biasiswa, beli mih bup enggau kereban sekula ti bukai. Anang lalu terus meli talipaun binching ti berega beribu-ribu. Orang ti udah bekereja pan nyau alah laban nembiak sekula. Chukup beruntung mih nembiak kemaya hari tu. Nyau deka genap bantu diberi ngagai nembiak sekula. Nembiak sekula patut malas semua budi ti udah diberi ngagai sida. Anang malas iya ngena penyai. Diberi laptop tang bepeda utai kamah baka pornografi enggau cherita enda menuku. Tu ukai pekara ti patut. Laptop diberi ngambika ulih ngulihka penerang tambah ba internet.

           Nya alai, ngiga mih jalai ti pemadu manah ngambika pemisi ti diberi perintah enda diayah pia aja. Semua patut nemu tanggung pengawa kediri empu lebuh bekenaka pemisi ti diberi perintah. Pemesai ti ditemu salah ngena pemisi menua enda patut nyadi di menua tu. Sida iya patut kasihka rayat ti idup merinsa. Pemesai ti kaya raya ketegal pengawa ti enda betul sigi bisi maya iya ila kena penulah diri. Indah baka sempama, landik pan tupai merejuk, sigi bisi maya iya labuh ke tanah.

Licha: Bekelimat Ngena Duit

Karang: Bejaku ba mua mayuh/Licha

Tanya: Nuan ngarika sekula ba pekit bejaku ba mua mayuh ti. Topik nuan iya nya “ Penguntung Nemu Bekelimat Ngena Duit”

Tulis penuh teks nuan nya.

         Terima kasih raban pengatur program. Meri selamat pagi sereta tabi basa ngagai kepala pengajar, Mr Rantai Embawie, bala pengajar, raban hakim ti seruran baka idung antara mata, dilah antara nyawa, enggau semua ti bisi datai ditu. Aku meri besai terima kasih laban diberi peluang bejaku ngagai kita semua.

         Jaku tuai ti suah didinga, “buah ubi laun dikali buruk di pun, buah empasa laun diempa lunggar taun” tu nyadi lalau enggau tenggau aku bejaku ngagai kita. Reti sempama nya nerangka pekara ke manah tauka penemu ke menuku enti disimpan sereta enda dipekunsika enggau orang bukai, iya nadai beguna agi. Enggau nya, aku tu deka bekunsi pasal “Penguntung nemu bekelimat ngena duit.” Aku nemu topik ke pagi tu amat beguna ngagai mensia mayuh kelebih agi maya pengusut ekonomi ti nuntung menua kitai.

Semua peninga,
         Duit tu besai bendar guna kemaya hari tu. Enti jeman suba, kitai ulih betukar barang ti dikumbai sistem barter. Semua nya enda ulih dikena agi diatu. Semua barang dibeli ngena duit. Nya alai, duit ti berega amat. Orang ti nadai duit nadai ulih meli barang. Nya mih, kitai mesti bekelimat ngena duit. Kitai patut enda masau, enda ngayah, sereta cheremat ngena duit. Kebuah pia, mayuh penguntung enti nemu bekelimat ngena duit.

         Siti ari kebuah penguntung nemu bekelimat ngena duit iya nya bisi duit simpan. Duit tu mih ke penabat dikena dudi hari. Kitai sama enda nemu pekara ti deka nyadi dudi hari. Ukai kitai ngajihka rangkang ngachuk mata tang manah agi kitai besedia dulu. Enti kitai nadai besimpanka duit dikena dudi hari tentu tu mai penusah. Mayuh chunto udah dipeda ketegal ti nadai nemu bekelimat ngena duit. Enti bisi penusah ngenyit nyadi lalu enda ulih gawa tentu nadai diberi gaji. Ari nya tadi, duit simpan tu mih dikena dulu seraya nganti udah gerai lalu ulih gawa.

         Kelimpah ari nya, penguntung bukai nemu bekelimat iya nya enda meli barang sepeneka ati. Penguna ti nemu bekelimat nemu berunding dulu sebedau meli barang. Sida enda mudah meli siti-siti barang taja pan rega iya murah. Kebuah pia, barang ti dibeli nya patut bisi guna. Chunto iya, meli mija baru taja pan mija lama agi ulih dikena. Ulah nya tadi enda bepikir dulu sebedau meli laban alah kena jaku manis orang ti bejual barang nya. Nya alai, enti kitai nemu bekelimat ngena duit, barang ti dibeli kitai endang barang ti amat-amat dikena. Ulah rua ti ulih ditingkilka kitai semua. Sempama baka besai beliung besai ga abi enda patut nyadi agi. Kitai mesti nemu ngelimat duit

Bala peninga,
         Tentu ditu mayuh apai indai. Baka ni belanja diri sebilik taun tu? Tentu bisi empas ketegal GST ti dipejalai belabuh bulan Empat tu tadi. Enti bisi dalam ruang bilik nya nemu bekelimat ngena duit, tentu lempung mimit lebuh sida ti ngiga belanja. Ambika banding, tiap iku dalam ruang bilik nya ngelimat seringgit sehari. Enti sebulan, siku ulih nyimpan RM30. Arapka lebih mih orang nemu bekelimat ba sida sebilik nya. Pekara ti bebatang ti dipejuraika nya tadi iya bekelimat ngena duit ngelempungka belanja diri sebilik. Bepun ari sehari tu, sama-sama mih kita ngelimatka duit diri.

        Penguntung bukai ari nemu bekelimat iya nya ngerekaika pengerindu nabung. Pengawa nabung tu ulih digaga enti kitai nemu bekelimat ngena duit. Enti nadai duit lebih, pengawa nabung tu enda ulih digaga. Pengawa nyimpan duit tu sigi patut dikereja enda ngira umur. Anak mit suah agi diasuh apai indai nyimpan duit dalam tabung. Orang tuai besai ti bekereja patut nyimpan duit dalam bank. Nya alai, kitai patut ngemeranka pengawa nabung tu. Enti nadai nemu bekelimat tentu nadai ga duit ti disimpan dalam tabung.

         Ke bukai agi, penguntung bekelimat ngena duit tu ulih nyeliahka pengawa riri berutang. Tentu kitai kala ninga jaku sema “kair pantuk baka manuk.” Sempama tu bisi kaul enggau ulah kitai ti enda nemu ngatur belanja tauka gaji diri. Pemadu rugi enti suah berutang. Tentu bisi chara kena nyeliahka diri ari berutang. Tu mih kebuah kitai patut bekelimat ngena duit. Enti ulih, kitai semina tau berutang lebuh bisi ditinggal penusah tauka penanggul besai. Anang baka sempama lawa kerubung enda perisi. Gamal enggau pisin ti enda ngipakka pemisi diri. Dikena ngerari diri ari berutang iya nya mesti bekelimat ngena duit. Duit ti dikukun ulih nyadi mayuh lalu ulih meli barang ti mar nya.

Peninga semua,

           Nya alai, mayuh amai penguntung enti kitai nemu bekelimat. Aku minta ampun enti bisi tinggi jaku lebuh bejuraika topik tu tadi. Ngarapka pengerindu bekelimatka tu ulih ngerekai dalam pengidup kitai. Sama mih kitai berunding lalu bepikir laban ujan enda sepemanjai malam. Enggau penemu ti agi rapas penyuluk tu, aku sekali agi nandu jaku iya nya mayuh penguntung nemu bekelimat ngena duit. Nya aja, terima kasih.

Asil karang: Angela Nyawai (5A)

Chunto Karang Sekondari Baruh

Karang Sekondari Baruh

Tanya Karang: Nuan dipinta nulis siti artikel besuluka ramba jaku “Nembiak Menyana Sekula Beberita.” Tulis penuh artikel nuan nya.

“Nembiak Menyana Sekula Beberita”

Dikarang: Affrans Jie

             Kemaya hari tu, pemujur nembiak sekula ba peresa perintah suah nyadi batang randau mensia mayuh. Taja pia, ukai semina pemujur ba peresa aja patut diperatika tang pekara bukai pan sama beguna ba sekula. “Nembiak Menyana Sekula Beberita” tu siti sulu jaku ti mai besai bendar reti ngagai pemansang dudi hari ila. Kebuah pia, sulu jaku nya ullih nyadika juluk ati kitai semua ti ngagai nembiak.

