Meretika Teks (2.0)

Bacha enggau silik genteran teks tu. Udah nya saut semua tanya ti nangkanka nya.

Apai tuai Jana rindang beransah. Iya ngansah lungga penutus. Diansah iya tajam-tajam. Nya baru ngilir lungga nya ba batu linchin. Dikilir tajam-tajam. Diuji-uji ba bulu lengan iya empu. Bekeberai putus. Nyau nyilu asai tungkul ati beratika penajam lungga penutus. Jampat ketap kedap. Rentak-rentak dada, belematika lungga nya lagi dikena tukang tutus bedengahka kami lima.
            Apai tuai Jana endang tukang tutus tebilang. Nyau ka semua bujang enggau nembiak rebak baru kami serumah udah nyepi penajam lungga penutus enggi iya. Jari iya mega chelap nutus orang.

         “Bah, niki kitu! Sapa bagi dulu?” Tanya tukang. Agat?Enggai. Igat? Enggai. Arong? Enggai. Anchap?Pan Enggai. Sida semua takut sereta kakang ati.
“Aku dulu apai tuai. Lagi pan betutus mih,” aku mansutka diri ari ai. Chelap pemadu chelap. Tekap pending, empa penyelap. Digak-digak. Seruran begangga dagu. Aku lalu duduk empekang ba atas kah mereba, nunga tukang tutus. Nyerahka diri ngagai iya nunda pemeli buyah ti nabakka diri ngagai api. Tak pejam menchelak.
“Pejamka mata!” perintah tukang. Tekemil asai punggung asai ti digigit kesa. Gemerik.
“Udah! Alai berendam baru!”
Dibuka aku mata. Peda tak mirah chechirak belumur darah. Aku nabanka diri terejun ke ai. Hesssshhh! Nadai utai ngemedis nya. Meliar ai mata laban abi tutus nya bepedi laban ai. Sekejap bekau nya, baru naban diri baru niki ke tebing. Apai, ke nyadi pemantu tukang, lalu ngubat telih ngena ai entemut. Dilapik ngena daun sirih. Baru iya malut ngena kain ini.
            Anchap nangkanka aku. Iya nadai penakal. Maya tukang ngurik, nyawa iya rauh-rauh madahka diri pedis. Madahka diri mati. Lalu nyabak duie-duie. Ulah iya, ngemba sida tiga ke apin. Lalu sida tiga nya tadi lalu ganjang-ganjang niki jalai pendai. Ke ngejungka sida tiga apin betutus rebak nya.
          Dalam kandang seminggu nangkanka nya, enda disagi apai indai betanchut, enggaika abi tutus bedarah kena rindas tanchut. Enda disagi mandi enggaika abi muruk laban ai. Utai bebau baka belachan, budu, bubuk enggau utai bebau dipenti makai. Baka nya mega utai gatal baka bukau, utai miang baka tubu, enda tau diempa enggai abi laun suman.
            Dalam tiga minggu, abi tutus udah suman. Ati berasai bisi pemuas. Sebengkah agi pengawa ti diungkup ke lelaki udah mujur dikereja. Besunat. Kelimpah ari penguntung bukai, besunat ngenuaika bulu. Besunat nanda pemerani.
(Diambi sereta dibali ari Dunya Aku, Janang Ensiring, 1995)


Tanya 1 ngagai 5
Ba siti-siti tanya empat iti pilih saut A, B, C enggau D. Pilih siti saut ti betul nitihka lebas tanya nya.

1 Nama pengawa sida lima iku ti deka ditutus maya apai tua Jana beransah?
A Berunding ngerarika diri ari kena tutus
B Beratika penajam lungga ari tebing ai
C Beasuh-asuh dulu laban enggai ditutus
D Berendam dalam ai

2 Baka ni asai penulis lebuh maya ditutus apai tuai Jana?
A Meliar ai mata
B Seruran bedangga dagu
C Tekemil asai punggung
D Rauh-rauh madahka diri pedis


3 Sapa ti enda nyadi betutus?
A Igat, Anchap enggau Arong
B Agat, Igat enggau Arong.
C Agat, penulis enggau Anchap
D Igat, penulis enggau Anchap

4 Pemakai ti dibaruh tu “utai gatal”?
A belachan
B tubu
C bukau
D bubu

5 Siti ari pekara di baruh tu ukai kebuah pengawa besunat tu beguna ba sida ke lelaki?

A Ngambi jampat bebini
B Ngasuh ngenuaika bulu
C Nanda pemerani diri
D Nyadi ke tanda pengawa orang lelaki ti udah mujur dikereja

Tanya 6 ngagai 10
Saut tanya di baruh tu ngena ayat penuh.
6 Nama kebuah apai tuai Jana ngansah lungga enggau naka iya penajam?


7 Nama kebuah apai tuai Jana ngasuh penulis mejamka mata?

8      Nama reti leka jaku ngurik ?

9 Rintai tiga penti udah besunat?

10   Ba penemu nuan, nama kebuah orang diatu jarang betutus ngena chara lama?

ENSERA TEKURA

"Pisang Tekura"

      Bala jelu mupuk bepangan baru. Sida badu agi ringat ngagai Pelanduk seduai Tekura. Hari siti Beruang mai Tekura berumah. Seduai betampung dua pintu aja. Seduai lalu mupuk beramu. Ramu pan chukup, rumah pan lalu dientakka seduai. Lebuh rumah udah tembu, seduai lalu ngiga utai bukai ke dempa. Terubah Tekura nurun lalu dititihka Beruang.

       “Enda pia, manah tua mupuk bekebun pisang. Enda manah tua beridupka buah kampung,” pia ku Beruang. “Amat kena runding nuan, Sambi,” pia ku saut Tekura. Beruang seduai bulih seduai lalu nanam tambak pisang semak rumah seduai. Nyadi pisang Beruang enda tau besai laban mayuh diempa iya upa. Enggi Tekura galak bendar. Diatu, pisang Tekura mupuk bebuah. Lama agi, majak mayuh ga pisang Tekura mupuk bebuah. Lama agi, mayuh agi ga pisang Tekura nungkul tang pisang Beruang lalu nadai bebuah. Lebuh Beruang meda buah pisang Tekura nyau midar, reti nya baru kuning, iya lalu minta diri niki pisang nya. “Oh! Sambi. Uji aku niki buah pisang nuan nya ke diempa tua,” pia ku Beruang.

“Oh! Oh! Enda tau Sambi. Tua ga sama bisi pisang ke diri empu,” pia ku saut Tekura. Nyadi Beruang, nemu pisang diri enda tau bebuah laban selalu diupa iya. Iya majak madahka diri deka niki buah pisang Tekura. Pia mega Tekura sayau ke pisang iya ditiki Beruang.

            Nyau kepuas seduai bekelikuhka nya, dia Beruang enda liat ati lalu niki pisang Tekura. Nama dih jaku tudah Tekura tak besap-besap mata ngilaka Beruang niki buah pisang iya. Lebuh datai ba puchuk, dia Beruang lalu bepakaika buah pisang. Kupak seleka, tikau ga umbang. Anti Tekura meri enda ga meri. Dia Tekura lalu nyabak teki-teki:
“Hi-hi! Umbang embuang
Isi enda embui
Hi-hi Umbang embuang
Isi enda embui!”

             “Eh! Nama agi dianti aku ditu. Buah pisang udah ga abis diempa Beruang,” pia ku putap Tekura. Kenyau ari hari nya iya ngiga akal dikena iya malas penyai Beruang. Antara dua-tiga hari udah nya, dia seduai sama-sama nurun ngiga buah ke kampung. Diatu Tekura udah bulih akal. Lebuh iya tepedaka unak semambu, dia iya ngaitka kapir iya ba unak. Iya lalu betayun-tayun ba unak nya nimang diri munyi tu:
“Ayun! Uang ayun!
Upa uyas ungkol isang!
Ayun! Uang ayun!
Upa akai uah isang!
Oh! Nyin apai betugal kurung
Bebaju burung
Oh! Nyin indai betanggui seraung
Beseluk lintung
Naka pengelenggau ati
Ke apai seduai indai
Naka udah meda baka tu
Pan pama mih !”

         “Eh! Sapa dipeda nuan dia, Sambi?” pia ku Beruang. Tekura enda nyaut, tang majak nampung nimang diri. “Oh! Sambi! Sapa dipeda nuan dia?” pia ku Beruang. “Eh! Apai seduai indai enggau sida bukai sama benung nugal di sebayan din,” pia ku saut Tekura sikuk-sikuk ngaga diri nyabak, sinu ati.

         Dia mih Beruang bengap-bengap ngemataka Tekura berua tunsang ba unak semambu, enda badu-badu nimang diri. Beruang nyau enda liat ati agi. Iya mega keran deka meda sebayan nugal baka ke dipeda Tekura.

         “Uji aku ga berua dia Sambi?” pia ku Beruang. “Oh! Enda nuan tau!” pia ku saut Tekura. “Tubuh nuan berat. Tambah mega, enggai ke sebayan tak lari meda pemesai gamal nuan,” ku iya. “ Enti nuan enda ngasuh. Aku tarit nuan ari nya lagi,” ku Beruang. “Anang nuan nguji berua baka aku, enggaika nuan tak bebadi ngapa,” ku Tekura. “Enti sema aku tak mati labuh ari nya lagi, nadai ku enggau iya. Jampat agi ga betemu enggau sida apai sida indai di sebayan din,” ku Beruang.

       “Barang iya! Enti nuan tak keras, enda ga aku nagang nuan berua,” pia ku Tekura. Udah nya, Beruang lalu niki ngagai randau semambu. Unak iya pan panjai. “Nuan bepegai rat ba randau semambu tu. Aku ngachukka unak ba burit nuan,” ku Tekura. “Au, jampatka agi, awakka lengkas meda sida apai din,” pia ku Beruang.

        Tekura lalu ngachukka unak ba burit Beruang. “Bisi nuan meda sida apai enggau indai nuan di sebayan din?” pia ku tanya Tekura. “Tak lalu nadai ayan sida tu,” pia ku Beruang. “Anang guai,” pia ku Tekura. “Apin chukup dalam unak tu.” Beruang rauh-rauh madahka diri pedis, Tekura enda ibuh. Udah nya, tak lalu ditayunka Tekura. Peda tak merubus perut Beruang pansut ditarit unak.

             Enda lama udah nya, Beruang pan lalu bekalih tunsang. Dinga nyawa iya tak merap sekali agi. Udah nya lalu enda engkeretik agi. “Lapa nya dih Sambi?” Tekura nanya tang Beruang enda nyaut agi. Iya udah mati.

        “Ukai semina ulih meda sida sebayan nugal sambi tu, tang lalu enggau sida din,” pia ku Tekura gaga meda Beruang udah mati. Tekura lalu mulaika diri ngagai rumah iya empu. Lebuh meda rumah Beruang nadai nguan agi, dia Tekura serebana lalu bejaku enggau diri empu. “Enti nunda, patut bagi bela mih buah pisang. Nya baru ati sama lantang. Tang ga enda sebaka ati, laban bisi amu ari pangan,” ku iya. “Enti asai ati aku diatu, enda aku malas penyai Beruang enggau aku. Tang Beruang ga enda meretika ati orang bukai,”ku iya. Iya lalu bepantun:
“Getil isi orang, getil isi diri”






LATIH A:
Sambung ayat di baruh tu nitihka ensera nya tadi

1.Nyadi pisang Beruang enda tau.............
2.Lama agi, majak mayuh ga...........
3.Lebuh datai di puchuk, dia Beruang...........
4.Dia mih Beruang bengap-bengap.......
5.Tekura lalu mulaika....................


