ENSERA NGINSAP DANAU
Nyadi diatu bala jelu tusah ati. Sida nyau nemu diri udah kena akal Pelanduk seduai Tekura. Sida ringat ngagai seduai, laban lebu nadai mai salai ikan pulai ngagai palan diri empu. Salai ikan abis dibai Pelanduk seduai Tekura.
“Pelanduk seduai Tekura tu patut kena bunuh. Seduai udah ngakal semua kitai,” pia ku Badak.
Semua bala jelu lalu ngamatka jaku Badak. Diatu sida ngiga akal dikena munuh Pelanduk seduai Tekura. Nyadi lebuh Tekura ninga jaku bala jelu bukai, iya lalu rari terejun ke dalam danau. Pelanduk lalu belalai ba perigu pun buluh. Dia iya engketut takutka bala jelu deka munuh iya.
Bala jelu lalu belabuh begigaka Pelanduk seduai Tekura. Lebuh sida datai semak perigu pun buluh ke alai iya belalai, dia Pelanduk lalu numbit pun buluh nya. Nyadi daun buluh, laban layu, lalu labuh sebelah tanah. Tanah ngelingi pun buluh nya luchak. Nya kebuah daun buluh ke labuh lalu bediri baka tukak.
“Anang kitai beguai ngampir. Peda tukak ditan Pelanduk,” pia ku Rusa.
Enda lama udah nya, Pelanduk lalu ngangau: “Mansang mih! Enti kita amat berani munuh aku,”ku iya.
“Enda kami munuh nuan. Enti nuan deka madahka alai Tekura belalai,” pia ku Rusa.
“Au mih,” pia ku Pelanduk. “Aram! Titihka aku.”
Bala jelu lalu nunda udi Pelanduk. Nyau kelama, nya baru bala sida datai ba danau, alai Tekura belalai.
“Diatu semua kitai bediri berintai-rintai ngelilingi tebing danau. Lebuh aku ngasuh, semua kita lalu belabuh nginsap ai danau tu. Lebuh ai udah langkang, nya baru Tekura ayan, lalu ulih bunuh kitai,” pia ku Badak.
Bala jelu lalu nginsap ai nya. Lama agi mimit agi ga ai tinggal dalam danau. Pelanduk ngeluluka diri enggau nginsap ai. Iya bediri semak Badak. Nyadi Badak, laban besai agi, mayuh agi ga ai diinsap iya. Burit Badak ditensang enggau libut enggaika ai pansut baru.
Danau pan nyau deka langkang, belakang Tekura pan ayan. Tudah Tekura belabuh tusah ati, meda bala jelu deka munuh iya.
Enda mukai-mukai, Pelanduk lalu engkechit. Iya tetumbitka libut dikena nensang burit Badak. Ai lalu pansut ngisi danau nya baru.
“Lapa nuan baka nya!” pia ku Badak.
“Eh, aku ga engkechit deka mantap Tekura. Tang enda mukai-mukai kaki aku kena kait randau lalu tetumbitka burit nuan,”pia ku Pelanduk.
“Anang ibuh ke nya. Insap baru ai tu ulih kitai. Gaga Tekura nya idup udah ngakal kitai,”pia ku bala jelu.
Bala jelu lalu berengkah baru nginsap ai danau nya. Pelanduk ngeluluka diri nginsap ai. Iya bediri semak Badak.
Enda lama udah nya, ai danau nyau langkang baru. Peda belakang Tekura lalu ayan baru.
“Bah! Tangkap Tekura nya ulih kitai,” pia ku Rusa.
Pelanduk lalu engkechit, kaki iya dikait randau baru kenu ku iya. Iya lalu tetumbitka libut tensang burit Badak. Nyah! Ai lalu tebubuh ari burit Badak. Danau lalu penuh baru. Tudah Tekura lalu enda ulih tangkap sida.
“Salah tu!Enti baka tu enda ai danau tu ulih insap kitai. Manah Menarat nya asuh nyelam Tekura. Iya betah agi nyelam ari kitai bukai,”pia ku Badak. Semu jelu bukai nurutka penemu Badak.
Menarat lalu terejun ke dalam danau. Iya nangkin ilang sebilah. Iya deka munuh Tekura.
Lebuh Menarat datai semak Tekura, dia dilah iya lalu kelur-kelur. Tekura nemu Menarat deka munuh iya. Iya lalu ngeluluka diri mati. Iya enda kebut-kebut. Menarat udah nyintak ilang iya. Enda ga iya berani lalu mantap Tekura. Iya nemu Tekura kebal. Iya semina ngamang aia. Amang Menarat sekali, enda ga iya berani mantap.
“Lalu Unggal, duduk,”ku Tekura.
Menarat laban endang agi ringat, enda bejaku manah nyaut Tekura. “Au, enda diasuh nuan lalu, pan lalu ga aku. Enda diasuh nuan duduk, duduk ga aku. Aku endang datai deka munuh nuan,” pia ku Menarat.
“Anang bangat beguai mih unggal,”pia ku Tekura nyaut. “Dulu makai pinang, nya baru tua bebunuh,” pia ku Tekura.
Menarat enda nyaut Tekura. Mata iya merening Tekura. Dilah iya kelur-kelur. Iya enggai makai pinang diberi Tekura. Tekura lalu ngerayap semak agi ngagai Menarat. “Nama kebuah tua bebunuh ngelaban diri sebilik, diri sekaban. Nama laya tua? Enti aku bisi penyalah, kita tau ngaduka iya. Ukai aku takutka nuan, tang enggaika tua bisi bebadi ngapa. Seput enda ulih ganti ngena tajau dua, tajau tiga. Enti nuan mati, sapa ngidupka bini anak nuan? Aku tu kebal, unggal,” pia ku Tekura, natuk kerubung diri, lalu ngujungka jaku iya enggau Menarat.
Latih A
1. Nama kebuah bala jelu tusah ati?
2. Nama penyadi sida ti nginsap ai danau nya?
3. Lapa Menarat enda berani mantap Tekura?
4.Nama ajar manah ari ensera nya tadi?
Latih B;
Beri reti leka jaku di baruh tu:
1.Langkang
2. tebubuh
3. nyintak
4. ngerayap
5. natuk