           Nembiak tu iya nya anak ti agi tauka anak mit. Menyana tu iya nya nadai penimbang enggau pengurang kelebih agi ba penemu enggau penau. Sekula tu iya nya palan endur belajar sereta ngiga penemu baru. Beberita tu mai reti nampak ditemu enggau dikelala orang mayuh. Nya alai “Nembiak Menyana Sekula Beberita” tu tau dikumbai nembiak ti ti nadai penimpang enggau pengurang mai  sekula ditemu sereta dikelala orang mayuh.

          Sekula deka tampak rita enti nembiak iya bulih pemutus peresa ti manah. Nya alai, pemberita berebut-rebut nusui sekula ti bulih pemutus peresa ti manah. Enggau nya, bala pengajar naka ulih ngajar nembiak ngambika mujur dalam peresa. Sekula ti mujur ba peresa seruran disebut-sebut nyadika chunto sekula bukai bebanding sekula ti kurang mujur. Ambika banding, sekula SK Ulu Lubai beberita bendar ketegal bulih pemutus peresa ti manah ba UPSR lalu mayuh bulih gela.Tu mih chara ti mudah ngasuh sekula beberita enggau jampat. Nembiak, apai indai, pengajar deka nerima jaku puji sereta ngasaika diri temegah ati.

           Ukai semina ari sukut akademik aja ti ulih nentuka sekula beberita. Sekula deka tebilang mega enti nyulut ba aktiviti kokurikulum. Akitiviti kokurikulum baka pekit badminton, ragbi enggau tennis mega ulih ngasuh sekula beberita. Enti nembiak ba sekula nya ulih ngarika menua nyentukka ngagai tikas dunya, iya mega ulih ngangkat nama sekula lalu mandangka nembiak ba sekula nya nyulut agi ba bidang kokurikulum. Penuduk sekula mega manah agi ari sekula bukai. Kebuah pia, sekula beberita ukai semina dipeda ari sukut akademik aja tang dipeda mega ari kokurikulum

             Siti agi pemenyana nembiak ti ngasuh sekula beberita iya nya ulah enggau perangai. Sekula ti likun sereta ngembuan nembiak ti manah perangai enggau ulah dikerinduka agi ari sekula bukai. Pemanah ulah enggau perangai bekaul amat enggau pemujur peresa. Nembiak ti ngembuan perangai enggau ulah ti manah deka mujur agi ari nembiak bukai. Nembiak ti ngereja mayuh penyalah deka ngerusakka nama sekula. Enti ulih, anang ngasuh sekula ditemu sereta nampak ketegal penyai.

           Nya alai, sekula endang enggau naka ulih nempa nembiak menyana. Apai indai enda patut ngelepaska tanggung pengawa sida iya. Apai indai pan patut sama mantu ngemujurka sulu jaku “Nembiak Menyana Sekula Beberita.” Pengawa ngasuh sekula beberita sereta jelai nama enda ulih dikereja nembiak enggau pengajar aja. Sama-sama mih kitai baka sempama “berat sama ngangkat, lempung sama nanggung”

KARANG LICHA/BEJAKU BA MUA MAYUH(1.0)

Karang Beformat: Bejaku Ba Mua Mayuh enggau Licha


Tip Karang:

1.Chara nulis karang bejaku ba mua mayuh enggau licha nyau deka sama. Taja pia, gaya enggau isi karang nya bisi bebida mimit.


2.Karang bejaku ba mua mayuh, suah agi diberi situasyen baka maya ngintu siti-siti pengerami. Nuan dipinta bejaku bepelasarka penerang ari situasyen ti diberi.


3.Suah agi tanya ngena situasyen ngambi bagi ba pekit bejaku ba mua mayuh.

4.Gaya nulis ti formal tang selitka jaku dalam, rambai jaku enggau jaku sempama ti dikena ngasuh peninga enda jampat leju lalu semampai deka ninga licha ti dikenataika maya nya.

FORMAT: Bejaku ba Mua Mayuh enggau Licha
1.Pemuka (1 paragraf)
- jaku pengelalu nitihka pangkat enggau hakim(enti bepekit)
- jaku pengelalu keterubah diberi ngagai tuai pengatur program(pengerusi majlis)
-madahka pasal diri ti bekaul enggau jaku/licha ti deka dikenataika
-madahka pengaga ati laban diberi peluang bejaku/ngenataika licha
-madah pengaga ati mega ngagai bala ti ulih datai lalu deka ningaka jaku/licha

2.Isi karang (5/6 isi)
- dibagi dua isi: Isi Pemuka enggau Kah Isi/Isi Pugu/Isi ke endar
Isi Pemuka/pelasar jaku pemuka
* meri penerang pasal topik- reti, kerembai topik
*dikena ngaitka/nyangkut Pugu isi@Isi karang

Isi Karang(5 isi)
-Tiap isi ditulis ba paragraf kediri.
-anang begulaika isi karang dalam siti paragraf
-kerembaika enggau manah isi karang-beri chunto, jaku dalam/jaku sempama/rambai jaku


3.Penutup Karang
- Ngeraup/ngukun semua penerang sereta meri penemu ti bebatang tauka jaku kenang.
-meri jaku terima kasih ngagai semua peninga
-minta ampun enti bisi jaku/licha ti dikenatai bisi nyima/ngasuh pedis ati


CHUNTO KARANG
Tanya Karang: Nuan baru udah ngulu licha pasal “Program Latih Ke Bansa(PLKN)”. Datai ba sekula, nuan ngenataika licha nya ngagai semua nembiak lebuh maya gempuru besai.

Tulis penuh licha nuan nya.

           Meri tabi basa lalu selamat pagi ngagai tuai pengatur program, iya ti dipebasa Prinsipal Mr Rajamanian Kumaresan, semua pengajar, raban pengawas, enggau bala nembiak ti bisi bela begempuru ditu. Nyadi aku berasai temegah ati laban diberi awak bejaku ditu. Pia mega, aku gaga ati mega laban kita deka ningaka pekara ti deka dikenataika aku lagi.

Bala peninga semua,
         Kena ujung minggu tu tadi, aku udah ngulu licha pasal Program Latih Ke Bansa. Dalam licha nya, aku diberi penerang pasal program nya. Nyadi ke pagi tu, aku deka ngenataika baru penerang nya ngagai kita semua. Ngarapka kita ulih mending sereta meretika pekara ti dikenataika tu lagi. Kebuah pia, kitai ti sama agi besekula tu endang deka nyereta program tu jemah ila.

           Nama Latih Ke bansa? Tanya tu suah bendar didinga ari orang ti bedau nemu pekara tu. Ukai semina kitai nembiak aja ti enda nemu, orang ti besai tuai pan bisi enda nemu utai ti disebut ‘Latih ke Bansa’. Program tu latih ti diterima nembiak lepas sekula pom lima. Program tu nyengkaum ngiri penemu soldadu enggau penemu taluk ke menua. Nya alai, perintah sigi ngarapka nembiak ti udah ngulu latih tu diadang bulih mayuh penemu ti beguna.

            Juluk ati lebuh perintah ngaga program tu iya nya ngambuh peranak Malaysia ti ngembuan pengangkun ke menua diri. Pengangkun tu nyadi lebuh kitai bisi pengingin sereta penyayau ngagai menua diri. PLKN tu dikena ngerak sereta deka ngetanka menua diri ari kena serang munsuh. Orang luar deka nyerang menua ti nadai penegap. Nya alai, menua kitai ngatur PLKN tu dikena ngenegapka agi menua sereta enda mudah kena serang. Kitai mega enggai agi dipegai orang luar. Enggau naka ulih mih kitai ngetanka menua merdeka tu kenyau 55 taun.

