Karang Kreatif

"Bebudi"

Hari maya nya tengah hari nampun. Matahari manchar terit. Ribut nadai bepuput. Daun kayu nadai engkebut. Jelu enggau burung ba temuda nya nadai engkeretik. Naka iya pengangat sehari nya. Siku ular sawa ke begenarau likau benung nyengkilung natka diri ba teluk bandir kayu upi. Sehari nya iya nadai berunding deka ngiga pemakai laban iya tak berasai ngelusu.

“Nyamai agi tinduk lebuh utai ngangat tu,” ku ati iya. Maya nya mega tudah tupai siku berasai angat bendar. Iya ngiga ayung puchuk kayu endur iya belalai. Seraya ti bejalai-jalai ngiga utai diempa. Iya bejalai bejimat-jimat sereta begadai-gadai laban takutka diri dipeda lalu disambar menaul. Iya tetemuka jumbuh utai. Ko ati iya lalu deka belindung dia. Iya lalu bejalai kejuk-kejuk sebelah nya. Tiki iya ari baruh sampai ke atas. Udah nya nurun baru ngiga endur belindung. Lebuh nya sawa ke tinduk nya ngasaika utai bisi ngerayap ba tubuh iya. Iya berasai geledi.

                “Nama utai ngachau aku tinduk?” ku iya bejaku kediri berandau nenggali. Mata iya agi pejam. Iya balat ngantuk.

                Jam nya tupai tekenyit bendar. Iya nguji merejuk tang tindikka pala sawa. Sawa pan tekenyit lalu nyambar kaki tupai.

                “Oh, oh…minta kasih ngagai nuan. Aku ukai deka ngachau nuan punggal, sawa. Aku bejalai ngiga pemakai, lalu tesingkangka nuan. Minta ampun, tulung lepaska aku, “ku tupai.

                “Nadai jalai. Nuan udah ngachau aku tinduk. Aku telan idup-idup mih nuan!” ku sawa lalu ke lalu nerekan deram-deram.

                “Minta kasih mih! Lepas ka aku! Ni nemu, dudi hari pegila lusa aku ulih nulung nuan, maya nuan dalam penusah,” ku tudah tupai nguji ngiga sebarang akal ngidupka diri.

                “Eee!...Nadai kala aku ninga utai ke mesai bulu mata baka nuan tau nulung aku. Ni jalai nuan ulih nulung aku, heh?” ku sawa. Iya lalu masung tubuh tudah tupai rat-rat. Tudah tupai nyau deka alit seput, deka  luput. Iya ga takut. Iya nyabak. Ai mata iya lalu labuh nelusur kuyu iya.

                Meda nya sawa bisi berasai sinu bebali ati. Iya lalu ngelekaka tudah tupai. “Enda ibuh mih, ukai tak ngasuh aku kenyang utai ke ngemit nuan tu. Semina ngiruh aku aja nuan nya. Nadai guna, rari nuan ari tu,” ku sawa.Tudah tupai nyau digenggam semenggat. Iya lalu jampat-jampat rari ninggalka endur nya.

                Nyau kedua minggu udah bekau penusah nya, tudah tupai pan lalu begiga baru neresa babas repa. Iya tekenyit ninga utai seguda. Iya lalu mansang semak ngagai munyi utai nya. Dia iya tekenyit tepedaka sawa ti besai suba tak udah mati daya, mati kira disintak tali panjuk anak mensia. Balat agi iya ngerijat makin rat agi ga panjuk nya nyintak iya. Dia mih iya nyau lembut tulang kepuas ke ngerijat deka ngelepaska diri. Iya nyau meliur. Dilah nyau kelur-kelur.

“Oh, nama pengawa nuan baka tu dih punggal sawa?Lama nuan udah kena sintak panjuk baka tu?” ku tupai.

“Lama. Kenyau ari tebererak tawas tadi. Tang lalu enda ulih ngelepaska diri. Diatu aku nyau lembut tulang. Uji lepaska aku tu apin anak mensia datai lagi,” ku iya minta tulung tupai.

“Eh, ni jalai aku tau nulung nuan dih? Nuan empu udah madahka aku ke ngemit tu nadai jalai nulung orang ke besai baka nuan nya,” ku tupai mulaika jaku sawa.

“Anang baka nya nuan punggal. Anang nuan enda ingatka pemanah ati aku ke udah ngelepaska nuan. Enti aki jai, udah aku telan nuan. Diatu tulung aku,” ku sawa.

