Thursday, May 13, 2010

KES BEBADI DI JALAI ALUN(CHUNTO KARANG)

              Nyau deka tiap-tiap hari kitai suah berita pasal kes bebadi ba jalai alun. Kes bebadi tu majak nyadi sehari ke sehari. Penusah tu mayuh nabanka nyawa. Pia mega iya pulaika pengerugi ngagai orang ti kena tinggang penusah tu.

             Kes bebadi ba jalai alun tu nyadi laban mayuh ketegal iya. Siti ari ketegal kes tu nyadi iya nya orang ti bekenaka jalai alun nya empu. Siti ari iya nya deriba suah bendar ngelanggar atur jalai alun. Sida ke deriba tu enda nitihka lampu trafik. Ambi ke chunto, lebuh maya lampu mirah, sida ke enda mereti enda irauka lampu nya. Tu tau ngujungka kerita tau belantak. Perangai enggau ulah deriba ti enda manah balat bendar tau ngujungka penusah bebadi. Bisi mega deriba mai kerita kelalu laju. Enti mai kerita kelalu laju ba tempat ti enda sepatut iya mega ngujungka penusah tau nyadi. Bisi sekeda orang ke nadai lessen berani mai kerita ensepi diri udah nemu mimit masang kerita. Orang nadai peneleba baka tu mudah amat deka bulih penusah.

            Kelimpah ari nya, ulah deriba ti enda ngirauka orang bukai mega ngasuh penusah ba jalai alun tu tau nyadi. Siti ari jaku tangkan ti enda dikirauka bala deriba iya nya betalipaun maya mai kerita tauka kereban pengangkut ti bukai ba jalai alun. Kebuah pia, enti lebuh betalipaun maya mai kerita dia deriba nya kurang beratika diri ke mai kerita. Nya alai, mayuh amat penyilap tau nyadi maya tu. Bisi sekeda bala deriba kempang ati ngelih kerita bukai di sengapa endur. Perangai ti baka tu mega tau bendar ngujungka penusah ba jalai alun. Nambahka nya, bisi mega orang enda beduli lalu nyangkaika kerita sida di sebarang endur. Tu ulih mega ngujungka penusah bebadi di jalai alun tau nyadi.
           
              Ukai semua kes bebadi ba jalai alun nya nyadi ketegal ari pengguna jalai alun aja. Siti ari kebuah ke bukai iya nya penyai jalai. Kemaya hari tu pemayuh mensia ti ngena kerita nyau betambah tang penyampat enggau pengawa beserurika jalai ke jai lubah bendar dikereja. Mayuh agi jalai alun ti udah digaga lalu dilakka pia aja. Nadai kereja seruri diaduka. Sekeda ari penyai jalai alun ti tau ngujungka bebadi nya baka, jalai belubang, sempit, bingkuk, lichin, bebatu kasar enggau ti bukai. Sida ke mai motosikal amat tusah lebuh nengah jalai ti belubang. Semua pekara nya tadi balat bendar tau ngujungka deriba mar bendar bejalaika kerita sida.

               Kelimpah ari nya, orang ti bekenaka kerita ti enda menyana mega tau ngujungka penusah. Ambi ke banding, bisi orang kempang ati bekenaka kerita ti tayar nadai bungai, lampu penanda udah jai, brek kerita udah jai enggau ti bukai.
           
              Penusah bebadi di jalai alun tu penanggul digaga mensia empu. Penanggul ti baka tu patut ulih diseliah enti semua orang ke mai kerita di jalai alun ngasika undang-undang jalai alun.