Bala peninga,
              PLKN tu diisi aktiviti sosial/masyarakat enggau pengangkun menua. Tentu bisi pengagit kitai deka enggau orang PLKN. Lebuh aktiviti masyarakat, kitai begulai ngaga siti-siti pengawa enggau orang tuai besai. Enggau chara tu, kitai ulih nelebaka diri begulai enggau orang bukai ukai semina sama umur sereta iya ti serebak. Kitai ti ngulu program tu belajarka pekara baru. Ambi ke banding, lebuh aktiviti ngechat rumah dia kitai bulih penemu baru ngechat. Pia mega aktiviti ke bukai. Kitai begulai enggau orang bukai sereta ngulihka penemu baka sempama nyelam sambil ngirup ai.

              Juluk perintah ba PLKN endang manah. Kitai sama nemu lepas SPM, nembiak sigi nadai pengawa kelimpah ti ngelimpangka diri bekereja sentara aja. Lebuh PLKN tu dipejalai, nembiak ulih ngisi maya tu enggau pekara ti chukup beguna tu. Tambah mega, sida ti udah kala enggau PLKN tu bisi diberi elaun RM300. Nitihka licha ti didinga maya nya, nembiak ti enggau PLKN deka bulih 2 set pekayan sereta pemakai endang disediaka perintah. Udah tu ila, majak kurang mih penanggul sosial nyadi baka lumba motosikal, kayo-kayo enggau bepakai utai ti enda menuku kelebih agi dadah.

              Maya licha nya mega, madahka apai indai patut nyukung program tu. Bisi sekeda apai indai irau ati anak sida iya ti nyereta PLKN. Sida enggaika anak diri nyadi soldadu baka ti nyadi ba menua bukai baka Singapura enggau Korea. Nya penemu ti salah. PLKN tu semina ngajar pasal kawad kaki, megai senyata sereta latih nimbak. Elemen tu semina 20% aja. Udah tu, padahka ngagai apai indai diri empu. Minta sida anang nagang anak diri nyereta PLKN tu.

              Perintah endang udah bebelanja besai lebuh ti ngatur program tu. Lebuh taun 2004 suba, nembiak ti kena bai nyereta PLKN tu manggai ngagai 7000 lebih. Ari nya, belanja iya sigi bejuta-juta. Diatu udah taun 2015, endang mayuh belanja dikena ari taun iya dipejalai. Ari nya tadi, jaku tangkan tu ngagai sida ti bisi peluang enggau PLKN tu enggau naka ulih ngulihka penemu sereta pengelandik maya nya ila. Enti ulih, anang baka ngelepas batuk ba tangga aja. Kaukka mih penemu enggau pengelandik maya nya.

           Ke pengujung iya, ngarapka penerang ti dikenataika tu nyentuk ba kita semua. Aku sekali agi minta ampun ari ujung kaki nyentukka punjung pala lebuh meri licha tu. Aku minta ngambi iya ti chiru lalu muai iya ti keruh. Ke simpul kenang ari aku, PLKN tu pekara ti manah ti digaga perintah lalu mai mayuh penguntung ngagai kitai semua. Nya aja ari aku. Terima kasih laban udah enggau lenak ninga licha tu.

Dikarang: Mathew Japing(5C)

Dunya Sempama- Karang belalauka Sempama

Karang Sempama- “Nesal dudi nadai reti”

             Ba rumah panjai Sungai Kudang, bisi siti ruang bilik ti diwan uchu enggau aki iya aja. Nama uchu iya iya Anchil. Anchil tu baru udah ngabiska pelajar pom lima ba sekula sekondari. Apai enggau indai Anchil udah nadai ketegal karam lebuh seduai pulai ari umai sida di Tempalai Midang. Tanah tu suba tanah pesaka ti diperimba aki iya. Sida serumah bala bela bisi tanah dia.

           Hari siti, Anchil bisi ati deka nyual tanah pesaka nya. Iya lalu ngelawa aki iya ti benung ngansah duku. “Aki, nama enda dijual tanah aki ba Tempalai Midang nyin. Nadai mih nya guna din. Enggi sida Duat udah dijual. Peda nyau kaya raja sida,” ku Anchil ngepunka randau enggau aki iya. Aki iya agi enda nyaut. Iya semina malik enda lama ngagai uchu. Perening iya nya nyelai ari ngelamatu. Anchil lalu nukik baru, “Aki, jual tanah nya. Enda aki tusah-tusah agi. Ngena duit nya ila mih tua beridup. Enda agi pengidup tua nyadi kair pantuk baka manuk belama iya”

          Aki iya lalu nyaut, “Uchu, tanah nya tanah pesaka. Enda ulih dijual sengapa. Peda nuan diatu, orang berebut ngiga tanah. Nama penyadi jemah ila, enti nadai tanah?”. Anchil lalu ngebuka diri. Iya nurun enggau sida Duat Nyabung. Aki iya lalu nurun deka mensiang kebun rian ba Tempalai Midang. Runding iya panjai. Seagi iya idup, seagi nya mih ngenanka tanah nya. Tanah tu mih pesaka ti pengambis iya berega ba aki Anchil.

         Pulai Anchil enggau Duat nyabung, peda sida serumah begelumu ba ruai iya. Peda aki iya enda kekebut bebenjur. Aki iya udah nadai. Iya nadai laban kena pantuk ular tedung ba Tempalai Midang. Sida serumah ngulit seminggu aja. Maya ngetas ulit, sida serumah bisi nyabung. Mayuh mega orang menua bukai datai nyabung. Siku ari orang ti enggau nyabung nya Tah Ah Hip. Iya endang orang kaya sereta mayuh udah meli tanah sida ba menua nya. Anchil lalu betemu enggau Tah Ah Hip laban deka nyual tanah ba Tempalai Midang. Udah runding setuju, tanah nya pan diempu Tah Ah Hip. Anchil gaga ati. Iya ngasaika diri udah kaya raja baka orang bukai. Dalam ati iya, iya siku orang ti benasit bendar laban bulih penyenang taja nadai kereja bebendar lalu nyemaka diri nemu rian tingkar.

           Ngena duit nya, Anchil majakka pengawa iya nyabung. Iya mega nyau nyadi pengirup sereta pengindu diatu. Duit tanah iya pan nyau majak mimit semimit. Taja pia, iya agi mih neruska pengawa nyabung nya. Sekali tu, iya seduai Duat nyabung ba rumah panjai di Kerangan Batu ti enda jauh ari pasar. Tu nyabung ti nadai pemendar sereta belalai.Anchil alah besai nyabung sekali tu. Sesen pan nadai mih iya duit agi. Enda memukai, benung meda manuk benung bebintis, dia dih polis datai. Mayuh orang kena tangkap nyentukka Anchil empu. Duat ulih ngerarika diri.

        Anchil diukum jil pengelama enam bulan. Iya chukup nesal ke pengawa diri tang asi udah nyadi bubur. Tanah udah ga dijual. Duit pan udah abis. Iya pan nyau dijil ketegal ditangkap nyabung. Nesal diatu nadai mih guna agi. Semua utai ti dikemisika Anchil ngelamatu udah nadai agi. Amai mih ku sempama, “nesal dudi nadai reti”. Ketegal ti enda bepikir panjai mih, Anchil nyau baka nya. Iya patut bepikir sereta nimbang siti-siti pengawa sebedau ngereja iya.


Dikarang ulih:

Grace Tugap (5A)

Nulis Karang - INTERNET (PENGURANG/PENGELEMI)

Karang

Unit: KOMUNIKASYEN GLOBAL(POM LIMA)

INTERNET KEMAYA HARI
Tanya: Kemaya hari tu, mensia mayuh beguna amat internet. Taja pia, internet tu bisi mai empas ti enda manah. Pejuraika pengurang/pengelemi internet tu.


        Diatu, enti kitai besebutka internet ngagai orang bukai, semua orang nemu pekara nya. Indah orang besemaka baka tu, “indah nembiak baru ada nemu utai ti dikumbai internet”. Internet tu ukai pekara ti baru. Guna internet ngagai pengidup mensia mayuh endang enda ulih disangkal agi. Bisi sekeda madahka diri enda ulih gawa ketegal ti nadai internet. Pekara tu endang bisi pengamat. Dunya kemaya hari tu, bepanggai ba internet. Taja pia, anang ga kitai madahka internet tu nadai pengurang. Internet tu bisi pengurang iya empu.

