DUNYA SEMPAMA(2.0)

Karang Sempama: 

“ Pandak mulut engkerasak, panjai mulut kitai”

            Linda baru ngawa nyadi kerani ba Kompeni Sempekat Maju nya. Sekumbang iya ngawa dia, kompeni nya maju semaju ari ke suba. Menija ba kompeni nya bisi ati deka ngasuh Linda mangku pengawa ti besai agi. Enggau nya, iya deka ditikika pangkat ti tinggi agi. Taja pia, semua pekara tu agi diperatika menija dalam dua tiga bulan agi.

           Enda semua orang ba kompeni nya gaga ati sereta rindu meda ulah Linda ti jampat endar deka ditikika orang pangkat. Dia bisi siku pekereja dia endang enda rindu sereta kepapas meda penyenang orang bukai. Surie tu indu ti udah lama gawa dia. Iya chemburu meda Linda deka ditikika pangkat. Surie lalu ngiga jalai dikena iya ngelabuhka Linda.

          Surie pan ngeripot ngagai menijar ba kompeni nya. Surie ngambi peluang laban menijar ba kompeni nya agi baru lalu enda nemu ulah iya. Menijar baru nya, Mr Rames baru gawa ba kompeni Sempekat Maju Baru dalam dua minggu ti udah. Iya lalu pechayaka ripot ari Surie nya tadi.

            Pagi siti, Mr Rames lalu ngangauka Linda ngagai opis iya. “Linda, aku enda nyangka nuan ngaga ulah bakatu. Duit kompeni kitai udah lenyau seribu. Orang ti nyaga duit tu iya nya nuan. Nuan patut nyaga sereta bekereja enggau naka iya pemanah ukai ngambi ulih,” ku Mr Rames. Linda enda bemunyi. Iya nemu semua tu jaku orang ti enggai meda penyenang iya. Bisi orang nemu nyadung jaku bula sampaika semua orang pechaya. Iya nemu Surie ngena lisin pekereja pemadu lama dia ngaga cherita bula.

            Enda nyangka digaga orang baka nya, Linda lalu mutus ati ngemaduka diri ba kompeni iya. Iya lalu mayar duit seribu nya taja ukai iya ngenchuri. Ba luar opis, Surie sempat mih nyindir iya ti benung bekemaska barang. Linda semampai enda bemunyi. Dalam ati iya, nadai guna enti bekereja ba tempat ti bisi ngembuan orang baka mulut pulut ati keladi. Orang ti benama Surie dikingatka iya sampai mati. Iya nemu Petara nemu malas sereta nimbang pengawa siku-siku. Orang ti manah sigi dibalas enggau pemanah.

          Empai lama udah nya, Linda bisi nerima surat kangau ari kompeni iya suba. Menijar kompeni nya minta iya gawa dia baru. Kompeni nya udah nasat ripot digaga nya enda betul. Orang ti nyadung pekara ti betul nya udah ditemu sida. Surie udah dibuai kereja. Pengawa Surie baka ai liur ti diludah enda ulih ditelan agi.Ngelamatu, Surie mih ti nyadung semua cherita bula. Surie udah dipindah gawa ngagai tempat bukai. Lebuh Linda nemu pekara nya, iya asai deka manjung. Nama jai iya suba udah nyadi manah baruh. Taja pia, iya udah mutus ati enda ngawa ba kompeni nya agi.

          Pemutus ati iya suba enda ulih diubah agi. Chukup mih nama iya udah manah ba kompeni nya. Iya ngasaika diri agi ensiban ati. Iya ngarapka orang ba kompeni nya ulih berubah bekau ari pekara ti udah nuntung iya. Sempat iya malas ngena surat ngagai menijar kompeni nya seruran nasat dulu pekara ti betul sereta anang jampat arapka jaku orang. Amai betul mih jaku sempama, “pandak mulut engkerasak, panjai mulut kitai.” Jaku kitai mensia sigi nemu nampung cherita bula sereta ngemanjaika iya agi. Anang jampat pechaya agi pekara ti enda betul. Bisi ga ati iya kasihka Surie. Iya arapka Surie ulih berubah nyadi manah. Kitai mensia bulih penulah enti ngaga cherita sengapa.

