Karang Kedut (4.0)

Rambau Bujang enggau Dara

KARANG KEDUT: Tulis Karang kedut enda lebih ari 100 leka jaku.

            Pengerusak moral sida ke bujang dara suah nyadi buah mulut. Pekara ti bekaul enggau pengerusak moral tu bisi diayanka nengah surat kabar, internet enggau televisyen. Pekara tu enda ulih dilakka pia aja laban mai empas ti enda manah. Ari nya tadi, kitai patut nyidi sereta nyerungkai pengerusak moral tu tau nyau balat ngerekai ngagai sida ke bujang dara.

          Bujang dara ti enda tegap pengarap suah amat tepejuh ngaga pekara ti enda menuku. Sida tu enda diajar pasal pekara ti salah tauka enda. Nya alai, sida sepeneka ati ngaga pengawa ti enda manah baka gian dadah, nginsap gam enggau penyalah kriminal. Enti sida bisi diiri enggau pengarap, sida ke bujang dara ulih nimbang pekara ti manah enggau jai.  Apai indai patut mega disalahka ba pekara tu. Apai indai enda meri penyayau enggau pengasih ti chukup ngagai anak diri. Sida enda ibuhka anak diri laban kelalu kiruh bekereja. Anak ditejuka sepeneka ati meda televisyen. Televisyen tu bisi pengurang iya. Cherita ari menua luar deka ngasuh runding bujang dara tepuruk ngagai pekara ti enda manah. Anak nyau sepeneka ati meda televisyen nadai betagang sereta jampat agi nunda ulah ti bisi dipeda nya.

            Ukai semina nya aja, pengerusak bujang dara tu nyadi mega ketegal salah milih pangan serambau. Pangan serambau ti manah endang mai ngagai pemanah. Enti pangan serambau ti enda manah, sida deka mai ngagai pekara ti ngerusak moral baka ngenchuri, ngerumpak, enggau mayuh agi. Kadang-kadang sekeda bujang dara ngereja pengawa ti salah nya laban ti enggai alah laban pangan ti bukai. Mensia mayuh ti meda pengawa ti salah, arap terus nagang sereta ngerara ulah bujang dara ti enda menuku tu. Tang kediatu, mensia mayuh nyau enda ibuhka pekara tu. Nya mih ngasuh pengerusak moral bujang dara majak nyadi.

            Beduduk ari nya, sama besaup mih ngemanahka moral bujang enggau dara. Sida tu mih ti nyadi penganti orang tuai besai. Enti semua sama ulih begempung sama, dia pengerusak moral bujang dara tu ulih diputarka enggau jampat.                      

Entelah Iban 3.0

Entelah



(A)
Pasar endang sigi besai,
Tang enti dipeda rumah nadai,

Sungai siti endang alai nginti,
Tang enti diperati nadai ai,

Menua endang beberita jelai nama,
Tang enti ditilik nadai siku gegelik,

Menua:
Dibai sebelah babas,
Ngambika nemu kuing menua,

Bisi dijual ba kedai cina,
Enda kala dipelajarka nembiak sekula.


Ulu lungga :  sar dudi
Saut         :  kar bumi

(B)
Indai Sandai berubah besai
tubuh ngerembai,
Laban nyawa bagas makai,
Niap hari bisi orang dianti datai,

Ibu Sanu dikumbai orang kena palu,
Kebuah pia tubuh berupai ensembu,
Deka gerai enti timpuh nya udah badu,

Menua:
Menua antu menua petara
Menua kitai menua iya.

Ulu Lungga : Kayu Lunchung
Saut         : Indu Ngandung

KARANG LICHA/BEJAKU BA MUA MAYUH(1.0)

Karang Beformat: Bejaku Ba Mua Mayuh enggau Licha


Tip Karang:

1.Chara nulis karang bejaku ba mua mayuh enggau licha nyau deka sama. Taja pia, gaya enggau isi karang nya bisi bebida mimit.


