Gaya Ngena Duit Belanja Ti Diberi Perintah
Tanya Karang: Tiap rayat di menua tu patut bisi tanggung pengawa diri lebuh bekena pemisi ti diberi perintah. Pejuraika penemu nuan senentang pekara nya?
Menua kitai benung dituntung penusah penatai pemisi kemaya hari tu. Mata duit menua kitai majak enda berega enti dibanding enggau mata duit menua bukai baka Brunei enggau Singapura. Taja pia, perintah seruran meri ungkup pemisi ngagai genap rayat iya. Mayuh empas ti enda manah deka nyadi enti kitai enda nemu ngena pemisi ti diberi nya. Gaya ngena pemisi ti diberi tu ulih mantu ekonomi ba menua tu pulaika manah baka selama.
Pemisi menua kitai endang chukup mayuh. Asil batang dunya tu endang tebal agi ari menua kitai. Bedau agi asil ari minyak enggau pengeraja asal ke bukai. Kitai patut temegah ati laban menua tu mayuh penatai pemisi. Enti ulih penatai pemisi menua tu patut dibagi enggau manah. Tiap ti nengeri patut diberi nitihka pengulih diri. Enti nengeri nya ngasilka minyak pemadu mayuh, beri mih ungkup ti ngelui agi ari nengeri bukai. Pia mega, bala pemesai enda patut masau tauka ngena pemisi tu ngagai pekara ti enda beguna. Enti ulih, mayuh agi belanja tu ungkup ngagai pelajar sekula. Kebuah pia, pemansang pelajar sekula pemadu beguna jemah ila. Gaya pemesai ngena belanja ke diatu patut diubah ngagai pengawa ke menyana agi. Masau duit dikena ngatur konsert enggau pengerami ti besai-besai sigi patut dipejalai tang enda merubuhka mayuh belanja ba pengawa nya.
Kebukai iya nya gaya bekenaka belanja ari opis-opis perintah. Tiap taun, endang bisi duit belanja ungkup opis-opis perintah. Ketuai ba opis perintah tu patut nemu ngena belanja nya. Bisi sekeda ketuai ba opis perintah lalu melanja duit nya dikena pekara ti enda tentu beguna. Ambika banding, nukar pekekas opis taja agi manah. Chunto iya, airkon lama diganti enggau airkon baru. Enti ulih, kena mih belanja tu ngagai pengawa ti beguna agi. Pengawa ti tau nambahka kualiti enggau produktiviti sigi patut nyadika iching perinching ketuai opis perintah.
Ba genturung bukai mega bisi pengelemi lebuh bekena belanja tu. Enti ba rumah panjai, tuai rumah patut bekenaka belanja enggau betul. Duit rumah panjai enti enda dipelanja enggau betul nadai mai penguntung. Bisi sekeda rumah panjai lebuh nerima duit tu lalu dibagi sekayu rumah laban ngasaika diri untung nemu beliung enda ngambuh, nemu peredah enda ningkuh. Tu ukai jalai ti betul ngena belanja. Duit tu patut dibagi ngagai genap komiti ti bisi ba rumah panjai nya. Enti bedau bisi komiti, nadai salah numbuhka komiti baka komiti main asal, komiti pelajar sekula, komiti indu enggau komiti lumba enggau main.
Ukai nya aja, tiap ruang bilik mega patut nemu ngena pemisi ti diberi perintah. Diatu, mayuh amat pemeri perintah ke ungkup rayat. Chunto iya, duit BRIM, duit bantu sekula, duit rayat seranta enggau mayuh agi. Taja pia, mayuh rayat enda nemu ngena pemisi ti diberi perintah tu. Enti ulih, kena mih duit nya enggau betul. Bisi sekeda udah bulih duit BRIM lalu mayuh kaban ngelangkau sereta enda ngira anak bini. Pengujung iya, duit ambis dikena ngena jalai ti enda betul. Duit ambis nadai temu tuju. Udah nya baru nesal laban udah masau pemisi ti diberi perintah tang nadai nguna baka sempama asi udah nyadi bubur.
Nembiak ti agi belajar mega patut nemu bekenaka pemisi ti diberi perintah. Duit biasiswa taja kurang diberi ngagai bansa Iban tang anang mih ngayahka iya enggau pekara ti enda betul. Udah ngulihka duit biasiswa, beli mih bup enggau kereban sekula ti bukai. Anang lalu terus meli talipaun binching ti berega beribu-ribu. Orang ti udah bekereja pan nyau alah laban nembiak sekula. Chukup beruntung mih nembiak kemaya hari tu. Nyau deka genap bantu diberi ngagai nembiak sekula. Nembiak sekula patut malas semua budi ti udah diberi ngagai sida. Anang malas iya ngena penyai. Diberi laptop tang bepeda utai kamah baka pornografi enggau cherita enda menuku. Tu ukai pekara ti patut. Laptop diberi ngambika ulih ngulihka penerang tambah ba internet.
Nya alai, ngiga mih jalai ti pemadu manah ngambika pemisi ti diberi perintah enda diayah pia aja. Semua patut nemu tanggung pengawa kediri empu lebuh bekenaka pemisi ti diberi perintah. Pemesai ti ditemu salah ngena pemisi menua enda patut nyadi di menua tu. Sida iya patut kasihka rayat ti idup merinsa. Pemesai ti kaya raya ketegal pengawa ti enda betul sigi bisi maya iya ila kena penulah diri. Indah baka sempama, landik pan tupai merejuk, sigi bisi maya iya labuh ke tanah.
