Jelu Nubai- Tusun Kesatu
Nyadi sekali jelu Badak ngelumuka bala jelu bukai lalu mai sida baum nubai. Badak ngasuh bala kera betesau kin kitu madahka maya baum.
Hari diletak maya baum pan datai, bala jelu pan mupuk mega ayan sebelah tanah enggau puchuk kayu. Bala pan nyau sampal datai, dia Badak lalu madahka batang aum. Semua bala jelu bukai gaga bendar ati ninga penemu Badak ke nyadi tuai dalam aum nya. Badak ngeletak hari nurun nubai, lalu ngasuh sida begigaka tubai dulu. Pia mega, iya ngasuh sida sedia mai sadak, serampang enggau bekal dikena nubai.
Udah tembu aum, dia bala jelu lalu mulaika diri ngagai palan sida empu. Hari siti sida lalu ngemas diri. Sida mupuk ngiga tubai enggau pekekas bukai ti diguna diri empu. Sida ngundur Sungai Kara. Lebuh maya hari ke nubai, dia bala jelu lalu betugung ba tebing sungai, nganti penatai Badak. Nyau kelama, nya baru iya datai. Iya lalu ngasuh sida nutuk ai tubai. Badak lalu meri anak ikan ke antu rua, antu rangka, iya nya enselua.
Enda lama udah lepas nya, ikan pan mayuh dipeda mabuk tubai. Bala jelu lalu bekaukka ikan enggau sadak sida. Bisi sekeda numbuk ikan ngena serampang. Hari pan nyau lemai, ikan mayuh mega udah ulih sida. Badak lalu mai sida mulaika diri.
Datai di langkau, sida pan mela diri lalu makai. Ikan ke lebih empa, laban bengat mayuh, lalu disalai sida. Pagi siti, sida lalu nurun nubai baru. Sekalitu, Badak mai nubai ulu Sungai Puak.
Rusa seduai Babi ngibun langkau sida. Apin tentu lama udah nya, dia Babi seduai Rusa lalu ninga nyawa utai ngangau munyi tu:
Tum ketumba!
Indai Ragum nadai dia!
Nyau nubai Sungai Kara!
Bulih undang empa mata!
Ni asai salai, uchu?
Tum ketumba!
Indai Ragum nadai dia!
Iya ke tuai aku empa!
Iya ke biak aku ma!
Ni asai salai, uchu?
Rusa seduai Babi lalu takut. Seduai nyengau lalu meda Antu Raya. Pending iya mesai chapan. Mata iya mesai buah terung kanggan. Betis iya mesai putan. Ngeli mesai dekuan.
Rusa seduai Babi, laban kelalu takut, lalu rari. Tinggal seduai rari, dia Antu Raya lalu makai salai sida dataika abis.
(diambi sereta dibali ari Micheal Buma, Borneo Literature Bureau, 1970)
Latih
Saut tanya di baruh tu ngena ayat penuh.
1.Sapa ti nyadi tuai aum bala jelu ke deka nubai nya?
2.Sapa ti diasuh Badak nesau bala jelu?
3.Nama utai diasuh Badak giga bala jelu?
4.Nama utai ti patut disediaka bala jelu nitihka padah Badak?
5.Nama pekara ti digaga Badak sebedau iya ngasuh bala jelu ngumpul ikan?
6.Bakani bala jelu ngaga ikan teda empa?
7.Nama pengawa digaga bala jelu lebuh hari kedua?
8.Sapa ti nyaga salai hari ti keterubah?
9.Ni pemesai pending Antu Raya dipeda Rusa seduai Babi?
10.Nama pekara ti digaga Rusa seduai Babi lebuh meda Antu Raya?
Latih 2
Ngaga ayat ngena leka jaku ti diberi
1.Ngeletak
2.Ngundur
3.Ngibun
4.Nyengau
5. kelalu
