Sistem Jaku Iban (TANDA SEKANG)

Sistem Jaku Iban

Tanda sekang (-)

1. Dalam sistem jaku Iban, tanda sekang semina dikena ba:

a) Jaku betandu

Jaku Betandu	Urat jaku	Chunto
Jaku betandu penuh	chegit	Chegit-chegit
	Kayo	Kayo-kayo
Jaku betandu bepenambah ba pun	tundi	Betundi-tundi
	pangku	Bepangku-pangku
Jaku betandu bepenambah ba tengah	mimit	Mimit-semimit
	tinggi	Tinggi-setinggi
Jaku turu betandu	Tukang guntin	Tukang-tukang guntin
	Pengajar Matematik	Pengajar-pengajar Matematik

 b) Leka jaku ti betawing enggau lumur ordinal

              Ke-15

Ke-200

Ke-4000

c) Jaku nama tetap ti diberi penambah pun

Se-Malaysia

Pro-ASEAN

Penyalah ti suah nyadi

1.Sida serumah sama sampal tuai-biak besembiang Hari Minggu ba gerija nya.(salah)

   Sida serumah sama sampal tuai biak besembiang Hari Minggu ba gerija nya. (betul)

2.Anak iya terang terang dulu ngepunka laya tang agi mih indai iya enda ngaku nya. (salah)

  Anak iya terang-terang dulu ngepunka laya tang agi mih indai iiya enda ngaku nya. (betul)

3.Iya bulih lumur ke 16 ba pekit belagu lagu Iban ti diatur Gerempung Jaku Iban SMK Selumpung Kayu. (salah)

  Iya bulih lumur ke-16 ba pekit belagu lagu Iban ti diatur Gerempung Jaku Iban SMK Selumpung Kayu. (betul)

4.Tukang jaga-tukang jaga udah diberi baju baru dikena nganti baju ti udah lama nya. (salah)

  Tukang-tukang jaga udah diberi baju baru dikena nganti baju ti udah lama nya. (betul)

Latih

Pilih ayat ti betul sereta engkeman

1	I	Iya benung berandau enggau kaban-belayan ti baru datai ari Johor.
	II	Tuai rumah Empina nguluka apai-indai  ba  rumah  panjai nya  betemu  enggau   pengajar  Layang.
	III	Bup ke 20 ti ditulis iya deka dijual ba kedai bup belabuh Hari Satu tu ila.
	IV	Kami sekelas sama bela beguai-guai nuju bilik pengajar Salang.
	A	I enggau II
	B	II enggau III
	C	III enggau IV
	D	I enggau IV
		Saut: D

2	I	Kitai patut bekereja-sama enggau diri serumah ngambika
	II	Tuai-tuai rumah  kemaya hari  tu patut  ngembuan  pengelandik  ngena  komputer.
	III	Kelima-lima  menyadi  iya udah mujur     ba pelajar sekula.
	IV	Sida-sida  sekelas  sama nganti penatai pengajar Usup.
	A	I enggau II
	B	II enggau III
	C	III enggau IV
	D	I enggau IV
		Saut: B

3	I	Kasut-kasut sekula ba kedai nya besai-besai magang.
	II	Beg-beg sekula nya diengkah ba tisi pintu.
	III	Kami sebuat belanda-landa  nuju  buding  laban  hari  deka  ujan.
	IV	Iya nyadi orang ke-521  ti nerima  pemeri  penyampau   seratus ringgit nya.
	A	I, II enggau III
	B	I, II enggau IV
	C	I, III enggau IV
	D	II, III enggau IV
		Saut: D

Karang Kedut (2.0)
Bacha enggau silik teks di baruh tu. Udah nya tulis karang kedut enda tau lebih ari 100 leka jaku.


             Malaysia nguna mayuh macham chara dikena nagang aktiviti gian dadah. Dadah tu nyadi munsuh lumur satu ba menua Malaysia. Kemaya hari tu, dadah tu mih kebuah nembiak ba menua tu nyau lesi laya sulai. Laban ti kelalu gian, telebih dadah ngujungka sida parai. Bisi mega madahka orang ti gian dadah tu disemaka baka bangkai ti agi enseput. Pekara ti nyadi tu mandangka nembiak kemaya hari mudah amat tepalit enggau pengawa ti enda menyana baka nginsap dadah.

