Leka Main Iban

Jaku Ngelar Ai Tuak

Tu ai sempuli padi mudah,
Ditanam Endu Dara Kelinah,
       Di tanah datar tarah,
Nyerumba penumbuh Bintang Tangkung Peredah,
Maya taun udah nampun nuntung di penyungah;
Iya dulu diketau Dara Bagau udu penyampau
      Menuhka langkau ngisi rumah,
Maya ingga kitai deka gawa ngintu rumah
     Tu kemari iya lalu dipi Dara Tinggi
Ngena pendi periuk tanah,
Diperesing Manang Iling,
Enggau pamping piring diperah,
Disimpan iya dalam pelawan tajau kelawah;
Tujuh hari udah nya,
Ensium bau tak bealu-alu udu pemanah-manah,
Dinga kurak tak perebensak,
Munyi umbak mangkaka silak awak Nanga Mukah.
"Enti baka tu udah mansau ai berau tua Lengau lebu majah,"
Pia ku Endu Teruna Dara Kelinah,
Bejaku enggau bini Bunsu Tuah,
Udah nya lalu dikauk seduai enggau cherebuk,
Disimpan dalam jebul balang mirah;
Nyadi ai nya bisi ditu lemai tu,
Ditunga kitai ke berintai duduk bekejengah;
Enti agi menya,
Ai tu teleba dikena Ngumbang seduai Balang
     Ngansah isau sanjau betatah timah,
Nya ke suah dikena seduai bedengah mudah rawai dua.
Tang ke lemai tu,
Ai tu semina dikena kitai
     Bebuti sambil bungah,
Awakka kitai tau sama
     Bela bulih mudah gerah
Nguan menua......

Kertas 2- Bahasa Iban (PMR)

Bagi A: Meretika Teks Prosa

Bacha enggau silik teks karang di baruh tu. Udah nya saut semua tanya ti nangkan nya ngena ayat penuh.

Kuntau: Main Asal Iban

 Kati nemu enda leka jaku ‘kuntau’? Nama ke dikumbai orang kuntau?Kuntau tu siti ari main asal kitai Iban. Kuntau tu siti ari pengelandik nyaga pengelikun tubuh diri ari serang orang ke jai. Ia mega siti chara ke manah nyaga pengerai tubuh enggau pemintar runding.

            Ke maya hari tu jarang kitai meda orang bekuntau. Enti bisi, iya dibantai maya bisi pengerami. Ba pengerami Gawai, orang suah diperindang enggau kuntau kelimpah ari main asal bukai baka ngajat. Endang timpang kuntau tu enti iya enda diserimbai enggau tabuh ti ngena perengka baka tawak, bebendai, engkerumung enggau gendang. Kebuah pia, tiun tabuh nya nyadika peransang orang ke bekuntau. Tu ngujungka orang ti bekuntau tau gagit agi ati ngerenekka bungai kuntau iya enggau naka pemanah-manah.

            Baka ni chara bekuntau tu? Sebedau belajar bekuntau, dia dulu nyediaka kelang tauka palan ti numbas iya pemesai. Kelang tu amat iya enda jauh ari rumah tang jarang digaga tekelalu ayan dipeda orang. Kebuah pia, maya belajar orang bukai ke ukai nembiak enda ulih meda.

            Kuntau Iban tu diajar siku pengajar ti digela Guru. Iya tu orang ti landik sereta ngembuan mayuh macham bungai kuntau. Apin berengkah belajar, dia bala nembiak guru nya tadi dulu berunsut ngena ubat ke dikumbai pelampas. Nyadi pelampas tu digaga ari buah nyiur puda ti diengkah dalam mangkuk lalu disampi. Kelimpah ari nya, tiap-tiap sida ke belajar kuntau mai buah limau sigi siku. Tu dikena nitik mata sida ngambika lansik lebuh belajar. Nyadi pengawa ke betitikka mata ngena ai limau tu dikereja tiap-tiap kali sida datai sebedau belajar dalam kandang tiga minggu.

            Nyadi pelajar keterubah diajar guru ngagai nembiak iya nya belajar nusun langkah enggau nanam kuda ti lebuh maya belaban tauka bebukut. Udah nya, baru sida diajar bunga kuntau ti bendar nitihka guru dalam kandang dua tauka tiga minggu. Sida mega diajar muai tumbuk, diajar nyilat enggau numbuk. Udah tembu penau nya diajar guru, sida lalu diajar lapis. Lapis tu iya nya jalai ngalahka silat tauka buai munsuh. Udah sida pandai ngelapis, dia guru lalu ngajar sida megai senyata baka keris enggau kayu.