2.Karang bejaku ba mua mayuh, suah agi diberi situasyen baka maya ngintu siti-siti pengerami. Nuan dipinta bejaku bepelasarka penerang ari situasyen ti diberi.


3.Suah agi tanya ngena situasyen ngambi bagi ba pekit bejaku ba mua mayuh.

4.Gaya nulis ti formal tang selitka jaku dalam, rambai jaku enggau jaku sempama ti dikena ngasuh peninga enda jampat leju lalu semampai deka ninga licha ti dikenataika maya nya.

FORMAT: Bejaku ba Mua Mayuh enggau Licha
1.Pemuka (1 paragraf)
- jaku pengelalu nitihka pangkat enggau hakim(enti bepekit)
- jaku pengelalu keterubah diberi ngagai tuai pengatur program(pengerusi majlis)
-madahka pasal diri ti bekaul enggau jaku/licha ti deka dikenataika
-madahka pengaga ati laban diberi peluang bejaku/ngenataika licha
-madah pengaga ati mega ngagai bala ti ulih datai lalu deka ningaka jaku/licha

2.Isi karang (5/6 isi)
- dibagi dua isi: Isi Pemuka enggau Kah Isi/Isi Pugu/Isi ke endar
Isi Pemuka/pelasar jaku pemuka
* meri penerang pasal topik- reti, kerembai topik
*dikena ngaitka/nyangkut Pugu isi@Isi karang

Isi Karang(5 isi)
-Tiap isi ditulis ba paragraf kediri.
-anang begulaika isi karang dalam siti paragraf
-kerembaika enggau manah isi karang-beri chunto, jaku dalam/jaku sempama/rambai jaku


3.Penutup Karang
- Ngeraup/ngukun semua penerang sereta meri penemu ti bebatang tauka jaku kenang.
-meri jaku terima kasih ngagai semua peninga
-minta ampun enti bisi jaku/licha ti dikenatai bisi nyima/ngasuh pedis ati


CHUNTO KARANG
Tanya Karang: Nuan baru udah ngulu licha pasal “Program Latih Ke Bansa(PLKN)”. Datai ba sekula, nuan ngenataika licha nya ngagai semua nembiak lebuh maya gempuru besai.

Tulis penuh licha nuan nya.

           Meri tabi basa lalu selamat pagi ngagai tuai pengatur program, iya ti dipebasa Prinsipal Mr Rajamanian Kumaresan, semua pengajar, raban pengawas, enggau bala nembiak ti bisi bela begempuru ditu. Nyadi aku berasai temegah ati laban diberi awak bejaku ditu. Pia mega, aku gaga ati mega laban kita deka ningaka pekara ti deka dikenataika aku lagi.

Bala peninga semua,
         Kena ujung minggu tu tadi, aku udah ngulu licha pasal Program Latih Ke Bansa. Dalam licha nya, aku diberi penerang pasal program nya. Nyadi ke pagi tu, aku deka ngenataika baru penerang nya ngagai kita semua. Ngarapka kita ulih mending sereta meretika pekara ti dikenataika tu lagi. Kebuah pia, kitai ti sama agi besekula tu endang deka nyereta program tu jemah ila.

           Nama Latih Ke bansa? Tanya tu suah bendar didinga ari orang ti bedau nemu pekara tu. Ukai semina kitai nembiak aja ti enda nemu, orang ti besai tuai pan bisi enda nemu utai ti disebut ‘Latih ke Bansa’. Program tu latih ti diterima nembiak lepas sekula pom lima. Program tu nyengkaum ngiri penemu soldadu enggau penemu taluk ke menua. Nya alai, perintah sigi ngarapka nembiak ti udah ngulu latih tu diadang bulih mayuh penemu ti beguna.