Latih B:
Terangka reti leka jaku di baruh tu:
1.Betampung
2.Beramu
3.Bekelikuh
4.Mupuk
5.Sebayan
6.Ditayunka

Latih C:
Saut tanya di baruh tu ngena ayat penuh.
1.Sapa ti enggau Tekura betampung rumah?
2.Nama kebuah pisang Beruang enda tau besai?
3.Sapa niki pisang Tekura?
4.Lapa Tekura nyabak teki-teki?
5.Nama akal ti deka dikena Tekura?
6.Nama penyadi Beruang ti ditayunka Tekura?
7.Nama reti rambai jaku “getil isi orang, getil isi diri”?
8.Nama ajar manah ari ensera nya tadi

Merdeka: Pengerindu, Penyerakup enggau Patriotisme

Kenang Merdeka: Ngelabuhka Pengerindu

          Ninting taun kena 31 Ogos endang nyadi hari besai kenyau ari taun 1957. Berindik ari tu, kitai patut enggau naka ulih ngelabuhka pengerindu ngagai menua diri. Ukai nya senang menua tu ngikaska diri ari kuasa luar maya nya suba. Bansa Indonesia suba merinsa pengelama 350 taun ketegal dipegai orang menua luar. Menua kitai dipegai British dalam kandang 150 taun lalu mai tempias ngagai pengerapit kaul. Bisi nya nyau lesi bebadi ketegal ngetanka menua diri ari pegai kuasa luar. Kitai beterima kasih ngagai bala tuai dulu suba ti mai menua tu merdeka baka ke diatu. Enti nadai sida, kada menua kitai ulih merdeka baka ke diatu. Nya alai, begempung mih kitai nyaga buah merdeka tu. Sulu jaku, kediri kitai lemi, betubuh kitai kukuh sigi tau ngeringka semengat merdeka kemaya hari tu. Ngayanka diri rindu ngagai menua ukai semina ngantung menira maya Hari Merdeka. Ia mega ukai semina dipeda bebaris manah di padang. Pengerindu tu dipeda ari ulah kitai ti ngemeratka sereta kiruhka menua diri.

Ditu Pengerindu belabuh
         Pengerindu tu mai reti bisi pengeransing ati. Iya mega tau dikumbai pengandal ati. Kitai patut bisi pengerindu ngagai menua diri. Kitai gaga ati laban udah diau ba menua tu. Enggau nya, ketegal ti ngembuan pengerindu, pengagit, sereta pengandal ati ke menua diri, kitai enggau naka ulih nyaga menua tu ari kena kachau ari orang menua luar. Ari nya, rayat patut ngelabuhka pengerindu ti enda bebelah bagi ngagai menua diri. Enti bisi pengerindu ti chukup dalam ba siku-siku rayat di menua tu, kuasa luar sigi enda ulih ngeruga sereta ngachau menua kitai. Iya nyadi kuta ti chukup tegap dikena napi serang ari luar.

         Pengerindu, Pengandal sereta penyayau ngagai menua diri ukai semina ba mulut aja. Semua tu mesti dikereja lalu dibantai sereta diayanka ngagai orang bukai. Baka ni mantaika sereta ngayanka pengerindu tu? Arus pemansang kemaya hari tu nganyutka pengerindu ngagai menua diri? Semua tu bepanggai ba diri kitai empu magang. Kitai patut bisi penangi. Nangika menua kitai dipegai menua luar baru. Pekara tu deka nyadi enti rayat nyau belabuh nadai pengerindu ngagai menua diri. Kitai sama enda nemu pekara ti deka nyadi dudi hari. Ari nya sama-sama mih besedia baka sempama “sediaka payung sebedau ujan.”

        Genap iku rayat tu patut ngembuan pengangkun ti chukup tinggi ngagai menua diri. Nitihka penemu Abd. Rahim Abd Rashid (2004) dalam Patriotisme:Agenda Pembinaan Bansa, madahka menua ti maju sereta mansang ulih napi ubah jeman ke-21 bepanggai ba pengering nasionalisme, demokrasi enggau pengawa ti dipejalaika ngambika ulih belematika reti merdeka. Nya alai, semengat patriotisme sereta angkunka menua diri chukup beguna dikena dikena ngenegapka menua tu. Ba taun 2014, Tema Hari Merdeka ke-57 iya nya ‘Malaysia: Ditu Pengerindu belabuh’ endang minta rayat sayauka menua diri sereta ngetanka iya ari menua luar. Orang ngembuan patriotisme iya nya orang ti ngembuan penyayau ti enda bebagi ngagai menua. Penyayau enggau pengerindu nentuka siti-siti menua nya terus maju sereta mansang bediri sama tinggi enggau menua bukai.

Jalai Ngelabuhka Pengerindu

         Pengerindu ngagai menua kitai bepun ari ati. Ari ati din, baru iya ulih ditunda udi enggau ulah. Kitai ukai semina ulih nyebut “Aku Sayau ke Malaysia” nengah leka jaku aja, belagu enggau mandangka ulah ti rindu ke menua diri. Rayat patut taluk ke raja sereta pemesai ti megai menua. Tu mih sekeda jalai kitai mantaika pengangkun ngagai menua diri. Rayat ti temegah ke menua diri mega bebasa lambang menua baka menira enggau lagu besai menua nya. Semengat tu ukai semina bebasa ke pemesai enggau lambang menua aja. Rayat ti angkun sigi enggau naka ulih ngetanka menua diri ari serang munsuh tauka kuasa luar. Kuasa luar tu meri tempias ti enda manah ba pengerapit kaul enggau dunya politik ba menua tu. Tun Dr Mahathir Mohamad kala minta rayat ukai bumiputera sama bela ba raban pengelikun baka soldadu, polis enggau mayuh agi. Nya alai, rayat Malaysia bepegai ba ramba jaku “Menua Kitai Tanggung pengawa Kitai”.


          Rayat Malaysia patut ngembuan semengat rindu begulai enggau sama diri. Reti nya, kitai ulih bekerejasama, sama ulih mantu pangan diri sereta ulih betulung enda ngira bansa, pengarap enggau penatai. 1Malaysia udah ditumbuh dikena nyerakupka semua bansa di menua tu. Kitai semua rayat 1Malaysia enda ngira Melayu, Cina, Iban tauka bansa bukai. Enti udah ngaku diri nyadi rayat 1Malaysia, nya baru ulih ngentapka pengangkun ngagai menua diri. Ulih begulai enggau mayuh pupu raban raban siti ari kebuah menua kitai tetap tegap sereta kebal ari kena kachau menua luar. Pengentap siti-siti menua sigi bepanggai ba pemansang enggau penyerakup raban bansa ti nguan menua nya.

         Apai indai patut ngepun pengerindu ke menua diri. Apai indai patut nyeritaka pasal tuai-tuai ti dulu kelia ti ngelaban orang luar sereta mai buah merdeka baka kemaya hari tu. Lebuh becherita, apai indai madahka pemar orang tuai bulih merdeka ari kuasa luar. Apai indai mega patut nusui pasal penusah orang maya pegai orang luar. Ari nya tadi, anak ulih mandingka penyamai ke baka sehari tu enggau penusah maya jeman pegai orang luar menya. Tunku Abdul Rahman suba enda ngerendut dada aja meda menua kitai dipegai menua luar. Iya bemati-mati ngulihka merdeka baka ke diasaika kediatu. Semua pengawa ti digawa tuai-tuai menya endang ungkup kitai ke diatu. Beduduk ari iya, sumbuk pengerindu ngagai menua deka nyamai agi tumbuh ba anak mit. Betul mih jaku sempama, meleti buluh sigi ari tubu iya. Nya baru, pengerindu ke menua majak galak-segalak.

          Patriotisme ari belabuh ati beguna agi ari patriotisme luar. Patriotisme luar baka nuatka menira, belagu patriotisme enggau begelumu maya merdeka tu semina mantai pengawa lalu sekeda nya enda datai ba lubuk ati din. Pengerindu ke menua sigi senyata ti chukup tajam dikena ngetanka menua ti merdeka. Pekara ti semampai nyau deka sama enggau merdeka iya nya begulai sereta nyerakup semua bansa. Sekeda tema hari merdeka iya nya besatu maju, nasionalisme teras penyerakup, seati sepenemu enggau mayuh agi. Enti nadai penyerakup, tentu menua enda likun baka ke diatu. Penyadi maya 13Mei suba mesti dikingatka kitai. Lebuh nya, rayat enda ulih begulai enggau bansa bukai. Mayuh pengerusak deka nyadi enti kitai nadai pengerindu ke menua diri. Berita perang di menua luar ulih nyadika teladan ti manah ngagai kitai.

         Kitai ulih nunjukka pengerindu ti chukup dalam lebuh sama besaup nyaga pengelikun menua. Polis enggau Soldadu endang sigi orang ti dipadu nyaga pengelikun menua. Enda salah enti kitai mega sama ulih mantu pengawa tu. Tanggung pengawa nyaga pengelikun menua tu ukai semina bepanggai ba polis enggau soldadu aja. Ari nya, kitai patut ulih nyereta raban pengelikun ti mantu polis enggau soldadu. RELA enggau Soldadu Wataniah antara dua raban ti nyadi terabai pengelikun menua tu. Perintah mega enggau naka ulih nambahka raban RELA enggau Soldadu Wataniah. Nengah chara tu mega, kitai ulih ngetanka menua diri ari serang menua luar. Berita pasal Lahad Datu tau nyadi ajar ti manah. Baka ni enti menua kitai majak diserang? Sama mih berunding. Menua sigi begunaka rayat ti ngembuan pengandal sereta pengerindu ti enda bebelah bagi.


         Pengerindu tau nyumbuk manah enti rayat nemu sejarah menua. Ari penerang tu, rayat nemu sereta meretika mayuh macham pekara ti nyadi lebuh numbuhka Malaysia. Penerang enggau penemu pasal sejarah tu ulih mantu rayat bisi penyayau, temegah ati ngagai menua diri. Kitai patut temegah ati nyadi rayat Malaysia. Enggau nya kitai ulih ngelabuhka pengerindu ngagai Malaysia. Nitihka Raja Ruslan Raja Samah (2005), “Patriotisme Belia Malaysia,” madahka elemen temegah ati ngagai menua diri siti ari elemen patriotisme. Ari nya, rayat ulih ngasaika pemerinsa sereta pengeran ati tuai kelia deka ngasuh menua tu merdeka. Enti rayat ke diatu ulih beterima kasih ngagai tuai keia ti ngulihka merdeka tu, dia sida enggau naka ulih ngetanka menua diri. Rayat ngembuan pemerani lebuh ngelaban munsuh lalu enda mudah nyerah.

         Pengerindu ke menua ulih nyadi besai bendar reti enti rayat iya bedisiplin. Rayat ti bedisiplin iya nya rayat ti taluk ke menua, nitihka atur dipelajaika perintah sereta enda ngelanggar undang-undang. Rayat ti nerima sereta nitihka undang-undang amat beguna ngagai perintah. Enti rayat seruran nitihka undang-undang, nyamai bejalaika mayuh macham pemansang. Juluk Wawasan 2020 ulih nyadi nyata.

         Kitai mesti bisi pengerindu enggau penyayau. Penyayau ke menua tu siti elemen ti bekaul rapat enggau pengerindu. Rayat lebih ngembuan penyayau enggau pengerindu ke menua ari ke sida sebilik. Tu mih siti ari pekara ti patut dikembuan rayat. Penyayau enggau pengerindu siti pekara dikena ngatur pemansang dudi hari. Ari penyayau mih kitai ulih begulai enggau orang bukai. Ari penyayau mih kitai ulih nerima pemesai ti megai menua tu. Pengerindu enggau penyayau ulih nyeliahka rayat ari ngereja pengawa ti enda menuku kelebih agi ngagai nembiak rebak baru. Pengawa baka ngerusak keresa rama, ngerumpak enggau mayuh pekara bukai ulih diseliahka laban rayat bisi penyayau enggau pengerindu.

        Pemadu manah pengerindu ke menua tu patut dikerembai bepun ari sekula. Nembiak kemaya hari tu dipeda majak kurang pengangkun ngagai menua diri. Ba sekula mih alai ngiri pengerindu ngagai menua diri. Mayuh macham program maya bulan Merdeka diatur ba sekula. Sekeda nya baka Pekit Lagu Patriotisme, Ngias kelas, Nuatka menira ba kandang sekula enggau mayuh agi. Ari pengawa ke baka tu, pengerindu ke menua ulih diiri ngagai nembiak sekula. Pengajar endang seruran ngiring ngembing nembiak sekula taluk ke menua. Mata pelajar baka Pendidikan Sivik dan Kewarganegaraan endang mayuh skop pasal pengandal, pengerindu sereta pengangkun ngagai menua. Pia mega, pekara ti bisi bekaul enggau pengerindu ke menua bisi diajar nengah mata pelajar Pendidikan Moral. Nembiak sekula kemaya hari tu chukup beruntung laban belajarka semua pekara tu. Perintah ngasaika mayuh penanggul deka nyadi enti nembiak nyau kurang pengangkun, pengandal enggau pengerindu ngagai menua diri. Nembiak tu orang ti nganti orang tuai besai dudi hari ila. Sida tu mih reta ti pemadu beguna dudi hari ila.

