Bacha enggau silik genteran teks tu. Udah nya saut semua tanya ti nangkanka nya.
“Kita aki! Tak enda nemu jaku. Aku udah madah enggai. Enggai mih! Enti merinsa ila, ukai kita. Aku!”
“Uchu...! Uchu...! Ketegal enda nyagi nuan merinsa mih kami uchu; berat-rat ngansak nuan besekula. Buji ba tubuh kami enggau tubuh apai nuan udah merinsa. Amat mih kitai kaya tanah raja leman buah, peda nuan. Nya ayam mata aja nya ila. Amat tanah kitai, ku kitai serumah, ku kitai semenua. Ukai nya bisi pala. Ila barang orang ke pintar mih ngaduka nya. Enti nuan bisi pelajar tinggi, pama mih bisi bai nuan ngaduka tanah buah kitai ba perintah. Tambah mega, diatu orang nentuka rega diri kitai bechuan ba ringkat pemandai ti diulih ari besekula. Tinggi agi pelajar kitai, besai agi rega kitai. Lalu senang agi nyapai penuduk ke ba tingkat pemadu atas maya sangkai lalu ngelimpas dunya 2020.”
“Uji badu churap-churap bejaku aki! Dek nadai mih bisi besekula berega mih dek ba mata ini. Deka mih ini jadi enggau dek! Idup mih seduai. Beberita kaya raja seduai. Ulih mih nupi sida apai semadi. Indah baka burung nadai mih ngembuan tibang, idup mih sida. Tu aku anak mensia. Enda patut enda ulih idup ba taun 2020 ila. Ni ulih nyadi tuan magang.”
“Saluwi..! Enti nuan udah enggai ninga aja kami. Enti beambis-ambis ati enggai besekula, anang mih ngaga aki nuan baka nya. Enti nuan udah mutus ati enggai besekula anang tak mayuh dalih. Enti deka badu, tak badu! Tang ingat ila, anang nuan nyalahka kami duai indai nuan; enggai nyengulaka nuan. Nya laban nuan deka ngemaduka diri.
***
Pengingat pasal ngemadu diri besekula enda mudah lenyau ari pengingat. Malam nya, penembu ngintu diri, Saluwi naka ulih berundingka chara muai penesal di dalam ati. Nesal badu besekula ti ngujungka iya sebaka enggau apai iya ti enda besekula. Agi bekuli. Isa apai agi ampit betangkalka getah. Agi buya berimba ba tanah perimba sida aki kelia. Diatu tusah mikir. Tanah nadai pala. Tanah semua nyadi tanah perintah.
Tanya 1 ngagai 5
Ba siti-siti tanya empat iti pilih saut A, B, C enggau D. Pilih siti saut ti betul nitihka lebas tanya nya.
1 Reti leka jaku dalam ayam mata nitihka teks iya nya
A semina tau meda aja ari jauh
B ulih meda aja tang enda ulih ngempu
C rindu meda aja taja ditagang
D belala meda utai ti bedau nyata diempu
2 Ba penemu aki Saluwi, baka ni chara nentuka rega mensia?
A Lama agi orang nya besekula deka tinggi agi rega iya
B Enti tikas pelajar iya tinggi, tinggi agi ga rega iya.
C Gaji orang ti besai nya orang ti besai rega.
D Orang ti mayuh reta tinggi agi rega iya.
3 Pilih siti pekara ti ukai kebuah aki ngansak Saluwi besekula?
A Ulih ngaduka tanah buah sida sebilik
B Awakka nyadi kaya raja
C Ngambika enda merinsa sebaka enggau iya
D Idup senang nuju taun 2020
4 Padahka penyadi Saluwi ti ngemaduka diri besekula?
A Semampai ringat laban ditagang sida sebilik
B Berasai sinu laban ngenang tanah sida udah diambi perintah
C Agi idup merinsa sereta agi sama sebaka enggau apai iya
D Meruan nyalahka sida sebilik kelebih agi apai enggau aki iya
5 Ni bagi sempama ti setipak enggau ulah sida sebilik ti meri jaku ajar tang enda ulih ngubah runding Saluwi?
A Nyiuhka ai ba daun keladi
B Tekura apin tepantup ba bandir
C Genggam bara api sampai nyadi arang
D Ngarapka bubu pesuk
Tanya 6 ngagai 11
Saut tanya di baruh tu ngena ayat penuh.
6 Nama penyadi tanah ti nadai pala nitihka padah aki Saluwi?
7 Sapa ti patut dipesalahka dalam cherita di atas?Beri kebuah nuan madah baka nya?
8 Padahka ajar ti manah ari cherita nya?
9 Ba penemu nuan, nama kebuah tanah ti diperimba aki ini patut ditan ari diambi orang bukai?
10 Enti nuan siku ari sida Saluwi sebilik, beri chara ti pemadu manah dikena nagang Saluwi ti deka badu besekula?
11 Nitihka penemu aki Saluwi, menua Malaysia begunaka orang ti bisi pemandai nuju taun 2020. Pelaba nuan, nama penyadi menua kitai enti juluk taun 2020 enda ulih japai?