            Juluk ati lebuh perintah ngaga program tu iya nya ngambuh peranak Malaysia ti ngembuan pengangkun ke menua diri. Pengangkun tu nyadi lebuh kitai bisi pengingin sereta penyayau ngagai menua diri. PLKN tu dikena ngerak sereta deka ngetanka menua diri ari kena serang munsuh. Orang luar deka nyerang menua ti nadai penegap. Nya alai, menua kitai ngatur PLKN tu dikena ngenegapka agi menua sereta enda mudah kena serang. Kitai mega enggai agi dipegai orang luar. Enggau naka ulih mih kitai ngetanka menua merdeka tu kenyau 55 taun.

Bala peninga,
              PLKN tu diisi aktiviti sosial/masyarakat enggau pengangkun menua. Tentu bisi pengagit kitai deka enggau orang PLKN. Lebuh aktiviti masyarakat, kitai begulai ngaga siti-siti pengawa enggau orang tuai besai. Enggau chara tu, kitai ulih nelebaka diri begulai enggau orang bukai ukai semina sama umur sereta iya ti serebak. Kitai ti ngulu program tu belajarka pekara baru. Ambi ke banding, lebuh aktiviti ngechat rumah dia kitai bulih penemu baru ngechat. Pia mega aktiviti ke bukai. Kitai begulai enggau orang bukai sereta ngulihka penemu baka sempama nyelam sambil ngirup ai.

              Juluk perintah ba PLKN endang manah. Kitai sama nemu lepas SPM, nembiak sigi nadai pengawa kelimpah ti ngelimpangka diri bekereja sentara aja. Lebuh PLKN tu dipejalai, nembiak ulih ngisi maya tu enggau pekara ti chukup beguna tu. Tambah mega, sida ti udah kala enggau PLKN tu bisi diberi elaun RM300. Nitihka licha ti didinga maya nya, nembiak ti enggau PLKN deka bulih 2 set pekayan sereta pemakai endang disediaka perintah. Udah tu ila, majak kurang mih penanggul sosial nyadi baka lumba motosikal, kayo-kayo enggau bepakai utai ti enda menuku kelebih agi dadah.

              Maya licha nya mega, madahka apai indai patut nyukung program tu. Bisi sekeda apai indai irau ati anak sida iya ti nyereta PLKN. Sida enggaika anak diri nyadi soldadu baka ti nyadi ba menua bukai baka Singapura enggau Korea. Nya penemu ti salah. PLKN tu semina ngajar pasal kawad kaki, megai senyata sereta latih nimbak. Elemen tu semina 20% aja. Udah tu, padahka ngagai apai indai diri empu. Minta sida anang nagang anak diri nyereta PLKN tu.

              Perintah endang udah bebelanja besai lebuh ti ngatur program tu. Lebuh taun 2004 suba, nembiak ti kena bai nyereta PLKN tu manggai ngagai 7000 lebih. Ari nya, belanja iya sigi bejuta-juta. Diatu udah taun 2015, endang mayuh belanja dikena ari taun iya dipejalai. Ari nya tadi, jaku tangkan tu ngagai sida ti bisi peluang enggau PLKN tu enggau naka ulih ngulihka penemu sereta pengelandik maya nya ila. Enti ulih, anang baka ngelepas batuk ba tangga aja. Kaukka mih penemu enggau pengelandik maya nya.

           Ke pengujung iya, ngarapka penerang ti dikenataika tu nyentuk ba kita semua. Aku sekali agi minta ampun ari ujung kaki nyentukka punjung pala lebuh meri licha tu. Aku minta ngambi iya ti chiru lalu muai iya ti keruh. Ke simpul kenang ari aku, PLKN tu pekara ti manah ti digaga perintah lalu mai mayuh penguntung ngagai kitai semua. Nya aja ari aku. Terima kasih laban udah enggau lenak ninga licha tu.

Dikarang: Mathew Japing(5C)

Latih Meretika Teks (1.0)

Bacha enggau silik genteran teks tu. Udah nya saut semua tanya ti nangkanka nya.