           Selamat Hari Merdeka. Ngarapka merdeka tu mai besai reti ngagai kitai semua. Seati sama penemu mih kitai ngetanka menua tu merdeka belama. Ukai siku, ukai seraban tang serap rayat Malaysia mesti begempung sereta beserakup ngetanka menua ti merdeka tu. Nengah jalai ke baka tu, baru menua kitai ulih merdeka datai ke ila-ila.

Latih Meretika Teks (1.0)

Bacha enggau silik genteran teks tu. Udah nya saut semua tanya ti nangkanka nya.

“Chak, aram tua bemain bol enggau orang”ku Aging. “Nadai nya salah. Nganti aku tembu ngaga tanya Matematik tu,”saut Engtebang. “Aku nginjau bup nuan legi. Nadai nemu nyaut tanya dia. Tusah amai nya. Iya ga aku sigi ke buruk. Sigi jauh panggang ari api enti dibanding enggau nuan,” ku Aging madah ngagai Entebang. Enda lama udah nya, Entebang lalu nyikap diri nurun bemain bol ba padang.

            Malam nya agi tachuh sida sekaban becherita pengawa bemain bol lemai tadi. Enda memukai lalu datai pengajar Lamai. Sida sekaban lalu enda engkeretik baka api dipanjah ai. Semina Aging aja agi becherita laban iya melakangka pengajar Lamai.
“Aging! Umbas nya bejaku,” ku pengajar Lamai. Aging tekenyit lalu berumban ngiga bup iya. “Kita tu patut nemu belajar. Enda ibuh nganti pengajar bisi baru deka muka bup. Peresa SPM enda lama agi. Tu mih peluang kita ngubah nasit diri. Semina pemujur ba pelajar sekula ulih ngangkatka pengidup kita,” pia ku pengajar Lamai. Nyau deka tiap malam iya meri jaku ajar.  Jaku ajar sekali tu lama agi selama. Sida dalam kelas sama bela bemunyi. Pengajar Lamai nyau baka apai sida. Indah apai sida di rumah nadai ngenyuah nya meri jaku. Kelebih agi apai Aging. Ukai semina pengirup, iya mega penyabung.
         
           Sekali tu ajar ari Pengajar Lamai masuk pending Aging. Ngelamatu, semina mansa aja. Masuk pending kanan pansut pending kiba. Kala iya ditangkap teruan belajar malam ketegal meda pekit belagu karaoke di pasar. Enda mih iya jera. Indai iya udah dua kali dikangau ke sekula ketegal pemuruk iya ngaduka latih ti diberi pengajar.
         
         “Tap!!”munyi mija ditempap. Aging tekenyit. Peda Entebang deka nyuaka iya bup Agi Idup Agi Senurut ngagai iya. “Enda manah bup tu, manah agi bup iya ti lama suba iya nya  Agi Idup Agi Ngelaban. Nya baru mayuh meri ulih ngeringka semangat.”ku Entebang muka randau. “Nya mih aku lalu enda abis-abis macha nya”timbal Aging. “Seagi bansa kitai begulai enggau ai bisa, endang nyamai agi bansa bukai ngempuk ngerenyuk bansa kita,” ku Aging mantaika penemu iya ngagai Entebang.
         
         “Nama nuan ngelama nya tegenung tadi?”tanya Entebang. “Nya mih. Enti nadai pengajar Lamai bebendar enda aku tu berubah,” ku Aging. “Diatu tua nya ba taun kepenudi kus nyadi pengajar. Ulih ga nganti penuduk pengajar Lamai. Enda ibuh orang luar nganti iya dia,” ku Aging nyambung randau iya. Entebang tekenung enda lama. “Ukai nya nadai pemandai kitai menua, tua tu kira benasit manah. Ingat nuan Ruland. Nyentukka diatu lalu bedau bulih gawa. Kenu ku iya empu, kuota udah penuh. Nya iya lalu bedau bulih kereja.” pia ku Engkebang. Aging besemaya dalam ati iya din, enti iya bisi penuduk tinggi, iya deka mantu bansa diri. Anang terus ngatika diri. Anang makai bansa diri. Iya deka matak bala ti di baruh ngambi sama niki ke atas sereta ngulurka tangga ngagai sida.

          Randau seduai ngetu tekala nya laban Aging nyaut talipaun apai iya. Apai iya madah duit belanja udah dipasukka ngagai akaun. Aging gaga meda apai iya meri duit taja pan bedau dipinta. Apai iya nyau berubah sekumbang Aging nyambung pelajar. Apai Aging mega nyau nemu nyimpan duit sereta bebendar melanja anak belajar. Iya mega seruran ngansak sida serumah bebendar nyengulaka anak. Ba runding iya, diatu kitai bansa ti jauh tinggal patut nyemekih bansa bukai ba pelajar sekula sama bela “ngerayap baka tuntung, nilat baka tekuyung lalu ujung-ujung iya ila ulih ngalahka remaung di bukit tinggi,”.

Tanya 1 ngagai 5
Ba siti-siti tanya empat iti pilih saut A, B, C enggau D. Pilih siti saut ti betul nitihka lebas tanya nya.

1 Nama kebuah Aging ngelawa Entebang?
A Deka madahka diri kurang pemandai ari Entebang.
B Minta iya nyikap diri nurun ke padang.
C Ngachau Entebang ti benung belajar.
D Mai bemain bol.

2 Siti ari di baruh tu ukai ulah jai ti kala digaga Aging?
A Rindu bemain bol
B Pansut ari kandang sekula nadai pemendar
C Enda ngaga kereja ti diberi pengajar
D Enda ninga jaku ajar ari pengajar Lamai


3 Nama semaya Aging kena iya mantu bansa diri?
A Ngidup ngatika diri
B Nyendiaka tangga kena orang niki
C Enda begunaka orang luar ba menua sida iya
D Besaup ngangkat bansa diri ti agi tinggal ari bansa bukai


4 Nama pengerusak ti bisi dipadah ketegal ngirup ai bisa dalam cherita nya?
A Ngasuh orang belaya
B Mayuh ngerua belanja
C Pengerai majak enda manah
D Anak enda mujur besekula


5 Nama reti tibak ““ngerayap baka tuntung, nilat baka tekuyung lalu ujung-ujung iya ila ulih ngalahka remaung di bukit tinggi,”?

A Belubah-lubah nitihka bansa bukai nyentukka ngagai tikas ti pemadu tinggi
B Begadai-gadai nyemekih bansa bukai ti endang udah tinggi penuduk
C Ngambi penuduk ti pemadu atas ngambika pengidup menyana agi
D Ngenang jelu ti lubah bejalai taja ulih ngalahka pejalai remaung.

Tanya 6 ngagai 10
Saut tanya di baruh tu ngena ayat penuh.

6 Nama pengurang enti pengidup kitai bansa baka sempama “agi idup agi senurut”?



7 Nama kebuah Aging tegenung ?



8 Ba penemu nuan, nama penyadi enti bisi orang ti udah bisi penuduk tinggi deka amai makai bansa diri?




9       Nama ajar manah ti ulih ari teks nya tadi?



10    Bakani tanggung pengawa apai indai kemaya hari ulih mantu pemujur anak ba pelajar sekula?

Tampung Ensera Atau Tanah - "PANSUT ARI LUBANG KEBUNG"

ENSERA PANSUT ARI LUBANG KEBUNG

            Ensepi diri ulih pansut ari lubang kebung, dia Pelanduk seduai Tekura lalu rindang dalam babas. Seduai enda ngaga tangga. Pelanduk ngiga buah buan. Tekura ngiga daun riang.
“Anang tua kiruh ngaga tangga. Peda pengurus nuan lama udah enda makai,”pia ku Pelanduk nganu Tekura.“Nya amat,” pia ku saut Tekura.
             Seduai lalu mupuk begiga buah, enda ibuhka jaku Badak ngasuh seduai ngaga tangga.
“Nadai mih penyadi mih kitai dikeduanka seduai nya,”ku Badak enggau bala jelu bukai. “Pelanduk seduai Tekura tu enda beban tangga. Nadai penyadi mih kitai dikeduan seduai nya,” ku iya.
“Enda pia,”ku Rusa. “Manah kitai ngiga akal bukai dikena mansutka diri ari lubang tu. Nadai penyadi kitai sebuat tak mati keberuran ngapa ditu, nganti seduai nya. Lagi asai seduai nya. Peruti enggau perut,” ku iya. “Oh! Enti munyi nya, manah kitai sebuat bepautka tanah ba tisi lubang kebung tu,” pia ku Badak. “Barang kitai lemi agi nya ngangkut tanah ngagai tengah-tengah lubang kebung.” Bala sida nyau mayuh lapar, laban atau tanah nadai agi ditemu sida dalam lubang kebung nya. Bala jelu lalu belabuh bepautka tanah nisi lubang kebung nya. Bala jelu ke mit ngeringak berangkutka tekang tanah.
            Lama agi tinggi agi ga tugung tanah ba tengah-tengah lubang kebung nya. Tugug tanah pan sama bela enggau mua lubang kebung, nya baru Badak ngasuk bala jelu ke mit agi pansut dulu. Enti jelu besai diasuh dulu tugung tanah nyau tau tumpur baru laban pemerat sida.
Sida lalu begigaka utai utai dempa dalam kampung semak nya. Bala jelu pan udah kenyang, sida lalu baum deka munuh Pelanduk seduai Tekura. Bala jelu balat bendar ringat laban Pelanduk seduai Tekura enda ngaga tangga.
            Badak lalu ngasuh bala jelu begigaka Pelanduk seduai Tekura. Barang jelu tau niki, lalu betilikka ari puchuk kayu. Sida bukai besidika bekau Pelanduk seduai Tekura sebelah babas dalam kampung nya.
          Lebuh munyi kerus bala jelu mansang semak, dia Pelanduk seduai Tekura lalu berunding. Seduai ngiga akal dikena ngidupka diri. Pelanduk lalu ngumpul kulit buah kundung. Iya nampal mata iya ngena kulit buah kundung. Iya lalu ngalika diri, ngaga diri tinduk ba baruh batang tebelian. Tekura lalu ngaitka diri ba unak semambu. Dia mih iya kating-kating betayun ba unak semambu. Bala jelu pan nyau datai semak. Sida lalu tepedaka Tekura kating-kating lekat ba unak semambu.
“Akai rai! Seninjik kita jampat datai. Enti enda pia, tentu aku mati,”ku Tekura. Tak enda mukai-mukai, lebuh aku narit rutan, kapir aku lalu dikait unak semambu,”ku iya.
Bala jelu lalu deka narit iya. “Anang munuh iya. Kasihka tudah Tekura lama kating-kating ba unak semambu,”pia ku Badak. Bala jelu lalu beguai-guai ngetas unak ke ngait kapir Tekura.
“Nyah! Idup mih nyawa baka tu,” pia ku Tekura.
           Lepas nya, bala jelu lalu ngiga Pelanduk. Enda jauh ari endur nya, alai ditemu sida iya. Bala jelu lalu meda Pelanduk tinggang batang tebelian. Bala jelu lalu deka ninggang iya enggau batang tebelian.
           “Anang munuh iya. Iya pan pedis kena tinggang batang nya,” ku Badak.
           “Akai apai! Akai indai! Naka mih pengasih kita nganti aku mai tangga. Enti laun datai, tentu aku mati kena tinggang batang tu,” ku Pelanduk. Bala jelu seruran deka munuh iya.
          “Oh! Anang munuh pelanduk,”pia ku Badak nagang bala jelu. “Kasihka iya. Iya ga pedis.”
Bala jelu lalu belabuh ngaringka batang tebelian. Laban batang nya berat, nya kelama, nya baru batang ulih garingka sida. Idup mih tudah Pelanduk. Iya lalu kechit-kechit, gagaka diri enda kena bunuh bala jelu.
          Diatu Pelanduk seduai Tekura lalu bepangan baru enggau bala jelu bukai. Bala jelu enda nemu diri diakal pemintar Pelanduk seduai Tekura.