Sempama Iban

Latih Sempama Pom Lima
Pilih saut ti engkeman ba tiap tanya di baruh tu.

1.Aki Emang nya nelap bendar. Semua ti kala nemuai ngagai iya tak barang pemisi utai ba kebun iya diberi ngagai kitai.
Sempama ti ulih nipakka ulah aki Emang iya nya
A.Baka empeliau bedua iku
B.Baka kepayang ngadaka dilah
C.Baka asam gulai garam
D.Baka rumput di tisau jalai

2.Nama sempama ti mai reti takut amat lebuh ngereja utai laban enggaika tinggang penusah.
A.Asai ke megai telu
B.Buah rampu begulai enggau rian
C.Mandi enda basah, tinduk endak jenak
D.Ngenung baka empelekung mabuk ambuh, ngetu baka puyu mabuk keruh.

3.Kami serumah ke benama Dom nemu bendar nusui utai ti tau bendar ngasuh ketawa. Nama sempama ti ulih nipakka penerang di atas?
A.Rangkai ngeli
B.Rangkai mata
C.Rangkai bulu
D.Rangkai daun

4.Lebuh bejaku, kitai mesti bejimat. Kebuah pia, laban jaku ti bisi salah kitai kena __________.
A. pansa bulu babas
B. tebak sengkilu diri
C. geraji mata dua
D. dinding bulu

5.Orang nya enda manah laban ba mua aja muji tang ba belakang lagi macham-macham penyai kitai ditusuika iya.
A.Pandak mulut engkerasak panjai mulut kitai
B.Mulut nyebut patung enda nyaut
C.Mulut pulut ati keladi
D.Mayuh mulut

6.Nama sempama ti ulih madahka orang ti nepu diri ngagai penusah.
A.Rarika ribut tetemuka ujan, rarika sungkup tetemuka pendam.
B.Lepas ari nyawa baya, masuk mulut rimau.
C.Nganjung paung empa jani.
D.Bemayau gila.

7.Iya benasit manah. Udah ga jadi enggau orang ti pemisi. Tambah mega diberi entua iya tanah ti udah ngemansut asil. Enda agi iya kiruh ngepunka nanam sawit.
Nama sempama ti ulih nipakka penerang di atas?
A.Asi ti udah disungkit, sapa ti enggai makai
B.Chapi empu ai tusu, kerebau ke bempu nama
C.Baka manta sepeneka ati ngaga,dilinut tau, ditumpi tau
D.Untung nemu beiung enda ngambuh, nemu peredah enda ningkuh

8.Nama reti sempama “Makai telu bangah”
A.Enggai bekereja ngambi ulih kediri empu.
B.Ngembuan penemu ti manah amat, enda bebagi kia-kia
C.Bulih upah sama baka orang bukai taja nadai gawa
D.Utai ke mimit endang enda ulih digaga nyadi mayuh.

9.Sida Jang sekaban endang chukup kering sereta enda mudah enti bemain bol ba menua sida iya ba Ulu Naning tang enti ba menua bukai enda kala bulih pemujur.
A.Udah ga mudah, agi ga nawar.
B.Remaung di rumah, raung di tanah.
C.Iku ukui dipurus pan agi mih bingkuk.
D.Mayuh tai nyumbuh, banyak tai badak.

10.Aya Muja enggai dibai sida sekaban ngasu. Iya bepenti laban bini benung ngandung. Nama sempama ti nipakka ulah aya Muja nya?
A.Buah jari.
B.Bengkak jari
C.Berat jari
D.Basah jari


12.Ku sekeda leka biau aki Imban ti dingatka iya, “Nadai apa, nadai nama, gayu guru gerai nyamai,”.
Nama reti jaku dalam “nadai apa, nadai nama” nya tadi?
A.Nadai bulih utai di dunya tu.
B.Bedau diberi nama sereta gelar.
C.Madahka gerai sereta lantang sentang.
D.Semina bulih pemedis tang udah gerai.