        Siti ari pengurang internet tu iya nya mensia mayuh nyamai ngulihka penerang ari internet. Lebuh tepeda gambar ti enda menuku baka pronografi tu, iya ulih ngeruga runding enggau pikir ngagai utai ti enda betul. Enti ngagai orang tuai besai, pekara tu enda tentu meri pengerusak laban ulih nimbang sereta nemu bepikir enggau manah. Enti ba nembiak sekula, utai ti enda menuku tu deka ngerusak runding enggau pikir sida iya. Lama laun, sida ngumbai utai tu enda salah. Ke pengujung iya, ulah enggau runding ketegal internet tu nyau limpang ngagai utai ti enda manah. Disiplin nembiak sekula pan majak enda manah bepun ari ulah meda utai ti enda menuku ba internet.

        Pengurang ke bukai internet tu iya nya mai empas ti enda manah ngagai penyerakup raban bansa.Blog tauka web ti sengaja meri penerang selebubu ngapa tau bendar ngasuh belaya. Penerang ti selebubu ngapa enggau enda amat tu laban enda ulih ditapis perintah tau ngujungka iya nyadi penerang ti betul. Penulis ti sengaja nulis utai ngapa tu disemaka baka sempama pandak mulut engkerasak panjai mulut kitai. Pengujung iya, perang mulut nyadi ba internet baka komen ti ngasuh belaya ba Facebook, Twitter enggau ba blog.Kemaya hari tu, mensia mayuh pechaya agi penerang ti ditulis ba internet enti dibanding penerang ari perintah. Nya mih biuh ti enda manah ari internet. Ngambika kitai nemu siti-siti pekara nya betul tauka enda, anang enda macha penerang ari internet tu. Udah nya, bandingka enggau penerang ti diberi perintah. Ari nya, kitai ulih mikir sereta ngaga pemutus kediri empu pekara ti endar.

        Kelimpah ari nya, orang ti bekenaka internet tu dikumbai enda nemu begulai enggau orang bukai. Tu enda bisi pengamat iya. Ambi ke banding, pulai ari sekula, lalu meda an Kaban mai bemain bol pan sida ti gian beinternet tu sigi enggai. Pengujung iya ila, kitai mensia enda nemu begulai enggau orang bukai. Kitai deka dikumbai orang bukai baka pendiau bunsu bubut. Kaul kitai enggai orang sepiak rumah nyadi jauh. Tu pekara ti patut dikenangi ka kitai semua. Mayuh penusah enti kitai enda nemu begulai enggau orang bukai. Kitai deka bisi penanggul lebuh kitai dituntung penusah. Ukai ga ngajika rangkang ngachuk mata tang kitai enda nemu utai ti deka nyadi dudi hari ila.

       Nangkanka tu, internet bisi pengurang iya ba dunya dagang. Pekara ti manah nyau nyadi enda manah. Kebuah pia, mayuh udah kes ngelakar lebuh pengawa dagang dipejalaika nengah internet. Orang ti bedagang amat nyau enda bulih bedagang nengah internet. Ambika banding, duit udah diberi tang barang lalu enda ga bisi tauka barang enda ngipakka gambar ti diayan ba internet. Ulah ti ngarap utai ngapa baka sempama ngarapka kijang dalam babas.Tu mih pekara ti ngasuh orang nyau jera bebeli barang nengah internet. Ke batang, pengawa dagang tu mih pemadu iya muntang. Enda ibuh ngelawa kedai, enda ibuh bebaris ba kaunter enggau enda kiruh minching barang pulai ke rumah. Nengah dagang ba internet barang datai ba pala tangga.

       Nambahka nya, pengurang bukai ba internet tu iya nya nambahka belanja siti-siti ruang bilik. Diatu nyau macham pekara begunaka internet. Enti suba kita semina muka Facebook. Tang diatu, mayuh agi baka Wechat, Whatassp enggau Telegram. Semua tu begunaka duit. Enti duit ngelamatu dikena bebayarka bil ai, letrik enggau Astro. Diatu ditambah enggau bil internet baka bil broadband. Tentu pekara tu mai penanggul ngagai sida ti kurang penatai pemisi. Ditambah enggau cas GST, bil nyau majak mar. Enggai enda pan laban udah ubah pemansang. Enti ulih, arapka perintah ulih meri internet enda bebayar ngagai orang ti kurang penatai pemisi. Enti sida ulih meri duit BRIM ngagai mensia mayuh, beri mih subsidi kena mayar bil internet.

       Nya alai, internet tu endang bisi pengurang iya. Ngarapka enggau pengurang tu, kitai sama bela bejimat bekenaka internet. Anang mega lalu ngelengka internet meda iya bisi pengurang enggau pengelemi. Kauk ke manah tang iyarka iya enda manah. Iya beguna bendar, kitai nemu manding pekara ti manah enggau iya ti enda manah. Guna mih internet ti mai pemanah.

Karang- Nanam Pengerindu Bekerejasama

Unit 6: Nanam Pengerindu Bekerejasama (Pom Empat)
Latih Karang
Tanya: Ba sekula, mayuh macham aktiviti dipejalaika ngambika nembiak ngembuan pengerindu bekerejasama. Pekara tu bisi guna iya.

Pejuraika pemesai guna nembiak ngembuan pengerindu bekerejasama.


            Kemaya hari tu, mayuh macham aktiviti dipejalaika dikena nanam pengerindu bekerejasama antara nembiak sekula. Kebuah pia, pengerindu bekerejasama tu besai bendar guna iya. Enti aktiviti dikena nanam pengerindu bekerejasama tu endang dipejalai enggau manah, dia nembiak kurang agi nembiak ngembuan pengerindu bekerejasama tu. Nya alai, aktiviti ti dikena nanam pengerindu bekerejasama patut dipelajai enggau manah.

          Siti ari kebuah nembiak sekula patut bisi pengerindu bekerejasama ba sekula ngambika sida tu ulih begulai enggau orang bukai. Ba sekula mih palan ti chukup manah alai nembiak nelebaka diri begulai enggau orang bukai. Nembiak ulih begulai lebuh belajar, bemain enggau mayuh aktiviti ke bukai. Enti ulih, ukai semina begulai enggau kaban ti sama bansa tang begulai mega enggau bansa bukai. Ari ti ulih bekerejasama enggau orang bukai, sida enda mudah belaya enggau pangan diri. Pengawa sida ba sekula enti udah baka isi enggau kulit endang chukup mamah. Pekara ti udah riri tu ulih dibai nyentukka nembiak udah besai panjai dudi hari ila.

           Enti diperati ari sukut ke bukai, pemesai guna bekerejasama tu mega bisi bekait enggau ulah sereta perangai nembiak sekula. Nembiak ti rindu bekerejasama enggau nembiak bukai enda mudah belaya. Sekula ti bisi kes nembiak belaya, bebukut, enggau mayuh agi endang bisi bekaul enggau pengerindu bekerejasama ti majak meranggang. Siti ari kebuah belaya laban enda ulih bekerejasama enggau orang bukai. Nya alai, anang enda ngemeratka pengerindu bekerejasama di sekula.

          Pemesai guna iya ke bukai iya nya mai empas ti manah ngagai pemujur ba pelajar sekula. Enti nembiak ulih bekerejasama enggau pangan diri, dia sida sanggup meri bantu ngagai pangan diri. Ambika banding, lebuh bisi nembiak kena penusah rumah angus, tentu pangan ke bukai deka bekerejasama nulung ngambika lempung agi. Pia mega ba pelajar sekula, nembiak ti kurang ba pelajar sekula deka dibantu nembiak ke pandai agi. Enggau tu, pemujur deka nyamai agi bulih laban nembiak ngembuan pengerindu bekerejasama. Sida enda ngelakka kaban sida ti bukai napi penusah kediri-diri. Enggau tu, sida ulih ngiarka diri ari ti bebulu ati ngagai orang bukai.