Latih A
Terangka reti leka jaku di baruh tu. Udah nya ngaga ayat.

1.Rindang

2.Pengurus

3.Dikeduan

4.Keberuran

5.Tambun

6.Tugung

7.Kating-kating

8.Ngetas

9.Ngenung

10.Melut


Latih B
Saut tanya di baruh tu ngena ayat penuh.
1.Nama kebuah Pelanduk seduai Tekura enda ngaga tangga?

2.Nama kebuah bala jelu ringat ngagai Pelanduk?

3.Nama chara bala jelu mansutka diri ari lubang kebung?

4.Nama kebuah bala jelu begigaka Pelanduk seduai Tekura.

5.Nama akal dikena Tekura ngidupka diri?

6.Nama kebuah Badak nagang jelu bukai munuh Tekura?

7.Sapa ke pintar dalam ensera tu, beri kebuah nuan madah baka nya?

ENSERA ATAU TANAH

 ENSERA ATAU TANAH

         Lebuh Tekura udah labuh, dia Beruang lalu berengkah bepakaika buah sibau. Iya enda ibuhka bala jelu bukai mansa pun sibau. Bala jelu enda berani niki sibau. Sida takut ke Beruang. Sekeda semina makai buah sibau ke labuh dibuai Beruang.
         Nyadi lubang kebung ke alai Tekura labuh nya dalam. Iya enda ulih niki pulai ke atas. Dia mih iya kual-kual dalam lubang. Nyau kepuas iya bekerawis ke tanah, dia dih Tekura tetemuka kerimpak buah nyiur. Nyadi buah nyiur nya, iya ke labuh dibai terebai suba. Nya mengkang bisi isi. Nyadi tekura laban lama udah natka diri lapar, lalu makai buah nyiur nya. Dia mih iya kerup-kerup mangkil isi nyiur.
“Oh, idup nyawa. Nyin langit, tu tanah,” pia ku Tekura. Nyadi bala jelu nyau mayuh mansa endur nya. Sida alit ati meda Tekura tak diau dalam lubang kebung. Nyau kelama, dia Rusa pan mansa. “Oi sambi! Nama gaga nuan dia?”
“Es!Nuan pan deka mih diau ditu, enti nuan udah ensepi,” ku Tekura nyaut.
“Nama utai nya dih, sambi?” ku Rusa.
“Tu mih utai ke dikumbai anak mensia atau tanah,” ku Tekura.
“Uji meri aku mimit?” ku Rusa.
“Au,mih,”pia ku Tekura sambil nikauka isi nyiur ngagai Rusa.
          Rusa lalu ngunyah isi nyiur. “ Amat nyamai mih atau tanah, enti asai tu,” pia ku Rusa.
Ensepi atau tanah tak nyamai, dia Rusa lalu enda kakang ati. Iya lalu terejun ke dalam lubang kebung. Dia mih iya begulai enggau Tekura ngali atau tanah. Puas dia, bisi ga Rusa tetemuka repik isi buah nyiur ke dikumbai Tekura atau tanah.
         Lama agi mayuh ga bala jelu betilikka Tekura seduai Rusa. Barang sida udah ensepi asai atau tanah diberi Tekura, lalu terejun ke dalam lubang kebung. Lama agi mayuh agi ga bala jelu tama lubang kebung nya. Pia mega, lama agi besai agi lubang kebung laban bala jelu ngiga atau tanah.
        Nyau ke lama laban endang enda mayuh, dia dih atau tanah nyau nadai temu bala jelu siga agi. Sida nyau berunding ngiga jalai pansut ari lubang kebung nya. Mayuh sida nguji niki tang enda ulih laban lubang kebung nyau dalam bendar. Bala jelu lalu berunding ngiga akal.
         Nyau kelama, dia Badak ke nyadi tuai sida lalu bejaku, “Enti kita ngatika diri tentu kitai enda ulih mansutka diri ari lubang kebung tu. Manah kitai bepangkat-pangkat atas pangan diri. Barang besai ari baruh. Barang mit ari atas,” pia ku iya. Bala jelu lalu gaga ati ninga jaku Badak.
“Nya baru kena,” pia ku Tekura.Sida lalu ngatur diri. Badak bediri dulu. Rusa lalu bediri di atas belakang Badak. Bala jelu bukai lalu bediri di atas pangan nitihka pemesai tubuh diri empu.
          Tekura seduai pelanduk laban seduai mit lalu nepan di atas belakang orang bukai. Lebuh seduai semak mua lubang kebung, dia seduai lalu engkechit keluar. Meda nya, Badak lalu bejaku. “Seduai niki dulu, tang anang enda ngaga tangga dikena kami bukai niki,” ku Badak.
“Au, barang iya mih,”saut Tekura seduai Pelanduk.
“Eh! Anang enda! Enti seduai enda ngaga tangga, nadai penyadi bala kami bukai lapar, nganti seduai datai baru,” ku Badak nangkan jaku iya ngagai Tekura enggau Pelanduk.
“Au!” pia ku saut Tekura seduai Pelanduk. “Lebuh tangga udah tembu gaga, nya baru kami dua datai ngulihka kita ari lubang tu,” ku seduai.
        Pelanduk seduai Tekura lalu mupuk tama ke babas ngejang lubang kebung. Siku melunchat, siku ringkap-ringkap, seduai ke bejalai dalam babas. Seduai baka ke nadai penemu tang balat bendar pemintar.


Latih A
Tukar ayat sebut ngagai ayat tusui

1.“ Amat nyamai mih atau tanah, enti asai tu,” pia ku Rusa.

2.“Seduai niki dulu, tang anang enda ngaga tangga dikena kami bukai niki,” ku Badak nangkan jaku iya ngagai Tekura enggau Pelanduk.

3.“Lebuh tangga udah tembu gaga, nya baru kami dua datai ngulihka kita ari lubang tu,” ku seduai.

Latih B
Saut tanya di baruh tu ngena ayat penuh.
1.Sapa ti niki pun sibau ke alai Tekura tepanggai?

2.Nama kebuah jelu bukai enda berani niki pun sibau nya?

3.Nama kebuah jelu bukai nitihka Tekura tama ngagai lubang kebung?

4.Nama akal dikena bala jelu mansutka diri ari lubang kebung?

5.Nama semaya Tekura seduai Pelanduk ngagai bala jelu bukai?


Latih C
Beri reti leka jaku di baruh tu.

1.Bekerawis

2.Ensepi

3.Ngejang

4.Pemesai

Tampung Ensera Ngabas Langit

Ensera Puchuk Sibau.

            Lebuh Kenyalang seduai Tekura nadai agi dipeda, dia bala jelu mulaika diri ngagai rumah diri empu.Hari maya kemarau lalu angat bendar. Nya alai, upih pinang sayap Tekura mupuk ngeriut. Iya lalu manjah enggau ai nyiur. Nyau kelama, ai nyiur mupuk abis. Panas mansang bisa. Sayap iya majak ngeriut.
“Nama mih penyadi aku tu? Sayap aku mansang ngeriut. Enda aku ulih terebai nitihka nuan,” pia ku Kenyalang.
“Nadai nya tusah, pajak mih. Nyin langit enda jauh agi,” ku Kenyalang.
“Enda tu alah pajak,” pia ku Tekura. “Sayap aku enggai kebab-kebab,” ku iya. Iya mupuk labuh ke baruh. Kenyalang, laban agi keran deka ngabas peninggi langit, nyau mupuk terebai berari. Tekura, laban sayap iya enda ulih kebab-kebab agi lalu labuh. Seninjik bendar Tekura labuh lalu tepanggai enselit ba selepak dan sibau.
          Kenyalang enda nyamai terebai lapu-lapu kediri-diri. Iya lalu nikal. Enda mih seduai nemu peninggi langit. Dia mih tudah Tekura kawih-kawih tepanggai ba selepak dan sibau. Iya enda ulih nurun, enda ulih niki.
“Nama mih penyadi aku tu,”pia ku Tekura.
Maya nya benung buah sibau mansau. Tekura nyau berasai lapar tang enda ga iya ulih ngambi buah sibau ke dempa diri.
            Lama agi mayuh agi ga bala jelu mansa pun sibau alai Tekura tepanggai. Sekeda sida enda meda iya teselit ba dan sibau. Barang sida meda lalu nanya.
“Nama gaga nuan dia sambi?”
“Eh! Meda pemayuh buah sibau mansau. Aku tu diasuh Raja ngibun iya,” pia ku saut Tekura. Bala jelu enda ngetu lama dia. Sida majak pejalai diri berari. Nyau ka lama, dia dih mansa tudah Beruang.                Iya nengkadah lalu tepedaka Tekura ba selepak dan sibau.“Nama gaga nuan dia, sambi?” pia ku Beruang.“Eh! Peda nuan pemayuh buah sibau mansau. Aku tu diasuh Raja ngibun iya,” pia ku saut Tekura.“Au, amat munyi ku nuan sambi. Uji aku niki buah sibau nya ke tua,”pinta Beruang.
“Oh! Enda tau dih sambi. Enggaika Raja nganu aku,” pia ku Tekura.
“Anang bangat ngerangka enggau pangan,” ku Tekura.
“Enti nuan deka ngasuh aku niki, aku tumbit lagi,”ku putap Beruang.
“Oh! Anang mungkal pangan ngaga laya. Nya mih dikeenggai aku. Tambah ga Raja tentu nganu nuan,” ku Tekura.
               Enda ibuhka diri dianu Raja laban nyawa tetengukka buah sibau, dia Beruang lalu niki ke puchuk. Enda lama udah nya iya lalu manggai ba pun dan alai Tekura enselit. Dia tudah Tekura, enda nemu daya agi, tak nat nganti Beruang numbit iya.
               Datai Beruang dia lalu enda chechamang tak lalu numbit Tekura. Tudah Tekura lalu labuh ke tanah. Seninjik iya ke labuh lalu tama kebung.

Latih A
Saut tanya di baruh tu ngena ayat penuh:

1.Nama kebuah sayap Tekura ngeriut?

2.Nama kebuah sayap Tekura nyau enggai agi kebap-kebap?

3.Nama penyadi Tekura lebuh sayap iya enggai kebap-kebap agi?

4.Nama kebuah Kenyalang nikal?

5.Ba penemu nuan, nama ajar manah ari ensera nya tadi?

Latih B
Beri reti leka jaku di baruh tu.