13.Sida Linda serumah semampai tusah irau ati laban ujan enda ngetu-ngetu tiga hari. Sida nemu lama laun ampuh mih rumah nya. Nama sempama ti ngayanka pengirau ati sida nya?
A.Asaika betangas
B.Asaika diau ba baruh punggu
C.Asaika dipandam dada
D.Asaika dibuai empeleman

14.Idup kitai endang semampai tusah belama laban bisi maya bulih penyenang baka sempama.....
A.Raung ngalih
B.Lubuk tau nyadika lansar, lansai tau nyadi lubuk
C.Pitak buai di mata
D.Mati enda ulih dikerari, parai enda ulih dikeengai


15.Enti maya maya baum, bedau ambis jaku tuai rumah, sigi dom Luat belama ti ngelampat jaku iya. Ulah dom Luat tu baka...
A.tuai pala upa.
B.ensuai nangkap ludah.
C.alah nyadi abu, menang nyadi arang.
D.Baru ngelangkah sesingkang, udah bekalau panjung neratang diri udah menang.


16.Sekumbang apai indai udah beserara, iya nyau nadai orang ngiring ngembing. Ulah iya nyau enda menuku ba sekula.
Nama sempama setipak enggau penerang nya?
A.Baka keli ditetak ikuh
B.Baka timau jampat meda
C.Baka perau patah kemudi
D.Baka angat tai manuk

17.Nembiak ti baru pindah nya semina deka bekaban enggau Dom maya senang aja. Enti Dom bisi penusah, iya lalu enda ibuh agi. Sempama ti engkeman dikena nipakka ulah nembiak nya...
A.pendiau bunsu bubut.
B.baka ular ti udah nyilui.
C.duruk bubut seduai ruai.
D.menyadi perut jani, kaban perut ikan.


18.Udah tembu merarau, raban Opis Pengerai lalu ____________ laban pengawa sida meresa pengerai kami serumah enggau pemeresi kandang rumah udah magang.
A.angkat beketan
B.mabu runding
C.empelita diri
D.alah ayu

19.Indu dara nyin dipeda baka sempama lekat di engkiung?
Nama reti sempama nya?
A.Gamal indu ti udu mayuh ngepan dikena iya
B.Anta dikena iya nyau ngasuh pera-pera.
C.Indu ti udah tuai tang ngemiakka diri.
D.Madahka dara biak ke bajik.

20.Nembiak ke baru pansut ari kelas belajar malam nyau beraban bebala mayuh sereta besun-sun laban mulaika diri ngagai buding. Sida ti bebala mayuh sereta besun-sun tu baka....
A.ikan ke ngaban
B.pansut ari babas
C.meda balak entua
D.api dipanjah ai.

Jaku Kelaung

Jaku Kelaung

Penerang:

Jaku kelaung tu siti ari leman jaku ti dibungkur jaku sempama. Jaku tu endang dikena kitai Iban besehari-sehari. Tu ngayanka kita chukup siru, bisi pemanah basa enggau ngena jaku kelaung tu ngambika ngelaung utai ti tau nganu nyawa.

Chunto Leka jaku Kelaung

1.    Ribat

Reti: orang indu ti ngandung

Chunto ayat:

Bini Anggat ti ngandung anak keterubah tetenguk deka makai salai rusa.

2.    Utai ke terebai

Reti:  burung pipit ti ngachau padi/ pulung.

Chunto ayat:

“Padi kami taun tu balat  amat dikachau utai ke terebai” ku Nabau madahka tuai rumah.

3.    Telih

Reti: padi ke balat diempa chit.

Chunto ayat:

“Nadai penyadi kitai menyanak taun tu. Udu amat padi telih di umai din.” Ku Indai Kui madahka anak iya.

4.    Baju

Reti: sakang tauka puchau dikena nyaga tubuh diri ari pengaruh ti tau munuh

Chunto ayat:

Enti baju enda tebal, anang enggau orang mindah jauh enggaika bulih penusah

5.    Beranchau

Reti: bechara

Chunto ayat:

Bala kitai di ulu tebilang bendar ba pengawa beranchau. Nadai tau begulai manah enggau pangan diri.