“Chak, aram tua bemain bol enggau orang”ku Aging. “Nadai nya salah. Nganti aku tembu ngaga tanya Matematik tu,”saut Engtebang. “Aku nginjau bup nuan legi. Nadai nemu nyaut tanya dia. Tusah amai nya. Iya ga aku sigi ke buruk. Sigi jauh panggang ari api enti dibanding enggau nuan,” ku Aging madah ngagai Entebang. Enda lama udah nya, Entebang lalu nyikap diri nurun bemain bol ba padang.

            Malam nya agi tachuh sida sekaban becherita pengawa bemain bol lemai tadi. Enda memukai lalu datai pengajar Lamai. Sida sekaban lalu enda engkeretik baka api dipanjah ai. Semina Aging aja agi becherita laban iya melakangka pengajar Lamai.
“Aging! Umbas nya bejaku,” ku pengajar Lamai. Aging tekenyit lalu berumban ngiga bup iya. “Kita tu patut nemu belajar. Enda ibuh nganti pengajar bisi baru deka muka bup. Peresa SPM enda lama agi. Tu mih peluang kita ngubah nasit diri. Semina pemujur ba pelajar sekula ulih ngangkatka pengidup kita,” pia ku pengajar Lamai. Nyau deka tiap malam iya meri jaku ajar.  Jaku ajar sekali tu lama agi selama. Sida dalam kelas sama bela bemunyi. Pengajar Lamai nyau baka apai sida. Indah apai sida di rumah nadai ngenyuah nya meri jaku. Kelebih agi apai Aging. Ukai semina pengirup, iya mega penyabung.
         
           Sekali tu ajar ari Pengajar Lamai masuk pending Aging. Ngelamatu, semina mansa aja. Masuk pending kanan pansut pending kiba. Kala iya ditangkap teruan belajar malam ketegal meda pekit belagu karaoke di pasar. Enda mih iya jera. Indai iya udah dua kali dikangau ke sekula ketegal pemuruk iya ngaduka latih ti diberi pengajar.
         
         “Tap!!”munyi mija ditempap. Aging tekenyit. Peda Entebang deka nyuaka iya bup Agi Idup Agi Senurut ngagai iya. “Enda manah bup tu, manah agi bup iya ti lama suba iya nya  Agi Idup Agi Ngelaban. Nya baru mayuh meri ulih ngeringka semangat.”ku Entebang muka randau. “Nya mih aku lalu enda abis-abis macha nya”timbal Aging. “Seagi bansa kitai begulai enggau ai bisa, endang nyamai agi bansa bukai ngempuk ngerenyuk bansa kita,” ku Aging mantaika penemu iya ngagai Entebang.
         
         “Nama nuan ngelama nya tegenung tadi?”tanya Entebang. “Nya mih. Enti nadai pengajar Lamai bebendar enda aku tu berubah,” ku Aging. “Diatu tua nya ba taun kepenudi kus nyadi pengajar. Ulih ga nganti penuduk pengajar Lamai. Enda ibuh orang luar nganti iya dia,” ku Aging nyambung randau iya. Entebang tekenung enda lama. “Ukai nya nadai pemandai kitai menua, tua tu kira benasit manah. Ingat nuan Ruland. Nyentukka diatu lalu bedau bulih gawa. Kenu ku iya empu, kuota udah penuh. Nya iya lalu bedau bulih kereja.” pia ku Engkebang. Aging besemaya dalam ati iya din, enti iya bisi penuduk tinggi, iya deka mantu bansa diri. Anang terus ngatika diri. Anang makai bansa diri. Iya deka matak bala ti di baruh ngambi sama niki ke atas sereta ngulurka tangga ngagai sida.