            Orang gian dadah majak mayuh-semayuh ninting taun. Enggau nya, perintah Malaysia udah netapka dadah tu nyadi munsuh lumur satu. Tu ngambika semua ulih besaup ngelaban munsuh lumur satu tu. Perintah mega ngeletakka ukum mati ngagai orang ti ditemu nyual dadah di Malaysia. Taja pia, sekeda orang ti bejualka dadah tu enda takutka ukum tu laban ngasaika diri empu landik ngelarika diri ari kena tangkap.

            Ba undang-undang, Malaysia udah bejalaika iya enggau terit sereta enda beampun-ampun ngagai sida ti ditemu salah. Akta Penagih Dadah 1983(Ngubat enggau Ngerai) enggau Akta Dadah Berbahaya 1952 endang deka ngukum orang ti ditemu salah enggau nyemetak. Nitihka pansik, dadah tu dibai belalai tama ke menua tu. Pemisit meresa ba palan penama menua udah dipejalai enggau manah baka ba sempadan menua, padang bilun enggau palan kapal sangkai. Tu mih ti nyadika chara ngambika dadah enda ulih tama ke menua tu. Semua dadah ti ulih dibai tama ke menua tu semina bulih pemendar ari ejen anti-narkotik enggau ejen anti-dadah menua tu empu. Semua dadah tu dikena berubat. Iya ke bukai nya dibai ngena chara belalai.

            Ukai semina nya aja, mayuh udah pekara digaga perintah ngambika kes gian dadah ulih dikurangka sereta ulih dikemaduka ba menua tu. Ba sekula, nembiak diajar lalu diberi penemu pasal pengerusak ketegal gian dadah. Sida iya deka diperesa ai kemi dikena nentuka enda ngambi dadah. Ba sekula mega bisi kelab PEMADAM dikena mantu nyeliahka nembiak kena rampit dadah.Enggau nya nembiak nangi sereta enda ngereja pengawa ti salah. Ba televisyen, kimpin endang dipejalai enda ngira musim. Tiap kali bisi iklan, endang bisi diselitka enggau iklan pengerusak ketegal dadah.

            Nya alai, perintah endang enda ngelakka pekara tu nyadi-senyadi. Dadah ukai semina ngeruga pikir nyadi enda betul tang ngenataika penanggul ti besai siti-siti ruang bilik, mensia mayuh enggau perintah menua.

DUNYA SEMPAMA(2.0)

Karang Sempama: 

“ Pandak mulut engkerasak, panjai mulut kitai”

            Linda baru ngawa nyadi kerani ba Kompeni Sempekat Maju nya. Sekumbang iya ngawa dia, kompeni nya maju semaju ari ke suba. Menija ba kompeni nya bisi ati deka ngasuh Linda mangku pengawa ti besai agi. Enggau nya, iya deka ditikika pangkat ti tinggi agi. Taja pia, semua pekara tu agi diperatika menija dalam dua tiga bulan agi.

           Enda semua orang ba kompeni nya gaga ati sereta rindu meda ulah Linda ti jampat endar deka ditikika orang pangkat. Dia bisi siku pekereja dia endang enda rindu sereta kepapas meda penyenang orang bukai. Surie tu indu ti udah lama gawa dia. Iya chemburu meda Linda deka ditikika pangkat. Surie lalu ngiga jalai dikena iya ngelabuhka Linda.

          Surie pan ngeripot ngagai menijar ba kompeni nya. Surie ngambi peluang laban menijar ba kompeni nya agi baru lalu enda nemu ulah iya. Menijar baru nya, Mr Rames baru gawa ba kompeni Sempekat Maju Baru dalam dua minggu ti udah. Iya lalu pechayaka ripot ari Surie nya tadi.

            Pagi siti, Mr Rames lalu ngangauka Linda ngagai opis iya. “Linda, aku enda nyangka nuan ngaga ulah bakatu. Duit kompeni kitai udah lenyau seribu. Orang ti nyaga duit tu iya nya nuan. Nuan patut nyaga sereta bekereja enggau naka iya pemanah ukai ngambi ulih,” ku Mr Rames. Linda enda bemunyi. Iya nemu semua tu jaku orang ti enggai meda penyenang iya. Bisi orang nemu nyadung jaku bula sampaika semua orang pechaya. Iya nemu Surie ngena lisin pekereja pemadu lama dia ngaga cherita bula.