1.Kemarau

2.Nengkadah

3.Mungkal

4.Laya

5.Rangka

ENSERA NGABAS LANGIT

                                   NGABAS LANGIT

                   Nyadi hari siti, dia Badak ke selalu nyadi tuai bala jelu ngasuh Kera seduai Nyumbuh nesau bala jelu baum. Kebuah Badak milih seduai nya ngenyadika Kera enggau Nyumbuh tau niki kayu.
                 Kera seduai Nyumboh lalu nanchangka temuku tali seduai nimpuh hari maya baum. Seduai lalu niki kayu sereta engkechit bejambanka semua puchuk kayu. Lebuh seduai betemu enggau bala jelu, dia seduai lalu meri temuku tali madahka maya baum. Dalam kandang dua hari, dia semua jelu abis ditesau seduai magang. Seduai lalu mulaika diri ngagai Badak. Dia seduai nganti maya baum. Sintal temuku tali pan abis, bala jelu lalu datai. Endur sida ke baum nya ba tuchung Bukit Rabong.
               Lebuh bala jelu udah sampal datai, dia Badak lalu bejaku. “Suba bala kitai udah nubai. Lebuh nya mayuh ga salai ulih kitai. Nya alai, sekalitu kitai sebuat nguji ngabas peninggi langit. Enti kitai enda nguji, kitai lalu enda nemu peninggi iya,” pia ku Badak.
“Au, manah mih runding nuan nya, tuai,”pia ku Rusa nyaut ngarika bala jelu bukai.
“Tang sapa ari bala kitai berani nguji ngabas peninggi langit?”pia ku tanya Nyumbuh.
“Nya barang ku pilih mayuh. Aku empu enda ulih, laban kelalu berat,”pia ku Badak.
“Aku tu nadai bantah enti sema kita mayuh ngasuh. Tang aku enda nyamai terebai kediri, enti nadai pangan,”ku Kenyalang mansutka jaku iya.
“Oh! Kenyalang, nya amat patut laban iya tau terebai,” pia ku Rusa.
“Kami bukai tu enda ulih laban nadai sayap,” pia ku iya.
“Eh! Pasal sayap nya enda mar. Iya ga tau dilekat ka dudi hari ila,” pia ku Badak.
“Oh! Enti munyi nya, aku tu deka nyadi kaling Kenyalang terebai ngabas peninggi langit,” pia ku Kera.“ Enti nuan deka ke pangan aku, nyawa nuan enda tau enda diuji dulu kena nimbal nyawa aku,” ku Kenyalang.
         Udah nya, “Enggang!” pia ku Kenyalang. “Kachih-kerah!”ku Kera nimbal nyawa Kenyalang
“Oh! Enggai nyadi nyawa munyi nya nimbal enggi Kenyalang,” pia ku bala jelu. “Uji aku,” pia ku Pelanduk ngansakka diri semak Kenyalang. “Enggang! Enggang!”ku Kenyalang. “Put!Suut-suut-suut!” timbal pelanduk. “Oh! Lapa nyawa ngenyai nya munyi,” pia ku bala jelu.
“Aku ga nguji,”pia ku Babi.
“Embus! Embus! Embup! Embup!” ku Babi nimbal Kenyalang.
“Oh! Nya jauh agi deka nimbal enggi Kenyalang,” pia ku bala jelu.
“Uji aku. Nama enggi kita lalu enda betul,”pia ku Ukui.
“Enggang! Enggang!” pia ku Kenyalang.
“Au-o-o-ong! Au-o-o-ong!” ku Ukui
“Oh! Enggi Ukui pama mimit, laban inggar tang apin betul,” pia ku bala jelu.
            Bala jelu bukai lalu ngujika diri, tang siku pan sida nadai ga tau nimbal nyawa Kenyalang.
“Uji nuan ga nguji, unggal Beruang,”pia ku jaku jelu bukai.
“Au, kita ga ngasuh, deka ga aku nguji,” Beruang nyaut.
“Enggang! Enggang!” pia ku Kenyalang. Beruang dianti nimbal, lalu enda ga nimbal. “Lapa nuan enda nimbal nyawa Kenyalang?” ku bala jelu nanya Beruang. Beruang enda kebut-kebut. Udah nya, Kera lalu merak Beruang. “Lapa nuan lalu enda nimbal Kenyalang?” ku Kera.
“Iya nama utai ku kita?” ku Beruang.
“Es! Mandap nuan tu! Kenyalang udah ngenggang, nuan lalu enda nimbal iya,” ku bala jelu.
“Kati ku aku nimbal, aku ga enda ninga,”pia ku Beruang. “Oh! Enti baka tu, enda nuan tau enggau Kenyalang ngabas langit. Nuan ga bengal. Enggaika nuan enda ninga Kenyalang lalu tesat,” ku bala jelu nganu Beruang. “Eh! Ukai nya baka ke enda tau aku enggau ngabas langit. Ukai nya bisi madu renyuan din,” pia ku putap Beruang, laban iya endang irau deka maka madu renyuan.
“Es! Pachal utai, aya Makop nya. Enti nadai utai nguntungka iya enggai enggau kitai,” ku bala jelu.
             Bala jelu lalu ngasuh Tekura nyadika pangan Kenyalang. Tekura ngeringak duduk reringkap di atas batang mendingka bala jelu ngujika nyawa diri. “Uji nuan unggal Tekura terebai enggau kenyalang ngabas peninggi langit,” pia ku Badak. “Uji munyika nyawa nuan,” pia ku sida nganu Tekura. “Enggang! Enggang!” ku Kenyalang. “Changkuk liuk! Changkuk liuk!” pia ku Tekura nimbal munyi Kenyalang. “Ah! Nya baru manah! Nya baru tau nimbal Kenyalang,” ku jaku bala jelu mayuh. “Enti baka tu, nyadi mih ngabas peninggi langit,” ku Kenyalang.
            Ninga munyi nya, bala jelu lalu richah diri gagaka Tekura seduai Kenyalang deka ngabas peninggi langit. Bala jelu lalu begigaka upih pinang. Lebuh udah bulih, dia sida lalu ngebat nya ke sayap Tekura. Sida lalu nanchang buah nyiur sigi ba belakang iya. Lebuh semua udah kemas, dia Kenyalang seduai Tekura lalu mupuk terebai. Mayuh bendar bala jelu ngemataka seduai angkat.                    Lama agi tinggi agi ga seduai terebai. “Enggang! Enggang!” ku Kenyalang. “Changkuk liuk! Changkuk liuk!” pia ku Tekura nyaut. Bala jelu gaga ati meda seduai terebai. Sida nimang seduai ari tanah munyi tu:
“Terebai deras mih seduai,
Baka upas kesulai tandang,
Terebai bapit-apit mih seduai,
Baka sit tandan pisang,
Tau nginda mih seduai baka bekia,
Tau ngindang mih seduai baka lang.”


            Bala jelu ngeringak ngemataka seduai terebai. Lama agi jauh agi ga seduai ngejangka sida. Kenyalang seduai Tekura pan nyau rapas mata dipeda sida. Seduai nyau enda ayan laban lindung remang. Bala jelu meruan nganti seduai pulai baru. Sida keran deka nemu peninggi langit.




LATIH A
Saut tanya di baruh tu ngena ayat penuh.

1.Nama kebuah Badak mai bala jelu baum baru?

2.Sapa ti diasuh Badak nesau bala jelu?

3.Nama kebuah Badak milih Kera seduai Nyumbuh diasuh nesau bala jelu?

4.Nama guna temuku tali?

5.Dini alai bala jelu baum?

6.Sapa ti nyadi pangan Kenyalang ngabas peninggi langit?

7.Kati ku munyi Kenyalang seduai Tekura besaut-saut enggau pangan diri lebuh terebai?


Latih B.
Terangka dulu reti leka jaku di baruh tu. Udah nya gaga ayat.

1.  Beduan

2.  Tesat

3.  Nimbal

4.  Rapas

5.   Ngeriut

6.   Nuduh

7.   Lekat

8.   Manjah

Tampung Ensera Nginsap Danau

Pemintar Tekura

          Menarat agi ringatka diri udah kena akal Tekura, lalu iya enggai ninga jaku pujuk siku nya. Iya meruan ingatka diri udah kena asuh bala jelu bukai munuh tekura.
“Enti tua belaya, tua sama tau pedis. Nuan tau pedis. Aku tau pedis. Bala jelu bukai ketawaka tua,” ku Tekura nganu Menarat.
“Badu nuan agi mujuk aku. Aku enda tau enda munuh nuan nitihka jaku bala jelu bukai,”pia ku Menarat.
“Unggal! Ukai aku takutka ilang nuan nya. Dinga nuan munyi baju dikena kau,” ku Tekura natuk kerubung iya udu agi.
           Menarat, ninga munyi kerubung Tekura amat kering, arapka iya kebal. Menarat lalu nyelitka ilang iya pulai ngagai sarang.
“Unggal, uji dingaka aku nusut penatai tua,” pia ku Tekura.
“Au. Manah mih nya,”pia ku Menarat.
“Nyadi kami Tekura datai ari puri Ra. Pelanduk datai ari purih Ruk. Kijang datai ari purih Rang.                 Badak datai ari purih Rak. Tupai datai ari purih Rai. Mayau datai ari purih Rau. Ukui datai ari purih Rui. Babi datai ari purih Ri. Kita Menarat datai ari purih Rat,” ku Tekura.
“Nya! Peda nuan ripih kitai. Kita ari purih Rat, kami ari purih Ra,” pia ku Tekura. “Menua kitai pan enda bangat jauh ari pangan. Kitai sama tau idup dalam ai, sama mega tau idup di tebing . Kulit nuan tebal lalu kerubung kami kering. Nya alai kitai sama kebal,” pia ku Tekura.
“Nya amat munyi ku tusut nuan,”ku Menarat. “Tang sida bukai ngasuh aku enda tau enda munuh nuan.”
“Es! Sida bukai nya enda saum menua enggau kitai,” pia ku Tekura. “Sida semina idup ba darat.”
“Unggal, nama jalai aku madahka diri udah munuh nuan ngagai Badak?” pia ku tanya Menarat.
“Es! Nadai nya mar dih,”pia ku Tekura. “Legi tua ngunsut ilang nuan enggau darah pinang. Lebuh nuan pulai, pandangka ilang nuan ngagai bala jelu bukai. Padah ngagai sida darah ba ilang nya darah aku, udah dibunuh nuan,” pia ku Tekura mekat Menarat.
             Menarat enggau Tekura lalu pansut ari danau. Seduai lalu ngunsut ilang Menarat enggau darah pinang.Ilang pan tembu unsut, Menarat lalu pulai ngagai bala jelu bukai dalam kampung. Lebuh Menarat datai ba tengah-tengah jelu, dia iya lalu manjung rais-rais. Iya lalu nyintak ilang ari sarang. Bala jelu ngenung meda ilang Menarat nyau mirah chirak-chirak dibalut darah.
“Peda kita ilang aku balut darah! Tekura udah mati dibunuh aku. Taja Tekura beberita kebal, tang mimit pan enda mih iya ngelaban aku,” pia ku Menarat muji diri.
          “Akai rai! Nya baru amat berani. Unggal Menarat tu baru amat patut dipuji,”pia ku Badak. Bala jelu lalu manjung. Sida gaga laban Tekura udah mati.
           Enda lama udah nya, alai bala jelu mulaika diri ngagai palan sida empu. Serantu-rantu jalai sida nanyaka jalai Menarat munuh Tekura. Sekeda sida muji iya, gaga iya udah munuh Tekura. Enda bangat jauh udah sida bejalai, dia Pelanduk lalu ninggalka diri. Iya lalu begigaka buah buan di tisi jalai. Lebuh udah kenyang iya lalu tinduk ba pun kayu. Iya map mua diri enggau daun buan.
            Menarat pan diadang udah jauh ninggalka danau, Tekura lalu niki baru ke tebing. Iya lalu niti jalai ke ditengah bala jelu bukai.
            Hari pan nyau mupuk lemai, dia dih Tekura meda Pelanduk tinduk ba pun kayu. Iya lalu ngerak Pelanduk, Pelanduk ngadang nya jelu bukai, tekenyit lalu dani deka rari. Lebuh iya meda nya Tekura, nya baru ati iya lantang.
“Ni nuan ke udah mati dibunuh Menarat,”ku Pelanduk.
“Enti nitihka gaya pemedis ati bala jelu, udah mati mih aku dibunuh Menarat. Kita ga pintar, bisi akal begulai enggau orang bukai. Kitai ga enda tambap,” ku iya.
“Nama jalai nuan mujuk Menarat ngasuh iya enda nyadi munuh nuan?” pia ku Pelanduk.
“Jaku enda tau enda lembut. Tang taja pia, anang kitai ngayanka penakut diri,” pia ku Tekura.
Enda lama udah nya, alai Tekura seduai Pelanduk lalu mulaika diri ngagai palan seduai empu. Seduai meruan bepangan.
          Di rantau jalai, dia Pelanduk nusi pasal sida ke nginsap ai ba danau. Iya nusui diri numbit burit Badak, awakka danau enda langkang. Tekura gaga bendar meda Pelanduk udah nulung ngidupka iya.

Latih meretika genteran
1. Baka ni gaya Menarat agi ringat Tekura?