Ninga munyi nya tupai nadai beleman lalu nulung. Dikerit iya tali panjuk datai ke putus. “Ah…idup mih nyawa tu. Oh , enti baka tu amat mih jaku nuan punggal. Ulih  mih nuan nulung aku. Minta ampun aku,” ku sawa.

“Nya mih, kitai anang kelalu tinggi jaku ensepi diri ke besai gamal. Anang ngumbai orang k emit nadai guna, “ ku tupai.

“Pia mih punggal. Kelanjur jaku aku. Minta ampun, lalu minta kasih. Anang lama ditu, rari tua!”

Penyakit Denggi

CHARA NYELIAHKA DIRI ARI KENA RAMPIT PENYAKIT DENGGI

CHUNTO KARANG

               Penyakit denggi tu siti ari penyakit ti dibai nyamuk Aedes. Kitai ulih kena penyakit tu ari pantang nyamuk tu. Ke diatu, bedau bisi ubat ti chukup semitan dikena orang ngelaban penyakit tu. Nya alai kitai patut nemu chara nyeliahka diri ari kena rampit penyakit denggi.

               Siti ari chara chara nyeliahka diri ari penyakit denggi iya nya mesti tinduk bekibung. Kebuah pia, nyamuk enda ulih nginsap darah kitai laban udah kena lindung kibung. Tambah mega, kitai ulih tinduk jenak ketegal nadai nyamuk.

               Chara ti bukai iya nya nyaga pemeresi rumah. Kandang rumah mesti beresi. Parit rumah mesti disapu ngambika ai enda betekat. Pia mega babas mesti ditebas. Tin-tin enggau tayar kerita ti enda dikena patut ditanam. Semua pekara tu mesti diaduka kitai ngambi rumah enda endur nyamuk besarang.

               Kelimpah ari nya, kitai mega ulih nyeliah diri ari penyakit Denggi ngena chara ‘fogging’. Ngena chara tu, tempat diau kitai deka disembur asap. Tu ulih ngurangka lalu mega munuh nyamuk. Nyamuk mega enda ulih betelu agi ba tempat ti udah defogging nya tadi. Nya alai fogging tu beguna bendar kena nyeliahka ari penyakit denggi.

               Pia mega, kitai patut nudung endur nyimpan ai. Kebuah pia, nyamuk Aedes endang betelu ba ai betekat baka ba ai tung. Enti endur nyimpan ait u dijaga manah lalu ditudung, nadai alai nyamuk tu betelu. Tu ngujungka nyamuk nadai ba kandang rumah. Ari tu tadi, kitai enda irau agi pasal penyakit Denggi.

               Ke pengujung iya, anang ngambi mudah pasal penyakit Denggi tu. Penyakit tu ending ulih nabanka nyawa enggau ngenyit. Belabuh diatu, sama-sama mih kitai nyaga diri ari penyakit Denggi tu. Semua pekara ti ngasuh penusah tu nyadi patut diperatika semua kitai. 

Jaku Sempama

Jaku Sempama

Bacha genteran ke dibaruh tu lalu peratika jaku sempama ke dichelak ngena urup chundung.

            Anggat baru ingat lalat lebuh indai iya nadai. Iya apin tentu nemu ulu ili jam nya. Semina utai ti dikingatka iya nya orang ke mayuh begelumu ba bilik sida enggau ba rumah sida. Ku orang, indai Anggat sakit laban kena pansa bulu babas. Mayuh dukun enggau manang nguji ngubat iya tang semua nya nadai mujur. Sida sebilik ending nadai nasit. Mayuh orang bukai enti bisi pedera renga, enti udah diperubatka sida lalu diau diri. Sekeda sida serumah benasit bendar laban ulih gerai, penyakit sida nya lesap baka ke muai empeleman.

            Pendiau sida Anggat sebilik udah tinggal indai iya timpang bendar. Tu ti ngujungka apai Anggat tekuing runding deka beganti baru. Anggat gagit bendar ati laban iya deka bisi indai tiri nganti indai bendar iya. Taja pia, iya mega irau laban suah bendar indai tiri semina deka nganta pengkalan aja, udah nya lalu berubah enda manah, kelebih agi enti iya udah bisi anak diri empu.

            Jangka Anggat endang amat. Lebuh indai tiri iya udah bisi anak ke diadaka iya empu, iya berubah. Iya semina manah enti apai Anggat bisi enggau sida. Enti apai Anggat nadai, indai tiri iya nyiping iya. Iya endang baka mayau landik ngelalaika tai diri. Mulut iya pulut tang ati iya keladi.

