Apai tuai Jana rindang beransah. Iya ngansah lungga penutus. Diansah iya tajam-tajam. Nya baru ngilir lungga nya ba batu linchin. Dikilir tajam-tajam. Diuji-uji ba bulu lengan iya empu. Bekeberai putus. Nyau nyilu asai tungkul ati beratika penajam lungga penutus. Jampat ketap kedap. Rentak-rentak dada, belematika lungga nya lagi dikena tukang tutus bedengahka kami lima.
Apai tuai Jana endang tukang tutus tebilang. Nyau ka semua bujang enggau nembiak rebak baru kami serumah udah nyepi penajam lungga penutus enggi iya. Jari iya mega chelap nutus orang.
“Bah, niki kitu! Sapa bagi dulu?” Tanya tukang. Agat?Enggai. Igat? Enggai. Arong? Enggai. Anchap?Pan Enggai. Sida semua takut sereta kakang ati.
“Aku dulu apai tuai. Lagi pan betutus mih,” aku mansutka diri ari ai. Chelap pemadu chelap. Tekap pending, empa penyelap. Digak-digak. Seruran begangga dagu. Aku lalu duduk empekang ba atas kah mereba, nunga tukang tutus. Nyerahka diri ngagai iya nunda pemeli buyah ti nabakka diri ngagai api. Tak pejam menchelak.
“Pejamka mata!” perintah tukang. Tekemil asai punggung asai ti digigit kesa. Gemerik.
“Udah! Alai berendam baru!”
Dibuka aku mata. Peda tak mirah chechirak belumur darah. Aku nabanka diri terejun ke ai. Hesssshhh! Nadai utai ngemedis nya. Meliar ai mata laban abi tutus nya bepedi laban ai. Sekejap bekau nya, baru naban diri baru niki ke tebing. Apai, ke nyadi pemantu tukang, lalu ngubat telih ngena ai entemut. Dilapik ngena daun sirih. Baru iya malut ngena kain ini.
Anchap nangkanka aku. Iya nadai penakal. Maya tukang ngurik, nyawa iya rauh-rauh madahka diri pedis. Madahka diri mati. Lalu nyabak duie-duie. Ulah iya, ngemba sida tiga ke apin. Lalu sida tiga nya tadi lalu ganjang-ganjang niki jalai pendai. Ke ngejungka sida tiga apin betutus rebak nya.
Dalam kandang seminggu nangkanka nya, enda disagi apai indai betanchut, enggaika abi tutus bedarah kena rindas tanchut. Enda disagi mandi enggaika abi muruk laban ai. Utai bebau baka belachan, budu, bubuk enggau utai bebau dipenti makai. Baka nya mega utai gatal baka bukau, utai miang baka tubu, enda tau diempa enggai abi laun suman.
Dalam tiga minggu, abi tutus udah suman. Ati berasai bisi pemuas. Sebengkah agi pengawa ti diungkup ke lelaki udah mujur dikereja. Besunat. Kelimpah ari penguntung bukai, besunat ngenuaika bulu. Besunat nanda pemerani.
(Diambi sereta dibali ari Dunya Aku, Janang Ensiring, 1995)
Tanya 1 ngagai 5
Ba siti-siti tanya empat iti pilih saut A, B, C enggau D. Pilih siti saut ti betul nitihka lebas tanya nya.
1 Nama pengawa sida lima iku ti deka ditutus maya apai tua Jana beransah?
A Berunding ngerarika diri ari kena tutus
B Beratika penajam lungga ari tebing ai
C Beasuh-asuh dulu laban enggai ditutus
D Berendam dalam ai
2 Baka ni asai penulis lebuh maya ditutus apai tuai Jana?
A Meliar ai mata
B Seruran bedangga dagu
C Tekemil asai punggung
D Rauh-rauh madahka diri pedis
3 Sapa ti enda nyadi betutus?
A Igat, Anchap enggau Arong
B Agat, Igat enggau Arong.
C Agat, penulis enggau Anchap
D Igat, penulis enggau Anchap
4 Pemakai ti dibaruh tu “utai gatal”?
A belachan
B tubu
C bukau
D bubu
5 Siti ari pekara di baruh tu ukai kebuah pengawa besunat tu beguna ba sida ke lelaki?
A Ngambi jampat bebini
B Ngasuh ngenuaika bulu
C Nanda pemerani diri
D Nyadi ke tanda pengawa orang lelaki ti udah mujur dikereja
Tanya 6 ngagai 10
Saut tanya di baruh tu ngena ayat penuh.
6 Nama kebuah apai tuai Jana ngansah lungga enggau naka iya penajam?
7 Nama kebuah apai tuai Jana ngasuh penulis mejamka mata?
8 Nama reti leka jaku ngurik ?
9 Rintai tiga penti udah besunat?
10 Ba penemu nuan, nama kebuah orang diatu jarang betutus ngena chara lama?