         Kelimpah ari nya, pemesai guna nembiak ngembuan pengerindu bekerejasama iya nya ngetanka pengerapit kaul rayat di menua tu. Kebuah pia, nembiak tu udah besai tuai ila nadai penanggul begulai enggau orang bukai tauka bansa bukai. Belabuh ari sekula, nembiak udah diajar ngambika rindu bekerejasama enggau pangan diri. Dudi hari, bekerejasama enggau orang bukai tu ukai pekara baru sereta utai ti mai penanggul ngagai sida.

           Ke bukai iya, pengerindu bekerejasama tu mega ngemudahka agi pengawa pengajar ngatur siti-siti aktiviti ba sekula. Enti lebuh aktiviti kokurikulum dipejalai, dia semua nembiak ulih bekerejasama. Aktiviti ti digaga beraban nyamai diatur. Pia mega, aktiviti ke berat mega nyau nyadi lempung. Pengawa ti chukup manah diatur enti bisi ngembuan nembiak rindu bekerejasama iya nya gotong royong. Gotong-royong endang beguna pengerindu bekerejasama. Enti bisi pengerindu bekerejasama, dia pengawa kereja besaup tu deka mujur diatur. Lebuh bepekit mega pengerindu bekerejasama tu beguna bendar. Team main bol ti ngembuan pemain ti bekerejasama deka nyadi team ti kering sereta enda mudah alah.


           Nya alai, pengerindu bekerejasama tu endang patut dikembuan nembiak sekula. Bepun seharitu, sama-sama kitai ngesum pengerindu ngambika iya galak-segalak agi. Ukai semina pengawa tu bepanggai ba pengajar aja tang apai indai mega enda tau ngeleka tanggung pengawa sida iya. Pia mega, mensia mayuh sama bela kiruhka nanam pengerindu bekerejasama ngagai nembiak sekula. Enggau tu, enti sama enda ngelakka pangan diri, pekara ke berat nyadi lempung, pengawa ti tusah tau nyadi mudah.


Dikarang:
Anita Lemenun(5B)

Karang Pom Empat

Karang: DIMENSI DIRI

UNIT 10: Pengidup enggau Pengawa(POM EMPAT)

Tanya: Nuan bisi juluk ati deka ngulih kereja ti manah ti udah tembu belajar ila. Pejuraika chara nuan nyikap diri sebedau napi pengawa nya ila.

          Siti ari tuju kitai besekula ngambika bulih pengawa ti menyana sereta meruan dudi hari. Aku endang bisi juluk ati sebaka enggau orang bukai. Enti udah tembu belajar, aku deka nyadi pengajar Matematik. Nyadi pengajar Matematik tu endang juluk ati aku kenyau agi besekula tadika suba. Aku ngarapka bulih nyadi pengajar Matematik. Enggau nya, aku deka nyikap diri sebedau napi pengawa tu ila.
        Pekara pemadu beguna sebedau nyadi pengajar Matematik iya nya nyendiaka diri enggau penemu ti chukup. Pia mega, aku deka ngiga pengelandik dulu sebedau nyadi pengajar. Aku deka belajar bebendar ngambi diambi gawa nyadi pengajar. Enggau nya, aku mesti ngulihka pemutus peresa Matematik ti pemadu manah.Enti bulih kereja tu ila, aku gaga amat ati. Apai enggau indai aku mega ngasuh aku nyadi pengajar. Seduai iya deka betunggang lupung enti nyema aku mujur belajar nyentukka ngagai tikas Universiti.
       Pekara bukai mega ti patut disikap aku iya nya ngemeranka pengerindu nyadi pengajar. Aku patut mayuh macha pasal nyadi pengajar. Aku mega patut nemu chara ngajar ari pun agi. Enggau tu, aku suah ngelatih diri nyadi pengajar. Aku nyadi pengajar lebuh ngajar madi aku ke agi sekula primari. Enggau tu, aku ulih nanam pengerindu ngajar lebuh agi biak. Enti udah besai ila, pekara tu nadai nyadi penanggul. Kebuah pia, pengawa ti endang pengawa ti dikerindu aku empu.
       Kelimpah ari nya, aku nyereta mayuh macham aktiviti luar ti bisi bekaul enggau mata pelajar Matematik. Aku mesti masuk Kelab Matematik. Dalam kelab nya, aku ulih nambahka penemu pasal Matematik. Enti aku aktif dalam kelab nya, senang agi aku bulih gawa nyadi pengajar Matematik. Kemaya hari tu, nembiak ti aktif ba kokurikulum nyadi pekara dipeda sebedau ulih nyambung pelajar ba universiti.
       Nangkanka nya, aku mega deka nyikap diri ba ulah diri. Pengajar ngembuan ulah ti manah. Pengajar mega suah nitihka atur ti digaga perintah. Nya mih ti suah nyadika chunto aku ngelama tu. Aku mesti nyaga ulah diri. Pandai pan kitai tang enti ulah enda menuku nadai mih guna. Aku enda sekali-kali ngelanggar atur sekula. Aku nemu nembiak ngelanggar atur sekula deka mandangka diri empu kering sereta enda takutka pengajar. Sida enda nemu pengawa tu pulai ke pengerugi diri. Mayuh agi nembiak baka sempama “nesal dudi nadai reti”.
           Chara ke bukai dikena aku nyikap diri sebedau bulih kereja nyadi pengajar Matematik iya nya nyaga pengerai diri. Pekara tu endang pekara ti dikemeratka sebedau diterima gawa ba siti-siti pengawa. Pengawa nyadi pengajar endang begunaka pengerai ti chukup manah. Kebuah pia, pengajar tu siti ari pengawa ti begunaka orang ti cheregas sereta bepengerai. Kala orang ti kurang bepengerai sereta enda cheregas enda diterima nyadi pengajar. Nya alai, aku deka nyaga pengerai diri bepun ari diatu nyentukka dudi hari. Aku mesti nyaga pemakai ngambi tubuh semampai regas sereta enda udah kena penyakit baka kemi manis, darah tinggi enggau mayuh agi penyakit ke bukai.
           Ke penudi iya, ngarapka angan aku tu ulih nyadi nyata.  Enggau naka ulih mih aku ngaduka diri enggau naka pemanah iya ngambika bulih nyadi pengajar Matematik. Enti bulih nyadi pengajar tu ila, aku deka ngajar nembiak enggau memanah. Kediatu, mayuh endar pengajar ari menua bukai. Enti rayat di menua tu ulih ngisi pengawa ba menua kitai tu empu, enda agi kitai begunaka pengajar ari menua bukai. Awakka kitai ba menua tu aja ngajar ba menua kitai empu.

Karang Dagang Temuai

Karang Belalau

Tanya: Menua Malaysia seruran nyadi palan nemuai. Belalauka gambar di atas nya, tulis siti artikel “Pemandang Menua Malaysia”.



Dikarang: Nelson Bullit (5C)
 
                                              "Pemandang Menua Malaysia"


          Industri dagang temuai beguna bendar ngagai menua kitai Malaysia. Enggau naka ulih, Malaysia nyendiaka mayuh macham pekara ti ulih nyadika pemandang. Kati kala ninga jaku pemandang? Pemandang tu tau dikumbai pengaruh. Ia mega tau dikumbai ubat ti ngasuh orang jampat rindu. Nya alai “pemandang menua Malaysia” tau mega dipadah pekara ti ngasuh temuai rindu nemuai. Ngena jaku puntang iya nya pekara ti narit ati temuai ke Malaysia.

             Siti ari pemandang menua Malaysia iya nya mayuh palan ngelantangka ati. Nyau deka tiap nengeri ba Malaysia ngembuan palan ti narit ati temuai. Enti ke Sabah, palan ti narit ati baka Pulau Sipadan, Gunung Kinabalu enggau Pasar Philipin. Ba Sarawak bisi Kampung Budaya Sarawak, Pantai Damai enggau Muzium Sarawak. Pia mega mayuh agi palan narit ati temuai ba nengeri bukai. Nya alai, temuai luar endang teperindang sereta agi belala enti nemuai ke Malaysia. Ukai baka ba menua bukai ti asaika diau di baruh punggu. Enti bisi menua baka nya, temuai pan nyau enda berani nemuai kia.