2. Nama kebuah Tekura madahka Menarat mega sama kebal?

3. Nama chara Menarat madahka iya udah munuh Tekura?

4. Nama pekara ti ditusi Pelanduk ngagai Tekura?

5. Nama ajar manah ti ulih nuan ari cherita nya tadi?


Latih: Ngaga ayat
1. purih

2. saum

3. ngadang

4. palan

5. langkang

Tampung Ensera Jelu Nubai

ENSERA NGINSAP DANAU
             Nyadi diatu bala jelu tusah ati. Sida nyau nemu diri udah kena akal Pelanduk seduai Tekura. Sida ringat ngagai seduai, laban lebu nadai mai salai ikan pulai ngagai palan diri empu. Salai ikan abis dibai Pelanduk seduai Tekura.
“Pelanduk seduai Tekura tu patut kena bunuh. Seduai udah ngakal semua kitai,” pia ku Badak.
Semua bala jelu lalu ngamatka jaku Badak. Diatu sida ngiga akal dikena munuh Pelanduk seduai Tekura. Nyadi lebuh Tekura ninga jaku bala jelu bukai, iya lalu rari terejun ke dalam danau. Pelanduk lalu belalai ba perigu pun buluh. Dia iya engketut takutka bala jelu deka munuh iya.
               Bala jelu lalu belabuh begigaka Pelanduk seduai Tekura. Lebuh sida datai semak perigu pun buluh ke alai iya belalai, dia Pelanduk lalu numbit pun buluh nya. Nyadi daun buluh, laban layu, lalu labuh sebelah tanah. Tanah ngelingi pun buluh nya luchak. Nya kebuah daun buluh ke labuh lalu bediri baka tukak.
“Anang kitai beguai ngampir. Peda tukak ditan Pelanduk,” pia ku Rusa.
Enda lama udah nya, Pelanduk lalu ngangau: “Mansang mih! Enti kita amat berani munuh aku,”ku iya.
“Enda kami munuh nuan. Enti nuan deka madahka alai Tekura belalai,” pia ku Rusa.
“Au mih,” pia ku Pelanduk. “Aram! Titihka aku.”
         Bala jelu lalu nunda udi Pelanduk. Nyau kelama, nya baru bala sida datai ba danau, alai Tekura belalai.
“Diatu semua kitai bediri berintai-rintai ngelilingi tebing danau. Lebuh aku ngasuh, semua kita lalu belabuh nginsap ai danau tu. Lebuh ai udah langkang, nya baru Tekura ayan, lalu ulih bunuh kitai,” pia ku Badak.
          Bala jelu lalu nginsap ai nya. Lama agi mimit agi ga ai tinggal dalam danau. Pelanduk ngeluluka diri enggau nginsap ai. Iya bediri semak Badak. Nyadi Badak, laban besai agi, mayuh agi ga ai diinsap iya. Burit Badak ditensang enggau libut enggaika ai pansut baru.
           Danau pan nyau deka langkang, belakang Tekura pan ayan. Tudah Tekura belabuh tusah ati, meda bala jelu deka munuh iya.
Enda mukai-mukai, Pelanduk lalu engkechit. Iya tetumbitka libut dikena nensang burit Badak. Ai lalu pansut ngisi danau nya baru.
“Lapa nuan baka nya!” pia ku Badak.
“Eh, aku ga engkechit deka mantap Tekura. Tang enda mukai-mukai kaki aku kena kait randau lalu tetumbitka burit nuan,”pia ku Pelanduk.
“Anang ibuh ke nya. Insap baru ai tu ulih kitai. Gaga Tekura nya idup udah ngakal kitai,”pia ku bala jelu.
          Bala jelu lalu berengkah baru nginsap ai danau nya. Pelanduk ngeluluka diri nginsap ai. Iya bediri semak Badak.
Enda lama udah nya, ai danau nyau langkang baru. Peda belakang Tekura lalu ayan baru.
“Bah! Tangkap Tekura nya ulih kitai,” pia ku Rusa.
Pelanduk lalu engkechit, kaki iya dikait randau baru kenu ku iya. Iya lalu tetumbitka libut tensang burit Badak. Nyah! Ai lalu tebubuh ari burit Badak. Danau lalu penuh baru. Tudah Tekura lalu enda ulih tangkap sida.
“Salah tu!Enti baka tu enda ai danau tu ulih insap kitai. Manah Menarat nya asuh nyelam Tekura. Iya betah agi nyelam ari kitai bukai,”pia ku Badak. Semu jelu bukai nurutka penemu Badak.
Menarat lalu terejun ke dalam danau. Iya nangkin ilang sebilah. Iya deka munuh Tekura.
           Lebuh Menarat datai semak Tekura, dia dilah iya lalu kelur-kelur. Tekura nemu Menarat deka munuh iya. Iya lalu ngeluluka diri mati. Iya enda kebut-kebut. Menarat udah nyintak ilang iya. Enda ga iya berani lalu mantap Tekura. Iya nemu Tekura kebal. Iya semina ngamang aia. Amang Menarat sekali, enda ga iya berani mantap.
“Lalu Unggal, duduk,”ku Tekura.
          Menarat laban endang agi ringat, enda bejaku manah nyaut Tekura. “Au, enda diasuh nuan lalu, pan lalu ga aku. Enda diasuh nuan duduk, duduk ga aku. Aku endang datai deka munuh nuan,” pia ku Menarat.
“Anang bangat beguai mih unggal,”pia ku Tekura nyaut. “Dulu makai pinang, nya baru tua bebunuh,” pia ku Tekura.
          Menarat enda nyaut Tekura. Mata iya merening Tekura. Dilah iya kelur-kelur. Iya enggai makai pinang diberi Tekura. Tekura lalu ngerayap semak agi ngagai Menarat. “Nama kebuah tua bebunuh ngelaban diri sebilik, diri sekaban. Nama laya tua? Enti aku bisi penyalah, kita tau ngaduka iya. Ukai aku takutka nuan, tang enggaika tua bisi bebadi ngapa. Seput enda ulih ganti ngena tajau dua, tajau tiga. Enti nuan mati, sapa ngidupka bini anak nuan? Aku tu kebal, unggal,” pia ku Tekura, natuk kerubung diri, lalu ngujungka jaku iya enggau Menarat.

Latih A
1. Nama kebuah bala jelu tusah ati?

2. Nama penyadi sida ti nginsap ai danau nya?

3. Lapa Menarat enda berani mantap Tekura?

4.Nama ajar manah ari ensera nya tadi?


Latih B;
Beri reti leka jaku di baruh tu:
1.Langkang

2. tebubuh

3. nyintak

4. ngerayap

5. natuk

ENSERA JELU NUBAI- Tusun Keenam

JELU NUBAI- Tusun Enam (Pulai Nubai)

           Rerak tawas pagi siti, dia Badak lalu ngelumuka semua jelu. Iya ngasuh sida nugungka salai ikan ba mua langkau.
“Bakani jalai kitai bedua ikan tu dih?” pia ku Kijang nanya Badak.
“Mit kelikit, besai kelikai. Mit tubuh mimit ga untung. Besai tubuh mayuh agi ga untung,” pia ku Badak.
          Bala jelu ke besai lantang ati. Sida ke mit enda tentu lantang ninga gaya pedua Badak. Sida enda berani bejaku. Pelanduk seduai Tekura laban ngasaika diri udah munuh Antu Raya, ngadang diri bulih untung dua. Tang seduai enda berani mantah Badak, semina tak tuchum malik ngagai pangan diri.
            Badak lalu bedua salai ikan. Bala jelu pan lalu ngambi untung diri. Sida nyimpan salai ikan dalam ma diri empu. Lebuh udah kemas, sida nurun ke pengkalan. Diatu bala jelu mupuk mulaika diri mudik Sungai Kara. Bisi sida diau di Emperan Aping. Sida bukai diau ba Bukit Aping, sama besemak dia.
           Sekumbang di rantau ai, dia bala jelu tinduk magang. Sida natka perau ditabanka ribut. Sida belayar, ukai bekayuh. Semina Pelanduk ngemudi, lalu Tekura ngeluanka perau sida. Seduai enda tinduk. Seduai lalu ngiga akal. Seduai ringat laban bala jelu ke besai ngakal seduai bedua salai ikan.
“Uji ambi tisik ikan, lalu tampal ba mata semua sida ke tinduk. Lebuh udah kemas, nuan lalu megauka sida. Padahka munsuh data deka ngalahka kitai,” pia ku Tekura.
Pelanduk lalu ngumpul tisik ikan. Lebuh sida semak nanga Sungai Batu, dia Pelanduk lalu megau bala jelu bukai.
            “Angkat! Dani! Munsuh ngalahka kitai” pia ku Pelanduk.
Bala jelu, laban jenak tinduk, tekenyit lalu ensugau angkat kin-kitu. Sida enda nemu tunga rari. Perau sida singit lalu nyau deka karam. Bala jelu terejun ke dalam ai. Sida nguji ngidupka diri. Mata sida enda meda laban udah ditampal Pelanduk enggau tisik ikan.
Pelanduk seduai Tekura mega sama terejun ke ai. Laban seduai betah nyelam, nya alai seduai enda lemas. Sekeda bala jelu bukai mati lemas. Barang sida tau nyemerai, mata sida ga enda meda utai. Nya mih ngasuh sida tasah lalu niki di tebing sebarang endur.
            Udah bala jelu bukai ditemu seduai tasah, dia Pelanduk seduai Tekura niki baru ngagai perau sida.
“Pagi tadi sida ngakal tua bedua salai. Diatu semua salai pulai ngagai tua magang,” ku Pelanduk nganu Tekura.
             Pelanduk seduai Tekura lalu mudik ngagai ulu Sungai Aping. Dia seduai lalu ninggalka perau. Seduai lalu pulai ngagai bala diri empu di Emperan Aping, gaga ati ngema salai ikan ulih nubai.

Saut tanya di baruh tu:

Latih A
1.Ni maya jelu bedua ikan?

2.Nama saut Badak enggau Kijang pasal jalai bedua salai ikan?

3.Nama kebuah Pelanduk seduai enda lantang ati?

4.Nama kebuah bala jelu terejun ke ai?


5.Nama reti “mit kelikit, besai kelikai” nitihka pedua Badak?

6.Kini ke tunga Pelanduk seduai Tekura mulaika diri?

7.Nama ajar ti manah ari ensera nya tadi?


Latih B.
Tukar ayat sebut ngagai ayat tusui.

1.“Bakani jalai kitai bedua ikan tu dih?”tanya Kijang ngagai Badak.


2.“Uji ambi tisik ikan lalu tampal ba mata semua sida ke tinduk,” pia ku Tekura mekat Pelanduk.

3.“Angkat! Dani! Munsuh ngalahka kitai” Pelanduk nyerauh ngagai semua jelu.


Latih C
Terangka reti leka jaku. Udah nya ngaga ayat ti gramatis.

1.Bedua

2.Ngadang


3.Belayar


4.Ngemudi


5. Singit

6.Terejun

ENSERA JELU NUBAI- Tusun Kelima

Jelu Nubai-Tusun Kelima

        Burung pan baru didinga bemunyi madahka hari tawas, dia Badak lalu ngerak bala jelu.
“Dani semua bala kitai. Tawas hari tu,” ku Badak. Bala jelu lalu dani, sida lalu bekemas. Sida nyimpan tubai dalam ma diri. Udah kemas makai, dia bala jelu lalu nurun ke pengkalan. Sida nepan perau diri. Sida lalu mupuk mudik Sungai Kara. Sida mansang ngagai Sungai Batu, alai sida deka nubai.
        Lebuh datai di ulu Sungai Batu, dia Badak lalu ngasuh sida mupuk malu tubai. Iya ngasuh Gajah ngelalin buba, Kijang ngelalin ensenga. Lebuh udah tembu, dia Gajah nan bubu iya ba Nanga Bila Tiga. Kijang nampunka ensenga iya ba Rantau Empit. Bala jelu bukai pan lalu nyiuhka tubai sida.
Sungai Batu endang enda kala ditubai. Enda lama udah tubai disiuh, peda bala ikan pan ngabul. Badak lalu ngauk siku, lalu dibuai iya ke antu rua, antu rangka:

“Oh! Kita Antu Rua, Antu Rangka!
Kitai tu udah bebagi,
Tu ikan untung kita,
Iya ke agi nya untung kami,”
Pia ku sampi Badak.

          Badak lalu ngasuh bala jelu mupuk beribun. Sida bekayuh ke ili, nitihka ai tubai. Gajah nyaga bubu. Kijang duduk dedugau semak tampun ensenga iya.
Sehari nya Pelanduk seduai Tekura ngibun salai ikan sida. Seduai bejalai ari para siti ngagai para siti
Kira tengan niki mata panas, dia Pelanduk seduai Tekura lalu ninga gu utai. Munyi utai nya tunga Bukit Pentik.
“Kada enda Antu Raya ke bemunyi nya. Tua anang rari enggaika salai ikan kitai abis diempa iya,” pia ku Pelanduk
“Au mih,” pia ku Tekura
Lama agi, inggar agi ga munyi jaku.
“Tum ketumba!
Indai Ragum nadai dia!
Nyau nubai Sungai Kara!
Bulih undang empa mata!
Ni asai salai seduai uchu?