            Anggat enda bedulika nya. Ku ati iya “Petara bisi ngemata, antu bisi nemu”. Iya ngetupka ngeli lalu ngereja semua pengawa enggau bebendar. Pengawa enda tau dilengkaka enti apin tembu. Baka tekura, enggai enda tepantup di bandir.


Latih

Beri reti sempama nya tadi.

1. ingat lalat

2. nadai

3. pansa bulu babas

4. baka muai empeleman

5. beganti baru

6. indai tiri

7. nganta pengkalan aja

8. baka mayau landik ngelalaika tai

9. Mulut iya pulut ati iya keladi

10. ngetupka ngeli

11. tepantup di bandir

Kuasa Penambah -ka

Penambah -ka


Penambah -ka  di baruh tu nunjukka jaku asuh ti mudah.

Penambah -ka sama enggau imbuhan "-kan" ba tatabahasa Melayu.

Penambaha -ka mega dikena ba jaku penerang ti mudah.


Teladan:

1. Gima tetengukka buah maram.

2. Kenataika pesan aku ngagai iya.

3. Nembiak sekula patut selalu ngingatka jaku ajar pengajar.

4. Kami sekaban belangkauka daun pisang.

5. Anang ngerembaika berita enda menuku ngagai orang mayuh.



*** Penambah -ka nerangka utai ti kena kereja enti iya ditambah ngagai leka jaku ti bepun ari penambah be-,  
       te-, tauka -dipe

6. Anang bechabutka padi lebuh bejalai di umai.




*** Penambah -ka mega dikena ti meri reti 'ngena tauka beguna'
     


 7. Sida tinduk bepanggalka  lengan diri empu.

Pengaya Jaku

Baka jaku bansa bukai, kala mega leka jaku Iban bisi dikena enda betul.
Di baruh tu jalai ngena sekeda pasang ti suah salah kena lebuh bejaku tauka ngereja pengawa betulis

1. nginjau enggau nyali

    Akih nginjau kerita ari Langi.

   Langi enda kakang nyali kerita ngagai Akih.

  *** Enti kitai nginjau, kitai ngena utai orang.
         Enti kitai nyali, orang bukai ke ngena utai kitai.



2. rebah enggau labuh

   Sepun kayu rian rebah dipangka kabut.

   Sebedau pun rian nya rebah, buah iya nyau baketepak labuh.


*** Enti kayu rebah, iya enda bediri agi, tang pun iya mengkang dia.
       leka jaku labuh nya melengka ari atas ke baruh.


3. Ulih enggau bulih

    Padi ulih sida Linda taun tu bisi empat igi tibang.

    Sida bulih amat padi, nya alai  sida tau enda bumai dalam kandang dua tiga taun ti deka datai.



Sekeda ari pasang leka jaku ti bukai iya nya:

a) kembai enggau kerembai


b) kira enggau kira-kira 


c) tiap enggau tiap-tiap

d) puang enggau muang

Jaku ti bekait enggau hari

1. Hari nyadi

2. Hari puang

3. Beselat hari

4. Pulai hari

5. Betampung hari

6. Bejarit hari

7. Genap hari

8. Ninting hari

9. Tengah hari muda

10. Tengah hari dalam

11. Mata hari tengan niki

12. Ngalih hari

13. Mata hari pambar

14. Mata hari padam

15. Hari nyau petang

16. Muai hari

17. Kudi hari

18. Nadai hari

19. Hari nyau tinggi

20. Letak hari

Jalai Jaku

JAKU NAMA

- Jaku Nama nya leka jaku ti dikena nyebut nama orang, nama jelu, nama tempat enggau nama utai bukai.

1. Jaku Nama Rama

   - Jaku nama rama iya nya leka jaku ti dikena nyebut nama sebarang utai nyengkaum mensia, jelu, tempat enggau nama utai bukai

Chunto: sekula, bup, kedai, polis, baju, angin

2. Jaku Nama Tetap

  - Jaku nama tetap nya jaku ti dikena nentuka nama ti semina siti aja tauka sebaka nama ba jaku nama rama. Jaku nama tetap mesti ditulis ngena urup besai ba urup ti keterubah.