             Pemandang ke bukai iya nya deka meda budaya tiap raban bansa ti ngani menua Malaysia. Pemayuh raban bansa tu mih ulih narit temuai ke Malaysia. Temuai luar deka meda sereta beratika rayat di menua tu ulih begulai enggau manah taja pan lain-lain budaya enggau chara idup kediri empu. Nya alai, mayuh bansa mayuh mega main asal sida iya. Raban bansa ba menua tu agi baka wi tampung tali,rutan tampung danan. Sida agi ulih nampung pengawa orang tuai.Temuai ke Malaysia deka meda main asal ti nadai kala dipeda baka ajat Iban, zapin, dikir barat enggau ke bukai. Pemakai di menua tu mayuh pemakai bansa baka pansuh enggi bansa Iban, roti canai enggau bansa India enggau sate enggau bansa Melayu. Tu mih kebuah temuai luar tu datai ke Malaysia. Kebuah ti deka beratika rayat ti mayuh pupu raban bansa, sida mega deka ngasaika pemakai di menua tu.

             Siti agi pekara ti ulih nyadi pemandang menua Malaysia iya nya lebuh ti nyadi tuai pengatur lumba enggau main. Lebuh lumba F1 di sepang, mayuh temuai luar datai ke Malaysia. Pia mega, lebuh lumba basikal “Le Tour De Langkawi” ti diatur empai lama. Ia dikena  narit temuai luar. Nya alai, lumba tau nyadi pemandang menua Malaysia. Ukai semina orang ti ngambi bagi ba lumba aja ti datai ke Malaysia tang orang bukai baka penyukung enggau raban pemberita. Nya ti ngasuh lumba tu nyau ngasuh mayuh temuai datai. Enggau tu, Malaysia enda kala ngelepaska peluang nyadi tuai lumba laban tu ulih nyadika pemandang ti ngasuh temuai luar majak datai ke menua tu. Pengawa ke disemaka ba sempama nyelam sambil ngirup ai. Kebuah iya, dua ti pengawa digaga begulai iya nya nyadi tuai lumba enggau narit temuai luar.

             Bisi sekeda mega rindu amai datai ke Malaysia laban mayuh palan endur bebelika barang. Palan bebelika barang tu endang bisi udah tebilang ba serata dunya. Chunto iya baka Mega Mall di Kuala Lumpur, Mahkota Parade di Melaka enggau One Borneo di Sabah. Barang ti dijual ba Malaysia pan sama standard enggau menua bukai. Nya alai, temuai enda kakang ati bebelika barang ba menua kitai. Diatu, mata duit Malaysia nyau nurun lalu ngujungka mata duit ari menua luar baka Brunei, Singapura enggau menua Europa nyadi besai. Kuasa meli barang temuai luar majak besai. Tu mih ngasuh temuai luar majak rindu nemuai ke Malaysia.

             Pemandang ke bukai iya nya Malaysia bisi nyendiaka kereban pengangkut ti manah. Enti bisi kereban pengangkut, dia nyamai agi temuai mindah kin kitu nemuai ngagai siti palan ngagai palan nemuai ke bukai. Tu mih kebuah temuai mudah tetarit ati nemuai ke Malaysia. Nya alai, enggau naka ulih mih besediaka kereban pengangkut ti manah sereta ulih dikena. Kediatu Malaysia udah bisi LRT, bas enggau teksi. Semua kereban pengangkut tu mesti ulih dikena enggau senang sereta enda ngenusahka temuai. Anang ngambi ulih ba temuai luar baka niki tambang peneka ati ngagai temuai luar. Pekara tu enda manah laban ulih bejeraka temuai.

            Nya alai, pemandang tu patut dijaga enggau manah ngambika semampai bisi temuai datai ke Malaysia. Iya ke manah agi, temuai luar diasuh nambah senambah nemuai ke Malaysia. Pia mega, sama-sama mih kitai ngiga pemandang ke bukai ti tau narit temuai datai ke Malaysia. Ngena chara ngemansangka dagang temuai tu mih ulih meri penatai pemisi ngagai menua tu. Enti penatai pemisi betambah, menua pan majak mansang.

Karang "Pengawa Maya Pemisi"

Tanya: Maya pemisi endang dianti nembiak sekula. Pejuraika chara ti patut digaga dikena ngisi maya pemisi sekula enggau beguna.


              Pemisi sekula tu maya ti dianti nembiak sekula. Maya tu, nembiak enda ibuh ke sekula lalu belajar. Maya tu mih sida belelak ba rumah. Nembiak sekula ba menua tu untung bendar laban ukai diberi pemisi ujung minggu aja tang bisi pemisi tengan taun, pemisi ujung taun kelimpah pemisi enti bisi ngintu hari besai. Bisi sekeda nya baka munyi ukui labuh gelung laban ti enda besekula maya nya. Enti maya pemisi tu enda dikena enggau manah, dia nembiak sekula nadai bulih penguntung. Nya alai, sida iya patut nemu chara ti manah digaga maya pemisi sekula tu.
            Siti ari pengawa ti patut digaga nembiak sekula iya nya ngaga aktiviti nambahka pengelandik enggau penemu ba pelajar sekula. Sida iya tau ngulu kelas sanding bebayar. Pia mega, kereja tambah diberi pengajar ulih digaga maya pemisi tu. Taja pan maya tu pemisi tang pikir nembiak enda rari ari pelajar sekula. Sida meruan betatika pengawa sekula taja pan maya pemisi. Sempama baka tekura apin tepantup ba bandir tau bendar dikena meransang diri belajar enggau bebendar.
            Maya pemisi mega ulih dikena ngerapitka kaul enggau apai indai. Apai indai tau mai anak sida nemuai sambil ngelantangka ati. Aktiviti ke baka tu endang manah dikena ngerapitka kaul enggau diri sebilik. Bisi mega apai indai mai anak sida nemuai ke menua maya pemisi. Tu mega endang dikena ngerapitka kaul enggau diri sebilik. Kelimpah ti ulih ngundang orang tuai ba menua din, kaul enggau kaban belayan pan majak rapit agi.
           Kelimpah ari nya, pemisi sekula mega dianti-anti sida ke deka kereja sambil. Ambika chunto, sida ulih bekereja ba stesen-stesen minyak, kedai makai, kedai runchit enggau mayuh agi. Sida tu ukai semina bulih duit gaji tang mega ulih nambahka penau diri ba siti-siti pengawa. Sida mega ulih ngasaika diri ngiga duit belanja kediri empu. Enti sida nyepi pedis bulih duit, tu ulih nyadika peransang diri belajar bebendar dikena ngulihka pemujur ba sekula. Enti ulih anang nunda sempama malu bekayuh perau anyut. Enti kitai enda belajar bebendar dia kitai deka alah laban orang bukai.
           Chara ke bukai iya nya nemuai ngagai palan ti narit ati. Apai indai patut mai anak sida ngelantangka ati. Pengawa nemuai tu manah taja pan bisi orang madah pengawa tu mayuh bebasauka duit. Kebuah pia, kitai bulih nambahka penemu diri. Chunto iya, enti kitai nemuai ngagai palan Sejarah, dia penemu pasal sejarah kitai pan betambah. Nya alai, nemuai tu entara chara ke manah dikereja maya pemisi sekula.
            Nangkanka nya, chara ke bukai dikena ngisi maya lepa enggau beguna iya nya nyereta aktiviti begulai enggau mensia mayuh. Nyadi pengawa tu ulih nelebaka nembiak sekula begulai enggau mensia mayuh dalam genturung pendiau. Ari ti ulih begulai manah enggau orang bukai, dia mayuh mega pekara manah ti ulih diambi ari begulai enggau orang bukai. Ari nya, sida tu ulih mai diri enggau orang bukai. Enda ga sida tu disema baka pendiau batu tunggu ti enda mindah ke bukai. Nya alai, arapka mayuh aktiviti ulih digaga maya pemisi sekula. Sekeda aktiviti tu baka kerja ngechat rumah pengandai tuai, nyereta gotong royong meresika sungai maya Kimpin Nyaga Sungai dipejalai enggau mayuh agi aktiviti ke bukai.
           Ke pengujung iya, anang masauka pemisi enggau pengawa ti enda pulaika penguntung. Atur mih maya pemisi tu enggau manah ngambika kitai ulih ngasaika penguntung iya. Anang muai maya pemisi tu enggau pengawa ti enda menuku baka kayo-kayo, belumba motorsikal, bemain games enggau pengawa ke bukai. Apai indai enda patut nejuka anak sida ngatur kediri empu maya pemisi sekula. Iring embing mih anak diri ngambika enda ngelimpang ngaga pengawa ti enda patut.

