Ninting taun kena 31 Ogos endang nyadi hari besai kenyau ari taun 1957. Berindik ari tu, kitai patut enggau naka ulih ngelabuhka pengerindu ngagai menua diri. Ukai nya senang menua tu ngikaska diri ari kuasa luar maya nya suba. Bansa Indonesia suba merinsa pengelama 350 taun ketegal dipegai orang menua luar. Menua kitai dipegai British dalam kandang 150 taun lalu mai tempias ngagai pengerapit kaul. Bisi nya nyau lesi bebadi ketegal ngetanka menua diri ari pegai kuasa luar. Kitai beterima kasih ngagai bala tuai dulu suba ti mai menua tu merdeka baka ke diatu. Enti nadai sida, kada menua kitai ulih merdeka baka ke diatu. Nya alai, begempung mih kitai nyaga buah merdeka tu. Sulu jaku, kediri kitai lemi, betubuh kitai kukuh sigi tau ngeringka semengat merdeka kemaya hari tu. Ngayanka diri rindu ngagai menua ukai semina ngantung menira maya Hari Merdeka. Ia mega ukai semina dipeda bebaris manah di padang. Pengerindu tu dipeda ari ulah kitai ti ngemeratka sereta kiruhka menua diri.
Ditu Pengerindu belabuh
Pengerindu tu mai reti bisi pengeransing ati. Iya mega tau dikumbai pengandal ati. Kitai patut bisi pengerindu ngagai menua diri. Kitai gaga ati laban udah diau ba menua tu. Enggau nya, ketegal ti ngembuan pengerindu, pengagit, sereta pengandal ati ke menua diri, kitai enggau naka ulih nyaga menua tu ari kena kachau ari orang menua luar. Ari nya, rayat patut ngelabuhka pengerindu ti enda bebelah bagi ngagai menua diri. Enti bisi pengerindu ti chukup dalam ba siku-siku rayat di menua tu, kuasa luar sigi enda ulih ngeruga sereta ngachau menua kitai. Iya nyadi kuta ti chukup tegap dikena napi serang ari luar.
Pengerindu, Pengandal sereta penyayau ngagai menua diri ukai semina ba mulut aja. Semua tu mesti dikereja lalu dibantai sereta diayanka ngagai orang bukai. Baka ni mantaika sereta ngayanka pengerindu tu? Arus pemansang kemaya hari tu nganyutka pengerindu ngagai menua diri? Semua tu bepanggai ba diri kitai empu magang. Kitai patut bisi penangi. Nangika menua kitai dipegai menua luar baru. Pekara tu deka nyadi enti rayat nyau belabuh nadai pengerindu ngagai menua diri. Kitai sama enda nemu pekara ti deka nyadi dudi hari. Ari nya sama-sama mih besedia baka sempama “sediaka payung sebedau ujan.”
Genap iku rayat tu patut ngembuan pengangkun ti chukup tinggi ngagai menua diri. Nitihka penemu Abd. Rahim Abd Rashid (2004) dalam Patriotisme:Agenda Pembinaan Bansa, madahka menua ti maju sereta mansang ulih napi ubah jeman ke-21 bepanggai ba pengering nasionalisme, demokrasi enggau pengawa ti dipejalaika ngambika ulih belematika reti merdeka. Nya alai, semengat patriotisme sereta angkunka menua diri chukup beguna dikena dikena ngenegapka menua tu. Ba taun 2014, Tema Hari Merdeka ke-57 iya nya ‘Malaysia: Ditu Pengerindu belabuh’ endang minta rayat sayauka menua diri sereta ngetanka iya ari menua luar. Orang ngembuan patriotisme iya nya orang ti ngembuan penyayau ti enda bebagi ngagai menua. Penyayau enggau pengerindu nentuka siti-siti menua nya terus maju sereta mansang bediri sama tinggi enggau menua bukai.