            Enti sema guru udah puas ati meda pengelandik peranak iya bekuntau, dia iya ngatur pengawa ti dikumbai tamat. Dalam pengawa tu dia tiap-tiap iku sida mai manuk. Manuk tu tadi lalu disayat ba tengah kelang. Enti sema manuk ti disayat nya mati jauh ngejangka lubang ti digaga ba tengah kelang, reti nya orang ke bempu manuk nya enda mutus ati. Orang ti bempu manuk ti mati semak lubang nya, nya nunjukka iya mutus ati sereta berani.

            Nya sekeda ari pasal kuntau. Nembiak  diatu jarang bendar rindu bekuntau. Nemu nya nadai orang ngajar tauka nadai ati deka belajar bekuntau, ni ke betul? Taja pia, kitai bansa Iban patut ransing ati ngetanka main asal tu enggaika punas. Mayuh penguntung ari bekuntau tu. Kelimpah dikena merindang maya rami, tau bendar nyadi siti ari pekit lumba enggau main ba menua tu. Sama-sama mih kitai negapka main asal diri.

1.Sapa orang ti ngempu main asal ti dikumbai kuntau?

2. Nama kebuah orang ti bekuntau tu tau gagit ati lebuh ngerenekka bunga kuntau?

3. Nama ajar ti diberi guru keterubah iya lebuh belajar bekuntau?

4. Beri reti leka jaku nanam kuda.

5. Ba penemu nuan, nama kebuah main kuntau tu nyau majak punas?

BAGI B: KARANG BELALAU

Peratika Grafik di baruh tu enggau silik. Beri penerang nuan senentang enggau chara ngabiska peremisi sekula. Pemanjai karang nuan patut lebih ari 80 leka jaku

                       

BAGI C: KARANG

Tulis siti karang ari pekara di baruh tu. Pemanjai karang nuan nya patut lebih ari 200 leka jaku.

1.Nuan baru nerima surat ari pangan nuan ba sekula bukai. Iya minta nuan madahka chara-chara belajar ti manah.

Balas surat pangan nuan nya.

2.  Rayat di menua tu majak nemu pengerai amat beguna. Tulis karang pasal chara-chara idup bepengerai.

3.  Empai lama ti udah, menua nuan kena ampuh bah. Ceritaka penusah ti nyadi maya nya.

4. Tulis siti cherita belalauka sempama di baruh tu:

    “ Genggam bara api sampai nyadi arang”

Karang Kreatif

"Bebudi"

Hari maya nya tengah hari nampun. Matahari manchar terit. Ribut nadai bepuput. Daun kayu nadai engkebut. Jelu enggau burung ba temuda nya nadai engkeretik. Naka iya pengangat sehari nya. Siku ular sawa ke begenarau likau benung nyengkilung natka diri ba teluk bandir kayu upi. Sehari nya iya nadai berunding deka ngiga pemakai laban iya tak berasai ngelusu.

“Nyamai agi tinduk lebuh utai ngangat tu,” ku ati iya. Maya nya mega tudah tupai siku berasai angat bendar. Iya ngiga ayung puchuk kayu endur iya belalai. Seraya ti bejalai-jalai ngiga utai diempa. Iya bejalai bejimat-jimat sereta begadai-gadai laban takutka diri dipeda lalu disambar menaul. Iya tetemuka jumbuh utai. Ko ati iya lalu deka belindung dia. Iya lalu bejalai kejuk-kejuk sebelah nya. Tiki iya ari baruh sampai ke atas. Udah nya nurun baru ngiga endur belindung. Lebuh nya sawa ke tinduk nya ngasaika utai bisi ngerayap ba tubuh iya. Iya berasai geledi.

                “Nama utai ngachau aku tinduk?” ku iya bejaku kediri berandau nenggali. Mata iya agi pejam. Iya balat ngantuk.

                Jam nya tupai tekenyit bendar. Iya nguji merejuk tang tindikka pala sawa. Sawa pan tekenyit lalu nyambar kaki tupai.

                “Oh, oh…minta kasih ngagai nuan. Aku ukai deka ngachau nuan punggal, sawa. Aku bejalai ngiga pemakai, lalu tesingkangka nuan. Minta ampun, tulung lepaska aku, “ku tupai.

                “Nadai jalai. Nuan udah ngachau aku tinduk. Aku telan idup-idup mih nuan!” ku sawa lalu ke lalu nerekan deram-deram.

                “Minta kasih mih! Lepas ka aku! Ni nemu, dudi hari pegila lusa aku ulih nulung nuan, maya nuan dalam penusah,” ku tudah tupai nguji ngiga sebarang akal ngidupka diri.

                “Eee!...Nadai kala aku ninga utai ke mesai bulu mata baka nuan tau nulung aku. Ni jalai nuan ulih nulung aku, heh?” ku sawa. Iya lalu masung tubuh tudah tupai rat-rat. Tudah tupai nyau deka alit seput, deka  luput. Iya ga takut. Iya nyabak. Ai mata iya lalu labuh nelusur kuyu iya.

