Saturday, July 25, 2015

ENSERA JELU NUBAI- Tusun Keenam

JELU NUBAI- Tusun Enam (Pulai Nubai)

           Rerak tawas pagi siti, dia Badak lalu ngelumuka semua jelu. Iya ngasuh sida nugungka salai ikan ba mua langkau.
“Bakani jalai kitai bedua ikan tu dih?” pia ku Kijang nanya Badak.
“Mit kelikit, besai kelikai. Mit tubuh mimit ga untung. Besai tubuh mayuh agi ga untung,” pia ku Badak.
          Bala jelu ke besai lantang ati. Sida ke mit enda tentu lantang ninga gaya pedua Badak. Sida enda berani bejaku. Pelanduk seduai Tekura laban ngasaika diri udah munuh Antu Raya, ngadang diri bulih untung dua. Tang seduai enda berani mantah Badak, semina tak tuchum malik ngagai pangan diri.
            Badak lalu bedua salai ikan. Bala jelu pan lalu ngambi untung diri. Sida nyimpan salai ikan dalam ma diri empu. Lebuh udah kemas, sida nurun ke pengkalan. Diatu bala jelu mupuk mulaika diri mudik Sungai Kara. Bisi sida diau di Emperan Aping. Sida bukai diau ba Bukit Aping, sama besemak dia.
           Sekumbang di rantau ai, dia bala jelu tinduk magang. Sida natka perau ditabanka ribut. Sida belayar, ukai bekayuh. Semina Pelanduk ngemudi, lalu Tekura ngeluanka perau sida. Seduai enda tinduk. Seduai lalu ngiga akal. Seduai ringat laban bala jelu ke besai ngakal seduai bedua salai ikan.
“Uji ambi tisik ikan, lalu tampal ba mata semua sida ke tinduk. Lebuh udah kemas, nuan lalu megauka sida. Padahka munsuh data deka ngalahka kitai,” pia ku Tekura.
Pelanduk lalu ngumpul tisik ikan. Lebuh sida semak nanga Sungai Batu, dia Pelanduk lalu megau bala jelu bukai.
            “Angkat! Dani! Munsuh ngalahka kitai” pia ku Pelanduk.
Bala jelu, laban jenak tinduk, tekenyit lalu ensugau angkat kin-kitu. Sida enda nemu tunga rari. Perau sida singit lalu nyau deka karam. Bala jelu terejun ke dalam ai. Sida nguji ngidupka diri. Mata sida enda meda laban udah ditampal Pelanduk enggau tisik ikan.
Pelanduk seduai Tekura mega sama terejun ke ai. Laban seduai betah nyelam, nya alai seduai enda lemas. Sekeda bala jelu bukai mati lemas. Barang sida tau nyemerai, mata sida ga enda meda utai. Nya mih ngasuh sida tasah lalu niki di tebing sebarang endur.
            Udah bala jelu bukai ditemu seduai tasah, dia Pelanduk seduai Tekura niki baru ngagai perau sida.
“Pagi tadi sida ngakal tua bedua salai. Diatu semua salai pulai ngagai tua magang,” ku Pelanduk nganu Tekura.
             Pelanduk seduai Tekura lalu mudik ngagai ulu Sungai Aping. Dia seduai lalu ninggalka perau. Seduai lalu pulai ngagai bala diri empu di Emperan Aping, gaga ati ngema salai ikan ulih nubai.

Saut tanya di baruh tu:

Latih A
1.Ni maya jelu bedua ikan?

2.Nama saut Badak enggau Kijang pasal jalai bedua salai ikan?

3.Nama kebuah Pelanduk seduai enda lantang ati?

4.Nama kebuah bala jelu terejun ke ai?


5.Nama reti “mit kelikit, besai kelikai” nitihka pedua Badak?

6.Kini ke tunga Pelanduk seduai Tekura mulaika diri?

7.Nama ajar ti manah ari ensera nya tadi?


Latih B.
Tukar ayat sebut ngagai ayat tusui.

1.“Bakani jalai kitai bedua ikan tu dih?”tanya Kijang ngagai Badak.


2.“Uji ambi tisik ikan lalu tampal ba mata semua sida ke tinduk,” pia ku Tekura mekat Pelanduk.

3.“Angkat! Dani! Munsuh ngalahka kitai” Pelanduk nyerauh ngagai semua jelu.


Latih C
Terangka reti leka jaku. Udah nya ngaga ayat ti gramatis.

1.Bedua

2.Ngadang


3.Belayar


4.Ngemudi


5. Singit

6.Terejun