Chunto: Modenas, Malaysia, Anggat Ngumbang

JAKU GANTI NAMA

-        Jaku Ganti Nama nya jaku ti dikena nganti leka jaku nama

1. Jaku Ganti Nama Orang

- bagi ngagai 4:

a)     Jaku Ganti Nama Orang Kesatu

-dikena nganti nama orang ke bejaku (aku, kami, kitai)

b) Jaku Ganti Nama Orang Kedua

-dikena nganti nama orang ti enggau kitai berandau (nuan, dek, seduai, kita, kua)

c) Jaku Ganti Nama Orang Ketiga

-dikena nganti nama orang ti dikenang lebuh dua iku orang berandau (iya, sida)

d)Jaku Ganti Nama Orang Pengempu

-dikena nganti nama orang ke ngempu (engku, engkami, engkita)

2. Jaku Ganti Nama Penunjuk

-        Jaku tu dikena nganti nama utai tauka pekara ti ditunjuk

(tu, nya, nyin)

JAKU ADJEKTIF

-dikena nerangka gaya jaku nama

Chunto: mirah, gaga, pait, pandai, baru, deras

-jaku adjektif mega bisi ngundan penguat ( pemadu, amat, begerenyam, amat, udu )

Chunto: pemadu pandai, udu lubah,

JAKU TUMBUH

-semua urat jaku ti udah nerima penambah disebut jaku tumbuh

Chunto:

Urat Jaku                    Penambah                   Jaku Tumbuh

Ajar                             ng                                ngajar

                                    Peng                            pengajar

Kereja                         be                                bekereja

JAKU ADAP

-Jaku ti dikena nyebut tunga utai tauka adap.

Chunto: ulu, ili, atas, baruh, kiba, antara, tisi

JAKU PENGAWA

-Jaku pengawa nerangka kereja ti digaga mensia tauka utai bukai. Iya dibagi ngagai 2 bengkah:

1. Jaku Pengawa Transitif

-bisi penyambut tauka objek dikena nembuka reti ayat ti ngena iya

Chunto:

i. Sindung benung macha bup.

ii. Polis benung bejalaika pengawa iya.

2. Jaku Pengawa Intransitif

-nadai penyambut tauka objek ba ujung ayat.

Chunto:

i. Jang udah mandi.

ii. Mayau nya benung tinduk.

AYAT TANYA

-Ayat ke dikena kitai nanya tauka ngulihka penerang

-Ayat Penerang tau nyadi ayat Tanya enti iya dikelai enggau tanda Tanya (?)

-Leka jaku Tanya: sapa, lapa, nama, dini, kemaya, ni, kini, kati

AYAT PERINTAH

-Dikena lebuh kitai ngasuh, nagang, ngelalu tauka minta utai.

a)Ayat Asuh

chunto:

1. Alai nuan berapika kitai
2. Buai uras nya

b)Ayat Tagang

Chunto:

1. Anang Inggar.
2. Enda tau nginsap ditu

c)Ayat Pengelalu

chunto:

1. Lalu meh.

2. Aram meh kitai kin.

d) Ayat Peminta

chunto:

1. Aku minta nuan anang guai pulai.
2. Lagi nuan madah ngagai iya.

JAKU TURU

-leka jaku ti ngundan dua tauka lebih leka jaku

-Iya mai reti siti pekara tauka utai

i.jaku turu nama

chunto: ai ujan, bup teks.

ii. jaku turu sempama

chunto: liat ati, landik jari

iii. jaku turu banding

chunto: baka nya, baka nyin

JAKU BETANDU

-Jaku ti disebut 2 kali dikena nunjukka reti ti bebida-bida ba ayat.

-Jaku betandu dikena ba jaku nama, jaku pengawa enggau jaku adjektif

i. Jaku Betandu Penuh

-semua urat jaku ditulis tauka disebut beulang-ulang nadai berubah

Chunto(jaku nama)nunjukka pemayuh: mija-mija, kerita-kerita, pinsil-pinsil,

Chunto(jaku pengawa)nunjukka kereja nya benung digaga tauka suah dikereja: uji-uji, peda-peda, sapu-sapu

Chunto(jaku adjektif)nunjukka penguat reti iya: besai-besai, manah-manah, bajik-bajik

ii. Jaku Betandu Bepenambah

Jaku betandu bepenambah ba jaku pengawa nunujukka pengawa nya dikereja bebalas-balas, suah tauka lama.

Chunto: betelai-telai, betundi-tundi, begusung-gusung.

Jaku betandu bepenambah ba jaku adjektif nunjukka reti majak tauka betambah. Iya mega ngena urup penambah se… ba tengah.

Chunto: manah-semanah,dalam-sedalam, rindu-serindu.

iii. Jaku Betandu Puntang

Jaku betandu puntang sama reti enggau jaku betandu penuh. Iya semina bebida ari sepil laban sepil enggau sebut iya dipuntangka

Chunto: manah-manah = memanah, garing-garing= gegaring, manis-manis=memanis