            Enda nyangka digaga orang baka nya, Linda lalu mutus ati ngemaduka diri ba kompeni iya. Iya lalu mayar duit seribu nya taja ukai iya ngenchuri. Ba luar opis, Surie sempat mih nyindir iya ti benung bekemaska barang. Linda semampai enda bemunyi. Dalam ati iya, nadai guna enti bekereja ba tempat ti bisi ngembuan orang baka mulut pulut ati keladi. Orang ti benama Surie dikingatka iya sampai mati. Iya nemu Petara nemu malas sereta nimbang pengawa siku-siku. Orang ti manah sigi dibalas enggau pemanah.

          Empai lama udah nya, Linda bisi nerima surat kangau ari kompeni iya suba. Menijar kompeni nya minta iya gawa dia baru. Kompeni nya udah nasat ripot digaga nya enda betul. Orang ti nyadung pekara ti betul nya udah ditemu sida. Surie udah dibuai kereja. Pengawa Surie baka ai liur ti diludah enda ulih ditelan agi.Ngelamatu, Surie mih ti nyadung semua cherita bula. Surie udah dipindah gawa ngagai tempat bukai. Lebuh Linda nemu pekara nya, iya asai deka manjung. Nama jai iya suba udah nyadi manah baruh. Taja pia, iya udah mutus ati enda ngawa ba kompeni nya agi.

          Pemutus ati iya suba enda ulih diubah agi. Chukup mih nama iya udah manah ba kompeni nya. Iya ngasaika diri agi ensiban ati. Iya ngarapka orang ba kompeni nya ulih berubah bekau ari pekara ti udah nuntung iya. Sempat iya malas ngena surat ngagai menijar kompeni nya seruran nasat dulu pekara ti betul sereta anang jampat arapka jaku orang. Amai betul mih jaku sempama, “pandak mulut engkerasak, panjai mulut kitai.” Jaku kitai mensia sigi nemu nampung cherita bula sereta ngemanjaika iya agi. Anang jampat pechaya agi pekara ti enda betul. Bisi ga ati iya kasihka Surie. Iya arapka Surie ulih berubah nyadi manah. Kitai mensia bulih penulah enti ngaga cherita sengapa.

KARANG- Kes Belantak Ba Jalai Raya

Karang Belalauka Grafik

Tanya: Peratika gambar di baruh tu. Tulis siti karang kebuah kes belantak ba jalai raya suah nyadi.

Dunya Sempama- Karang belalauka Sempama

Karang Sempama- “Nesal dudi nadai reti”

             Ba rumah panjai Sungai Kudang, bisi siti ruang bilik ti diwan uchu enggau aki iya aja. Nama uchu iya iya Anchil. Anchil tu baru udah ngabiska pelajar pom lima ba sekula sekondari. Apai enggau indai Anchil udah nadai ketegal karam lebuh seduai pulai ari umai sida di Tempalai Midang. Tanah tu suba tanah pesaka ti diperimba aki iya. Sida serumah bala bela bisi tanah dia.

           Hari siti, Anchil bisi ati deka nyual tanah pesaka nya. Iya lalu ngelawa aki iya ti benung ngansah duku. “Aki, nama enda dijual tanah aki ba Tempalai Midang nyin. Nadai mih nya guna din. Enggi sida Duat udah dijual. Peda nyau kaya raja sida,” ku Anchil ngepunka randau enggau aki iya. Aki iya agi enda nyaut. Iya semina malik enda lama ngagai uchu. Perening iya nya nyelai ari ngelamatu. Anchil lalu nukik baru, “Aki, jual tanah nya. Enda aki tusah-tusah agi. Ngena duit nya ila mih tua beridup. Enda agi pengidup tua nyadi kair pantuk baka manuk belama iya”

          Aki iya lalu nyaut, “Uchu, tanah nya tanah pesaka. Enda ulih dijual sengapa. Peda nuan diatu, orang berebut ngiga tanah. Nama penyadi jemah ila, enti nadai tanah?”. Anchil lalu ngebuka diri. Iya nurun enggau sida Duat Nyabung. Aki iya lalu nurun deka mensiang kebun rian ba Tempalai Midang. Runding iya panjai. Seagi iya idup, seagi nya mih ngenanka tanah nya. Tanah tu mih pesaka ti pengambis iya berega ba aki Anchil.