Jalai Ngelabuhka Pengerindu
Pengerindu ngagai menua kitai bepun ari ati. Ari ati din, baru iya ulih ditunda udi enggau ulah. Kitai ukai semina ulih nyebut “Aku Sayau ke Malaysia” nengah leka jaku aja, belagu enggau mandangka ulah ti rindu ke menua diri. Rayat patut taluk ke raja sereta pemesai ti megai menua. Tu mih sekeda jalai kitai mantaika pengangkun ngagai menua diri. Rayat ti temegah ke menua diri mega bebasa lambang menua baka menira enggau lagu besai menua nya. Semengat tu ukai semina bebasa ke pemesai enggau lambang menua aja. Rayat ti angkun sigi enggau naka ulih ngetanka menua diri ari serang munsuh tauka kuasa luar. Kuasa luar tu meri tempias ti enda manah ba pengerapit kaul enggau dunya politik ba menua tu. Tun Dr Mahathir Mohamad kala minta rayat ukai bumiputera sama bela ba raban pengelikun baka soldadu, polis enggau mayuh agi. Nya alai, rayat Malaysia bepegai ba ramba jaku “Menua Kitai Tanggung pengawa Kitai”.
Rayat Malaysia patut ngembuan semengat rindu begulai enggau sama diri. Reti nya, kitai ulih bekerejasama, sama ulih mantu pangan diri sereta ulih betulung enda ngira bansa, pengarap enggau penatai. 1Malaysia udah ditumbuh dikena nyerakupka semua bansa di menua tu. Kitai semua rayat 1Malaysia enda ngira Melayu, Cina, Iban tauka bansa bukai. Enti udah ngaku diri nyadi rayat 1Malaysia, nya baru ulih ngentapka pengangkun ngagai menua diri. Ulih begulai enggau mayuh pupu raban raban siti ari kebuah menua kitai tetap tegap sereta kebal ari kena kachau menua luar. Pengentap siti-siti menua sigi bepanggai ba pemansang enggau penyerakup raban bansa ti nguan menua nya.
Apai indai patut ngepun pengerindu ke menua diri. Apai indai patut nyeritaka pasal tuai-tuai ti dulu kelia ti ngelaban orang luar sereta mai buah merdeka baka kemaya hari tu. Lebuh becherita, apai indai madahka pemar orang tuai bulih merdeka ari kuasa luar. Apai indai mega patut nusui pasal penusah orang maya pegai orang luar. Ari nya tadi, anak ulih mandingka penyamai ke baka sehari tu enggau penusah maya jeman pegai orang luar menya. Tunku Abdul Rahman suba enda ngerendut dada aja meda menua kitai dipegai menua luar. Iya bemati-mati ngulihka merdeka baka ke diasaika kediatu. Semua pengawa ti digawa tuai-tuai menya endang ungkup kitai ke diatu. Beduduk ari iya, sumbuk pengerindu ngagai menua deka nyamai agi tumbuh ba anak mit. Betul mih jaku sempama, meleti buluh sigi ari tubu iya. Nya baru, pengerindu ke menua majak galak-segalak.
Patriotisme ari belabuh ati beguna agi ari patriotisme luar. Patriotisme luar baka nuatka menira, belagu patriotisme enggau begelumu maya merdeka tu semina mantai pengawa lalu sekeda nya enda datai ba lubuk ati din. Pengerindu ke menua sigi senyata ti chukup tajam dikena ngetanka menua ti merdeka. Pekara ti semampai nyau deka sama enggau merdeka iya nya begulai sereta nyerakup semua bansa. Sekeda tema hari merdeka iya nya besatu maju, nasionalisme teras penyerakup, seati sepenemu enggau mayuh agi. Enti nadai penyerakup, tentu menua enda likun baka ke diatu. Penyadi maya 13Mei suba mesti dikingatka kitai. Lebuh nya, rayat enda ulih begulai enggau bansa bukai. Mayuh pengerusak deka nyadi enti kitai nadai pengerindu ke menua diri. Berita perang di menua luar ulih nyadika teladan ti manah ngagai kitai.
Kitai ulih nunjukka pengerindu ti chukup dalam lebuh sama besaup nyaga pengelikun menua. Polis enggau Soldadu endang sigi orang ti dipadu nyaga pengelikun menua. Enda salah enti kitai mega sama ulih mantu pengawa tu. Tanggung pengawa nyaga pengelikun menua tu ukai semina bepanggai ba polis enggau soldadu aja. Ari nya, kitai patut ulih nyereta raban pengelikun ti mantu polis enggau soldadu. RELA enggau Soldadu Wataniah antara dua raban ti nyadi terabai pengelikun menua tu. Perintah mega enggau naka ulih nambahka raban RELA enggau Soldadu Wataniah. Nengah chara tu mega, kitai ulih ngetanka menua diri ari serang menua luar. Berita pasal Lahad Datu tau nyadi ajar ti manah. Baka ni enti menua kitai majak diserang? Sama mih berunding. Menua sigi begunaka rayat ti ngembuan pengandal sereta pengerindu ti enda bebelah bagi.
