Thursday, July 30, 2015

Nulis Karang - INTERNET (PENGURANG/PENGELEMI)

Karang

Unit: KOMUNIKASYEN GLOBAL(POM LIMA)

INTERNET KEMAYA HARI
Tanya: Kemaya hari tu, mensia mayuh beguna amat internet. Taja pia, internet tu bisi mai empas ti enda manah. Pejuraika pengurang/pengelemi internet tu.


        Diatu, enti kitai besebutka internet ngagai orang bukai, semua orang nemu pekara nya. Indah orang besemaka baka tu, “indah nembiak baru ada nemu utai ti dikumbai internet”. Internet tu ukai pekara ti baru. Guna internet ngagai pengidup mensia mayuh endang enda ulih disangkal agi. Bisi sekeda madahka diri enda ulih gawa ketegal ti nadai internet. Pekara tu endang bisi pengamat. Dunya kemaya hari tu, bepanggai ba internet. Taja pia, anang ga kitai madahka internet tu nadai pengurang. Internet tu bisi pengurang iya empu.

        Siti ari pengurang internet tu iya nya mensia mayuh nyamai ngulihka penerang ari internet. Lebuh tepeda gambar ti enda menuku baka pronografi tu, iya ulih ngeruga runding enggau pikir ngagai utai ti enda betul. Enti ngagai orang tuai besai, pekara tu enda tentu meri pengerusak laban ulih nimbang sereta nemu bepikir enggau manah. Enti ba nembiak sekula, utai ti enda menuku tu deka ngerusak runding enggau pikir sida iya. Lama laun, sida ngumbai utai tu enda salah. Ke pengujung iya, ulah enggau runding ketegal internet tu nyau limpang ngagai utai ti enda manah. Disiplin nembiak sekula pan majak enda manah bepun ari ulah meda utai ti enda menuku ba internet.

        Pengurang ke bukai internet tu iya nya mai empas ti enda manah ngagai penyerakup raban bansa.Blog tauka web ti sengaja meri penerang selebubu ngapa tau bendar ngasuh belaya. Penerang ti selebubu ngapa enggau enda amat tu laban enda ulih ditapis perintah tau ngujungka iya nyadi penerang ti betul. Penulis ti sengaja nulis utai ngapa tu disemaka baka sempama pandak mulut engkerasak panjai mulut kitai. Pengujung iya, perang mulut nyadi ba internet baka komen ti ngasuh belaya ba Facebook, Twitter enggau ba blog.Kemaya hari tu, mensia mayuh pechaya agi penerang ti ditulis ba internet enti dibanding penerang ari perintah. Nya mih biuh ti enda manah ari internet. Ngambika kitai nemu siti-siti pekara nya betul tauka enda, anang enda macha penerang ari internet tu. Udah nya, bandingka enggau penerang ti diberi perintah. Ari nya, kitai ulih mikir sereta ngaga pemutus kediri empu pekara ti endar.

        Kelimpah ari nya, orang ti bekenaka internet tu dikumbai enda nemu begulai enggau orang bukai. Tu enda bisi pengamat iya. Ambi ke banding, pulai ari sekula, lalu meda an Kaban mai bemain bol pan sida ti gian beinternet tu sigi enggai. Pengujung iya ila, kitai mensia enda nemu begulai enggau orang bukai. Kitai deka dikumbai orang bukai baka pendiau bunsu bubut. Kaul kitai enggai orang sepiak rumah nyadi jauh. Tu pekara ti patut dikenangi ka kitai semua. Mayuh penusah enti kitai enda nemu begulai enggau orang bukai. Kitai deka bisi penanggul lebuh kitai dituntung penusah. Ukai ga ngajika rangkang ngachuk mata tang kitai enda nemu utai ti deka nyadi dudi hari ila.

       Nangkanka tu, internet bisi pengurang iya ba dunya dagang. Pekara ti manah nyau nyadi enda manah. Kebuah pia, mayuh udah kes ngelakar lebuh pengawa dagang dipejalaika nengah internet. Orang ti bedagang amat nyau enda bulih bedagang nengah internet. Ambika banding, duit udah diberi tang barang lalu enda ga bisi tauka barang enda ngipakka gambar ti diayan ba internet. Ulah ti ngarap utai ngapa baka sempama ngarapka kijang dalam babas.Tu mih pekara ti ngasuh orang nyau jera bebeli barang nengah internet. Ke batang, pengawa dagang tu mih pemadu iya muntang. Enda ibuh ngelawa kedai, enda ibuh bebaris ba kaunter enggau enda kiruh minching barang pulai ke rumah. Nengah dagang ba internet barang datai ba pala tangga.

       Nambahka nya, pengurang bukai ba internet tu iya nya nambahka belanja siti-siti ruang bilik. Diatu nyau macham pekara begunaka internet. Enti suba kita semina muka Facebook. Tang diatu, mayuh agi baka Wechat, Whatassp enggau Telegram. Semua tu begunaka duit. Enti duit ngelamatu dikena bebayarka bil ai, letrik enggau Astro. Diatu ditambah enggau bil internet baka bil broadband. Tentu pekara tu mai penanggul ngagai sida ti kurang penatai pemisi. Ditambah enggau cas GST, bil nyau majak mar. Enggai enda pan laban udah ubah pemansang. Enti ulih, arapka perintah ulih meri internet enda bebayar ngagai orang ti kurang penatai pemisi. Enti sida ulih meri duit BRIM ngagai mensia mayuh, beri mih subsidi kena mayar bil internet.

       Nya alai, internet tu endang bisi pengurang iya. Ngarapka enggau pengurang tu, kitai sama bela bejimat bekenaka internet. Anang mega lalu ngelengka internet meda iya bisi pengurang enggau pengelemi. Kauk ke manah tang iyarka iya enda manah. Iya beguna bendar, kitai nemu manding pekara ti manah enggau iya ti enda manah. Guna mih internet ti mai pemanah.