Tum ketumba!
Indai Ragum nadai dia!
Iya ke besai aku empa!
Iya ke mit aku ma!
Ni asai salai seduai, uchu?”

       Enda lama udah nya, Antu Raya lalu ayan ba puting langkau sida. “Lalu aki! Lalu niki ngagai langkau kami,”pia ku Pelanduk.
Antu Raya lalu nudukka diri ba tanah. Langkau bala jelu mit sereta baruh. Iya besai sereta tinggi. Langkau enda umbas alai iya tama.
“Mua mih pemanah bau salai ikan kita dih, uchu. Nyau bau rengut,” ku Antu Raya.
“Belelak dulu, aki. Nuan tentu ikak udah bejalai,” pia ku saut Pelanduk.
         Nyadi Tekura ngeringak melah rutan. Pelanduk ngeraut pasak.
“Nama guna seduai rutan enggau pasak nya dih uchu?” ku Antu Raya.
“Kenu ku jerita Anak Mensia, madahka langit deka runtuh. Nyadi kami dua sambi Tekura tu ngaga pakau kena nudung pala diri empu. Barang tinggi agi tubuh, nya dulu ditinggang langit runtuh,”pia ku Pelanduk.
“Oh! Enti munyi nya pala aku dulu pakau seduai, uchu,”pia ku Antu Raya.
“Kada nuan nakal natka pantang pasak dih aki?” pia ku Pelanduk.
“Nadai ku enggau iya mih uchu. Tak tatka mih. Anang ga mati ditinggang langit runtuh,” ku Antu Raya.
          Pakau pan udah ga tembu kelalin, Pelanduk lalu ngasuh Antu Raya gali telentang. Tekura masukka pakau. Pelanduk megai pemalu. Iya lalu pasak ngagai pala Antu Raya.
“Akai, uchu! Akai! Anang bengat udu malu, uchu,”pia ku Antu Raya.
“Tatka aki! Lama agi nyamai agi. Endang asai pasak baru negu kulit pala,”pia ku Pelanduk.
         Tekura ngenanka pasak lebuh Pelanduk malu. Udah siti laput, pasak bukai ga dipantang seduai. Antu Raya nyau rauh-rauh. Nyadi pasak, laban panjai, nyau kebus ngagai tanah. Nya ngasuh Antu Raya enda ulih angkat agi.
         Diatu pala Antu Raya nyau pechah, seduai nanchang kaki jari iya enggau rutan. Antu Raya nyau dedemuh. Lama agi, pandak agi ga sintak seput iya. Enda lama udah nya, iya lalu mati. Bangkai iya laban besai sereta tinggi, nyau bejur-jur ba mua langkau bala jelu.
        Diatu mata panas baru padam. Badak mai bala jelu mupuk mulaika diri. Sida richah laban gaga meda ikan ulih nubai sehari nya.
        Lebuh sida datai semak langkau, dia sida tekenyit meda Antu Raya tak gali bejur-jur. Sida nyengau ari jauh. Kera niki puchuk kayu lalu ngangau.
“Tu mih Antu Raya dikerarika kami duai Nyumbuh,” pia ku iya.
“Amat iya nya! Parai kitai tu dempa iya nya lagi,” pia ku Rusa.
       Pelanduk seduai Tekura lalu pansut ari langkau. Seduai madahka Antu Raya udah mati.
Jelu bukai gaga bendar ati meda Antu Raya udah mati. Diatu bala jelu mupuk mela ikan. Laluh empa disalai sida. Salai pan mansau, hari pan nyau semak tengah malam, dia sida lalu nindukka diri.



Latih Meretika Genteran
Saut tanya di baruh tu:


1. Ni maya Badak ngerak bala jelu?


2. Dini alai bala jelu nubai sekali tu?


3. Sapa diasuh Badak ngaga bubu enggau ensenga?


4. Dini endur Gajah ngenanka bubu?

5. Dini alai Kijang nampunka ensenga?

6. Nama leka sampi Badak lebuh meri Antu Rua?

7. Sapa nyaga langkau sehari nya?

8. Nama kebuah Pelanduk seduai Tekura ngaga pasak?

9. Nama penyadi Antu Raya ti deka makai salai ikan nya?

ENSERA JELU NUBAI- Tusun Keempat

JELU NUBAI- Tusun Keempat

        Tumu-tumu pagi nya, Badak ngelumuka semua bala jelu baru. “Seharitu aku nyaga langkau enggau salai ikan kitai. Semua kita bukai nitihka Gajah nubai baru. Serak tu kita malu tubai ba Ulu Sungai Rian,” pia ku Badak.
        Lebuh udah makai pagi, dia sida lalu nurun ngagai Ulu Sungai Rian. Di rantu jalai, sida ngenang pasal Antu Raya ke beduan sida. “Mua mih enti Badak tak takutka Antu Raya baka sida ke udah. Lebu mih kitai tu nubai!” pia ku Gajah.
           Lebuh sida datai di Ulu Sungai Rian, bala jelu lalu belabuh malu tubai. Serak tu sida enda ngena perau. Sida bedarat ari palan ngagai endur nya. Gajah ngasuh Rusa ngaga ensenga. Lebuh udah tembu, Gajah lalu ngasuh Pelanduk seduai Tekura nan bubu ba nanga Bila Dua. Gajah ngasuh Ringin seduai Kijang nampunka ensenga ba Rantau Lensat.
             Diatu tubai pen udah kemas dipalu bala jelu. Sida lalu nyiuhka ai tubai. Enda lama udah, bala ikan pan ngabul. Gajah lalu nyampi munyi tu:

“Oh! Kita Antu Rua, Antu Rangka,
 Kita udah diberi,
 Dibagika kami ikan.
 Nya ikan untung kita,
 Iya ke agi tu, untung kami”

            Gajah lalu ngasuh bala jelu mupuk beribun. Sida lalu bebagi tubuh. Sekeda ari tebing kanan. Rusa nguluka bala ari tebing kiba. Barang sida tau nyelam beribun kulu-kili.
             Sehari nya, Badak ngibun langkau enggau salai ikan sida. Kira baru udah ngalih hari, dia iya ninga gu utai tunga Bukit Pentik. “Kada enda nya Antu Raya,” pia ku ati iya.
Lama agi semak agi ga munyi serap utai nya. Badak lalu belalai dalam madang resam ba puting langkau sida. Enda lama udah nya iya lalu ninga nyawa orang bejaku:

“Tum ketumba!
Indai Ragum nadai dia!
Nyau nubai Sungai Kara!
Bulih undang empa mata!
Ni asai salai uchu?

Tum ketumba!
Indai Ragum nadai dia!
Iya ke tuai aku empa!
Iya ke biak aku ma!
Ni asai salai uchu?

                 Badak begadai-gadai nilik. Dia iya meda Antu Raya bediri semak para salai. Antu Raya bediri lalu makai salai ikan. Abis ba para siti, iya lalu ngagai para siti. Badak enda berani ngerara Antu Raya. Iya takutka Antu Raya nya nelan iya.
              Lebuh salai udah abis, nya baru Antu Raya mulaika diri. Iya nengah jalai iya ke mansang tadi, nuju ngagai Bukit Pentik. Badak meruan belalai. Iya takutka antu nya nikal baru.
Hari pan nyau lemai. Ikan pan nadai tentu agi ayan. Gajah lalu ngasuh Pelanduk seduai Tekura ngabas bubu. Iya mega ngasuh Kijang seduai Ringin ngabas ensenga. Iya ngasuh bala jelu bukai besikap mulai kediri. Ikan ulih buba Pelanduk seduai Tekura nyau deka enda ulih ma seduai laban kelalu mayuh. Pia mega ikan ulih ensenga Kijang seduai Ringin mayuh bendar. Semina ikan besai dibai seduai pulai. Lebuh semua udah kemas, dia Gajah lalu mai sida pulai ke langkau.
            Bala jelu rami nengah jalai. Sida gaga meda diri bulih sehari nya.
“Oh! Kini tunga Badak?” pia ku Gajah.
“Kerah! Lapa para tak puan?” pia Kera
“Kini tunga salai ikan kitai?” pia ku Rusa.

            Nyau kelama, nya baru Badak mansutka diri. Iya lalu madahka pasal Antu Raya ke makai salai ikan sida. “Pama ga pemerani aku ngelamatu. Tang lebuh aku meda pemesai Antu Raya, aku enda berani nganu iya. Pemesai ngeli iya umbas ngasuh takut,”pia ku Badak.
“Eh! Awakka kami duai Tekura ngibun langkau pegila” pia ku Pelanduk. “Au mih,” pia ku Tekura nurutka jaku Pelanduk.
              Bala jelu lalu belabuh mela ikan sida. Udah sida badu makai, sida lalu mupuk nyalai ikan. Lebuh salai nyau mansau, sida lalu nindukka diri.
“Pegila kitai nurun nubai baru. Sekali tu kitai malu ke ulu Sungai Batu,” pia ku Badak.
           Udah lepas nya, bala jelu pulai ngagai palan diri empu.




Latih A
1.Sapa ti ngelumu bala jelu tumu-tumu pagi?

2.Sapa ti nguluka bala jelu nubai sekalitu?


3.Dini alai sida nubai?


4.Nama chara sida ngagai ulu Sungai Rian?


5.Sapa diasuh Gajah ngaga ensenga?


6.Nama sampi Gajah lebuh iya meri antu rangka, antu rua makai?

7.Sapa tinggal ngibun langkau sehari nya?

Latih B.
Terangka reti leka jaku di baruh tu. Udah nya, lalu gaga ayat.

1.Lebu


2.Nampun


3.Puting


4.Ngerara


5.Palan

ENSERA JELU NUBAI- Tusun Ketiga

JELU NUBAI-Tusun Ketiga

         Taja ikan udah mayuh ulih bala jelu, sida agi deka nambahka salai sida. Pagi hari ketiga, dia bala jelu tumu dani tinduk. Badak ngasuh sida makai dulu enggaika lapar lebuh beribun. Lebuh sida udah kemas nyikap diri, dia bala jelu pan nurun ngagai sungai ke alai sida deka nubai. Sekali tu, sida nubai pati Sungai Kara, iya nya Sungai Isu. Sungai nya ari ulu Rantau Mirah Mata ke alai sida nubai hari keterubah.
         Sungai tu enda berapa besai, tang gaya ai baka ke mayuh ikan,” pia ku Badak bejaku enggau bala jelu bukai. Sida lalu malu tubai dia.Pia mega, lebuh ai tubai udah disiuh, dia ikan pan bisi mega dipeda ngabul, mabuk tubai. Bala jelu agi nganti Badak udah meri antu rua makai ikan, nya baru beribun. Enda lama udah nya, Badak lalu ngauk ikan siku, nya dibuai iya ke enselua, antu rua antu rangka.
            Diatu bala jelu bekayuh kulu, kili nitihka ikan. Tekura nyelam kin-kitu ngiga ikan dalam ai. Jelu Ringin laban nyelam bulih amat ikan mit. Rusa, laban nadai perau ngundan iya, nya alai iya bedarat, nebing sungai. Taja iya lubah, tang iya bulih ikan besai ditumbuk iya enggau gansai.
            Nyadi sehari nya, Kera enggau Nyumbuh ngintu langkau enggau salai ikan sida. Seduai udah madah ngagai jelu bukai malam siti, seduai enda rari enti Antu Raya bisi datai ngagai langkau sida.
          Kira udah ngalih hari udah seduai makai, dia Kera seduai Nyumbuh lalu ninga nyawa utai. Munyi nyawa agi jauh, tang mansang semak berari.
“Kada enda nya munyi Antu Raya ti ku Rusa seduai Babi,”pia ku Kera bejaku enggau Nyumbuh.
Kera seduai Nyumbuh lalu niki ngagai puchuk tapang. Seduai nilik kin kitu. Munyi nyawa nyau mansang semak. Jaku pan nyau didinga. Kera seduai Nyumbuh lalu belalai ba puchuk tapang. Baka tu munyi jaku Antu Raya didinga seduai:

Tum ketumba!
Indai Ragum nadai dia!
Nyau nubai Sungai Kara!
Bulih undang empa mata!
Ni asai salai, uchu!