(Dikarang ulih: Boblyn Nyalu, 5B)

Karang Kedut Bahasa Iban

UNIT 5: NYAGA RAMPA MENUA

Latih Karang Kedut Pom Lima
Bacha teks di baruh tu enggau silik. Udah nya, tulis karang kedut belalauka teks ti udah dibacha nya tadi. Leka jaku karang kedut nuan enda lebih ari 100 leka jaku

Jelu siga ti majak punas ba menua kitai tu endang ukai pekara baru ti nyadi buah mulut ba menua kitai tu. Pemunas jelu siga tu endang bisi kait enggau ulah mensia.

Mayuh sekeda bisi ngenemuka diri jelu siga tu ulih nyadika ubat sereta baka sakang seribu guna. Endang ulah mensia ti kelalu enggai tuai lalu ngiga ubat biak, iya ke sakit lalu minta ubat ti ulih ngasuh jampat suman, iya ketuai sereta enda dapat lalu ngiga ubat ti tau ngasuh kering. Nyau ambis rengka tubuh jelu siga diguna baikka nya diempa tauka diambika nya pemandang ba rumah. 

Kitai sama nemu semua jelu begunaka sarang alai ngenduh. Jelu siga begunaka kampung alai diau sereta beranak betelesak. Jelu siga tu midang ketegal pemansang ti digaga enda nitithka atur ke patut. Lebuh kayu ditebang, kampung majak dirumpang lalu alai diau jelu siga tu pan nyau nadai agi. Enti nadai alai diau, jelu siga enda ulih idup sereta beranak betelesak. Enti penanggul tu majak nyadi, jelu siga ulih punas dudi hari ila.

Ba sekeda menua bukai, mayuh macham chara dipejalaika dikena nagang jelu siga ti majak punas. Ba menua kitai tu, sebarang sapa ti ditangkap ngembuan jelu siga ti nadai lisin ulih diukum jil dua taun enggau RM2000 nitihka Ordinan Nyaga Jelu Taun 1999 (diubah taun 2003). Taja pia, agi mih bisi orang ngereja iya taja ukum ti dikena tu udah chukup berat. Nya alai perintah meri ukum ti berat agi. Enggau tu mensia mayuh enda berani agi ngereja pengawa ti salah tu.

Enggau tu, begempung mih kitai besaup nyaga jelu siga ari ti majak punas. Sida ke rindu ngasu tau ga ngurangka pengawa tu. Kebuah pia, ngembuan dagin jelu siga ngelui lima kilo deka dikumbai orang bisi niat deka bejualka dagin nya. Kurangka mih ngasu beburu tu. Kasihka mih uchu ambu dudi hari ila ti nadai peluang ngelala jelu siga.

Enti sema bisi tetemuka tauka tetangkapka jelu siga tu tau mih nganjung ngagai palan jelu siga. Anang mih nyimpan tauka nyual iya. Tu mih pemesai guna palan nyimpan jelu siga. Palan tu sekeda chara dikena nagang jelu siga ari ti punas. Ari ti ngukun mayuh macham jelu siga, palan tu mega nyadi palan jelu siga beranak telesak sebedau dilepaska baru ngagai kampung. Ngena chara tu, jelu siga ulih betambah lalu ukai majak nadai.

Nya alai, bedau laun endur kitai mutarka penanggul tu. Enti semua bisi pengasih sereta siru, jelu siga di menua ulih enda mudah punas ngapa.

SURAT PEKIRUM PERINTAH ( POM EMPAT & POM LIMA)

Unit 8: Tulung Enda Bepampas (Pom 4)

Tanya
Nuan nyadi sekretari rumah panjai diasuh tuai rumah nulis surat minta duit ngagai pengari rayat.
Ba surat nuan nya, madahka tuju duit nya dikena.


Langkar Karang:
Pemuka:
-Nama enggau address pengirum/penulis
-Nama enggau address penerima
-Haribulan enggau topik surat

Isi karang(5/6 isi)
Isi 1: Dikena ngatur pengawa begotong-royong sepemanjai taun
Kerembai isi:Kebuah duit nya dikena?
-dikena meli perengka ti dikena begotong-royong
Chunto: Rachun, chat, paku, barang pemakai, enggau ti bukai

Isi 2: Dikena mantu nembiak sekula
Kerembai isi: Kebuah duit dikena ngagai nembiak sekula?
-enda semua nembiak chukup penatai pemisi
-duit nya ulih nagang nembiak ari badu besekula
Chunto: Dikena meli barang sekula baka beg, baju, kasut, enggau bup


Isi 3: Dikena nulung bala serumah ti ditinggang penusah/bisi penanggul
Kerembai isi: Bakani duit ulih mantu bala serumah?
-duit ulih ngelempungka penusah ti ditapi
-ulih nampung duit ti enda chukup
Chunto: Duit tu ulih mantu dikena berubat ke sepital, maya ngintu pemati

Isi 4: Dikena ngatur pengerami ti diatur begulai
Kerembai isi: Ulih ngerapitka kaul enggau diri serumah enti mayuh pengerami diatur begulai.
Chunto: Pengerami ngiling bidai, Pengerami Hari Malaysia


Isi 5: Dikena maya bisi baum ba rumah panjai
Kerembai isi: dikena meli barang dikena baum
Chunto: meli kereban tulis, fail, pemakai enggau ti bukai.


Isi 6: Dikena lebuh mindah ngagai opis perintah/pengawa rasmi
Kerembai isi: nyadika duit tambang enggau duit belanja raban ti ngari rumah panjai
Chunto: diri serumah ti ngelimpangka diri ngagai aktiviti opis perintah diberi duit gaji.


Penutup: - Jaku terima kasih
- Arap ulih meri kerejasama
- Bedanji ngena duit nya enggau manah


Chunto Format Surat Pekirum Perintah

Karang Nembiak Pom 4

RH Lindang anak Dali,
Simpang Limau Manis,
98700 Limbang
_________________________________________________________________________________


YB Musir anak Dunggat
P. 221 Limbang,
98700 Limbang
SARAWAK                 22 Jun 2015

Tuan,

Minta Duit Bantu
Enggau basa ke besai, pekara di atas diperatika. Aku ngarika kami serumah di rumah panjai Simpang Limau Manis deka minta tulung meri kami serumah duit bantu. Pekara tu nitihka aum ti udah dipejalaika dulu agi sebedau surat tu ditulis. Ke diatu, duit rumah panjai kami bedau chukup dikena napi aktivti enggau program ti deka diatur dalam taun tu.

2.    Siti ari kebuah kami minta duit bantu tu iya nya dikena ngatur pengawa begotong-royong ti deka diatur dalam taun. Enti bisi duit bantu tu ila, kami ulih nyendiaka chukup perengka dikena ngatur pengawa begotong-royong. Chunto iya, kami deka bebelika rachun rumput, mesin penebas, chat enggau ti bukai agi. Enti bisi duit tu, nadai penanggul kami ngatur gotong-royong ninting bulan. Tambah mega, rumah panjai kami deka ngambi bagi ba Pekit Rumah Panjai Chunto.

3.    Nambahka nya mega, enti bulih duit bantu tu ila, kami serumah udah merambu sereta ngagihka duit tu ungkup nembiak sekula. Nembiak sekula ti mujur nyambung pelajar ke universiti deka kami beri duit bantu. Pia mega agih tu diberi ngagai nembiak ti kurang penatai pemisi. Ngena duit bantu tu, sida ulih bebelika barang baka bup, kasut, baju enggau utai bukai. Nya alai, duit bantu tu ila ulih mantu ngemansang pelajar sekula ba rumah panjai kami. Kitai sama nemu, sida ke biak tu ila ti nampung pengawa orang tuai diatu sempama baka wi tampung tali.

