Karang
Tanya:
Nembiak sekula enda ulih mai talipaun binching ke sekula. Pejuraika penemu nuan senentang pekara tu.
Talipaun binching tu siti ari pemansang ti sama diasai kitai kemaya hari tu. Enti suba, semina orang ti kaya sereta pemisi aja bisi ngembuan talipaun binching. Tang diatu, nyau ka tiap-tiap iku dalam siti ruang bilik bisi talipaun binching kediri. Nembiak sekula pan baka nya meh. Nyau deka serap sida tu bisi talipaun binching kediri empu. Taja pia, nembiak sekula enda dikemendar mai talipaun binching ke sekula. Kebuah pia, mayuh penanggul deka nyadi.
Siti ari penanggul iya nya nembiak enda tentu belajar. Kebuah pia, pengajar benung ngajar ba mua tang bala nembiak bemain talipaun. Tu ulih ngujungka nembiak enda ulih nerima belajar enggau manah. Pengawa ke baka tu ngujungka nembiak enda mujur dalam sekula. Nyadi semua tu pulaika pengerugi diri.
Kelimpah ari nya, talipaun tu ulih ngujung nembiak bukai mega enda ulih belajar. Talipaun ti bemunyi inggar tu ngachau ari ningaka ajar ari pengajar. Pekara ti diajar pengajar tentu enda nyentukka ngagai bala nembiak. Tu ngerugika bala nembiak. Ketegal talipun binching, nembiak sekula kurang nerima nyentuk isi pelajar.
Kebuah ti bukai nembiak enda ulih mai talipaun binching ke sekula laban mayuh pekara ti enda manah ketegal talipaun binching tu. Bisi sekeda nembiak bekenaka talipaun binching nyimpan gambar ti enda manah lalu nyadung iya ngagai orang bukai. Pengawa tu enda manah dikereja. Ia mega nyadika siti penanggul ba sekula.
Nya alai, amat patut meh perintah nagang nembiak sekula mai talipaun binching ke sekula. Enti amat nembiak deka betalipaun, sida ulih ngena talipaun opis sekula tauka talipaun rama. Pengawa ke nagang nembiak sekula mai talipaun binching ke sekula mayuh amat penguntung iya.