Pengerindu tau nyumbuk manah enti rayat nemu sejarah menua. Ari penerang tu, rayat nemu sereta meretika mayuh macham pekara ti nyadi lebuh numbuhka Malaysia. Penerang enggau penemu pasal sejarah tu ulih mantu rayat bisi penyayau, temegah ati ngagai menua diri. Kitai patut temegah ati nyadi rayat Malaysia. Enggau nya kitai ulih ngelabuhka pengerindu ngagai Malaysia. Nitihka Raja Ruslan Raja Samah (2005), “Patriotisme Belia Malaysia,” madahka elemen temegah ati ngagai menua diri siti ari elemen patriotisme. Ari nya, rayat ulih ngasaika pemerinsa sereta pengeran ati tuai kelia deka ngasuh menua tu merdeka. Enti rayat ke diatu ulih beterima kasih ngagai tuai keia ti ngulihka merdeka tu, dia sida enggau naka ulih ngetanka menua diri. Rayat ngembuan pemerani lebuh ngelaban munsuh lalu enda mudah nyerah.
Pengerindu ke menua ulih nyadi besai bendar reti enti rayat iya bedisiplin. Rayat ti bedisiplin iya nya rayat ti taluk ke menua, nitihka atur dipelajaika perintah sereta enda ngelanggar undang-undang. Rayat ti nerima sereta nitihka undang-undang amat beguna ngagai perintah. Enti rayat seruran nitihka undang-undang, nyamai bejalaika mayuh macham pemansang. Juluk Wawasan 2020 ulih nyadi nyata.
Kitai mesti bisi pengerindu enggau penyayau. Penyayau ke menua tu siti elemen ti bekaul rapat enggau pengerindu. Rayat lebih ngembuan penyayau enggau pengerindu ke menua ari ke sida sebilik. Tu mih siti ari pekara ti patut dikembuan rayat. Penyayau enggau pengerindu siti pekara dikena ngatur pemansang dudi hari. Ari penyayau mih kitai ulih begulai enggau orang bukai. Ari penyayau mih kitai ulih nerima pemesai ti megai menua tu. Pengerindu enggau penyayau ulih nyeliahka rayat ari ngereja pengawa ti enda menuku kelebih agi ngagai nembiak rebak baru. Pengawa baka ngerusak keresa rama, ngerumpak enggau mayuh pekara bukai ulih diseliahka laban rayat bisi penyayau enggau pengerindu.
Pemadu manah pengerindu ke menua tu patut dikerembai bepun ari sekula. Nembiak kemaya hari tu dipeda majak kurang pengangkun ngagai menua diri. Ba sekula mih alai ngiri pengerindu ngagai menua diri. Mayuh macham program maya bulan Merdeka diatur ba sekula. Sekeda nya baka Pekit Lagu Patriotisme, Ngias kelas, Nuatka menira ba kandang sekula enggau mayuh agi. Ari pengawa ke baka tu, pengerindu ke menua ulih diiri ngagai nembiak sekula. Pengajar endang seruran ngiring ngembing nembiak sekula taluk ke menua. Mata pelajar baka Pendidikan Sivik dan Kewarganegaraan endang mayuh skop pasal pengandal, pengerindu sereta pengangkun ngagai menua. Pia mega, pekara ti bisi bekaul enggau pengerindu ke menua bisi diajar nengah mata pelajar Pendidikan Moral. Nembiak sekula kemaya hari tu chukup beruntung laban belajarka semua pekara tu. Perintah ngasaika mayuh penanggul deka nyadi enti nembiak nyau kurang pengangkun, pengandal enggau pengerindu ngagai menua diri. Nembiak tu orang ti nganti orang tuai besai dudi hari ila. Sida tu mih reta ti pemadu beguna dudi hari ila.
Selamat Hari Merdeka. Ngarapka merdeka tu mai besai reti ngagai kitai semua. Seati sama penemu mih kitai ngetanka menua tu merdeka belama. Ukai siku, ukai seraban tang serap rayat Malaysia mesti begempung sereta beserakup ngetanka menua ti merdeka tu. Nengah jalai ke baka tu, baru menua kitai ulih merdeka datai ke ila-ila.