          Randau seduai ngetu tekala nya laban Aging nyaut talipaun apai iya. Apai iya madah duit belanja udah dipasukka ngagai akaun. Aging gaga meda apai iya meri duit taja pan bedau dipinta. Apai iya nyau berubah sekumbang Aging nyambung pelajar. Apai Aging mega nyau nemu nyimpan duit sereta bebendar melanja anak belajar. Iya mega seruran ngansak sida serumah bebendar nyengulaka anak. Ba runding iya, diatu kitai bansa ti jauh tinggal patut nyemekih bansa bukai ba pelajar sekula sama bela “ngerayap baka tuntung, nilat baka tekuyung lalu ujung-ujung iya ila ulih ngalahka remaung di bukit tinggi,”.

Tanya 1 ngagai 5
Ba siti-siti tanya empat iti pilih saut A, B, C enggau D. Pilih siti saut ti betul nitihka lebas tanya nya.

1 Nama kebuah Aging ngelawa Entebang?
A Deka madahka diri kurang pemandai ari Entebang.
B Minta iya nyikap diri nurun ke padang.
C Ngachau Entebang ti benung belajar.
D Mai bemain bol.

2 Siti ari di baruh tu ukai ulah jai ti kala digaga Aging?
A Rindu bemain bol
B Pansut ari kandang sekula nadai pemendar
C Enda ngaga kereja ti diberi pengajar
D Enda ninga jaku ajar ari pengajar Lamai


3 Nama semaya Aging kena iya mantu bansa diri?
A Ngidup ngatika diri
B Nyendiaka tangga kena orang niki
C Enda begunaka orang luar ba menua sida iya
D Besaup ngangkat bansa diri ti agi tinggal ari bansa bukai


4 Nama pengerusak ti bisi dipadah ketegal ngirup ai bisa dalam cherita nya?
A Ngasuh orang belaya
B Mayuh ngerua belanja
C Pengerai majak enda manah
D Anak enda mujur besekula


5 Nama reti tibak ““ngerayap baka tuntung, nilat baka tekuyung lalu ujung-ujung iya ila ulih ngalahka remaung di bukit tinggi,”?

A Belubah-lubah nitihka bansa bukai nyentukka ngagai tikas ti pemadu tinggi
B Begadai-gadai nyemekih bansa bukai ti endang udah tinggi penuduk
C Ngambi penuduk ti pemadu atas ngambika pengidup menyana agi
D Ngenang jelu ti lubah bejalai taja ulih ngalahka pejalai remaung.

Tanya 6 ngagai 10
Saut tanya di baruh tu ngena ayat penuh.

6 Nama pengurang enti pengidup kitai bansa baka sempama “agi idup agi senurut”?



7 Nama kebuah Aging tegenung ?



8 Ba penemu nuan, nama penyadi enti bisi orang ti udah bisi penuduk tinggi deka amai makai bansa diri?




9       Nama ajar manah ti ulih ari teks nya tadi?



10    Bakani tanggung pengawa apai indai kemaya hari ulih mantu pemujur anak ba pelajar sekula?

Karang Kedut (3.0)

Karang Kedut
Unit 1: Nembiak Mansang Menua Tebilang (Pom Lima)


Bacha enggau silik teks di baruh tu. Udah nya tulis siti karang kedut pasal penguntung nemuai sambil belajar. Pemanjai karang kedut nya enda lebih ari 100 leka jaku.[ 15 mark ]

        Program nemuai sambil belajar tu ukai program ti baru diatur sekula tang sigi udah lama ari suba. Program tu suah agi diatur maya ujung minggu tauka maya peremisi sekula. Diatu, Opis Menteri Pelajar udah meri pemendar program nemuai sambil belajar tu ulih dipejalaika maya hari besekula. Kebuah pia, program ke baka tu diasaika endang ulih mai mayuh penguntung ngagai nembiak sekula.