Tum ketumba!
Indai Ragum nadai dia!
Iya ke tuai aku empa!
Iya ke biak aku ma!
Ni asai salai, uchu!

                Lebuh Kera seduai Nyumbuh nilik, dia dih seduai meda Antu Raya. “Kerah,”ku Kera nelai Nyumbuh. “Tu mih Antu Raya ku Rusa seduai Babi.” Peninggi Antu Raya amat nyau deka nyentuk ngagai dan tapang ke alai seduai belalai. Antu Raya majak kediri semak agi. Ninga utai bukai nadai bemunyi, dia iya lalu makai semua salai ikan bala jelu. Kera seduai Nyumbuh lalu enda berani nurun ari puchuk tapang.
             Hari pan nyau mupuk petang, ikan udah ga mayuh ulih, dia Badak lalu ngasuh bala jelu mupuk mulaika diri. Sida lalu berangkutka ikan ngagai langkau sida. Lebuh datai dia, sida nadai meda Kera seduai Nyumbuh. Sida ngangauka seduai, tang nadai ga nyaut. Rusa seduai Babi lalu ngabas salai ikan, tang siku pan nadai ga ikan agi ditemu tinggal di atas para. Nyau kelama, nya baru Kera seduai Nyumbuh nurun ari puchuk tapang. Seduai lalu nusui Antu Raya ke datai lalu makai semua salai ikan sida.
“Kerah!” ku Kera. “Amat besai Antu Raya. Sapa berani meda utai mesai nya. Kami duai Nyumbuh lalu enda kebut-kebut meda iya ngulam ikan kitai,” pia ku Kera.
“Sapa berani ngerara Antu Raya makai salai. Tak semua ikan ba para siti abis sekali iya mapa ngagai nyawa. Enti kami duai sema kada nya umbas telan iya sekali,” pia ku Nyumbuh.
“Enti kita ke biak nya takut ngintu langkau kitai, awakka aku kediri tinggal pegila. Semua kita nurun nubai magang. Nadai utai dibai pulai, enti salai udah abis. Pegila Gajah nguluka kita nubai,” pia ku Badak.
             Bala jelu lalu mela diri makai. Udah nya, sida lalu mupuk nyalai ikan. Nyau jauh malam, nya baru sida nindukka diri.


Latih A

1. Nama kebuah Badak ngasuh sida makai?


2.Kini tunga sida nubai sehari nya?


3. Nama penyadi ikan udah disiuhka ai tubai?


4. Nama kebuah Rusa bedarat nebing sungai?


5. Baka ni chara Kera seduai Nyumbuh meda Antu Raya?


6. Sapa nganti Badak nyadi tuai sida ti deka nubai hari siti?


Latih B.
Giga reti leka jaku di baruh tu.

1. Nyikap


2. Ngabul


3. Nelai


4. Ngulam


5. Umbas

ENSERA JELU NUBAI- Tusun Kedua

JELU NUBAI- Tusun Kedua
             Sehari-hari nya bala jelu beribunka ikan. Kera nyau kerah-kerah gaga meda ikan mayuh ulih diri. Pelanduk laban tau nyelam bulih agi ikan ari jelu bukai. Perau sida sarat laban ikan.
            Hari pan nyau lemai, dia Badak lalu mai sida mulaika diri. Lebuh datai di tebing, bala jelu lalu ngangkut ikakun ngagai langkau sida. Lebuh bala jelu datai ba langkau, sida nadai meda Rusa seduai Babi agi dia. Sida mega nemu salai ikan di atas para nyau abis nadai tinggal siku agi.
          “Mua mih pengerugi kitai. Pegila kitai enda tau enda nurun nubai baru,” pia ku Badak.
Bala jelu, sekeda mela ikan ke lauk lemai nya, lalu sida bukai mupuk nyalai ikan. Enda lama udah nya Rusa seduai Babi lalu mansutka diri. Seduai ngelalaika diri dalam babas semak langkau sida. Bala jelu bukai enda ibuhka seduai. Sida ringat meda salai ikan nadai agi di atas para.
          “Nama kebuah seduai ninggalka langkau kitai? Peda semua salai udah abis dichuri orang!” pia ku Badak nganu Rusa seduai Babi.
          “Uji nuan Babi ngangauka semua jelu bukai ngasuh sida datai kitu, awakka sida ampit berita tu,” pia ku Badak nganu Rusa seduai Babi.
           Babi lalu ngasuh semua jelu bukai ngasuh sida datai kia. Lebuh bala jelu udah sampal datai, dia Rusa seduai Babi madahka pasal Antu Raya ke datai ngagai langkau sida.
         “Kami duai Babi amat takut ke Antu Raya. Bulu Antu Raya panjai ari bulu kami duai. Tubuh iya tinggi baka puchuk tapang. Mata iya mirah chinang-chinang. Pala iya bulih mesai tibang. Salai ikan abis diempa iya tinggal kami duai rari.”
        “Enti tubuh Antu Raya amat ninggi puchuk tapang, awakka kami duai Nyumbuh ngibun langkau kitai pegila. Enti Antu Raya datai, kami duai lalu niki ngagai pala iya,”pia ku Kera.
         Nyumbuh pan deka ga nurutka jaku Kera. Badak lalu ngasuh sida pulai ngagai langkau diri. Bala jelu, laban diatu nyau jauh malam tambah ga lelak, lalu nindukka diri. Badak lalu ngasuh sida tumu dani, awakka tumu ga nurun nubai baru.
(diambi sereta dibali ari Micheal Buma, Borneo Literature Bureau, 1970)

A. Saut tanya di baruh tu ngena ayat penuh.

1.Sapa kerah-kerah gagaka diri bulih ikan?


2.Sapa bulih agi ikan ari semua jelu bukai?


3.Nama kebuah Pelanduk bulih agi ikan?


4.Nama utai terubah ditemu bala jelu lebuh sida datai di langkau?


5. Nama kebuah jelu ringat?


6.Dini alai Rusa seduai Babi belalai?


7.Nama kebuah seduai belalai?


8.Sapa makai salai ikan bala jelu?


9.Kati Rusa seduai Babi berani ke Antu Raya?


10.Ni peninggi Antu Raya dipeda seduai?


11.Ni gamal mata Antu Raya ku Rusa seduai Babi?

12.Ni pemesai pala Antu Raya dipeda seduai?

13.Nama jaku Kera nyaut Rusa seduai Babi?

14.Sapa dibai Kera ngibun salai hari siti?

15.Kati Nyumbuh deka enggau Kera ngibun salai?



Giga leka jaku ti sama reti:
1.Sarat


2.Ampit


3.Ringat


4.Nubai


5.Ngibun


6.Tibang


7.Nurut


8. mela

Latih Meretika Teks Bahasa Iban Pom 5

Meretika Teks

Tanya 1 ngagai 7
Bacha enggau silik genteran teks tu. Udah nya saut semua tanya ti nangkanka nya.

“Sapa nemu kini tunga Jelawai? Nama iya lalu enda datai sekula?” ku pengajar Jalin nanya sida Jelawai sekelas.
“Aku udah ngelawa rumah iya tang nadai iya ba rumah. Ketegal malu nanya orang bukai aku enda nemu kini penunga iya pengajar. Menyadi iya bisi ba rumah tang iya enda nyaut lebuh aku nanya iya. Engka malu kini.” Saut Chemenda madah ngagai pengajar Jalin.
Udah lebih seminggu Jelawai diau ba sepital nguan indai iya ti lalu bedau ngeleda taja pan seput iya agi bisi. Taja diau ba sepital, Jelawai enda ngelengkaka pengawa sekula iya. Iya belajar kediri sambil ke ngibun indai iya.
“Chemenda, betul rumah ke dilawa tua tu? Anang aja tu ukai rumah sida Jelawai?”ku pengajar Jalin irau ati.
“Betul mih tu pengajar. Aku suah kitu enggau Jelawai,” saut Chemenda
“Nyin menyadi Jelawai dih pengajar. Aram tua ngelawa iya.” Ku Chemenda nunjuk ke menyadi menyadi Jelawai.
Chemenda enggau Pengajar Jalin beguai-guai ngelawa menyadi Jelawai iya nya James laban nangika iya ngelari kediri lagi. Menyadi Jelawai sigi enda entu deka bebakih enggau orang ke enda dikelala iya laban selalu ninga cherita pasal apai nyamun ari aya Jimmy. Aya Jimmy tu suah meri seduai Jelawai belanja lebuh ti bisi rembus ke rumah sida.
James bejalai enda berumban laban iya irau ati meda orang ke enda dikelala iya baka Chemenda enggau pengajar Jalin. Taja pan Chemenda suah ngagai rumah sida, James tetap enda ngelala Chemenda laban iya suah nadai ba rumah lebuh maya Chemenda enggau Jelawai pulai ke rumah.
“Nama utai?” ku James bejaku seleka dua aja.
“Kini tunga Jelawai nadai sekula?” ku Chemenda ngepunka cherita.
James lalu enda mansutka leka jaku tang ai mata iya nerutu naya. Chemenda enggau pengajar Jalin tegepang ati meda James nyabak tekala nya laban baka ke seduai iya nganu James.
“Nama ga nuan nyabak James?”ku pengajar Jalin lalu murus belakang James.
“Jelawai ba sepital.”Saut James.
“Nama! Nama penyakit iya?”ku Chemenda tekenyit ninga utai ti dipadah James.
“Ukai iya sakit. Indai kami sakit. Lalu empai ngeleda sampai diatu. Nya mih kebuah Jelawai enda nurun sekula. Iya ngibun indai ba sepital din.”Saut James.
“Riman tulang belakang iya. Nganti maya deka beputung mih iya.”ku James tusah ati.
“Aram mih pengajar. Enda nyamai ati aku tu. Kasih ku ninga berita nya.” Ku Chemenda. “Enti pia, mupuk kami duai, James. Nyaga diri manah nuan,”ku pengajar Jalin ngagai James.
“Mupuk, au.” Ku Chemenda enggai enda.



Tanya 1 ngagai 5
Ba siti-siti tanya empat iti pilih saut A, B, C enggau D. Pilih siti saut ti betul nitihka lebas tanya nya.

1 Sapa ti enggau Jelawai serumah?
A Indai iya, madi iya James enggau Chemenda.
B Aya Jimmy, indai iya enggau James.
C Indai iya enggau aya Jimmy.
D Indai iya enggau madi iya James
2 Nama reti apai nyamun?
A Orang ti enda dikelala sereta deka mai bebakih
B Orang ti dikelala sereta bisi niat ti enda manah
C Orang ti jarang dipeda sereta suah meri duit
D Orang ti suah dipeda tang deka nulung

3 Padahka kebuah James nyabak?
A Meda orang ti enda dikelala ngangauka iya
B Indai iya enggau Jelawai ba sepital
C Indai iya sakit sereta empai ngeleda
D Kasihka diri diau siku aja di rumah

4 Nama sempama ti ulih nipakka ulah Jelawai ti ditinggang penusah indai iya sakit lalu iya enda             teputar diri ngujungka iya enda besekula.
A Enda tau muai empeleman ba mata diri empu.
B Liur ke diludah enda ulih ditelan agi.
C Arang abis besi enda bepijar.
D Nganti sungai enda beulu.

5 Siti di baruh tu ukai nyerita pasal Chemenda enggau Jelawai?
A Chemenda enggau Jelawai sama sekula.
B Chemenda enggau Jelawai diau ba rumah panjai ti sama
C Pengajar Jalin bisi ngajar Chemenda enggau Jelawai.
D Seduai endang bebakih amat.

Tanya 6 ngagai 8
Saut tanya di baruh tu ngena ayat penuh.

6 Nama kebuah pengajar Jalin ngiga tunga Jelawai?

7 Nama perangai manah ti ulih diambi ari Chemenda nya?

8     Ba penemu nuan, patut tauka enda Jelawai terus nyaga indai iya ba sepital?Nama kebuah nuan
       madah baka nya?