JELU NUBAI- Tusun Kedua
Sehari-hari nya bala jelu beribunka ikan. Kera nyau kerah-kerah gaga meda ikan mayuh ulih diri. Pelanduk laban tau nyelam bulih agi ikan ari jelu bukai. Perau sida sarat laban ikan.
Hari pan nyau lemai, dia Badak lalu mai sida mulaika diri. Lebuh datai di tebing, bala jelu lalu ngangkut ikakun ngagai langkau sida. Lebuh bala jelu datai ba langkau, sida nadai meda Rusa seduai Babi agi dia. Sida mega nemu salai ikan di atas para nyau abis nadai tinggal siku agi.
“Mua mih pengerugi kitai. Pegila kitai enda tau enda nurun nubai baru,” pia ku Badak.
Bala jelu, sekeda mela ikan ke lauk lemai nya, lalu sida bukai mupuk nyalai ikan. Enda lama udah nya Rusa seduai Babi lalu mansutka diri. Seduai ngelalaika diri dalam babas semak langkau sida. Bala jelu bukai enda ibuhka seduai. Sida ringat meda salai ikan nadai agi di atas para.
“Nama kebuah seduai ninggalka langkau kitai? Peda semua salai udah abis dichuri orang!” pia ku Badak nganu Rusa seduai Babi.
“Uji nuan Babi ngangauka semua jelu bukai ngasuh sida datai kitu, awakka sida ampit berita tu,” pia ku Badak nganu Rusa seduai Babi.
Babi lalu ngasuh semua jelu bukai ngasuh sida datai kia. Lebuh bala jelu udah sampal datai, dia Rusa seduai Babi madahka pasal Antu Raya ke datai ngagai langkau sida.
“Kami duai Babi amat takut ke Antu Raya. Bulu Antu Raya panjai ari bulu kami duai. Tubuh iya tinggi baka puchuk tapang. Mata iya mirah chinang-chinang. Pala iya bulih mesai tibang. Salai ikan abis diempa iya tinggal kami duai rari.”
“Enti tubuh Antu Raya amat ninggi puchuk tapang, awakka kami duai Nyumbuh ngibun langkau kitai pegila. Enti Antu Raya datai, kami duai lalu niki ngagai pala iya,”pia ku Kera.
Nyumbuh pan deka ga nurutka jaku Kera. Badak lalu ngasuh sida pulai ngagai langkau diri. Bala jelu, laban diatu nyau jauh malam tambah ga lelak, lalu nindukka diri. Badak lalu ngasuh sida tumu dani, awakka tumu ga nurun nubai baru.
(diambi sereta dibali ari Micheal Buma, Borneo Literature Bureau, 1970)
A. Saut tanya di baruh tu ngena ayat penuh.
1.Sapa kerah-kerah gagaka diri bulih ikan?
2.Sapa bulih agi ikan ari semua jelu bukai?
3.Nama kebuah Pelanduk bulih agi ikan?
4.Nama utai terubah ditemu bala jelu lebuh sida datai di langkau?
5. Nama kebuah jelu ringat?
6.Dini alai Rusa seduai Babi belalai?
7.Nama kebuah seduai belalai?
8.Sapa makai salai ikan bala jelu?
9.Kati Rusa seduai Babi berani ke Antu Raya?
10.Ni peninggi Antu Raya dipeda seduai?
11.Ni gamal mata Antu Raya ku Rusa seduai Babi?
12.Ni pemesai pala Antu Raya dipeda seduai?
13.Nama jaku Kera nyaut Rusa seduai Babi?
14.Sapa dibai Kera ngibun salai hari siti?
15.Kati Nyumbuh deka enggau Kera ngibun salai?
Giga leka jaku ti sama reti:
1.Sarat
2.Ampit
3.Ringat
4.Nubai
5.Ngibun
6.Tibang
7.Nurut
8. mela