      Penemuai ngagai palan ti meri mayuh penerang tu sigi manah digaga. Chunto iya, enti nemuai ngagai Muzium, dia nembiak ulih macha penerang ti beguna ba tempat nya. Penerang ti diulih ngena chara baka tu deka lama agi keingatka nembiak. Aktiviti macha enggau meda nyengenda siti-siti pekara deka ngasuh nembiak ingat agi. Nembiak ti nyereta program nemuai sambil belajar tu deka bulih penemu sereta ngasaika pekara baru ti bedau kala nyadi ba pengidup sida. Ambika banding, pengawa niki Gunung Kinabalu. Enti ngelamatu nembiak semina ninga ari padah orang aja. Tang lebuh nemuai sambil belajar tu diatur, sida ngasai pekara nya ba sida empu.

        Nembiak ti dibai enggau nemuai endang enda muai peluang tu. Sida seruran gagit ati lebuh dibai nemuai. Ngena tu, pengajar ulih nyadika aktiviti ke baka tu siti pengawa ngajar enggau belajar. Program nemuai tu siti chara pengajar ngajar nembiak ba mata pelajar ti bisi kaul. Enti nemuai ngagai kilang sawit, dia pengajar ulih nerang enggau mudah pengawa nya lalu ukai semina bepanggai ba bup teks aja.

       Program nemuai sambil belajar tu nadai ditagang dipejalaika baik nya ba sekula primari enggau sekula sekondari. Program nemuai sambil belajar tu ulih mantu nembiak nyaut tanya peresa enggau mudah. Ba mata pelajar Bahasa Iban, enti ditanya pasal ripot nemuai sambil belajar, dia nembiak ulih nyaut iya enggau manah.

      Taja pan program nemuai sambil belajar tu mayuh mai penguntung, bisi mega iya mai empas ti enda manah. Pengelikun mesti diperatika enggau manah. Anang mega ketegal nya, program nemuai sambil belajar lalu enda nyadi digaga. Iya ke beguna bendar iya nya mesti bisi kerejasama antara nembiak, apai indai enggau pengajar. Enti bisi, program nemuai sambil belajar tu mai mayuh penguntung.

Entelah Iban 2.0

Entelah 2.0

(A)
Orang di nanga Beluh endang ditemu kurus,
Besai pala tang enda ulih meda,
Panjang bukang baka batang,

Orang di Bukit selidi sigi berani,
Bisi penemu mansutka api,
Tang mesti diirit sampaika bemunyi.

Menua:
Menua antu menua petara
Menua kitai menua iya


Ulu Lungga : Seperis Lundu
Saut iya   : Manchis kayu


(B) Bujang Rembai dua begulai,
    Bagas bejalai enti bepegai,
        Diikat rat tali panjai,

       Bujang Ringga seduai Uga,
       Buku dibuka seduai melengka,
       Diau diri tekala nya,

Menua:
Di kedai cina, dikerindu mayuh raban bansa
Dikena tiap hari sebarang maya.


Ulu Lungga : Bekut
Saut         : Kasut

Peresa Jaku Iban Pom Tiga (3.0)

PERESA POM TIGA

BAGI A

[ Taga Jam: 40 minit ]

[ 38 mark ]

1. Tulis siti ayat ngena leka jaku di baruh tu. Nuan tau meri penambah, nukar penambah sereta ngena leka jaku nya sempama tauka jaku nama tetap

(i)	dilunyu
(ii)	nyelepak
(iii)	penyuah
(iv)	ikak
(v)	tajam

2. Ayat di baruh tu bisi ngundan dua iti penyalah jalai jaku. Kemetulka lalu tulis baru ayat di baruh tu. Anang ngubah tukuh enggau reti asal ayat nya.

(i)	Aki tuai nya nganjung berurut kena muai angin dalam tuboh.
(ii)	Iya enggau pekit nya nyentukka ba tikas entara bansa lalu kala bulih lumur kesatu dalam taun tu tadi.
(iii)	Mua anak mit nya nyau bimbi laban udah dirara aki Udai ketegal bakajengkak ba ruai.
(iv)	Pun rian apak rumah sekula ti lama nya bisi dua sepemerap laki-laki.
(v)	Orang ti ngena gari tibak charik nya udah terima bantu seribu ringgit.