4.    Kelimpah nya, duit bantu tu ila mega diagihka kami nyadi duit penabat rumah panjai. Kami serumah udah besetuju deka numbuhka tabung duit penabat tu. Tuju iya enda dikena mantu kami serumah ti bulih penanggul tauka penusah ngenyit baka pemati, sakit ngenyit. Tentu sida tu begunaka belanja dikena napi semua utai tu. Kitai ukai mega ngajihka rangkang ngachuk mata, tang duit penabat tu endang beguna bendar ngagai orang ti kurang penatai pemisi.

5.    Kami serumah mega udah sama setuju enti bisi duit bantu tu deka ngatur mayuh agi pengawa ngena chara begulai. Duit bantu tu deka dibagi kami serumah dikena ngatur mayuh macham aktiviti ba rumah panjai. Iya ke udah diperambu kami serumah iya ngatur Pengerami Ngiling Bidai enggau Hari Malaysia. Kami mega deka ngatur Pekit Main Bol enggau Nyumpit. Duit bantu tu ulih dikena kami serumah nyadika puku dulu. Ngarapka semua aktiviti ti ngena puku tu ulih pulaika penguntung lalu ukai baka buntak pulai buntak.

6.    Ngambika tuan nemu mega, agih duit bantu tu dikena bejalaika pengawa ti bekaul enggau rumah panjai. Ambika banding lebuh maya baum, duit tu dikena meli perengka tulis. Pia mega, enti lebuh ngulu aum ti dipejalaika opis-opis perintah, tentu mega bisi sekeda nyau ngelimpangka diri ari pengawa diri. Enggau tu, duit bantu ulih ga nyadi ganti duit belanja sehari nya. Ungkup sida ti ngelimpangka diri endang deka diberi enggau lurus ati. Nyadi tu mega ulih ngemajuka atur sereta pengawa ba rumah panjai
 
7.    Ke pengujung iya, ngarapka tuan ulih nyadi beratika semua pekara tu. Enggau ati ti besai, kami arapka peminta tu ulih dikemendarka enggau jampat. Meri besai terima kasih ke kerejasama enggau pengiruh ke pekara tu. Kami serumah nadai nemu agi alai bepanggai ba orang bukai. Minta ampun enti pekara ditu bisi nyima ati.

Nya aja. Terima kasih.


Aku ke bendar,

tawi

(TAWI ANAK BEDILANG)
Sekretari,
JKKK RH Lindang anak Dali

Tanya KBAT ( Nulis Karang )

Tanya KBAT Bahasa Iban Pom 4

Unit 2: PEMANSANG MENUA MALAYSIA NUJU 2020

Peratika enggau silik grafik sereta penerang di baruh tu.

Ari grafik enggau penerang nya tadi, kenang pemansang ti patut diberi ngagai sida nya.

Latih Karang Pom Lima

Unit 8: Komunikasyen Global

Tanya Karang:
1.Internet tu mayuh guna iya ngagai mensia mayuh. Pejuraika guna internet tu ngagai nembiak sekula.


2.Kemaya hari tu, mensia mayuh endang mayuh bepanggai ba internet. Taja pia, internet mega bisi mega pengelemi iya empu.

Saraka penemu ti ulih nyukung pekara nya tadi.


3.Nembiak sekula enda tau mai talipaun binching ke sekula. Pekara tu tentu bisi kebuah iya.
Pejuraika kebuah nembiak sekula enda tau mai talipaun binching ke sekula.

4. Dunya kemaya hari tu amat bepanggai ba teknologi pemadah(ICT). Kenang pasal pemesai guna ICT ngagai menua kitai.


UNIT 9: UKIR NYADIKA IDENTITI

TANYA KARANG:
1.Ukir tu sebengkah ari asil pengelandik jari ti nyadi pesaka siti-siti bansa tang pengelandik tu majak kurang dikembuan nembiak rebak baru. Bakani kitai tau ngurangka penanggul tu.

2.Pengelandik jari baka ngukir, nganyam enggau betenun majak enda dikemerankan nembiak rebak baru. Saraka penemu nuan senentang chara ngangkatka pengelandik jari asal bansa ngambika enda majak punas.


3.Kemaya hari tu, nembiak rebak baru kurang pengerindu pasal main asal bansa diri. Pekara tu tentu bisi kebuah iya. Pejuraika kebuah nembiak rebak baru kurang pengerindu ngagai main asal.


4.Nuan bisi siku pangan ari menua tasik ti deka mansik siti pengelandik jari bansa Iban. Nuan deka nerangka iya siti ari pengelandik jari nya.

Tulis surat nuan nya.

5.Nuan bisi enggau orang bepekit bejaku ba mua mayuh. Topik nuan nya “ Guna pua kumbu maya dulu enggau kemaya hari”

Sediaka teks nuan nya.

6.Chura ukir bansa Iban ditagang dikena orang bansa bukai. Besetuju tauka enda nuan enggau pekara tu.

Pejuraika penemu nuan nya.

7.Nuan dipinta nulis siti artikel ba siti surat kabar. Topik artikel nuan nya “ukir ti ngayan identiti bansa tu mayuh mai penguntung”.

Tulis artikel nuan nya.

8.Siti-siti bansa ti ngembuan main asal kediri empu. Kemaya hari tu, main asal bansa majak enda ditemu nembiak rebak baru belabuh ubah pemansang dunya diatu.

Tulis siti karang nerangka kebuah pekara nya nyadi.

9.Main asal kitai majak punas enti enda ditanka sereta dikemansangka ari diatu. Pejuraika chara ti patut ngetanka sereta ngemansangka main asal bansa kitai.


10.Nuan dipinta ngarang siti artikel pasal “Buluh enggau pengelandik jari”
Tulis artikel nuan nya.

Pemanah enggau Pengelemi Televisyen

Unit: 10 ( KERESA DIRI SEBILIK)

Meretikas teks

Asil pelajar: 1) Macha teks enggau betul

                     2) Nyaut tanya enggau betul



              Ulih ke enda kitai idup enti nadai televisyen?Bisi nya nyaut enda ulih. Saut ke baka tu nunjukka televisyen tu beguna bendar kemaya hari tu. Sekeda mega bisi ngumbai televisyen semina siti ari kereban ti dikena merindang diri lalu enda lebih ari nya. Bisi mega, rambau bujang dara sereta nembiak mit meri penemu ti chukup nyemetak iya nya nadai televisyen nadai guna idup.

              Enti nitihka ubah pemansang kediatu enggau dulu suba, televisyen ngembuan empas ti besai. Ari mayuh macham program ti bisi dibantaika, televisyen ulih nyadi kereban dikena belajar. Chunto iya, program Tutor TV ulih nyadika malin nembiak sekula ari sekula primari nyentukka sekula sekondari. Nitihka pansik ti dipelajai ba menua orang putih, rayat iya ulih begulai sereta begempuru enggau diri sebilik lebuh sama-sama meda televisyen. Tambah mega, cherita ba televisyen ti dipeda iya nya drama ruang bilik, animasi enggau sitkom. Isi cherita nya tadi mayuh ngayanka cherita ti bendar. Orang ti meda cherita nya ulih ngambi ajar sereta teladan ti manah.

       Taja pia, televisyen tu mega mai empas ti enda manah. Lebuh beratika pekara tu, orang mayuh enda irau pasal empas ti enda manah tu. Mayuh agi pemanah enggau penguntung televisyen ti nyulut agi ari pengurang. Ba pekara tu, pun iya endang ari apai indai. Laban pia, sida ti meratika sereta ulih betagangka program ti deka dipeda anak diri. Apai indai tu baka orang ti ngemudi perau. Enti salah kemudi, anak ti pedis dudi hari.


1.Nama guna televisyen ti dipeda ari sukut pelajar sekula?

2.Nama reti rambau?

3. Nama kebuah orang rindu bendar meda televisyen?

4. Nama empas ti enda manah ba televisyen tu?

5.Setuju tauka enda nuan pasal nadai televisyen nadai guna idup? Pejuraika penemu nuan nya.