                Meda nya sawa bisi berasai sinu bebali ati. Iya lalu ngelekaka tudah tupai. “Enda ibuh mih, ukai tak ngasuh aku kenyang utai ke ngemit nuan tu. Semina ngiruh aku aja nuan nya. Nadai guna, rari nuan ari tu,” ku sawa.Tudah tupai nyau digenggam semenggat. Iya lalu jampat-jampat rari ninggalka endur nya.

                Nyau kedua minggu udah bekau penusah nya, tudah tupai pan lalu begiga baru neresa babas repa. Iya tekenyit ninga utai seguda. Iya lalu mansang semak ngagai munyi utai nya. Dia iya tekenyit tepedaka sawa ti besai suba tak udah mati daya, mati kira disintak tali panjuk anak mensia. Balat agi iya ngerijat makin rat agi ga panjuk nya nyintak iya. Dia mih iya nyau lembut tulang kepuas ke ngerijat deka ngelepaska diri. Iya nyau meliur. Dilah nyau kelur-kelur.

“Oh, nama pengawa nuan baka tu dih punggal sawa?Lama nuan udah kena sintak panjuk baka tu?” ku tupai.

“Lama. Kenyau ari tebererak tawas tadi. Tang lalu enda ulih ngelepaska diri. Diatu aku nyau lembut tulang. Uji lepaska aku tu apin anak mensia datai lagi,” ku iya minta tulung tupai.

“Eh, ni jalai aku tau nulung nuan dih? Nuan empu udah madahka aku ke ngemit tu nadai jalai nulung orang ke besai baka nuan nya,” ku tupai mulaika jaku sawa.

“Anang baka nya nuan punggal. Anang nuan enda ingatka pemanah ati aku ke udah ngelepaska nuan. Enti aki jai, udah aku telan nuan. Diatu tulung aku,” ku sawa.

Ninga munyi nya tupai nadai beleman lalu nulung. Dikerit iya tali panjuk datai ke putus. “Ah…idup mih nyawa tu. Oh , enti baka tu amat mih jaku nuan punggal. Ulih  mih nuan nulung aku. Minta ampun aku,” ku sawa.

“Nya mih, kitai anang kelalu tinggi jaku ensepi diri ke besai gamal. Anang ngumbai orang k emit nadai guna, “ ku tupai.

“Pia mih punggal. Kelanjur jaku aku. Minta ampun, lalu minta kasih. Anang lama ditu, rari tua!”

Penyakit Denggi

CHARA NYELIAHKA DIRI ARI KENA RAMPIT PENYAKIT DENGGI

CHUNTO KARANG

               Penyakit denggi tu siti ari penyakit ti dibai nyamuk Aedes. Kitai ulih kena penyakit tu ari pantang nyamuk tu. Ke diatu, bedau bisi ubat ti chukup semitan dikena orang ngelaban penyakit tu. Nya alai kitai patut nemu chara nyeliahka diri ari kena rampit penyakit denggi.

               Siti ari chara chara nyeliahka diri ari penyakit denggi iya nya mesti tinduk bekibung. Kebuah pia, nyamuk enda ulih nginsap darah kitai laban udah kena lindung kibung. Tambah mega, kitai ulih tinduk jenak ketegal nadai nyamuk.

               Chara ti bukai iya nya nyaga pemeresi rumah. Kandang rumah mesti beresi. Parit rumah mesti disapu ngambika ai enda betekat. Pia mega babas mesti ditebas. Tin-tin enggau tayar kerita ti enda dikena patut ditanam. Semua pekara tu mesti diaduka kitai ngambi rumah enda endur nyamuk besarang.

               Kelimpah ari nya, kitai mega ulih nyeliah diri ari penyakit Denggi ngena chara ‘fogging’. Ngena chara tu, tempat diau kitai deka disembur asap. Tu ulih ngurangka lalu mega munuh nyamuk. Nyamuk mega enda ulih betelu agi ba tempat ti udah defogging nya tadi. Nya alai fogging tu beguna bendar kena nyeliahka ari penyakit denggi.

               Pia mega, kitai patut nudung endur nyimpan ai. Kebuah pia, nyamuk Aedes endang betelu ba ai betekat baka ba ai tung. Enti endur nyimpan ait u dijaga manah lalu ditudung, nadai alai nyamuk tu betelu. Tu ngujungka nyamuk nadai ba kandang rumah. Ari tu tadi, kitai enda irau agi pasal penyakit Denggi.