         Pulai Anchil enggau Duat nyabung, peda sida serumah begelumu ba ruai iya. Peda aki iya enda kekebut bebenjur. Aki iya udah nadai. Iya nadai laban kena pantuk ular tedung ba Tempalai Midang. Sida serumah ngulit seminggu aja. Maya ngetas ulit, sida serumah bisi nyabung. Mayuh mega orang menua bukai datai nyabung. Siku ari orang ti enggau nyabung nya Tah Ah Hip. Iya endang orang kaya sereta mayuh udah meli tanah sida ba menua nya. Anchil lalu betemu enggau Tah Ah Hip laban deka nyual tanah ba Tempalai Midang. Udah runding setuju, tanah nya pan diempu Tah Ah Hip. Anchil gaga ati. Iya ngasaika diri udah kaya raja baka orang bukai. Dalam ati iya, iya siku orang ti benasit bendar laban bulih penyenang taja nadai kereja bebendar lalu nyemaka diri nemu rian tingkar.

           Ngena duit nya, Anchil majakka pengawa iya nyabung. Iya mega nyau nyadi pengirup sereta pengindu diatu. Duit tanah iya pan nyau majak mimit semimit. Taja pia, iya agi mih neruska pengawa nyabung nya. Sekali tu, iya seduai Duat nyabung ba rumah panjai di Kerangan Batu ti enda jauh ari pasar. Tu nyabung ti nadai pemendar sereta belalai.Anchil alah besai nyabung sekali tu. Sesen pan nadai mih iya duit agi. Enda memukai, benung meda manuk benung bebintis, dia dih polis datai. Mayuh orang kena tangkap nyentukka Anchil empu. Duat ulih ngerarika diri.

        Anchil diukum jil pengelama enam bulan. Iya chukup nesal ke pengawa diri tang asi udah nyadi bubur. Tanah udah ga dijual. Duit pan udah abis. Iya pan nyau dijil ketegal ditangkap nyabung. Nesal diatu nadai mih guna agi. Semua utai ti dikemisika Anchil ngelamatu udah nadai agi. Amai mih ku sempama, “nesal dudi nadai reti”. Ketegal ti enda bepikir panjai mih, Anchil nyau baka nya. Iya patut bepikir sereta nimbang siti-siti pengawa sebedau ngereja iya.


Dikarang ulih:

Grace Tugap (5A)

Tampung Ensera Atau Tanah - "PANSUT ARI LUBANG KEBUNG"