Sekeda ari Jaku Kelaung ti bukai

1.    Chelap

Reti: lama udah enda begulai enggau laki

2.    Ngaru

Reti: gatal

3.    Nawang

Reti: umai ke enggai tumbuh padi laban taun udah lanjur

4.    Kenyap

Reti: Mimpi

5.    Beganti

Reti: bebini tauka belaki baru

6.    Rumbau

Reti: Nadai anak/enda belaku tauka bebini

Tanya Jaku Sempama

1. Kami serumah ngaga jematan tu endang ngena chara "angkut semut". Nama reti jaku "angkut semut"?
A. Betulung ngereja pengawa
B. Bebendar sereta kiruh lebuh ngereja pengawa
C. besaup ngereja pengawa ti kelalu berat.
D. Bepeda sereta ngereja pengawa diri empu.

2. Apai Nina enda dibai sida serumah begiga laban iya agi bengkak jari. Reti bengkak jari nya meri reti ngagai..
A. bepentika pangan ngandung
B. bepentika bini ngandung
C. bepentika madi ngandung
D. bepentika anak ngandung

3. Nembiak patut ningaka ajar orang tuai laban sida endang _________________.
A. makai bulu
B. dulu makai garam
C. tau mulut
D. pachal orang

4. Pengudah makai ba kedai makai di ujung jalai, dia dih buah lemba Achai tak enda nyamai. Nama reti buah lemba.
A. perut
B. pala
C. kaki
D. jari

5. Di Plaza Limbang, mayuh barang murah dijual tang kami sekaban semina ____________ aja laban ti nadai duit kena meli.
A. main ular
B. nyual mata
C. bekedar lengan
D. mata engkudu

Jaku Sempama

Jaku Sempama

Bacha genteran ke dibaruh tu lalu peratika jaku sempama ke dichelak ngena urup chundung.

            Anggat baru ingat lalat lebuh indai iya nadai. Iya apin tentu nemu ulu ili jam nya. Semina utai ti dikingatka iya nya orang ke mayuh begelumu ba bilik sida enggau ba rumah sida. Ku orang, indai Anggat sakit laban kena pansa bulu babas. Mayuh dukun enggau manang nguji ngubat iya tang semua nya nadai mujur. Sida sebilik ending nadai nasit. Mayuh orang bukai enti bisi pedera renga, enti udah diperubatka sida lalu diau diri. Sekeda sida serumah benasit bendar laban ulih gerai, penyakit sida nya lesap baka ke muai empeleman.

            Pendiau sida Anggat sebilik udah tinggal indai iya timpang bendar. Tu ti ngujungka apai Anggat tekuing runding deka beganti baru. Anggat gagit bendar ati laban iya deka bisi indai tiri nganti indai bendar iya. Taja pia, iya mega irau laban suah bendar indai tiri semina deka nganta pengkalan aja, udah nya lalu berubah enda manah, kelebih agi enti iya udah bisi anak diri empu.

            Jangka Anggat endang amat. Lebuh indai tiri iya udah bisi anak ke diadaka iya empu, iya berubah. Iya semina manah enti apai Anggat bisi enggau sida. Enti apai Anggat nadai, indai tiri iya nyiping iya. Iya endang baka mayau landik ngelalaika tai diri. Mulut iya pulut tang ati iya keladi.

            Anggat enda bedulika nya. Ku ati iya “Petara bisi ngemata, antu bisi nemu”. Iya ngetupka ngeli lalu ngereja semua pengawa enggau bebendar. Pengawa enda tau dilengkaka enti apin tembu. Baka tekura, enggai enda tepantup di bandir.


Latih

Beri reti sempama nya tadi.

1. ingat lalat

2. nadai

3. pansa bulu babas

4. baka muai empeleman

5. beganti baru

6. indai tiri

7. nganta pengkalan aja

8. baka mayau landik ngelalaika tai

9. Mulut iya pulut ati iya keladi

10. ngetupka ngeli

11. tepantup di bandir