               Ke pengujung iya, anang ngambi mudah pasal penyakit Denggi tu. Penyakit tu ending ulih nabanka nyawa enggau ngenyit. Belabuh diatu, sama-sama mih kitai nyaga diri ari penyakit Denggi tu. Semua pekara ti ngasuh penusah tu nyadi patut diperatika semua kitai. 

Jaku Sempama

Jaku Sempama

Bacha genteran ke dibaruh tu lalu peratika jaku sempama ke dichelak ngena urup chundung.

            Anggat baru ingat lalat lebuh indai iya nadai. Iya apin tentu nemu ulu ili jam nya. Semina utai ti dikingatka iya nya orang ke mayuh begelumu ba bilik sida enggau ba rumah sida. Ku orang, indai Anggat sakit laban kena pansa bulu babas. Mayuh dukun enggau manang nguji ngubat iya tang semua nya nadai mujur. Sida sebilik ending nadai nasit. Mayuh orang bukai enti bisi pedera renga, enti udah diperubatka sida lalu diau diri. Sekeda sida serumah benasit bendar laban ulih gerai, penyakit sida nya lesap baka ke muai empeleman.

            Pendiau sida Anggat sebilik udah tinggal indai iya timpang bendar. Tu ti ngujungka apai Anggat tekuing runding deka beganti baru. Anggat gagit bendar ati laban iya deka bisi indai tiri nganti indai bendar iya. Taja pia, iya mega irau laban suah bendar indai tiri semina deka nganta pengkalan aja, udah nya lalu berubah enda manah, kelebih agi enti iya udah bisi anak diri empu.

            Jangka Anggat endang amat. Lebuh indai tiri iya udah bisi anak ke diadaka iya empu, iya berubah. Iya semina manah enti apai Anggat bisi enggau sida. Enti apai Anggat nadai, indai tiri iya nyiping iya. Iya endang baka mayau landik ngelalaika tai diri. Mulut iya pulut tang ati iya keladi.

            Anggat enda bedulika nya. Ku ati iya “Petara bisi ngemata, antu bisi nemu”. Iya ngetupka ngeli lalu ngereja semua pengawa enggau bebendar. Pengawa enda tau dilengkaka enti apin tembu. Baka tekura, enggai enda tepantup di bandir.


Latih

Beri reti sempama nya tadi.

1. ingat lalat

2. nadai

3. pansa bulu babas

4. baka muai empeleman

5. beganti baru

6. indai tiri

7. nganta pengkalan aja

8. baka mayau landik ngelalaika tai

9. Mulut iya pulut ati iya keladi

10. ngetupka ngeli

11. tepantup di bandir

Kuasa Penambah -ka

Penambah -ka


Penambah -ka  di baruh tu nunjukka jaku asuh ti mudah.

Penambah -ka sama enggau imbuhan "-kan" ba tatabahasa Melayu.

Penambaha -ka mega dikena ba jaku penerang ti mudah.


Teladan:

1. Gima tetengukka buah maram.

2. Kenataika pesan aku ngagai iya.

3. Nembiak sekula patut selalu ngingatka jaku ajar pengajar.

4. Kami sekaban belangkauka daun pisang.

5. Anang ngerembaika berita enda menuku ngagai orang mayuh.



*** Penambah -ka nerangka utai ti kena kereja enti iya ditambah ngagai leka jaku ti bepun ari penambah be-,  
       te-, tauka -dipe

6. Anang bechabutka padi lebuh bejalai di umai.




*** Penambah -ka mega dikena ti meri reti 'ngena tauka beguna'
     


 7. Sida tinduk bepanggalka  lengan diri empu.

Pengaya Jaku

Baka jaku bansa bukai, kala mega leka jaku Iban bisi dikena enda betul.
Di baruh tu jalai ngena sekeda pasang ti suah salah kena lebuh bejaku tauka ngereja pengawa betulis

1. nginjau enggau nyali

    Akih nginjau kerita ari Langi.

   Langi enda kakang nyali kerita ngagai Akih.

  *** Enti kitai nginjau, kitai ngena utai orang.
         Enti kitai nyali, orang bukai ke ngena utai kitai.



2. rebah enggau labuh

   Sepun kayu rian rebah dipangka kabut.

   Sebedau pun rian nya rebah, buah iya nyau baketepak labuh.


*** Enti kayu rebah, iya enda bediri agi, tang pun iya mengkang dia.
       leka jaku labuh nya melengka ari atas ke baruh.


3. Ulih enggau bulih

    Padi ulih sida Linda taun tu bisi empat igi tibang.

    Sida bulih amat padi, nya alai  sida tau enda bumai dalam kandang dua tiga taun ti deka datai.



Sekeda ari pasang leka jaku ti bukai iya nya:

a) kembai enggau kerembai


b) kira enggau kira-kira 


c) tiap enggau tiap-tiap

d) puang enggau muang