ENSERA PANSUT ARI LUBANG KEBUNG

            Ensepi diri ulih pansut ari lubang kebung, dia Pelanduk seduai Tekura lalu rindang dalam babas. Seduai enda ngaga tangga. Pelanduk ngiga buah buan. Tekura ngiga daun riang.
“Anang tua kiruh ngaga tangga. Peda pengurus nuan lama udah enda makai,”pia ku Pelanduk nganu Tekura.“Nya amat,” pia ku saut Tekura.
             Seduai lalu mupuk begiga buah, enda ibuhka jaku Badak ngasuh seduai ngaga tangga.
“Nadai mih penyadi mih kitai dikeduanka seduai nya,”ku Badak enggau bala jelu bukai. “Pelanduk seduai Tekura tu enda beban tangga. Nadai penyadi mih kitai dikeduan seduai nya,” ku iya.
“Enda pia,”ku Rusa. “Manah kitai ngiga akal bukai dikena mansutka diri ari lubang tu. Nadai penyadi kitai sebuat tak mati keberuran ngapa ditu, nganti seduai nya. Lagi asai seduai nya. Peruti enggau perut,” ku iya. “Oh! Enti munyi nya, manah kitai sebuat bepautka tanah ba tisi lubang kebung tu,” pia ku Badak. “Barang kitai lemi agi nya ngangkut tanah ngagai tengah-tengah lubang kebung.” Bala sida nyau mayuh lapar, laban atau tanah nadai agi ditemu sida dalam lubang kebung nya. Bala jelu lalu belabuh bepautka tanah nisi lubang kebung nya. Bala jelu ke mit ngeringak berangkutka tekang tanah.
            Lama agi tinggi agi ga tugung tanah ba tengah-tengah lubang kebung nya. Tugug tanah pan sama bela enggau mua lubang kebung, nya baru Badak ngasuk bala jelu ke mit agi pansut dulu. Enti jelu besai diasuh dulu tugung tanah nyau tau tumpur baru laban pemerat sida.
Sida lalu begigaka utai utai dempa dalam kampung semak nya. Bala jelu pan udah kenyang, sida lalu baum deka munuh Pelanduk seduai Tekura. Bala jelu balat bendar ringat laban Pelanduk seduai Tekura enda ngaga tangga.
            Badak lalu ngasuh bala jelu begigaka Pelanduk seduai Tekura. Barang jelu tau niki, lalu betilikka ari puchuk kayu. Sida bukai besidika bekau Pelanduk seduai Tekura sebelah babas dalam kampung nya.
          Lebuh munyi kerus bala jelu mansang semak, dia Pelanduk seduai Tekura lalu berunding. Seduai ngiga akal dikena ngidupka diri. Pelanduk lalu ngumpul kulit buah kundung. Iya nampal mata iya ngena kulit buah kundung. Iya lalu ngalika diri, ngaga diri tinduk ba baruh batang tebelian. Tekura lalu ngaitka diri ba unak semambu. Dia mih iya kating-kating betayun ba unak semambu. Bala jelu pan nyau datai semak. Sida lalu tepedaka Tekura kating-kating lekat ba unak semambu.
“Akai rai! Seninjik kita jampat datai. Enti enda pia, tentu aku mati,”ku Tekura. Tak enda mukai-mukai, lebuh aku narit rutan, kapir aku lalu dikait unak semambu,”ku iya.
Bala jelu lalu deka narit iya. “Anang munuh iya. Kasihka tudah Tekura lama kating-kating ba unak semambu,”pia ku Badak. Bala jelu lalu beguai-guai ngetas unak ke ngait kapir Tekura.
“Nyah! Idup mih nyawa baka tu,” pia ku Tekura.
           Lepas nya, bala jelu lalu ngiga Pelanduk. Enda jauh ari endur nya, alai ditemu sida iya. Bala jelu lalu meda Pelanduk tinggang batang tebelian. Bala jelu lalu deka ninggang iya enggau batang tebelian.
           “Anang munuh iya. Iya pan pedis kena tinggang batang nya,” ku Badak.
           “Akai apai! Akai indai! Naka mih pengasih kita nganti aku mai tangga. Enti laun datai, tentu aku mati kena tinggang batang tu,” ku Pelanduk. Bala jelu seruran deka munuh iya.
          “Oh! Anang munuh pelanduk,”pia ku Badak nagang bala jelu. “Kasihka iya. Iya ga pedis.”
Bala jelu lalu belabuh ngaringka batang tebelian. Laban batang nya berat, nya kelama, nya baru batang ulih garingka sida. Idup mih tudah Pelanduk. Iya lalu kechit-kechit, gagaka diri enda kena bunuh bala jelu.
          Diatu Pelanduk seduai Tekura lalu bepangan baru enggau bala jelu bukai. Bala jelu enda nemu diri diakal pemintar Pelanduk seduai Tekura.


Latih A
Terangka reti leka jaku di baruh tu. Udah nya ngaga ayat.

1.Rindang

2.Pengurus

3.Dikeduan

4.Keberuran

5.Tambun

6.Tugung

7.Kating-kating

8.Ngetas

9.Ngenung

10.Melut


Latih B
Saut tanya di baruh tu ngena ayat penuh.
1.Nama kebuah Pelanduk seduai Tekura enda ngaga tangga?

2.Nama kebuah bala jelu ringat ngagai Pelanduk?

3.Nama chara bala jelu mansutka diri ari lubang kebung?

4.Nama kebuah bala jelu begigaka Pelanduk seduai Tekura.

5.Nama akal dikena Tekura ngidupka diri?

6.Nama kebuah Badak nagang jelu bukai munuh Tekura?

7.Sapa ke pintar dalam ensera tu, beri kebuah nuan madah baka nya?