3. a) Kalihka ayat sebut ngagai ayat tusui.

(i)	“Kita patut ngenataika diri ditu pegila laban lusa program nyadi,”ku Dom madahka sida Landan sekelas.
(ii)	“Aku deka agi nemuai ba menua diri enti dibanding ngagai menua luar,” ku Senada madah ngagai Alin seduai Inda.
(iii)	“Baka ni chara nuan ulih nyaut tanya Matematik tu?”tanya Beluda ngagai Satap.

     b) Kalihka ayat tusui ngagai ayat sebut

(iv)	Aki Bantin nagang bala uchu iya bemain ba pendai laban ai ti udu deras.
(v)	Dilang ngajar anak iya semampai nyaga ulah diri enti begulai enggau orang bukai.
(vi)	Endu Jenia madahka Umang iya nya indai iya deka makai mee guring enggau ruti paun.

4. Tulis sempama ti engkeman dikena nipak penerang ba baruh tu.

(i)	Nyebut utai aja tang enda ulih ngereja
(ii)	Orang ke udah bedengah
(iii)	Manah dipeda maya agi biak aja

Bagi B

[ Taga Jam : 20 minit ]

[12 mark]

5. Bacha leka main di baruh tu. Udah nya, saut tanya ti nangkanka nya ngena ayat penuh.

Sa, dua, tiga, empat, lima, enam, tujuh!

Nya alai aku ke bediri kayau-kayau,

Tu minching selanjau ijau manuk banda,

Ukai laban aku bengat galak jegak lain baka,

Aku ga nunda adat lama kitai ke ari kelia menya,

Aku tu meri kita tabi, kedua, iya adat basa,

Meda kita ke betubuh mua pemayuh betunga mua,

Kitai ke datai ngena timpuh abis semaya,

Nya alai kitai ngintai ke mimpi tinduk lina,

Enggau nadai alai kitai ngintaika igau diau di menua,

Nyangka kita bisi kena sipat mimpi ringat,

Kena pansa mimpi bisa,

Lebuh kita ke nepan bas niki kerita,

Sepanjai jalai sebelah menua

Nyangka kita bisi labuh pimpin ke bemain ba jalai raya,

Nyangka kitai bisi raup ke ngelikup mansa mua

Enti iya udah dibiau aku enggau selanjau manuk banda tu.

Nadai apa agi ku Petara, gerai nyamai kita ku Raja Selampandai.

(i)	Nama kebuah ‘aku’ bediri kayau-kayau?
(ii)	Terangka reti leka jaku bengat?
(iii)	Nama tema leka main tu?
(iv)	Nama kereban pengangkut ti dikena sida tu ngabang?
(vi)	Cheritaka ngena jaku nuan empu leka main nya tadi.

Bagi C

[ Taga jam: 15 minit ]

[ 10 mark ]

6. Peratika penerang di baruh tu enggau silik. Belalauka penerang nya, tulis        pasal sungai ti  dikemataka Opis Rampa Menua.

Sungai ti dikemataka Opis Rampa Menua ari taun 2008 ngagai tahun 2010

Taun Kategori Sungai 2008     (penyampau) 2009 (penyampau) 2010 (penyampau) Beresi 76 70 65 Jelan kamah 60 64 65 Kamah 7 9 13 Kamah amat 0 0 0

Bagi D : Karang

[ Taga jam : 45 minit ]

[ 40 mark ]

7. Tulis karang pasal siti ari pekara di baruh tu. Pemanjai karang nya enda kurang ari 150 leka jaku.

(i)	Reta rama reta kitai
(ii)	Nuan dipinta nulis ripot pasal aktiviti sepemanjai taun ti diatur kelab nuan nya.
(iii)	Kemaya hari tu, nembiak sekula nadai pengelandik bekelimat. Terangka jalai dikena nanam pengerindu bekelimat tu.