ENSERA ATAU TANAH

 ENSERA ATAU TANAH

         Lebuh Tekura udah labuh, dia Beruang lalu berengkah bepakaika buah sibau. Iya enda ibuhka bala jelu bukai mansa pun sibau. Bala jelu enda berani niki sibau. Sida takut ke Beruang. Sekeda semina makai buah sibau ke labuh dibuai Beruang.
         Nyadi lubang kebung ke alai Tekura labuh nya dalam. Iya enda ulih niki pulai ke atas. Dia mih iya kual-kual dalam lubang. Nyau kepuas iya bekerawis ke tanah, dia dih Tekura tetemuka kerimpak buah nyiur. Nyadi buah nyiur nya, iya ke labuh dibai terebai suba. Nya mengkang bisi isi. Nyadi tekura laban lama udah natka diri lapar, lalu makai buah nyiur nya. Dia mih iya kerup-kerup mangkil isi nyiur.
“Oh, idup nyawa. Nyin langit, tu tanah,” pia ku Tekura. Nyadi bala jelu nyau mayuh mansa endur nya. Sida alit ati meda Tekura tak diau dalam lubang kebung. Nyau kelama, dia Rusa pan mansa. “Oi sambi! Nama gaga nuan dia?”
“Es!Nuan pan deka mih diau ditu, enti nuan udah ensepi,” ku Tekura nyaut.
“Nama utai nya dih, sambi?” ku Rusa.
“Tu mih utai ke dikumbai anak mensia atau tanah,” ku Tekura.
“Uji meri aku mimit?” ku Rusa.
“Au,mih,”pia ku Tekura sambil nikauka isi nyiur ngagai Rusa.
          Rusa lalu ngunyah isi nyiur. “ Amat nyamai mih atau tanah, enti asai tu,” pia ku Rusa.
Ensepi atau tanah tak nyamai, dia Rusa lalu enda kakang ati. Iya lalu terejun ke dalam lubang kebung. Dia mih iya begulai enggau Tekura ngali atau tanah. Puas dia, bisi ga Rusa tetemuka repik isi buah nyiur ke dikumbai Tekura atau tanah.
         Lama agi mayuh ga bala jelu betilikka Tekura seduai Rusa. Barang sida udah ensepi asai atau tanah diberi Tekura, lalu terejun ke dalam lubang kebung. Lama agi mayuh agi ga bala jelu tama lubang kebung nya. Pia mega, lama agi besai agi lubang kebung laban bala jelu ngiga atau tanah.
        Nyau ke lama laban endang enda mayuh, dia dih atau tanah nyau nadai temu bala jelu siga agi. Sida nyau berunding ngiga jalai pansut ari lubang kebung nya. Mayuh sida nguji niki tang enda ulih laban lubang kebung nyau dalam bendar. Bala jelu lalu berunding ngiga akal.
         Nyau kelama, dia Badak ke nyadi tuai sida lalu bejaku, “Enti kita ngatika diri tentu kitai enda ulih mansutka diri ari lubang kebung tu. Manah kitai bepangkat-pangkat atas pangan diri. Barang besai ari baruh. Barang mit ari atas,” pia ku iya. Bala jelu lalu gaga ati ninga jaku Badak.
“Nya baru kena,” pia ku Tekura.Sida lalu ngatur diri. Badak bediri dulu. Rusa lalu bediri di atas belakang Badak. Bala jelu bukai lalu bediri di atas pangan nitihka pemesai tubuh diri empu.
          Tekura seduai pelanduk laban seduai mit lalu nepan di atas belakang orang bukai. Lebuh seduai semak mua lubang kebung, dia seduai lalu engkechit keluar. Meda nya, Badak lalu bejaku. “Seduai niki dulu, tang anang enda ngaga tangga dikena kami bukai niki,” ku Badak.
“Au, barang iya mih,”saut Tekura seduai Pelanduk.
“Eh! Anang enda! Enti seduai enda ngaga tangga, nadai penyadi bala kami bukai lapar, nganti seduai datai baru,” ku Badak nangkan jaku iya ngagai Tekura enggau Pelanduk.
“Au!” pia ku saut Tekura seduai Pelanduk. “Lebuh tangga udah tembu gaga, nya baru kami dua datai ngulihka kita ari lubang tu,” ku seduai.
        Pelanduk seduai Tekura lalu mupuk tama ke babas ngejang lubang kebung. Siku melunchat, siku ringkap-ringkap, seduai ke bejalai dalam babas. Seduai baka ke nadai penemu tang balat bendar pemintar.


Latih A
Tukar ayat sebut ngagai ayat tusui

1.“ Amat nyamai mih atau tanah, enti asai tu,” pia ku Rusa.

2.“Seduai niki dulu, tang anang enda ngaga tangga dikena kami bukai niki,” ku Badak nangkan jaku iya ngagai Tekura enggau Pelanduk.

3.“Lebuh tangga udah tembu gaga, nya baru kami dua datai ngulihka kita ari lubang tu,” ku seduai.

Latih B
Saut tanya di baruh tu ngena ayat penuh.
1.Sapa ti niki pun sibau ke alai Tekura tepanggai?

2.Nama kebuah jelu bukai enda berani niki pun sibau nya?

3.Nama kebuah jelu bukai nitihka Tekura tama ngagai lubang kebung?

4.Nama akal dikena bala jelu mansutka diri ari lubang kebung?

5.Nama semaya Tekura seduai Pelanduk ngagai bala jelu bukai?


Latih C
Beri reti leka jaku di baruh tu.

1.Bekerawis

2.Ensepi

3.Ngejang

4.Pemesai